Refrens Blong Kristin Wok Mo Laef Buk Blong Miting
5-11 OGIS
OL GUDGUDFALA SAMTING LONG BAEBOL | 2 TIMOTI 1-4
“Spirit We God i Givim i No Blong Mekem Yumi Fraet”
w09 1/5 pej 18 haf 9
Ol Yangfala—Mekem Ol Man Oli Luk Se Yufala i Stap Gohed Gud
9 Biaen, blong givhan long Timoti, Pol i mekem hem i tingbaot se: “Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, i blong mekem yumi lavem ol man, mo blong mekem yumi naf blong blokem ol samting we yumi nomo i wantem [“mo blong yumi gat wan tingting we i kliagud”, NW].” (2 Tim. 1:7) “Tingting we i kliagud” i min se man i naf blong tingting gud mo skelem ol samting wetem stret tingting. Man ya i naf tu blong fesem enikaen traem, i no se hem i stanap strong nomo taem ol samting oli rongud olsem hem i wantem. Sam yangfala we oli no bigman long ol Kristin fasin, oli fraet taem oli kasem wan hadtaem mo oli traem blong ronwe long hadtaem ya. Blong mekem olsem, oli traem blong no moa tingting long hadtaem ya, maet oli stap slip oltaem, oli lukluk televisen bitim mak, oli tekem drag mo oli dring gogo oli lusum hed, oli mekem lafet oltaem, mo oli slip olbaot. Baebol i tok strong long ol Kristin se oli ‘mas livim olgeta fasin we oli no stret long fes blong God. Oli no mas wantem tumas ol samting blong wol ya, mo oli mas blokem ol samting we olgeta nomo oli wantem. ‘Oli mas [“gat tingting we i kliagud mo,” NW] mekem ol fasin we i stret, we God i stap harem gud long hem.’—Taetas 2:12.
‘!Yufala i No Fraet, Yufala i Stanap Strong!’
7 Pol i raet i go long Timoti, i se: “Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, . . . Nao from samting ya, bambae yu no sem blong tokbaot Masta blong yumi.” (2 Timoti 1:7, 8; Mak 8:38) Naoia we yumi ridim tok ya finis, yumi save askem se: ‘?Mi mi sem long bilif blong mi, no mi mi gat fasin we mi no fraet? ?Long ples blong wok (no long skul), mi mi talemaot long ol narafala se mi mi wan Witnes Blong Jehova, no mi haedem samting ya? ?Mi mi sem blong stap defren long ol narafala man, no mi mi glad blong soemaot se mi defren from we mi mi fren wetem Jehova?’ Sipos wan long yumi i fraet blong talemaot gud nius no i fraet blong tekem wan desisen we ol man oli no agri long hem, man ya i mas tingbaot advaes we Jehova i givim long Josua se: “Tingting blong yu i mas strong, mo yu no mas fraet, yu mas stanap strong oltaem.” Yumi neva mas fogetem se; i no tingting blong ol man long ples blong wok no ol yangfala long skul we i impoten, be tingting blong Jehova mo Jisas Kraes, hemia nao samting we i impoten.—Galesia 1:10.
Traem Faenem Ol Gudfala Samting Ya
Wok Had Blong Kasem Ol Rij Samting We Oli Tru
13 Timoti i gat strong bilif. Pol i singaot hem se “wan gudfala soldia blong Kraes Jisas,” mo i talem se: “Sipos wan soldia i wantem se man we i putum hem long wok ya i glad, hem i no save mekem ol prapa bisnes blong hem.” (2 Timoti 2:3, 4) Ol man blong Jisas tede, we moa long wan milian long olgeta oli mekem wok blong Jehova fultaem, oli folem advaes ya blong Pol. Oli no letem ol rij samting blong wol ya i pulum olgeta. Oli tingbaot se: “Sipos yu kaon long wan man, bambae yu kam slef blong hem.” (Ol Proveb 22:7) Setan i wantem se yumi spenem olgeta taem mo paoa blong yumi blong wok blong kasem mane. Samfala oli tekem bigfala lon long bang blong pem wan haos, wan trak, ol kos, mo lafet blong mared. Yumi mas lukaot gud, sipos no, bambae yumi wok had blong plante yia blong pembak wan bigfala kaon. Yumi soemaot se yumi waes taem yumi no mekem laef blong yumi i fasfas, yumi no gat kaon, mo yumi no spenem mane olbaot. Long rod ya, yumi save mekem moa long wok blong God, i bitim we yumi kam slef blong ol rij samting blong wol.—1 Tim. 6:10.
