Refrens Blong Kristin Wok Mo Laef Miting Wokbuk
3-9 JULAE
OL SAS SAMTING LONG BAEBOL | ESRA 4-6
“No Pusum Nus Blong Yufala Long Wok Ya”
?Yu Yu Luk Samting We Sekaraea i Luk?
13 Nating se oli putum tabu long wok blong bildim bak tempol, be tufala man ya we oli putumap tufala blong lidim ol man, hemia Hae Pris Jesua (Josua) mo Hed Gavman ya Serubabel, tufala i “stat blong bildim bakegen haos blong God.” (Esra 5:1, 2) Maet sam man Jiu oli save gat tingting ya se desisen ya i no stret. Ol man Jiu oli no save haed blong bildim tempol, mo oli save se ol enemi bambae oli traehad long evri rod blong traem stopem wok ya. Josua mo Serubabel, tufala i nidim blong harem ol tok we i soemaot se Jehova i stap sapotem olgeta. ?Olsem wanem tufala i harem ol tok ya?
w86 2/1 29, bokis ¶2-3
Ae Blong Jehova i Stap “Lukaot Long Ol Elda Blong Ol Man Jiu”
Afta we wan smol grup blong ol man Jiu oli aot long Babilon oli kambak, wok blong bildim tempol i bin stop blong 16 yia. Profet Hagae mo profet Sekaraea i givhan long ol man Jiu blong gat strong tingting blong bildim bakegen tempol blong Jehova. I no longtaem afta, ol haeman blong Pesia oli traem stopem wok ya. Ol man blong agens oli askem se: “?Hu i givim raet long yufala blong bildim haos ya mo blong finisim ol wok ya?”—Esra 5:1-3.
Ol elda oli mas lukaot gud long ansa we bambae oli givim. Sipos oli lego fraet i winim olgeta, bambae oli no moa bildim tempol. Mo sipos oli mekem ol haeman ya oli kros, olgeta oli save putum tabu long wok blong tempol. So ol elda ya, oli ansa long fasin we i waes (i sua se Hed Gavman ya Serubabel mo Hae Pris Josua nao i lidim olgeta). Oli rimaenem ol haeman ya long loa ya blong bifo, we Saeras i raetem blong letem ol man Jiu oli bildim tempol. Ol haeman blong Pesia oli save se, folem rul blong olgeta, oli no mas agensem eni loa we king i putum. Taswe oli no wantem agensem oda blong king. So wok i gohed kasem we King Darias i givim oda blong apruvum wok we oli stap mekem.—Esra 5:11-17; 6:6-12.
?Yu Yu Luk Samting We Sekaraea i Luk?
7 I gat wan jenis i kamaot we i mekem i gud long ol man we oli stap bildim tempol. ?Wanem jenis ya? Long yia 520 B.K.T., i gat wan niufala king i rul long Pesia, hemia Darias I. Long seken yia we hem i rul, hem i faenemaot se i gat tabu long wok blong bildim tempol. Be biaen hem i givim raet blong oli finisim wok ya. (Esra 6:1-3) Desisen blong king i mekem evriwan oli sapraes. Be i no hemia nomo, hem i mekem sam moa samting. King i givim oda long ol man raonabaot se oli mas stop blong agensem ol man Jiu, mo se oli mas givim mane mo ol narafala samting we ol man Jiu oli nidim blong finisim wok ya. (Esra 6:7-12) From samting ya, fo yia afta, ol man Jiu oli finisim blong bildim tempol, hemia long yia 515 B.K.T.—Esra 6:15
?Yu Yu Luk Samting We Sekaraea i Luk?
