Ol Refrens Blong Kristin Wok Mo Laef Buk Blong Miting
6-12 OGIS
OL GUDGUDFALA SAMTING LONG BAEBOL | LUK 17-18
“Talem Tangkiu”
nwtsty ol not blong stadi long Lu 17:12, 14
ten man we oli gat leprosi: Bifo, ol man we oli gat leprosi oli stap tugeta nomo long ol grup, hemia i mekem i isi blong oli givgivhan long olgeta. (2Ki 7:3-5) Loa blong God i talem se ol man we oli gat leprosi oli mas stap longwe long ol narafala. Mo tu, man we i gat leprosi i mas singaot blong givim woning long narafala se: !Mi mi doti! !Mi mi doti! (Le 13:45, 46) Folem Loa ya, ol man ya we oli gat leprosi, oli stanap longwe lelebet long Jisas.—Yu luk not blong stadi long Mt 8:2 mo Diksonari long tok ya, “Leprosi.”
soem bodi blong yufala long ol pris: Jisas Kraes i folem Loa taem hem i stap long wol, hem i save wok we ol pris oli mekem, nao hem i sanem ol man ya we hem i tekemaot leprosi long olgeta blong oli go luk ol pris. (Mt 8:4; Mk 1:44) Folem Loa blong Moses, sipos wan man i gat leprosi nao sik ya i finis long hem, i wok blong pris blong jekemgud sipos sik ya i finis. Mo man we sik ya i finis long hem, i mas go long tempol blong givim presen blong hem, hemia tu laef pijin we i klin, wud blong sida, kaliko we i red mo hisop.—Le 14:2-32.
?From Wanem i Gud Blong Talem Tangkiu?
?Olsem wanem? ?Jisas i no wantem save long mastik blong ol narafala ya we oli no talem tangkiu long hem? Baebol i talem se: “Ale Jisas i talem se: “?Mi ting se i gat ten man we bodi blong olgeta i kam klin bakegen? ?Wehem ol narafala naen man ya? ?I no gat wan long olgeta i kambak blong presem God? ?Man ya nomo we i blong narafala neson i kambak?”—Luk 17:17, 18.
Ol naen man ya we oli gat leprosi oli no ol rabis man. Oli soemaot se oli bilif long Jisas mo oli glad blong obei long tok blong hem, hemia blong go luk ol pris long Jerusalem. Be i tru, oli no bin mekem samting blong talem tangkiu long Jisas. Taswe Jisas i no glad long fasin blong olgeta. ?Olsem wanem long yumi? Taem narafala i mekem i gud long yumi, ?yumi kwik blong talem tangkiu mo yumi glad blong soemaot samting ya, long wan smol leta we yumi raetem i go long hem?
Traem Faenem Ol Gudfala Samting Ya
nwtsty not blong stadi long Lu 17:10
man nating: PT., “gud blong nating nomo.” Long parabol ya, poen we Jisas i wantem makem hemia se, ol slef, hemia ol disaepol, oli no mas luk olgeta se oli gud blong nating nomo. Folem stori we i stap, tok ya “man nating” i givim tingting se ol slef oli mas gat tingting daon, oli no mas wantem blong gat haenem o blong narafala i presem olgeta. Sam man blong stadi oli talem se tok ya i minim “mifala ol slef nomo mifala i no wantem blong narafala i leftemap mifala.”
nwtsty not blong stadi long Lu 18:8
bilif olsem: Ol Grik tok long haf we i kamaot bifo long tok ya “bilif” oli soemaot se Jisas i no stap tokbaot wan bilif we i olbaot nomo. Be hem i tokbaot wan kaen bilif, we i olsem blong wido long parabol blong Jisas. (Lu 18:1-8) Mo tu i minim strong bilif se God bambae i harem ol prea, mo bilif se God bambae i givhan long ol man blong hem. Jisas i no givim ansa long kwestin long saed blong bilif, from we hem i wantem se ol disaepol oli luklukgud se bilif blong olgeta i olsem wanem. Parabol long saed blong prea mo bilif, i stret gud from we Jisas i jes tokbaot ol traem we ol disaepol bambae oli fesem.—Lu 17:22-37.