w14 15/7 pej 14 haf 10
Ol Man Blong Jehova Oli ‘Livim Ol Fasin We i No Stret’
10 Tede, yumi no save faenem wan man blong apostasi insaed long Kongregesen. Be nating se i olsem, yumi save faenem ol tingting blong olgeta we oli agensem ol tijing blong Baebol. Yumi mas sakemaot ol tingting ya, nomata weples oli kamaot long hem. I no waes blong yumi toktok wetem ol man ya long Intenet, no taem yumi mitim olgeta, no long narafala rod bakegen. Sipos yumi toktok wetem olgeta, yumi no stap obei long God, nating se maet yumi gat tingting blong givhan long olgeta. God i talem se yumi no mas joen nating wetem olgeta.
12-18 OGIS
OL GUDGUDFALA SAMTING LONG BAEBOL | TAETAS 1–FILIMON
“Putumap Ol Elda”
w14 15/11 pej 28-29
Kwestin
Nating se Baebol i no talemaot evri samting long fasin blong putumap ol brata long taem ya, be i gat sam eksampol we i soem olsem wanem oli bin mekem. Yumi save se taem Pol mo Banabas oli finisim faswan misinari trip blong tufala, “tufala i putumap ol elda long ol kongregesen wanwan, blong oli givhan long ol disaepol. Mo tufala i prea mo livim kakae, mo tufala i putum olgeta ya long han blong Jehova, from we oli bilif finis long hem.” (Wok 14:23) Sam yia biaen, Pol i raet long fren blong hem Taetas, i se: “Taem mi aot long Krit, mi livim yu yu stap blong yu stretem sam samting we oli no stret, mo blong yu go long olgeta taon blong putumap ol elda, stret folem ol tok ya blong mi.” (Taetas 1:5) Timoti tu we i travel plante wetem Pol, i kasem semfala oda blong putumap ol elda. (1 Tim. 5:22) I klia nomo se ol eria elda nao oli putumap ol elda, be i no ol aposol mo ol elda we oli stap long Jerusalem.
From samting ya, Hed Kampani Blong Ol Witnes Blong Jehova i mekem sam jenis long fasin ya blong putumap ol elda mo ol man blong givhan. Long 1 Septemba, 2014, oli folem rod ya: Wanwan eria elda i mas jekem ol rikomendesen we ol elda oli mekem folem eria we hem i wok long hem. Nao taem hem i visitim ol kongregesen, bambae hem i traem blong savegud olgeta we ol elda oli rikomendem. Blong mekem olsem, hem i save prij wetem olgeta. Afta we eria elda i tokbaot ol rikomendesen ya wetem bodi blong ol elda, biaen hem nao bambae i putumap ol elda mo ol man blong givhan. Long rod ya, hem i folem semfala rod we ol fas Kristin oli stap folem.
?Hu nao i lukaot long ol defren wok ya? Olsem oltaem, “gudfala slef we i waes” nao i lukaot long wok ya blong givim ol kakae long saed blong spirit. (Mat. 24:45-47) Tabu spirit i givhan long olgeta blong faenem ol vas blong Baebol, we i save halpem ol kongregesen raon long wol blong folem semfala plan nomo. Mo tu, gudfala slef we i waes i putumap ol eria elda mo ol memba blong Branj Komiti. Biaen, wanwan branj ofis i givhan long ol kongregesen blong oli folem plan we i kam long gudfala slef ya. Ol elda oli gat bigfala wok ya blong lukluk mo tokbaot sipos wan brata i kasem ol mak we Baebol i tokbaot blong kam wan elda o man blong givhan. Mo biaen, wanwan eria elda i gat wok ya blong prea mo lukluk bakegen rikomendesen ya we ol elda oli mekem, nao i save putumap wan brata.