16 Wan narafala rod we Jehova i folem blong givim daereksen long yumi, hemia tru long “gudfala slef we i waes.” (Mat. 24:45) Samtaem, slef ya i save givim daereksen we maet yumi no kasemsave fulwan long hem. Eksampol, maet yumi kasem wan daereksen we i talem stret samting we yumi mas mekem blong stap sef long wan disasta, we maet yumi ting se bambae i neva hapen long ples blong yumi. O maet yumi harem se long taem blong pandemik ya, gudfala slef i givim ol daereksen we i bitim mak. ?Bambae yumi mekem wanem sipos yumi harem se ol instraksen ya oli no waes? Yumi save tingbaot eksampol blong ol man Isrel we oli kasem gudfala samting, taem oli lesin long advaes we Jehova i givim tru long Josua mo Serubabel. Mo tu, yumi save tingbaot ol stori long Baebol we yumi bin ridim. Samtaem ol man blong God oli kasem daereksen, we long lukluk blong man hemia i narakaen, be daereksen ya i sevem laef blong olgeta.—Jaj. 7:7; 8:10.
Ol Gudgudfala Samting
?Yu Save Trastem Baebol?
Mane ya oli wokem long Tasas, wan taon we i stap long saotis blong kantri ya we naoia oli kolem Teki. Mane ya oli wokem long taem ya we man Pesia ya, Mazaeus hed gavman i stap rul biaen long yia tri handred B.K.T. Hem i makemaot hem olsem hed gavman long distrik “Longwe long Reva ya,” hemia, Reva Yufretes. ?Be from wanem yumi intres long tok ya?
From we bambae yu faenem sem ples ya long Baebol blong yu. Esra 5:6–6:13 i tokbaot Darias, King blong Pesia mo wan hed gavman nem blong hem Tattenai. Tokbaot taem ya we ol man Jyu oli stap wokem bakegen tempel blong olgeta long Jerusalem. Esra i gat gudhan blong mekem kopi long Loa blong God, mo bambae yu tingting se hem i mas raetem samting we i stret. Bambae yu luk long Esra 5:6 mo 6:13 se hem i tokbaot Tattenai se “hed gavman longwe long Reva.”
Esra i raetemdaon tok ya kolosap 460 B.K.T., kolosap 100 yia bifo we oli wokem mane ya. Maet, sam man oli ting se ples blong wan haeman bifo olsem, hem i nating nomo. Be sipos yu trastem ol man blong raetem Baebol long ol smosmol samting olsem, bambae yu save trastem moa ol narafala samting we oli raetem.
10-16 JULAE
OL SAS SAMTING LONG BAEBOL | ESRA 7-8
“Fasin Blong Esra i Leftemap Nem Blong Jehova”
Stadi i Karem Gudfala Frut Mo Glad
8 Yes, lav we yumi gat long Tok blong Jeova i mas kamaot long hat blong yumi, we i stamba blong ol filing. Yumi mas glad blong tingting dip long ol vas we yumi jes ridim. Tekem taem blong tingting long ol dip samting long saed blong spirit, putum tingting i stap strong long olgeta, mo tingting dip long olgeta. Blong mekem olsem, yumi nidim blong stap kwaet, tingting gud long samting we yu jes ridim mo prea. Olsem Esra, yumi mas mekemrere hat blong yumi, blong ridim mo stadi long Tok blong God. Baebol i tokbaot hem i se: “Esra i mekemrere hat blong hem finis blong ridimgud loa blong Jeova, mo blong mekem i wok, mo blong tijim ol man Isrel long ol rul mo long stret fasin.” (Esra 7:10, NW) Makemgud trifala risen from wanem Esra i mas mekemrere hat blong hem: blong stadi, blong mekem samting we hem i lanem i wok long laef blong hem, mo blong tijim narafala. I gud yumi folem eksampol blong hem.
si 75 ¶5
Buk Blong Namba 13—1 Kronikel
5 I nogat wan narafala we i naf blong givim ol stret save long saed blong histri ya, olsem we Esra i mekem. Hemia from we “Esra i rerem hat blong hem blong stadi long Loa blong Jehova mo mekem Loa ya i wok long laef blong hem, mo blong i tijim ol man Isrel long ol rul mo ol jajmen we oli kamaot long Loa ya.” (Esra 7:10) Jehova i yusum tabu spirit blong givhan long Esra. Taem king blong Pesia i luk waes we God i givim long Esra, hem i mekem Esra i kasem wan hae posisen long distrik blong Juda. (Esra 7:12-26) From raet we king i givim long Esra mo from help blong tabu spirit, Esra i gat akses long ol beswan infomesen blong i save raetem ol buk ya.
