Refrens Blong Kristin Wok Mo Laef Buk Blong Miting
3-9 FEBRUARI
OL GUDGUDFALA SAMTING LONG BAEBOL | JENESIS 12-14
“Wan Kontrak We i Gat Paoa Long Yu”
it-1 pej 522 haf 4
Kontrak
Kontrak Wetem Ebraham. Kontrak we God i mekem wetem Ebraham i stat blong kamtru taem Ebram (Ebraham) i krosem Yufretes Reva blong go long Kenan. Loa blong kontrak i stanap 430 yia biaen. (Ga 3:17) Taem Ebraham i stap long Mesopotamia, long taon ya Uru long Koldia, Jehova i talem long hem blong i travel i go long wan kantri we bambae Hem i soemaot long hem. (Wok 7:2, 3; Je 11:31; 12:1-3) Eksodas 12:40, 41 (LXX) i talem se long en blong 430 yia, we oli bin stap long Ijip mo long kantri blong Kenan, “stret long dei ya,” ol man Isrel we oli bin slef long Ijip, oli aot long Ijip. Oli aot long Ijip long Nisan 14, long yia 1513 Bifo Kraes, we hem i dei blong Pasova. (Ek 12:2, 6, 7) Hemia i soemaot se Ebraham i krosem Yufretes Reva blong go long Kenan long Nisan 14, long yia 1943 Bifo Kraes, mo hemia nao taem we God i mekem kontrak wetem Ebraham. Afta we Ebraham i kasem ples ya Sekem long kantri blong Kenan, God i kamtru long hem bakegen mo i mekem promes ya i kam bigwan moa i se, “Hemia nao graon ya we mi bambae mi givim long olgeta we bambae oli kamaot biaen long yu,” nao hem i soemaot olsem wanem kontrak ya i joen wetem promes we hem i mekem long garen blong Iden, mo i talemaot se “[sid]” ya bambae i kam wan man, we bambae i kamaot long laen blong hem. (Je 12:4-7, NW) Ol narafala promes we Jehova i mekem biaen, oli stap long Jenesis 13:14-17; 15:18; 17:2-8, 19; 22:15-18.
w89 1/7 pej 3 haf 4
?From Wanem Yu Mas Save Trutok Long Saed Blong Ebraham?
Hemia i wan nambawan promes, mo Ebraham i harem Jehova i talemaot long tu defren taem. (Jenesis 18:18; 22:18) Blong promes ya i kamtru, God bambae i mekem ol man we oli ded, we oli blong ol defdefren famle, oli laef bakegen. Bambae i wan nambawan blesing blong ol man ya, from we bighaf blong olgeta bambae oli laef bakegen long wol ya we i sem mak olsem Paradaes we man i bin lusum bifo. Biaen, bambae oli lanem olsem wanem blong kasem blesing ya blong laef olwe.—Jenesis 2:8, 9, 15-17; 3:17-23.
it-2 pej 213 haf 3
Loa
Folem sam pruf blong histri, sam man blong stadi dip long Baebol oli bilif se, blong givimaot wan graon, man we bambae i pem graon ya, i mas go stanap long wan ples we i hae blong i save luk stret mak blong graon ya. Taem man we bambae i pem graon ya i talem se, “Mi luk,” hemia i min se folem loa, hem i agri blong tekem graon ya. Taem Jehova i mekem promes blong givim graon blong Kenan long Ebraham, fastaem hem i talem long Ebraham blong i lukluk raon long graon ya. Ebraham i no talem se, “Mi luk,” maet from we God i talem se bambae hem i givim Promes Lan ya i go long olgeta we bambae oli kamaot biaen long Ebraham. (Je 13:14, 15) Jehova i talem long Moses, we i representem ol man Isrel, blong i “lukluk” graon ya, mo sipos hemia nao stret rod blong givimaot graon olsem we ol man blong stadi oli talem, long taem ya Jehova i givim graon ya long ol man Isrel, we bambae Josua i lidim olgeta i go insaed long hem. (Du 3:27, 28; 34:4; mo tu traem tingbaot ol samting we Setan i wantem givim i go long Jisas long Mt 4:8.) Wan narafala samting tu we klosap i sem mak long loa ya hemia: blong wokbaot i gokros long graon ya o go insaed wetem tingting ya blong tekem graon ya. (Je 13:17; 28:13) Long sam olfala buk, taem oli wantem salem wan graon, oli mas kaontem namba blong ol tri we i stap long graon ya.—Skelem wetem Je 23:17, 18.