Traem Faenem Ol Gudfala Samting Ya
w89 15/5 pej 31 haf 5
Kwestin
I klia se Pol i no agri wetem fasin blong ol man blong tok nogud long ol man Krit from laen blong olgeta. Yumi save samting ya from we hem i save se i gat sam gudfala Kristin long Krit we God i glad long olgeta mo i makemaot olgeta wetem tabu spirit blong hem. (Wok 2:5, 11, 33) I gat plante Kristin we oli wok strong, we oli naf blong statem ol kongregesen “long olgeta taon.” Yumi save se ol brata ya oli no stret gud olgeta, be oli no ol man blong giaman mo les, from we Jehova i glad long olgeta. (Filipae 3:18, 19; Revelesen 21:8) Tede tu i gat sam man we oli olsem ol man Krit, we oli gat gudfala hat mo oli wantem mekem samting we i stret, mo oli rere blong lesin long gud nius.—Esikel 9:4; skelem wetem Wok 13:48.
w08 1/10 pej 31 haf 3
Ol Bigfala Poen Long Leta Blong Taetas, Filimon Mo Hibrus
15, 16—?From wanem Pol i no askem long Filimon blong hem i letem Onesimas i go fri? Pol i wantem mekem gud wok ya we God i givim long hem blong mekem, hemia blong ‘talemaot [“Kingdom,” NW] blong God mo tijim ol man long gud nius blong Jisas Kraes.’ Taswe, hem i jusum blong no joen long ol raorao blong ol narafala, olsem raorao ya long saed blong ol man we oli wok slef mo ol man we oli gat ol slef blong olgeta.—Wok 28:31.
19-25 OGIS
OL GUDGUDFALA SAMTING LONG BAEBOL | HIBRUS 1-3
“Laekem Stret Fasin Mo Agensem Nogud Fasin”
w14 15/2 pej 5 haf 8
!Yumi Presem Kraes, King We i Hae We i Hae!
8 Long 1914, Jehova i putumap Pikinini blong hem olsem Mesaea King long heven. Baebol i tokbaot rul blong Jisas, se: “Yu yu stap rulum ol man blong yu long stret fasin.” Tok ya i mekem yumi sua se King ya bambae i mekem i stret long olgeta man we hem i rul long olgeta, mo bambae hem i mekem i sem mak long olgeta evriwan. Long olfala lanwis we oli raetem Baebol long hem fastaem, vas blong Ol Sam 45:6 i talem se: “God hem i olsem jea blong yu, bambae i stap oltaem nomo, i no save finis.” Rul blong King ya i stret tu from we God i olsem jea blong hem. Hemia i min se Jehova i givim paoa long hem blong i King. Mo rul blong Jisas bambae i stap “oltaem nomo, i no save finis.” ?Yu yu glad blong mekem wok blong Jehova mo stap aninit long rul blong King ya we hem i jusumaot?
w14 15/2 pej 4-5 haf 7
!Yumi Presem Kraes, King We i Hae We i Hae!
7 Ridim Ol Sam 45:6, 7. Jisas i laekem ol fasin we oli stret mo i no laekem eni samting we i save mekem Papa blong hem i harem nogud. From samting ya, Jehova i putumap hem blong i King long Kingdom. Jisas i glad tumas from we God i jusumaot hem, mo i leftemap hem i hae moa long “ol narafala king.” “Ol narafala king” ya, hemia ol king blong Juda we oli kamaot long laen blong Deved. ?Olsem wanem Jehova i mekem Jisas i hae moa long olgeta? Faswan samting, Jehova hem wan i jusumaot Jisas. Namba tu samting, Jehova i jusumaot hem blong i King mo i Hae Pris tu. (Sam 2:2; Hib. 5:5, 6) Namba tri samting, Jehova i makemaot hem wetem tabu spirit, be i no wetem prapa oel olsem we hem i bin mekem long ol king blong Isrel. Mo laswan samting, rul blong hem i kamaot long heven, i no long wol.
Traem Faenem Ol Gudfala Samting Ya
it-1 pej 1185 haf 1
Pija
?I tru se oltaem Jisas i stap soemaot ol sem fasin olsem Papa blong hem?