13-19 OGIS
OL GUDGUDFALA SAMTING LONG BAEBOL | LUK 19-20
“Lanem Lesen Long Parabol Blong Ten Mina”
jy pej 232 haf 2-4
Parabol Blong Hem Long Saed Blong Ten Mina
Hem i se: “Wan haeman i go long wan kantri longwe, blong oli putumap hem i kam king, ale bambae hem i kambak bakegen.” (Luk 19:12) I tekem taem blong go long wan kantri we i stap longwe. Long parabol ya, Jisas nao i “haeman” ya, we i go long wan “kantri longwe,” hemia long heven, nao Papa blong hem bambae i givim paoa long hem blong i king.
Folem parabol ya, bifo we “haeman” ya i aot, hem i singaot ten slef mo givim wan silva mina long wanwan long olgeta, mo i talem se: “Yufala i mekem bisnes wetem ol mane ya kasem we mi kambak.” (Luk 19:13) Ol prapa silva mina oli ol sas mane. Wan mina i sem mak long pei we wan man we i wok long garen i kasem long tri manis.
Maet ol disaepol oli kasemsave se olgeta nao oli ol ten slef long parabol ya, from we Jisas i talem finis se olgeta oli olsem ol man blong tekemaot kakae long garen. (Matiu 9:35-38) Jisas i no askem olgeta blong tekem ol kakae long garen i kam. Be, i gat ol narafala disaepol we bambae oli mekem wok blong tekemaot kakae long garen, blong oli save gat wan ples long Kingdom blong God. Ol disaepol oli yusum evri samting we oli gat, blong oli save stap long Kingdom.
jy pej 232 haf 7
Parabol Blong Hem Long Saed Blong Ten Mina
Sipos ol disaepol oli kasemsave se olgeta oli olsem ol slef we oli yusum evri samting blong olgeta blong pulum moa man i kam disaepol, bambae oli sua gud se Jisas i glad long olgeta. Mo oli save trastem se Jisas bambae i givim pei long olgeta. Be evri disaepol blong Jisas, laef blong olgeta i no sem mak, mo oli mekem ol defdefren wok. Nating se i olsem, Jisas, we “oli putumap hem i kam king,” bambae i luksave olgeta mo i blesem olgeta from traehad we oli mekem, blong pulum man i kam disaepol.—Matiu 28:19, 20.
jy pej 233 haf 1
Parabol Blong Hem Long Saed Blong Ten Mina
Slef ya i no kasem wan samting, from we hem i no wok blong kasem moa samting blong masta blong hem. Ol aposol oli luksave se Jisas nao i king long Kingdom blong God. Taswe tok blong Jisas long saed blong laswan slef ya, i mekem olgeta oli kasemsave se sipos oli no lukaotgud, bambae oli no gat ples long Kingdom.
Traem Faenem Ol Gudfala Samting Ya
nwtsty not blong stadi long Lu 19:43
ol pos we en blong olgeta i sap: Grik tok ya khaʹrax, i kamaot nomo long vas ya long Grik haf blong Baebol. Tok ya i minim wan “stik o pos we en blong hem i sap we oli yusum olsem fenis blong wan eria,” mo tu ol “soldia oli yusum.” Tok blong Jisas i kamtru long yia 70 Kristin Taem, hemia taem ol soldia blong Rom, we Taetas i lidim olgeta, oli kam raonem Jerusalem. I gat tri samting we Taetas i plan blong mekem. Hem i wantem blokem ol man Jiu blong oli no ronwe, hem i wantem blong ol man Jiu oli sarenda, hem i wantem se oli stap insaed long taon ya gogo oli no moa gat kakae. Ale ol soldia blong Rom oli go long ol ples we i gat plante tri long hem, mo oli katemdaon mo oli karem i kam blong wokem wan fenis i go raon long Jerusalem.
nwtsty not blong stadi long Lu 20:38
long tingting blong hem, olgeta evriwan oli laef nomo: Baebol i soemaot se olgeta we oli mekem samting we God i no glad long hem, long lukluk blong God, i olsem se oli ded finis. (Ef 2:1; 1Ti 5:6) Long sem fasin, olgeta we oli ded finis be oli mekem ol samting we God i glad long hem, long lukluk blong God, i olsem we oli laef yet, from we i plan blong God blong mekem olgeta oli laef bakegen.—Ro 4:16, 17.