Traem Faenem Ol Gudfala Samting Ya
Lav i Givhan Long Yumi Blong Stretem Problem
12 Baebol i tokbaot olsem wanem ol man blong God oli save mekem pis, taem i gat wan problem. Yu traem tingbaot Ebraham mo Lot. Tufala i gat plante animol, mo ol man blong lukaot long ol animol blong tufala, oli stap raorao long olgeta from we i no gat ples blong ol animol oli stap long hem. Ebraham i wantem se tufala i gat pis, taswe hem i letem Lot blong i jusum beswan ples we hem i wantem go stap long hem. (Jenesis 13:1, 2, 5-9) !Hemia wan gudfala eksampol blong yumi! ?Olsem wanem? ?Ebraham i harem nogud from gudfala fasin we hem i soemaot long Lot? Nogat. Stret afta long taem ya, Jehova i promes blong blesem Ebraham. (Jenesis 13:14-17) ?Yumi lanem wanem long stori ya? Yumi lanem se Jehova bambae i blesem yumi, taem yumi stretem problem blong yumi long kaen fasin, nating se yumi harem nogud.
it-2 pej 683 haf 1
Pris
Melkisedek we i king blong Salem i wan spesel pris (ko·henʹ). Baebol i no tokbaot laen we hem i kamaot long hem, taem we hem i bon, o ded blong hem. Melkisedek i no kamaot long laen blong ol pris, mo hem i no tekem ples blong wan man o i no gat wan man i tekem ples blong hem. Melkisedek i wan king mo long semtaem hem i wan pris. Hem i wan pris we i hae moa long ol narafala pris we oli kamaot long laen blong Livae, from Livae tu i givim taet i go long Melkisedek. Livae i wan bubu blong Ebraham, mo long taem ya we hem i no bon yet, Ebraham i givim taet long Melkisedek mo Melkisedek i blesem hem. (Je 14:18-20; Hib 7:4-10) Ol samting ya long saed blong Melkisedek oli pija blong Jisas Kraes, we i “wan pris olsem Melkisedek mo bambae [i] pris oltaem gogo i no save finis.”—Hib 7:17.
10-16 FEBRUARI
OL GUDGUDFALA SAMTING LONG BAEBOL | JENESIS 15-17
“?From Wanem Jehova i Jenisim Nem Blong Ebram Mo Sarae?”
it-1 pej 817
Mekem i No Stret, Faenem Poen
Mo tu, plante taem rod we man i folem mo ol samting we hem i mekem oli no stret. Tru long Adam, olgeta man oli gat sin mo oli mekem samting we i no stret. (Ro 5:12; Sam 51:5) Be Jehova, we hem i stretgud olgeta, “hem i savegud we hem i mekem yumi long graon. Oltaem hem i stap tingbaot we yumi kamaot long asis nomo,” mo hem i gat sori long yumi. (Sam 103:13, 14) Hem i tokbaot gudfala man ya blong bilif, Noa, se hem i “wan stret man, we ol man oli no save jajem hem.” (Je 6:9) Hem i talem long Ebraham se, “Oltaem, yu yu mas obei long mi, mo yu mas mekem ol stret fasin.” (Je 17:1) Nating se tufala man ya i sin man mo oli ded, be long lukluk blong Jehova, tufala i stretgud from we “hem i luk wanem i stap long hat blong man.” (1Sa 16:7, NW; skelem wetem 2Ki 20:3; 2Kr 16:9.) Hem i talem long Isrel se: “Yu yu mas soemaot long Jehova we yu no gat poen.” (Du 18:13, NW; 2Sa 22:24) Jehova i givim Pikinini blong hem we i stretgud olgeta (Hib 7:26) olsem wan ransom sakrefaes. Mo long rod ya, hem i save singaot olgeta man we oli soemaot bilif mo oli obei long hem se oli “stret man long fes blong hem,” be long semtaem hem i stap olsem Jaj ya we i jaj long stret fasin mo i no gat poen agens long hem.—Ro 3:25, 26; yu luk INTEGRITY; PERFECTION.