Jisas i fasbon pikinini blong God we biaen hem i kam long wol ya olsem wan man. Mo hem i pija blong Papa blong hem. (2Ko 4:4) Antap moa, yumi sua se hem nao we God i bin stap toktok long hem se, “I gud yumi mekem man, mo i gud yumi mekem we hem i tekem fasin blong yumi.” Jisas i pija blong Papa blong hem, stat long taem ya we God i wokem hem. (Je 1:26; Jon 1:1-3; Kol 1:15, 16) Taem hem i kam long wol ya olsem wan man we i stret gud olgeta, hem i soemaot gud olgeta fasin blong Papa blong hem long olgeta haf blong laef blong hem, taswe hem i save talem se, “Man we i luk mi, hem i luk Papa tu.” (Jon 14:9; 5:17, 19, 30, 36; 8:28, 38, 42) Jisas i soemaot moa ol fasin blong Papa blong hem taem hem i laef bakegen, mo Jehova God i givim long hem “olgeta samting long heven mo long wol.” (1Pi 3:18; Mt 28:18) Afta God i givim “wan posisen long hem we i hae” moa, naoia hem i soemaot ol fasin blong Papa blong hem moa i bitim olgeta taem bifo we hem i stap long heven mo long wol. (Fil 2:9; Hib 2:9) Taswe, hem i “stret pija blong God.”—Hib 1:2-4.
it-1 pej 1063 haf 7
Heven
Ol tok blong Ol Sam 102:25, 26 i blong tokbaot Jehova God, be aposol Pol i talem ol tok ya bakegen blong tokbaot Jisas. Hemia from we Pikinini ya blong God wan nomo we hem i gat, i wan Spesel wokman blong hem we hem i yusum blong i mekem heven mo wol. Pol i talem se sipos God i wantem, hem i save distroem olgeta samting ya. Be Pol i talem se pikinini blong God bambae i laef olwe.—Hib 1:1, 2, 8, 10-12; skelem wetem 1Pi 2:3, futnot.
26 OGIS–1 SEPTEMBA
OL GUDGUDFALA SAMTING LONG BAEBOL | HIBRUS 4-6
“Traehad Long Evri Rod Blong Kasem Spel Blong God”
w11 1/7 pej 24 haf 3-5
God i Spel—?Hemia i Minim Wanem?
3 I gat tu samting we tufala i soemaot se, long taem blong Jisas mo ol fas Kristin, namba seven dei i stap gohed yet. Fas samting, hemia tok we Jisas i talem long ol man we oli agensem hem from we hem i mekem wan sikman i kam gud long Sabat dei. Ol man ya oli talem se taem Jisas i mekem samting ya, hem i mekem wan wok. Masta Jisas i talem long olgeta se: “Oltaem Papa blong mi i stap wok, mo mi tu mi mas wok.” (Jon 5:16, 17) ?Yu yu luksave poen we Jisas i wantem soemaot? Ol man oli stap agensem hem se hem i wok long Sabat dei. Be hem i ansa long olgeta se, “Oltaem Papa blong mi i stap wok.” I olsem we hem i talem long olgeta se: ‘Mi mo Papa blong mi, mitufala i mekem sem wok. Papa blong mi i stap gohed blong wok long ol taosen yia we oli sabat dei blong hem. Taswe i stret nomo we mi tu mi gohed blong wok long Sabat dei.’ Ale, tingting we yumi kasem long ol tok ya blong Jisas, se, long taem blong hem, namba seven dei, no dei ya we God i spel long wok blong mekem ol samting long wol, i no finis yet. Be God i stap wok yet blong mekem stamba tingting blong hem long saed blong ol man mo wol ya i kamtru.
4 Namba tu samting, hemia ol tok blong aposol Pol. Pol i talem bakegen ol tok blong Jenesis 2:2 se God i spel. Mo tabu spirit i pulum hem blong raetem se: “Yumi ya we yumi bilif, bambae yumi save kasem spel ya.” (Hib. 4:3, 4, 6, 9) Ale, long taem blong Pol, namba seven dei i stap gohed yet. ?Dei ya blong spel bambae i finis wetaem?
