Leta Blong Hed Kampani

Yufala Ol Gudfala Witnes Blong Jehova:

!Plante samting oli stap hapen long taem blong yumi! !Mo yumi glad we yumi glad from! Mifala i harem gud tumas blong wok wetem yufala, ol gudfala brata mo sista, i olsem se ‘solda blong mifala i joen long solda blong yufala.’ Yumi stap witnes long saed blong Papa blong yumi, Jehova, long wan fasin we i bigwan moa i bitim ol narafala taem long histri blong wol.—Sef. 3:9, NW; Jon 14:12.

Yumi glad from wok we yumi mekem blong Jehova be samting ya i no min se yumi no kasem hadtaem. Long las seves yia, sam long yufala i kasem hadtaem from we graon i seksek, wota i ron bigwan, hariken i kilim ples blong yufala, no wan narafala disasta olsem i kasem yufala. (Mat. 24:7) Plante brata mo sista oli harem nogud evri dei from we oli sik mo oli olfala. Yumi evriwan yumi fesem ol samting ya we oli stap kam mowas, i olsem we “woman i stat harem we bak blong hem i soa blong i bonem pikinini.” (Mat. 24:8) Long sam kantri, olsem Amenia, Eritrea, mo Saot Koria, i gat plante brata we oli stap long kalabus from we oli holemstrong long bilif blong olgeta.—Mat. 24:9.

Nating se yumi kasem hadtaem from ol samting ya, ?wanem i givhan long yumi blong gat gudfala tingting? Stamba vas blong yia 2010 i mekem yumi tingbaot wan impoten trutok, we i se: ‘Lav i stanap strong tru long olgeta samting. Lav i no save lus samtaem.’ (1 Kor. 13:7, 8, NW) Yes, fasin ya blong lavem ol brata sista mo blong lavem Jehova, i givim paoa long yumi blong stanap strong longtaem.

Plante man we oli talem se oli Kristin, oli sapraes long wok blong prij we yumi mekem. Oli sapraes we yumi mekem wok ya long plante plante ples, mo wok ya i stap gohed oltaem nomo long wan fasin we i folem oda. Nating se samfala oli no agri long ol bilif mo ol tijing blong yumi be oli talem ol toktok olsem se: “!Yufala nao i stap mekem wok we mifala i mas mekem!” ?Wanem wan samting we i givhan long ol Witnes blong Jehova blong oli gohed blong mekem wok blong prij oltaem? Bakegen ansa blong kwestin ya, hemia lav. Olsem Papa blong yumi long heven, yumi no wantem se bambae wan man i lus. (2 Pita 3:9) Yumi wantem se olgeta man bambae oli tanem tingting blong olgeta from ol sin blong olgeta. Samting ya i klia taem yumi luk se, yumi kasem wan niufala namba blong 7,508,050 pablisa long las seves yia. I no gat wan narafala skul we ol man blong hem oli wok strong long gladhat blong olgeta nomo, blong givhan long ol narafala blong oli save moa long saed blong Baebol.

Ol samting ya we yumi stap luk oli leftemap tingting blong yumi bigwan, from we oli soemaot se profet tok we Aesea i talemaot i stap kamtru. Hem i talem se: “I gat taem i stap kam, we hil ya we haos blong [Jehova] i stap long hem, bambae i kam hae moa, i winim ol narafala hil. Mo ol man blong ol narafala kantri bambae oli save wokbaot blong kam long hem.” (Aes. 2:2-4) Long bigfala hip blong ol man ya we oli stap kam long haos blong Jehova, i gat 294,368 man we oli baptaes long las seves yia. Yumi glad tumas blong welkamem olgeta ya long famle blong yumi. Kristin fasin blong yumi blong lavem narafala i mekem se yumi mas givhan long olgeta ya blong oli agensem ol samting we enemi blong yumi, Setan, i mekem blong traem olgeta.—1 Pita 5:8, 9.

Namba blong olgeta we oli kam long Memoriol i bigwan moa i bitim ol yia bifo. Long Tusde, 30 Maj 2010, i gat 18,706,895 man oli kam long Memoriol. Samting ya i soemaot se i gat plante milian man yet we oli save joen wetem yumi blong mekem wosip long Jehova. !Yes, yumi glad se Jehova i no spolem rabis wol ya yet! Go kasem taem we wol ya i lus, lav blong yumi i givhan long yumi blong gohed blong stanap strong longtaem.—2 Tes. 3:5.

Long yia 2010, Distrik Asembli ya “!Stap Klosap Long Jehova Oltaem!” we i stap long olgeta ples long wol, i mekem se yumi fren gud moa wetem Papa blong yumi long heven, Jehova. Ol tok blong man we i raetem Sam, oli tru tumas, se: “!Hae God i God blong yumi, mo from samting ya, yumi save harem gud.” (Sam 144:15) Nomata wanem samting i kamaot long laef blong yumi, sipos yumi meksua se Jehova i stap klosap long yumi oltaem, i no gat wan samting blong yumi fraet long hem. (Sam 23:4) I no longtaem, Jehova bambae i talem long Pikinini blong hem blong i “brekemdaon ol wok we Setan i mekem.” (1 Jon 3:8) !Yumi wantem tumas blong luk samting ya i kamtru! Be go kasem taem ya, yumi mas bisi from we yumi gat plante wok blong mekem.—1 Kor. 15:58.

“Evri taem” mifala i prea, mifala i stap tingbaot yufala. (Rom 1:9) Plis yufala i “stap long laef ya we oltaem yufala i save se God i stap lavem yufala, mo oltaem yufala i mas luk long Jisas Kraes, Masta blong yumi, blong hem bambae i gat sore long yufala, i givim laef long yufala we i no save finis.”—Jud 21.

!Mifala i lavem yufala evriwan!

Ol brata blong yufala,

Hed Kampani Blong Ol Witnes Blong Jehova