LAEF BLONG OL KRISTIN

?Yu Save Lanem Wanem Long Ol Kristin We Oli Gat Ekspiriens?

Long kongregesen i gat sam brata mo sista we oli mekem wok blong Jehova blong plante yia. Eksampol blong olgeta blong trastem Jehova i save halpem yumi. Yumi save askem olgeta blong tokbaot histri blong oganaesesen blong Jehova mo olsem wanem Jehova i halpem olgeta blong winim ol trabol. Maet yumi save singaot wan olfala brata o sista i kam long Famle Wosip blong yumi, mo askem hem blong i tokbaot sam ekspiriens blong hem.

Sipos yu wan Kristin we yu stap longtaem long trutok, i gud yu tokbaot ol ekspiriens blong yu long ol Kristin we oli yang. Jekob mo Josef i tokbaot ol ekspiriens blong tufala long ol pikinini we oli kamaot biaen long tufala. (Je 48:21, 22; 50:24, 25) Jehova i talem long ol papa blong tijim ol pikinini long ol bigfala wok blong hem. (Du 4:9, 10; Sam 78:4-7) Tede, ol papa mo mama, mo ol narafala long kongregesen oli save tokbaot long ol yangfala, ol gudfala samting we Jehova i mekem long oganaesesen blong hem.

WAJEM VIDEO YA MIFALA I JOENGUD NATING SE OLI BLOKEM MIFALA, MO BIAEN YU ANSA LONG OL KWESTIN YA:

?Olsem wanem branj blong Ostria i givhan long ol brata long sam kantri we gavman i putum tabu long wok blong yumi?
?Ol brata long ol kantri ya oli mekem wanem blong bilif blong olgeta i stap strong?
?From wanem plante brata mo sista blong Romania oli seraot long oganaesesen blong Jehova? ?Olsem wanem oli kambak?
?Olsem wanem ol ekspiriens ya oli mekem bilif blong yu i strong?

Pija: Ol pija blong video ya ‘Mifala i Joengud Nating Se Oli Blokem Mifala.’ 1. Wan map we i soem ol kantri long Is Yurop we bifo oli blokem wok blong yumi. 2. Wan olfala masin blong printim ol buk. 3. Tu brata long Romania i putum han i goraon long tufala. — !Yu save lanem plante gudfala samting long ol olfala brata mo sista we oli gat ekspiriens!