?Yu Yu Save Joen Long Wok Blong Prij Long Sande?
1. ?Yumi save lanem wanem long wok we Pol mo ol fren blong hem oli mekem long Filipae?
1 Long Sabat dei, bighaf blong ol man Jiu long Filipae oli spel. Pol mo ol fren blong hem oli stap mekem misinari trip blong olgeta, nao oli visitim taon ya. Sipos oli no prij long Sabat dei mo oli spel nomo, bambae i no gat man i faenem poen long olgeta, from we i stret nomo we oli spel smol. Be oli save se ol man Jiu oli stap joen wanples afsaed long taon ya blong prea. Ale, oli yusum janis ya blong prij long olgeta. !I sua se Pol mo ol fren blong hem oli glad tumas, taem Lidia i lesin long tok blong olgeta mo hem wetem ful famle blong hem oli tekem baptaes! (Wok 16:13-15) Tede, plante man oli spel long Sande, taswe i gud yumi spenem sam taem long dei ya blong prij long olgeta.
2. ?Wanem hadtaem we ol man blong Jehova oli winim, blong oli save prij long Sande?
2 Hadtaem We Ol Man Blong God Oli Fesem Taem Oli Wantem Prij Long Sande: Long yia 1927, ol man blong Jehova oli kasem advaes se long evri Sande, oli mas spenem smol taem long wok blong prij. Taem oli mekem olsem, kwiktaem nomo ol man oli agensem olgeta. Long Yunaeted Stet, polis i holem plante brata sista from we oli talem se ol brata sista ya oli brekem loa ya se Sande i Sabat dei, oli spolem pis, mo oli no gat wan laesens blong salem buk. Be samting ya i no blokem ol man blong Jehova. Long ol yia afta long 1930, plante pablisa blong ol defdefren kongregesen oli joen wanples blong mekem wan spesel wok blong prij. Samtaem, taem ol polis oli kam blong holem olgeta, be oli no naf blong blokem olgeta from we oli plante tumas. From we ol brata ya oli traehad olsem, tede ol man oli no moa mekem trabol long yumi taem yumi prij long Sande. ?Olsem wanem? ?Yu yu glad mo yu talem tangkiu from we oli traehad olsem?
3. ?From wanem Sande i wan gudfala dei blong prij?
3 Wan Gudfala Dei Blong Prij: Long Sande, plante man oli no wok, oli stap nomo long haos blong olgeta. Oli harem gud from we tingting blong olgeta i spel. Sam man we oli stap go long jos, maet oli glad moa blong tokbaot God long dei ya. Sipos yumi gat miting long Sande, yumi werem ol klos we oli stret finis long wok blong prij. I gud yumi mekem plan blong prij bifo no afta long miting. Sipos yumi luk se bambae yumi no save gobak long haos blong kakae long medel dei, ale i gud yumi karem smol kakae i kam.
4. ?From wanem yumi save glad sipos yumi spenem smol taem blong prij long Sande?
4 Sipos yumi spenem smol taem blong prij long Sande, i gat taem yet i stap blong yumi spel smol olsem we yumi nidim. Mo bambae yumi glad long spel blong yumi, from we yumi bin joen long tabu wok ya blong prij. (Prov. 19:23) !Maet bambae yumi glad tu sipos yumi faenem sam man we oli gat sem tingting olsem Lidia!