it-1 1158 ¶4
Tingting Daon
Lukaotgud Long Man. Man we i mekem tingting blong hem i stap daon long fored blong God, God bambae i lukaotgud long hem. Esra i kasem wan bigfala wok hemia blong lidim bitim 1,500 man we oli stap long Babilon oli go Jerusalem. Hemia i minim tu ol pris, ol Netinim, ol woman mo ol pikinini. Be i no hemia nomo, taem oli aot, oli karem plante plante gol mo silva blong flasem haos tempol long Jerusalem. From samting ya, i isi nomo blong ol man oli stilim ol samting ya. Nating se i olsem, Esra i no askem king blong Pesia blong letem ol ami blong hem oli lidim olgeta, hem i no wantem dipen long paoa blong ol man. Mo tu, hem i bin talem finis long king se: “Gudfala han blong God blong mifala i stap wetem olgeta we oli stap lukaot hem.” Esra i askem ol man blong oli fasting, blong oli mekem tingting blong olgeta i stap daon long fored blong Jehova. Taem oli askem help long God, Hem i lesin long olgeta mo i protektem olgeta long longfala trip ya, nao oli kasem Jerusalem sef nomo. (Esr 8:1-14, 21-32) Taem profet Daniel i go kalabus long Babilon, hem i gohed blong mekem tingting blong hem i stap daon long fored blong Jehova. From samting ya, Jehova i glad tumas long hem mo i sanem wan enjel i kam long hem tru long wan vison.—Da 10:12.
Ol Gudgudfala Samting
Ol Bigfala Poen Long Buk Blong Esra
7:28–8:20—?From wanem plante man Jiu long Babilon oli no wantem folem Esra blong gobak long Jerusalem? Nating se moa long 60 yia i pas finis afta we ol faswan grup blong ol man Jiu oli kambak long ples blong olgeta, i gat bigfala ples i stap yet long Jerusalem. Taem oli kambak long Jerusalem, oli mas statem wan niufala laef bakegen long wan ples we laef i no isi mo i gat denja. Jerusalem long taem ya i no gat ol samting we ol man Jiu ya oli nidim blong laef olsem we oli gat long Babilon. Mo yumi no mas fogetem tu se trip blong olgeta ya i denja tumas. Ol man Jiu ya oli mas gat strong bilif long Jeova, oli mas gat strong tingting blong leftemap trufala wosip mo oli mas gat fasin no fraet blong livim Babilon blong kam long Jerusalem. Esra tu i nidim we Jeova i leftemap tingting blong hem mo i givim paoa long hem. Ale, i gat 6,000 man—hemia 1,500 famle—oli folem tok blong Esra. Mo taem Esra i rere blong aot, 38 Livaet mo 220 Netinim oli biaen long hem.
17-23 JULAE
OL SAS SAMTING LONG BAEBOL | ESRA 9-10
“Trabol i Kamaot Taem Yu No Obei”
Ol Bigfala Poen Long Buk Blong Esra
9:1, 2—?From wanem fasin ya blong mared wetem ol woman blong ol narafala kantri i wan denja long ol man Isrel? God i jusumaot neson blong Isrel olsem ol man blong holem klin wosip blong Hem gogo kasem taem we Mesaea i kam. Fasin ya blong mared wetem ol woman blong ol narafala kantri i rili save spolem trufala wosip. From we sam long olgeta oli mared wetem ol woman we oli wosip long ol aedol, maet samting ya i save pulum fulwan neson ya blong sapotem giaman wosip blong ol narafala neson. Trufala wosip i save lus fulwan. ?Ale sipos i olsem be bambae Mesaea i kamtru long laen blong hu? !Hemia nao from wanem Esra i sek taem hem i luk samting we i stap hapen long ples ya!
?Jehova i Askem Yumi Blong Mekem Wanem?
