Ansa Long Wan Kwestin
◼ ?Olsem wanem yumi evriwan i save givhan blong mekem se yumi lanem plante samting long ol miting blong kongregesen? (Dut. 31:12)
Yumi evriwan yumi stap kasem ol tok we i askem yumi blong kam eli long ol miting, mo blong yumi rerem yumi blong Jeova i tijim yumi, from we yumi gat bigfala respek long hem mo ol miting we hem i stanemap. Taem yumi kam long ol miting, i gud we yumi go sidaon long ol jea long fored, mo yumi lego ol jea biaen blong olgeta we oli gat ol smol pikinini mo olgeta we oli kam let. Bifo we miting i stat, yumi mas mekem se mobaelfon blong yumi i no ring mo spolem ol man we oli stap lesin. Sipos evriwan we oli stap oli gat fasin we i soem ona long God long ful miting ya, bambae i no gat tumas noes mo samting we i blokem olgeta blong lesin.—Pri. 5:1; Fil. 2:4.
Taem ol niuwan oli stat blong kam long ol miting blong kongregesen, wan brata no sista we i save olgeta i save go sidaon wetem olgeta. Samting ya bambae i givhan bigwan long olgeta, speseli ol papa mama we oli mas trenem ol smol pikinini blong olgeta. Maet fasin blong kam long ol miting i wan niufala samting long ol famle ya. Sipos i olsem, ating bambae ol papa mama ya oli glad blong sidaon biaen long Haos Kingdom. Olsem nao, oli no spolem ol narafala sipos oli mas go afsaed blong smoltaem, blong lukluk long nid blong ol smol pikinini blong olgeta. (Prov. 22:6, 15) I nogud we ol papa mama mo ol pikinini blong olgeta oli sidaon long wan narafala rum long Haos Kingdom, nao ol pikinini oli harem se i oraet blong oli mekem noes. I moagud we ol papa mama oli tekem pikinini blong olgeta i go afsaed blong stretem hem, no blong lukluk long nid blong hem, mo biaen, oli tekem hem i kambak insaed.
Wok blong ol man blong welkam i blong mekem se ol samting i gohed insaed long Haos Kingdom long fasin we i stret long wan ples blong wosip. Oli halpem ol famle mo olgeta we oli kam let, blong oli faenem ples we i stret blong oli sidaon long hem. Taem ol man blong welkam oli halpem ol narafala blong faenem wan jea, oli mekem long fasin we i soem respek mo i kwaet, from we oli tingbaot ol narafala we oli stap lesin. Sipos wan samting i hapen we i blokem narafala blong i no lesin, ol man blong welkam oli stretem samting ya long waes fasin. Taem wan pikinini i mekem noes we i blokem narafala blong i no lesingud, ol man blong welkam oli save givhan long pikinini ya long kaen fasin.
Evriwan we oli stap long miting blong wosipim Jeova, oli save givhan blong mekem se olgeta evriwan oli lanem plante samting long saed blong Jeova, mo stamba tingting blong hem long saed blong niufala wol we bambae pis mo stret fasin nomo i stap long hem.—Hib. 10:24, 25.