Ansa Long Wan Kwestin
◼ ?Olsem wanem nao ol man blong welkam oli save givhan long ol papa mama blong halpem pikinini blong olgeta blong gat ol fasin we i stret oltaem long ol miting?
Ol pikinini oli bon wetem paoa blong muvmuf plante, oli no lan blong sidaon longtaem. Afta long wan miting, ol pikinini oli gat paoa we i pusum olgeta blong ronronem ol narafala pikinini long Haos Kingdom. Mo tu long ol narafala ples blong miting, ol ples we trak i stop, no long saed blong rod. Be proveb ya i talem i tru, se, ‘pikinini we oli no stretem hem, we oli letem hem i stap mekem hed blong hem, mo i stap folem tingting blong hem nomo, hem bambae i mekem papa mama blong hem, i sem bigwan.’—Prov. 29:15.
Sore tumas blong talem se sam long ol olfala brata mo sista oli kasem bigfala kil taem ol pikinini oli ron nao oli bangem olgeta i foldaon. Samting ya i mekem se ol olfala oli safa bigwan mo tu papa mama mo kongregesen oli mas spenem mane blong nating nomo. Blong protektem olgeta mo mekem se ol narafala oli sef, papa mama oli no mas letem ol pikinini i ronron mo pleplei insaed no afsaed long Haos Kingdom.
Ol papa mama oli gat responsabiliti ya we Baebol i tokbaot, blong trenem pikinini blong olgeta blong oli gat respek long ol ples blong wosip. (Pri. 5:1a) Long ol Kristin miting, ol asembli, ol man blong welkam oli gat wok blong “mekem olgeta samting long fasin we ol man oli laekem, mo long fasin we i stret nomo” mo “long gudfala oda.” (1 Korin 14:40 NW; Kolosi 2:5, NW) Oli mas lukaotgud oltaem, bifo mo long taem blong miting mo afta we miting i finis. Hemia long tugeta eria, insaed mo afsaed. Sipos wan pikinini i stap ronron no hem i stap stronghed, man blong givhan i save stopem pikinini ya long kaen fasin mo eksplenem long pikinini ya from wanem ol fasin olsem oli no stret. Long kaen fasin hem i mas talemaot problem ya long papa mama blong pikinini mo nid ya blong lukaotgud long pikinini. Papa mama ya oli mas mekem long wan stret fasin wanem we oli harem.
Yumi kasem save se ol smol bebi mo ol smol pikinini oli save krae no oli mekem noes samtaem long ol miting. Ol man blong welkam we oli kam 20 menet bifo we miting i stat, oli save livim ol jea biaen long rum blong ol papa mama we bambae oli wantem sidaon long ples ya wetem yangfala pikinini blong olgeta. Yumi save soem se yumi wok wanples wetem ol man blong welkam taem yumi livim ol jea ya i stap blong olgeta olsem.
Sipos wan pikinini i stap mekem noes, papa mama oli mas tekem sam aksin. Sipos papa mama i no mekem wan samting mo noes ya i mekem se ol man oli no save lesin gud, man blong welkam i mas askem long kaen fasin sipos papa mama oli save tekem pikinini blong olgeta i go afsaed. Taem yumi invaetem ol niuwan we oli gat pikinini long ol miting, yumi mas sidaon wetem olgeta mo rere blong givhan long pikinini blong olgeta sipos oli krae no oli mekem noes long ol narafala rod.
Hem i wan gudfala samting blong luk ol pikinini we oli gat defdefren yia oli stap long Haos Kingdom mo blong luk gudfala fasin blong olgeta insaed long haos blong God. (1 Tim. 3:15) Taem oli respektem rod ya we Jeova i stanemap blong wosip, samting ya i givim ona long hem, mo i mekem se evriwan long kongregesen oli glad long olgeta.