Taem yumi glad nomo blong obei, bambae yumi kasem blesing. Moses i raetem se: “Yu mas holemtaet ol komanmen . . . we mi mi stap talemaot long yu tede. Hemia bambae i givhan long yu.” (Vas 13) Yes, hemia i min se evri komanmen blong Jehova o evri samting we hem i askem yumi blong mekem, i blong givhan long yumi. Ol komanmen ya oli no blong spolem yumi, from we Baebol i se: “God hem i lav.” (1 Jon 4:8) God i givim ol komanmen ya blong halpem yumi blong gat wan gudfala laef. (Aesea 48:17) Taem yumi folemgud olgeta samting we Jehova i askem yumi blong mekem, bambae yumi no fesem tumas hadtaem naoia, mo long fiuja yumi save enjoem ol nambawan blesing we i kamaot taem Kingdom i rul.
Ol Gudgudfala Samting
Ol Bigfala Poen Long Buk Blong Esra
10:3, 44—?From wanem oli sanem ol woman ya wetem ol pikinini blong olgeta oli gobak long ples blong olgeta? Sipos ol pikinini ya oli bin stap, bambae i isi nomo long ol woman ya blong oli kambak blong luk ol pikinini blong olgeta bakegen. Antap moa, hemia from we ol pikinini oli nidim moa we mama i kea long olgeta.
24-30 JULAE
OL SAS SAMTING LONG BAEBOL | NEHEMAEA 1-2
“Nao Wantaem Nomo Mi Prea”
Tingbaot Jeova Oltaem Olsem We Yu Stap Luk Hem
5 Samtaem, maet yumi nidim blong askem God kwiktaem blong i halpem yumi. Wan taem, King Ataksekses blong Pesia i luk we man blong karem waen blong hem, hemia Nehemaea, i no glad. Ale King ya i askem se: “?Bambae mi mi mekem olsem wanem blong givhan long yu?” ‘Nao wantaem nomo Nehemaea i prea long God blong heven.’ I klia se prea ya we Nehemaea i mekem i sot nomo, mo i wan prea we hem i mekem long tingting blong hem nomo. Nating se i olsem, God i ansa long prea ya, from we King i halpem Nehemaea blong bildim bak stonwol long Jerusalem. (Ridim Nehemaea 2:1-8.) Yes, nating se prea blong yumi i sot mo yumi talem long tingting blong yumi nomo, Jeova i save ansarem prea ya.
Yusum Ol Prapa Tok Blong Yu
Sipos yu mas ansa long kwestin we wan man i askem be yu no gat taem blong rerem toktok blong yu, ?wanem i save givhan long yu blong yu givim wan gudfala ansa? Yu save folem fasin blong Nehemaea. Hem i prea long tingting blong hem bifo we hem i ansa long kwestin blong King Ataksekses. (Neh. 2:4) Afta, yu save mekem wan plan kwiktaem long tingting blong yu. Ol step blong mekem wan plan, hemia: (1) Yu tingbaot wan no tu poen we yu mas eksplenem (maet yu jusum ol poen long buk ya Reasoning From the Scriptures no Statem Wan Storian Long Baebol Mo Gohed Long Hem). (2) Yu jusum ol vas blong sapotem ol poen ya. (3) Yu tingbaot ol tok we yu save talem long kaen fasin blong statem wan storian we man i glad blong lesin long hem. Nao yu stat blong toktok.
Ol Gudgudfala Samting
w86 2/15 25
Tru Wosip Bambae i Win
Nogat, Nehemaea i bin stap tokbaot finis situesen blong Jerusalem long ol prea we hem i stap mekem “long dei mo long naet.” (1:4, 6) Hem i rili wantem givhan long wok ya blong bildim bak ol wol blong Jerusalem. Nao taem hem i gat janis blong talemaot filing blong hem long King Ataksekses, hem i prea bakegen olsem we hem i stap mekem finis. Jehova i ansa long prea blong hem, taem i letem hem i lidim wok blong bildim bak stonwol.
Yumi Lanem Wanem: Nehemaea i dipen long Jehova. Taem yumi gat wan bigfala desisen blong mekem, yumi save mekem olsem Nehemaea, yumi “prea oltaem” mo wok folem samting we Jehova i talem.—Rom 12:12.