20-26 OGIS
OL GUDGUDFALA SAMTING LONG BAEBOL | LUK 21-22
“Klosap Nao Bambae Yufala i Fri”
Kingdom i Finisim Gud Ol Enemi Blong Hem
9 Ol narakaen samting long skae. Jisas i talem se: “San bambae i kam tudak, mo mun bambae i no moa saen. Ol sta bambae oli folfoldaon.” Ol man bambae oli no moa save lukluk ol lida blong skul olsem ol laet blong lidim olgeta. Be maet Jisas i wantem talem tu se ol narakaen samting bambae i kamaot long prapa skae. (Aes. 13:9-11; Joel 2:1, 30, 31) Taem ol man oli luk ol samting ya, ?bambae oli mekem wanem? Bambae oli “harem nogud, oli fraet,” from we oli no save ronwe long trabol ya. (Luk 21:25; Sef. 1:17) Yes, ol enemi blong Kingdom blong God, nating se oli “king” no oli “slef,” be bambae oli “save ded from fraet, mo from we oli stap harem nogud long ol samting we” i kasem olgeta. Bambae oli traem blong ronwe, be bambae oli no faenem wan ples blong haed, from we oli no save ronwe long King blong yumi we i kros we i kros.—Luk 21:26; 23:30; Rev. 6:15-17.
Yufala i Mas ‘Gohed Blong Lavlavem Yufala Olsem Wan Brata Nomo’
17 Yumi “mekem tingting blong yumi i strong.” (Ridim Hibrus 13:6.) Sipos yumi trastem Jehova, hemia i mekem tingting blong yumi i strong, nao yumi save winim ol traem we yumi kasem. Mo, taem tingting blong yumi i strong, hemia i givhan long yumi blong gat stret tingting. Mo stret tingting i mekem se yumi wantem leftemap tingting blong ol brata mo sista, mo mekem olgeta oli harem gud. Taem yumi mekem olsem, hemia i soemaot se yumi lavlavem yumi olsem wan brata nomo. (1 Tesalonaeka 5:14, 15) Mo tu, long taem blong bigfala trabol, yumi save gat strong tingting, from we yumi save se i no longtaem bambae yumi fri.—Luk 21:25-28.
w15 15/7 pej 13 haf 13
‘!Bambae i No Longtaem Yufala i Fri!’
13 ?Olgeta we oli olsem ol nani bambae oli mekem wanem taem oli kasemsave se bambae oli lus? Baebol i talem se “bambae oli krae.” (Matiu 24:30) ?Be olsem wanem long ol tabu man blong God, mo ol man we oli joen wetem olgeta? Olgeta bambae oli mekem samting we Jisas i talem, hem i talem se: “Yufala i mas stanap stret, yufala i leftemap hed blong yufala, from we bambae i no longtaem, mi bambae mi kam blong sevem yufala, mi mekem yufala i fri.”—Luk 21:28.
Traem Faenem Ol Gudfala Samting Ya
nwtsty ol not blong stadi long Lu 21:33
Heven mo wol bambae tufala i save lus: Ol narafala vas oli soemaot se heven mo wol bambae i stap blong olwe. (Je 9:16; Sam 104:5; Prija 1:4) Taswe tok we Jisas i talem long vas ya i minim se ol samting blong wol mo heven oli save lus, be ol tok blong Jisas bambae oli kamtru. (Skelem wetem Mt 5:18.) Maet heven mo wol long vas ya hemia pijatok we i tokbaot “heven mo wol we tufala i stap fastaem,” we i kamaot long Re 21:1.
tok blong mi bambae i no save lus samtaem: Tu Grik tok we oli yusum long vas ya, i givim tingting blong wan samting we bambae i no lus. Hemia i blong makemgud se ol tok blong Jisas bambae oli stap blong olwe.