it-1 pej 31 haf 1
Ebraham
Taem i stap pas, mo naoia oli stap long Kenan samwe long ten yia finis, be Sera i no bonem wan pikinini yet. Hem i letem Hega we i woman slef blong hem, blong i go stap wetem Ebraham blong Hega i save gat wan pikinini blong hem. Ebraham i mekem olsem we Sera i talem. Nao long yia 1932 Bifo Kraes, taem Ebraham i gat 86 yia blong hem, Ismael i bon. (Je 16:3, 15, 16) Afta we plante yia i pas, long yia 1919 Bifo Kraes, taem Ebraham i gat 99 yia blong hem, Jehova i talem long Ebraham se olgeta man long famle blong hem oli mas sakomsaes. Hemia i olsem wan saen blong makemaot wan spesel kontrak we hem i gat wetem Ebraham. Mo long taem ya, Jehova i jenisim nem blong Ebram i kam Ebraham, “from we mi mi mekem yu yu kam stamba blong ol man blong plante ples.” (Je 17:5, 9-27; Ro 4:11) !Smol taem biaen, Ebraham i welkamem tri man we oli ol enjel blong Jehova, oli kam long haos blong hem, mo trifala oli mekem wan promes se long nekis yia, Sera bambae i gat bel mo i bonem wan pikinini boe!—Je 18:1-15.
w09 1/2 pej 13
Mining Blong Wan Nem
God hem wan i jenisim nem blong sam man taem hem i wantem talemaot wan profet tok. Eksampol, hem i jenisim nem blong Ebram, we i minim “Papa We Oli Presem Hem,” i kam Ebraham, we i minim “Papa Blong Bigfala Hip Man.” Tok ya i kamtru, from we Ebraham i kam papa blong plante nesen. (Jenesis 17:5, 6) Tingbaot waef blong Ebraham tu, Sarae, we nem ya i minim “Rao.” Hem i mas glad tumas taem God i jenisim nem blong hem i kam “Sera,” we i minim “Mama Blong Ol King.” Hemia i soemaot se bambae ol king oli kamaot long laen blong hem.—Jenesis 17:15, 16.
Traem Faenem Ol Gudfala Samting Ya
it-1 pej 460-461
Ol Samting We Oli Bin Hapen Bifo
Jehova i talem long Ebram (Ebraham) se: “Ol pikinini blong yu we bambae oli kamaot biaen long yu bambae oli go stap long wan narafala kantri, we bambae oli strenja nomo long ples ya. Nao bambae oli kam slef nomo blong ol man blong kantri ya, mo ol man ya bambae oli mekem i strong tumas long olgeta, gogo kasem we fo handred yia i pas.” (Je 15:13; yu luk tu long Wok 7:6, 7.) Tok ya i kamaot bifo we Aesak i bon, we hem nao “pikinini” ya we God i promes blong blesem. Long yia 1932 Bifo Kraes, Ismael we i pikinini blong Ebraham mo woman Ijip ya Hega, i bon, mo long yia 1918 Bifo Kraes, Aesak i bon. (Je 16:16; 21:5) Stat long taem we ol man Isrel oli aot long Ijip, mo yumi kaontem i gobak 400 yia (Je 15:14), bambae yumi kasem yia 1913 Bifo Kraes, mo long taem ya Aesak i gat samwe long faef yia blong hem. I luk olsem se long taem ya Aesak i wan bigfala boe, mo hem i stap finis olsem ‘wan strenja nomo,’ long wan narafala kantri, mo i stat blong harem nogud olsem we Jehova i bin talemaot bifo, hemia taem Ismael i stap “laf nogud” long hem. Long taem ya Ismael i gat samwe long 19 yia blong hem. (Je 21:8, 9) Nating se long taem blong yumi tede samting we Ismael i mekem long Aesak maet i no impoten, be long taem blong bifo samting ya i impoten tumas. Yumi luksave samting ya taem Sera i harem nogud mo God i letem we Hega mo boe blong hem Ismael, tufala i aot. (Je 21:10-13) Taswe stori ya i stap long Baebol blong makem stat blong ol 400 yia we ol man Isrel oli harem nogud, go kasem we oli aot long Ijip.—Ga 4:29.