5 Blong ansa long kwestin ya, yumi mas tingbaot se, ?namba seven dei ya i blong wanem? Jenesis 2:3 i talem se: ‘God i blesem namba seven dei ya, mo i makemaot se dei ya i tabu.’ ‘Dei ya i tabu,’ i min se Jehova i makemaot dei ya blong i yusum long wan spesel fasin, hemia blong mekem stamba tingting blong hem i kamtru. Stamba tingting blong hem, hemia se wol ya i mas fulap long ol man mo woman we oli obei long hem, mo we oli lukaot gud long wol ya mo long ol laef samting long hem. (Jen. 1:28) Jehova God mo Jisas Kraes we hem i “Masta blong Sabat dei,” tufala i “stap wok” kasem naoia, blong mekem stamba tingting ya i kamtru. (Mat. 12:8) Dei ya we God i spel long hem, bambae i gohed gogo kasem taem we tingting blong hem i kamtru fulwan. Hemia long en blong Taosen Yia Rul Blong Kraes.
w11 1/7 pej 24-25 haf 6
God i Spel—?Hemia i Minim Wanem?
6 God i talemaot klia nomo long Adam mo Iv, wanem stamba tingting blong hem. Be tufala i no wantem wok blong mekem stamba tingting ya i kamtru. I no tufala nomo we i no wantem obei long God. I gat plante milian narafala man we oli kamaot biaen long tufala, we olgeta tu oli no wantem obei long God. Nesen blong Isrel we God i jusumaot olsem spesel nesen blong hem, hem tu i no wantem obei long God. Mo Pol i givim woning long ol fas Kristin, se sam long olgeta oli save foldaon long fasin ya blong ol man Isrel bifo. Hem i raetem se: “Yumi mas traehad blong kasem spel ya. I nogud wan long yumi i folem fasin blong olgeta ya bifo we oli no obei long God, nao hem bambae i no save kasem spel ya.” (Hib. 4:11) Pol i talem se man we i no obei long God, bambae i no kasem spel ya. ?Long saed blong yumi, tok ya i minim wanem? ?Hem i min se, sipos yumi mekem fasin we i agensem stamba tingting blong God, maet bambae yumi no save joen wetem God long spel ya? I klia se, ansa blong kwestin ya i impoten tumas. Bambae yumi tokbaot samting ya moa. Be fastaem, bambae yumi tokbaot nogud fasin blong ol man Isrel. Bambae yumi luk wanem samting moa we yumi save lanem, blong yumi save joen wetem God long spel blong hem
w11 1/7 pej 27-28 haf 16-17
God i Spel—?Hemia i Minim Wanem?
16 Ol tru Kristin tede oli no ting se oli mas folem Loa blong Moses blong oli save kasem laef. Ol tok we tabu spirit i pulum Pol blong raetem long ol Kristin long Efesas, i klia nomo. Hem i talem se: “God i givhan long yufala long gladhat blong hem, i sevem yufala, from we yufala i bilif long Kraes. Be ol samting ya i no kamaot long yufala, mo i no from ol samting we yufala i mekem. Hem i kamaot long God nomo, olsem wan samting we hem i givim i go nomo long yufala, blong bambae i no gat wan long yufala we i save tok flas from.” (Efes. 2:8, 9) Taswe, ?ol Kristin tede oli mas mekem wanem blong joen wetem God long spel blong hem? Yu mas tingbaot se Jehova i makemaot namba seven dei we hem i spel long hem, blong i mekem stamba tingting blong hem long saed blong wol ya i kamtru fulwan. Hem i yusum oganaesesen blong hem blong tijim yumi long saed blong stamba tingting blong hem, mo blong talem long yumi se hem i wantem we yumi mekem wanem. Yumi save joen wetem Jehova long spel blong hem sipos yumi obei long hem mo oganaesesen blong hem.
17 Be sipos yumi no obei long slef we i stret mo waes, mo sipos yumi obei long samting we yumi nomo yumi ting se i impoten, yumi stap go agensem stamba tingting blong Jehova. Sipos yumi go agensem stamba tingting blong Jehova, yumi no fren blong hem. Long nekis stadi, bambae yumi tokbaot sam samting we oli save kamaot long laef blong yumi, we oli givim janis long yumi blong soemaot se yumi rere blong obei long God no nogat. Bambae yumi luk se desisen we yumi mekem long taem ya, i save soemaot sipos yumi joen wetem God long spel blong hem.
