Yumi Mas Rere Oltaem Blong Talemaot Gud Nius
1. ?From wanem yumi save se ol fas Kristin oli rere oltaem blong talemaot gud nius?
1 Ol fas Kristin oli wok strong blong talemaot gud nius we “oli no kam slak” nating. Oli prij long eni ples we ol man oli stap long hem. (Wok 5:42, NW) Taem oli stap prij long ol man long ol haos wanwan, ating oli prij tu long ol man we oli mitim long rod. Afta long wok blong prij, taem oli go long maket, ating oli tekem janis blong prij long ol man long maket tu. Olsem Jisas, oli rere oltaem blong talemaot gud nius.—Mak 6:31-34.
2. ?Man we i Witnes blong Jehova, hem i mas rere oltaem blong mekem wanem?
2 Yumi Rere Oltaem: Yumi ol Witnes blong Jehova. Nem ya i talemaot wanem samting we yumi mekem. Mo tu i talemaot se fasin blong yumi i olsem wanem. (Aes. 43:10-12) Taswe, nating se yumi no prij long ol haos wanwan, be yumi rere oltaem blong givim ansa long man we i askem from wanem yumi putum tingting blong yumi i stap long ol promes blong God. (1 Pita 3:15) ?Olsem wanem? ?Yu yu rerem tingting blong yu from ol janis we yu save tekem blong prij long ol man? ?Mo yu tingbaot wanem bambae yu talem? ?Oltaem yu fulumap sam buk no traket long basket blong yu blong seremaot olgeta long ol man we oli lesin gud? (Prov. 21:5) ?Yu yu prij nomo taem yu go long ol haos wanwan? ?No yu tekem janis blong talemaot gud nius long ol man long ol narafala ples tu?
3. ?From wanem yumi mas tinghevi long ol defren rod blong prij, olsem taem yumi prij long ol man long rod, long ples blong putum trak, long ples blong spel, mo long ples blong wok?
3 Prij “Long Fes Blong Ol Man”: Yumi prij long ol man long rod, long ples blong putum trak, long ples blong spel, long ples blong wok, mo long ol narafala ples bakegen. ?Olsem wanem? ?Yu ting se ol defren rod ya blong prij, oli wan samting we yumi mekem sam samtaem nomo, no yumi mekem nomo taem yumi wantem? Aposol Pol i talem se hem i prij “long fes blong ol man” mo long ol haos blong ol man tu. (Wok 20:20) Wok blong prij long ol haos wanwan i stamba rod we yumi folem blong prij long ol man, mo hemia i nambawan rod blong talemaot Kingdom long plante man. Be tingting blong ol fas Kristin i stap long ol man, i no long ol haos. Oli tekem evri janis blong tokbaot trutok long ol man. Eni ples we oli go long hem oli toktok wetem ol man, mo oli prij tu long ol man long ol haos wanwan. Tede yumi tu, yumi mas gat tingting olsem olgeta, blong yumi finisim gud wok ya blong talemaot gud nius.—2 Tim. 4:5.