g 7/12 pej 20 haf 2
?Tok ya i kamtru olsem wanem?: I gat hadtaem blong kasem kakae long kantri ya Kenan, ale ol pikinini blong Ebraham oli go stap long Ijip, gogo kasem taem blong ol smol bubu blong ol smol bubu blong olgeta. Fastaem oli strenja long kantri ya. Biaen oli kam ol slef we oli wokem ol brikis long graon mo drae gras. Yumi traem tingbaot laen blong Livae, we hem i wan smol bubu blong Ebraham. Long laen ya, i gat (1) Livae, (2) Livae i bonem Kohat, (3) Kohat i bonem Amram, mo (4) Amram i bonem Moses. (Eksodas 6:16, 18, 20) Long yia 1513 B.K.T. Moses i lidim ol man Isrel oli aot long Ijip.—Lukluk ol yia we oli stap daon, mo bokis ya “Kaontem Stret Ol Yia.”
17-23 FEBRUARI
OL GUDGUDFALA SAMTING LONG BAEBOL | JENESIS 18-19
“‘Man Blong Jajem Olgeta Man Blong Wol’ i Spolem Sodom Mo Gomora”
Oltaem “Jaj Blong Olgeta Man” i Mekem i Stret
EBRAHAM i talem long Jehova se: “Yu yu man blong jajem olgeta man blong wol. !Yu yu stap jajem man long stret fasin nomo!” (Jenesis 18:25) Long ol tok ya, Ebraham i soemaot se hem i trastem Jehova, blong i jajem tufala taon ya, Sodom mo Gomora, long stret fasin. Hem i gat strong tingting se, “i no fasin” blong Jehova blong spolem stret man wetem rabis man wantaem. Biaen, Jehova i tokbaot hem wan, i se: “Hae God i strong we i strong, . . . hem i stret olwe . . . mo hem i tru. Oltaem, tingting blong hem bambae i stap strong long olgeta. Oltaem hem i stap mekem ol samting we i stret, mo i stap mekem sem mak nomo long olgeta man.”—Dutronome 31:19; 32:4.
Longfala Tingting—?From Wanem i Impoten?
Yes, Jehova nao i beswan eksampol we yumi save folem blong gat longfala tingting. (2 Pita 3:15) Long Baebol, plante taem yumi ridim ol stori we oli soemaot se Jehova i gat longfala tingting. (Nehemaea 9:30; Aesea 30:18) ?Yu tingbaot samting we Jehova i mekem taem Ebraham i askem ol kwestin long saed blong desisen we Jehova i mekem blong spolem Sodom? Jehova i no stopem Ebraham. Hem i gat longfala tingting, mo i soemaot se hem i lesingud long ol kwestin we Ebraham i askem. Biaen, Jehova i talem long Ebraham se bambae hem i no spolem Sodom, nating sipos i gat 10 stret man nomo long taon ya. (Jenesis 18:22-33) !Oltaem Jehova i gat longfala tingting blong lesin, mo hem i neva mekem wan samting we i no stret!
w10 1/11 pej 26 haf 12
!Jehova i Hae God Mo Masta Blong Yumi!
12 Yumi save se i no longtaem, Jehova bambae i soemaot hae rul blong hem. Bambae hem i no letem rabis fasin i gohed olwe. Yumi save se yumi stap finis long ol las dei. Jehova i spolem ol rabis man long bigfala wota we i ron long taem blong Noa. Hem i spolem tufala taon ya Sodom mo Gomora bifo. Hem i kilim i ded King Fero mo ol ami blong hem. Siseraha wetem bigfala ami blong hem, mo Senakerib wetem ol ami blong Asiria, oli no naf blong winim Hae God. (Jen. 7:1, 23; 19:24, 25; Eks. 14:30, 31; Jaj. 4:15, 16; 2 King 19:35, 36) Taswe, yumi save gat strong tingting se Jehova God bambae i no letem ol man oli gohed olwe, blong spolem nem blong hem mo mekem i nogud long ol Witnes blong hem. Mo tu, yumi luk ol saen se Jisas i stap finis, mo se en blong rabis wol ya i klosap.—Mat. 24:3, NW.