w14 15/10 pej 14-15 haf 15-16
Wan ‘Tabu Neson Blong Ol King Mo Pris’
15 Afta we Jisas i stanemap Kakae blong Masta, hem i mekem kontrak blong Kingdom wetem 11 aposol blong hem. (Ridim Luk 22:28-30.) Jehova i no joen long kontrak ya olsem we i joen long ol narafala kontrak. Hemia wan kontrak we Jisas nomo i mekem wetem ol man we tabu spirit i makemaot olgeta. Taem Jisas i talem se, “olsem we Papa blong mi i putumap mi [“i mekem kontrak wetem mi,” NW],” ating hem i stap tokbaot kontrak we Jehova i mekem wetem hem, blong i kam wan ‘pris olsem Melkisedek’ blong olwe.—Hib. 5:5, 6.
16 Ol 11 gudfala aposol oli no lego Jisas long ol hadtaem we hem i kasem. Kontrak blong Kingdom i wan promes se ol aposol ya bambae oli rul olsem king mo mekem wok blong pris wetem Jisas long heven. Be i no 11 aposol ya nomo we bambae oli kasem blesing ya. Jisas i kamtru long aposol Jon long vison, mo i talem se: “Mi mi win long faet blong mi finis, nao mi stap sidaon wetem Papa blong mi blong joen long hem long hae nem blong hem. Mo long sem fasin, bambae mi mi givim raet long man we bambae i win long faet, blong i kam sidaon wetem mi, blong joen long mi long hae nem blong mi.” (Rev. 3:21) Taswe, hem i mekem kontrak blong Kingdom wetem ol 144,000 tabu Kristin. (Rev. 5:9, 10; 7:4) Kontrak ya i givim raet long ol tabu Kristin ya blong oli rul wetem Jisas long heven. Hemia i sem mak long wan woman we oli jusum hem blong i mared long wan king. Afta we tufala i mared, woman ya i gat raet blong joen wetem king ya blong rul. Baebol i tokbaot ol tabu Kristin se oli “woman” blong Kraes, oli olsem ‘wan yang gel we i klin’ we bambae i mared long Kraes.—Rev. 19:7, 8; 21:9; 2 Kor. 11:2.
27 OGIS–2 SEPTEMBA
OL GUDGUDFALA SAMTING LONG BAEBOL | LUK 23-24
“Rere Blong Fogivim Ol Narafala”
cl pej 297 haf 16
“Blong Yufala i Save Lav Ya We Kraes i Soemaot”
16 Jisas i soemaot lav blong Papa blong hem long wan narafala rod. Hemia blong rere blong “fogivim” narafala. (Ol Sam 86:5) Hem i soemaot samting ya taem hem i stap long pos. Hem i ded long wan fasin we i nogud. Taem oli nilim tufala han mo leg blong hem, ?Jisas i talem wanem? ?Hem i askem Jehova blong i panisim ol man ya we oli nilim hem? Long ol laswan tok we Jisas i talem, hem i se: “Papa, yu fogivim olgeta, from we oli no save samting we oli stap mekem.”—Luk 23:34.
g 08/2 pej 11 haf 5-6
?God i Save Fogivim Ol Bigfala Sin?
Jehova i luk sin we ol man oli mekem, mo tu hem i luk tingting mo filing blong olgeta. (Aesea 1:16-19) Tingbaot tufala rabis man ya we oli stap long pos klosap long Jisas. Tufala ya i bin mekem ol fasin we oli rabis olgeta, taswe wan long tufala ya i se: “Yumitufala, i stret nomo blong yumitufala i kasem panis ya from ol samting nogud ya we yumi yumitufala i mekem. Be man ya [Jisas] i no mekem wan samting nating we i rong.” Tok blong man ya i soemaot we hem i kasem save sam samting long saed blong Jisas. Save ya we hem i gat, i halpem hem blong jenisim tingting blong hem. Nekis tok we hem i talem long Jisas i soemaot samting ya, i se: “Jisas, taem we bambae yu kasem kingdom blong yu, plis yu tingbaot mi bakegen.” ?Jisas i talem wanem long man ya we i askem samting ya wetem fulhat blong hem? Jisas i talem long hem se: “Tru mi mi talem long yu tede, se bambae yu yu stap wetem mi long paradaes.”—Luk 23:41-43, NW.