Traem Faenem Ol Gudfala Samting Ya
Kwestin
?Wanem ya “tok blong God” we Hibrus 4:12 i talem se “i laef, mo i stap wok”?
▪ Ol vas raonabaot oli givhan long yumi blong kasem save se Pol i stap tokbaot stamba tingting blong God, olsem we yumi ridim long Baebol.
Plante taem ol buk blong yumi oli tokbaot vas blong Hibrus 4:12 se, Baebol i gat paoa blong jenisim laef blong man, mo hemia i tru. Be i gud blong kasem save samting we Pol i stap tokbaot long vas ya. Hem i leftemap tingting blong ol Kristin long taem ya, blong oli wok folem stamba tingting blong God. Plante long ol tingting ya oli stap long ol tabu hanraet we ol Kristin long taem ya oli gat. Pol i yusum eksampol blong ol man Isrel we God i mekem olgeta oli fri long Ijip. Olgeta ya oli gat janis blong harem gud mo spel, taem oli go long promes lan, we ‘graon blong hem i gud tumas, mo oltaem i karem fulap kakae.’—Eks. 3:8; Dut. 12:9, 10.
Hemia nao stamba tingting blong God. Be ol man Isrel oli no wantem obei long Jehova mo oli no bilif long hem. Taswe, plante long olgeta oli no kasem spel ya. (Namba 14:30; Josua 14:6-10) Nating se i olsem, Pol i talem se yumi gat janis yet from we ‘God i givim promes long yumi blong yumi save kasem spel blong hem.’ (Hibrus 3:16-19; 4:1) I klia nomo se “promes” ya, i wan haf blong stamba tingting blong God. Olsem ol Kristin bifo, yumi tu yumi save lanem mo wok folem stamba tingting blong God. Pol i talem bakegen sam tok blong Jenesis 2:2 mo Ol Sam 95:11, blong makemgud se promes ya i kamaot long Baebol.
Yumi glad tumas blong save se God i promes blong yumi kasem spel blong hem, mo promes ya i stap yet. Yumi trastem ol samting we Baebol i tijim long saed blong spel blong God, mo yumi stap mekem sam samting blong kasem spel ya. ?Olsem wanem? ?Hemia i min se yumi mas folem Loa blong Moses, no yumi mas mekem sam narafala samting bakegen? Nogat. Bilif we yumi gat long God, i mekem se yumi glad blong gohed blong wok folem stamba tingting blong hem. Plante man oli stap stadi Baebol mo oli lanem stamba tingting blong God. Hemia i pulum olgeta blong oli jenisim laef blong olgeta, oli bilif, mo oli baptaes. Ol jenis we oli mekem i pruvum se, “tok blong God i wan samting we i laef, mo i stap wok.” Stamba tingting blong God we Baebol i tokbaot, i jenisim laef blong yumi finis, mo bambae i gohed blong wok long laef blong yumi.
it-1 pej 1139 haf 2
Hop
Yumi save trastem hop ya blong laef olwe wetem wan bodi we i no save roten i blong olgeta we God i “singaot olgeta blong [oli] go laef long heven,” (Hib 3:1) from we hem i tru. I gat tu samting we i mekem se yumi save trastem tok blong God. Ol promes blong hem mo hop we yumi gat long Kraes we naoia hem stap long heven mo bambae i no moa save ded. Taswe Baebol i tokbaot hop ya se “hem i olsem wan angka blong holem laef blong yumi, hem i fas strong mo yumi save trastem, mo i lidim yumi i go insaed gogo [i olsem we] yumi go biaen long bigfala kaliko ya we i blokem rum ya we i tabu we i tabu. Jisas i go insaed long ples ya finis long bihaf blong yumi, blong openem rod blong yumi. Hem i kam hae pris olsem Melkisedek, mo bambae hem i pris oltaem gogo i no save finis.”—Hib. 6:17-20.