Traem Faenem Ol Gudfala Samting Ya
w88 15/5 pej 23 haf 4-5
?I Gat Man We i Luk God Samtaem?
Naoia yumi kasemsave from wanem Ebraham i talem se taem hem i toktok wetem wan enjel we i karem tok blong God, i olsem se hem i toktok stret long Jehova. From we enjel ya i talemaot stret tok we God i wantem talem long Ebraham mo Jehova i sanem hem i go toktok stret long Ebraham, Baebol i talem se “[Jehova] i kamtru bakegen long Ebraham.”—Jenesis 18:1.
Wan enjel blong Jehova i save talemaot ol mesej blong hem, sem mak olsem we wan man i talemaot ol tok i go long narafala tru long telefon o radio. Taswe, yumi kasemsave se taem Ebraham, Moses, Manoa, mo ol narafala oli talem se oli toktok wetem God, hemia i no min se oli toktok stret wetem God, be oli toktok wetem ol enjel blong God. Olgeta man ya oli save luk ol enjel ya mo paoa we Jehova i givim long olgeta, be oli no save luk God. Hemia i stret folem tok we aposol Jon i talem we i se: “I no gat man we i luk God samtaem.” (Jon 1:18) Ol man ya oli no luk God stret, be oli luk ol enjel we God i sanem.
Givhan Long Olgeta We Oli Stap Harem Nogud
3 Taem Lot i muv i go long Sodom we i fulap long ol doti fasin blong seks, hem i mekem wan nogud desisen. (Ridim 2 Pita 2:7, 8.) Graon long ples ya i rij, be Lot i kasem plante problem. (Jen. 13:8-13; 14:12) Waef blong hem i laekem taon ya mo ol fren blong hem, taswe hem i no obei long Jehova. Ale hem i ded taem God i mekem faea mo salfa i kamaot long skae. Tu man we tufala gel blong Lot i rere blong mared long tufala, tufala i ded long faea mo salfa we i kamdaon long Sodom. Lot i lusum haos mo olting blong hem, be hem i harem nogud moa blong lusum waef blong hem. (Jen. 19:12-14, 17, 26) ?Olsem wanem? ?Taem Lot i harem nogud tumas, Jehova i kros long hem? Nogat.
24 FEBRUARI–1 MAJ
OL GUDGUDFALA SAMTING LONG BAEBOL | JENESIS 20-21
“Oltaem Jehova i Mekem Promes Blong Hem i Kamtru”
Mama Blong Ol King
Taem Sera i laf, ?hemia i soem se hem i no gat bilif? Nogat. Baebol i talem se: “Sera tu i bilif, taswe nating se hem i olfala tumas, be hem i gat bel from we hem i trastem Man we i mekem promes long hem.” (Hibrus 11:11) Sera i save Jehova; hem i savegud se Jehova i save mekem eni promes we hem i talem i kamtru. Ating yumi evriwan i nidim blong gat strong bilif olsem. Sipos yumi savegud Jehova, we hem i givim Baebol long yumi, yumi save gat strong bilif olsem Sera. Mo bae yumi luksave se Sera i rili gat strong bilif. !Oltaem Jehova i holem promes blong hem mo i mekem evri promes blong hem i kamtru. Samtaem, hem i save mekem promes blong hem i kamtru long wan fasin we yumi neva tingbaot, mo yumi sapraes long hem o yumi sek long hem!
‘YU MEKEM OLSEM WE HEM I TALEM’
Taem Sera i gat 90 yia, hem i glad tumas blong kasem samting we hem i stap wet long hem longtaem finis i kam. !Hem i bonem wan boe blong gudfala hasban blong hem taem hem i gat 100 yia! Ebraham i mekem olsem we God i talem, i putum nem blong boe ya se Aesak, o “Laf.” Yu traem pijarem Sera, nating se hem i taet, be hem i smael taem i se: “God i mekem mi mi glad, i mekem mi mi laf. Sipos ol man oli harem nius blong samting ya, olgeta evriwan bae oli glad wetem mi, oli laf.” (Jenesis 21:6) Presen ya we Jehova i givim long hem i mas mekem hem i glad tumas. Nating se i olsem, hem i gat bigfala wok tu blong mekem.