Tingbaot ol laswan tok ya blong Jisas taem hem i stap yet long wol. Hem i sore long wan rabis man we hem wan i bin talem se i stret blong i kasem ded. !Samting ya i mas leftemap tingting blong yumi! Yumi save sua se long fiuja, nomata wanem bigfala sin we yumi mekem bifo, be sipos yumi soemaot we yumi rili tanem tingting blong yumi, bambae Jisas mo Jehova tugeta i save fogivim yumi mo tekemaot sin blong yumi.—Rom 4:7.
cl pej 297-298 haf 17-18
“Blong Yufala i Save Lav Ya We Kraes i Soemaot”
17 Maet samting we Jisas i mekem long Pita, i soemaot bakegen se Jisas i gat nambawan fasin ya blong fogivim man. Yes i tru, Pita i laekem Jisas tumas. Long Nisan 14, hemia laswan naet blong Jisas, Pita i talem long hem se: “Masta, mi mi rere blong go wetem yu long kalabus, mo mi rere blong ded wetem yu.” !Be sam aoa biaen, Pita i giaman tri taem se hem i no save Jisas! Baebol i talem samting we i hapen taem Pita i talem nambatri taem se hem i no save Jisas. Baebol i se: “Masta i tanem hem, i lukluk stret long Pita.” Pita i harem nogud bigwan from sin we hem i mekem, nao “hem i go afsaed mo i krae we i krae.” Biaen taem Jisas i ded, maet Pita i stap tingting se: ‘?Jisas i fogivim mi o nogat?’—Luk 22:33, 61, 62.
18 Pita i no wet longtaem blong kasem ansa. Afta we Jisas i laef bakegen long moning blong Nisan 16, mo long sem dei ya, hem i go visitim Pita. (Luk 24:34; 1 Korin 15:4-8) ?From wanem Jisas i go luk Pita, we hem nao i giaman se hem i no save Jisas? Maet Jisas i wantem talem long Pita, we i tanem tingting blong hem finis, se hem i lavem Pita yet, mo hem i glad long hem. Mo Jisas i mekem sam moa samting blong leftemap tingting blong Pita.
Traem Faenem Ol Gudfala Samting Ya
nwtsty not blong stadi long Lu 23:31
long taem we tri i grin yet, . . . sipos tri ya i drae: Jisas i stap minim neson blong ol man Jiu. I olsem wan tri we i ded, be i gat smol haf i grin yet, hemia from we Jisas i stap finis mo i gat sam man Jiu oli bilif long hem. Be i no longtaem Jisas bambae i ded, mo tabu spirit bambae i makemaot sam gudfala man Jiu blong oli kam haf blong Isrel blong God. (Ro 2:28, 29; Ga 6:16) Long taem ya, prapa neson blong Isrel bambae i ded long saed blong spirit, olsem tri we i drae.—Mt 21:43.
nwtsty pija mo video
Wan Nil We i Stap Long Bun Blong Leg
Hemia foto blong wan bun blong baksaed blong leg we oli nilim wan nil i gotru long hem. Nil ya hem i 11 sentimeta. Oli faenem bun ya long yia 1968, taem ol man oli digim graon long not blong Jerusalem. Hem i wan bun blong wan man long taem blong ol man Rom. Bun ya i soemaot se ol man long taem blong Baebol oli yusum ol nil blong nilim ol man i go long wan pos. Maet nil ya i sem mak long ol nil we ol soldia blong Rom oli yusum blong nilim Jisas Kraes long pos. Oli faenem bun ya insaed long wan bokis blong ston, we nem blong hem ossuary. Oli yusum ol bokis olsem blong putum ol bun blong ol man we oli hangem olgeta long pos afta we ol mit blong olgeta oli folfoldaon. Hemia i soemaot se samtaem oli karemaot ol man long pos blong go berem olgeta.