Taem Aesak i gat faef yia, ol famle oli mekem wan lafet blong makem dei we hem i livim titi. Be i no evriwan we oli harem gud. Baebol i talem se Sera i stap “luk” wan fasin we i no stret long taem ya. Ismael, boe blong Hega we i gat 19 yia, i stap jikim smol Aesak. Hem i no mekem blong pleplei nomo. Biaen, tabu spirit i pulum aposol Pol blong raetem se, Ismael i stap agensem Aesak. Sera i luksave se Ismael i stap agensem Aesak from ol samting we bae Aesak i kasem. Hem i save se Aesak i no jes pikinini blong hem nomo; be hem i gat wan impoten wok blong mekem stamba tingting blong Jehova i kamtru. Taswe, hem i gat strong tingting blong go toktok stret long Ebraham. Hem i askem Ebraham blong i sanemaot Hega mo Ismael i gowe.—Jenesis 21:8-10; Galesia 4:22, 23, 29.
?Ebraham i harem olsem wanem? Baebol i se: “Tok ya i mekem Ebraham i harem nogud tumas, from we Ismael ya tu i stret pikinini blong hem.” Hem i papa blong Ismael mo hem i lavem Ismael, taswe hem i harem se hem i no save mekem olsem. Be Jehova i save samting we i stret blong mekem, so hem i kam insaed long bisnes ya. Hem i talem long Ebraham se: “Ebraham. Yu no harem nogud from pikinini ya blong yu wetem woman slef ya. Yu mekem olsem we woman blong yu i talem, from we promes ya blong mi we mi talem se, ‘Bambae yu yu gat plante pikinini we bambae oli kamaot biaen long yu, hem bambae i kamtru long pikinini ya blong yu Aesak.’” Jehova i talem long Ebraham se bae hem i lukaot long Hega mo boe blong hem. Ale, Ebraham i mekem olsem we hem i talem.—Jenesis 21:11-14.
Traem Faenem Ol Gudfala Samting Ya
wp17.3 pej 12, futnot
“Yu Yu Naes Tumas”
Sera i wan sista blong Ebraham. Tera hem i papa blong tufala, be tufala i gat tu defren mama. (Jenesis 20:12) Tede wan man i no save maredem wan sista blong hem, be long taem bifo ol man oli save mared olsem. Hemia from we ol man long taem ya, oli gat wan strong bodi we i olsem blong Adam mo Iv. Taswe, taem oli maredem ol famle blong olgeta, samting ya i no save spolem ol pikinini blong olgeta. Be bitim 400 yia afta, ol man oli kam olsem yumi tede, we bodi blong yumi i no moa strong. Mo long taem ya, Jehova i givim Loa long Moses se ol man oli no moa save maredem famle blong olgeta.—Levitikas 18:6.
Yu No Lego
9 Maet yumi wantem mekem moa long wok blong Jehova. ?Be olsem wanem sipos yumi bin wet longtaem finis blong kasem wan wok long kongregesen, no blong ol samting long laef blong yumi oli kamgud moa? Yumi mas gat longfala tingting. (Maeka 7:7) Mo nating se Jehova i letem ol samting ya oli gohed olsem, be yumi sua se bambae hem i gohed blong givhan long yumi. Eksampol blong Ebraham i save givhan long yumi. Jehova i bin promes long hem se bambae hem i gat wan boe, be hem i mas wet plante yia bifo we Aesak i bon. Long ol taem ya, Ebraham i gat longfala tingting mo i neva lego bilif blong hem.—Jenesis 15:3, 4; 21:5; Hibrus 6:12-15.
10 I tru, i no isi blong wet. (Ol Proveb 13:12) Be sipos yumi stap tingting tumas from we laef blong yumi i no jenis kwik nao yumi no glad, bambae tingting blong yumi i foldaon bigwan. Be taem yumi stap wet, i gud yumi traehad blong kamgud moa long ol fasin we yumi mas gat, blong bambae yumi save mekem sam wok long kongregesen.