31 JULAE–6 OGIS
OL SAS SAMTING LONG BAEBOL | NEHEMAEA 3-4
“?Yu Yu Ting Nating Long Wok Blong Klinim Mo Fiksim Ol Samting?”
Ol Bigfala Poen Long Buk Blong Nehemaea
3:5, 27. I nogud yumi tinghae tumas long yumi wan nao yumi no wantem mekem wok olsem klinim, fiksimap, no bildim samting blong sapotem trufala wosip. Hemia fasin we “ol lida” blong ol man Tekoa oli mekem. I moagud yumi gat fasin blong ol man Tekoa we oli rere nomo blong mekem wanem wok we oli putum long han blong olgeta.
?Bambae Jehova i Yusum Yu Olsem Wanem?
11 Plante handred yia biaen, Jehova i yusum ol gel blong Salum wetem sam narafala, blong oli wokem bakegen stonwol blong Jerusalem. (Neh. 2:20; 3:12) Nating se papa blong olgeta i pikinini blong king, be oli glad blong mekem wok ya we i had mo i denja. (Neh. 4:15-18) !Oli defren olgeta long ol haeman blong Tekoa, we “oli no wantem” wok had! (Neh. 3:5) !Traem tingbaot olsem wanem ol gel blong Salum oli glad taem stonwol ya i finis long 52 dei nomo! (Neh. 6:15) Tede tu, plante gudfala sista oli glad blong joen long spesel wok ya blong bildim mo fiksimap ol haos wosip. Yumi nidim ol sista ya we oli gat gudhan, oli glad blong wok, mo oli holemstrong long God, blong oli givhan long ol bigfala wok ya.
Kasem Tingting Blong Kraes Long Saed Blong Haenem
16 Olgeta Kristin, ol yangfala mo ol olfala, oli mas traehad blong wokem tingting blong Kraes long saed blong haenem. I gat plante defdefren wok blong mekem insaed long kongregesen. Yumi neva mas kros sipos oli askem long yumi blong mekem sam wok we yumi ting se i daonem yumi. (1 Samuel 25:41; 2 King 3:11) Ol papa mama, yufala i mas pulum ol pikinini mo yangfala blong yufala, blong oli glad long enikaen wok we oli kasem, nating se hem i long Haos Kingdom, no long taem blong asembli. Mo i gud sipos oli luk we yufala papa mama tu i mekem ol wok ya we i daon. Wan brata we i wok naoia long hedkwota blong ol Witnes blong Jeova i rimemba gudfala eksampol blong papa mama blong hem. Hem i se: “Taem mi luk fasin blong tufala blong mekem ol wok blong klinim Haos Kingdom no ples blong asembli, mi luksave se ol wok ya oli impoten tumas long tingting blong tufala. Plante taem oli rere blong mekem ol wok we oli save givhan long kongregesen no long ol brata, nating se maet long lukluk blong narafala, ol wok ya oli nating nomo. Fasin blong tufala i halpem mi naoia, blong mi rere oltaem blong mekem enikaen wok we oli askem mi blong mekem long haos Betel.”
Ol Gudgudfala Samting
Ol Bigfala Poen Long Buk Blong Nehemaea
4:17, 18—?Olsem wanem ol man oli save wokem stonwol long wan han nomo? Hemia i no hadwok tumas long ol wokman we oli stap karem ol hevi samting. Taem oli putum hevi samting antap long hed no solda blong olgeta, i isi nao blong oli holem hevi samting ya long wan han, we long semtaem oli stap ‘holem samting blong faet long narafala han.’ Be, olgeta we oli wok antap long stonwol, we olgeta oli nidim tufala han long wok blong olgeta, oli “hangem naef blong faet long strap blong olgeta” mo semtaem oli stap wok. Ol man ya oli rere oltaem blong faet sipos ol enemi oli kam agensem olgeta.
7-13 OGIS
OL SAS SAMTING LONG BAEBOL | NEHEMAEA 5-7
“Nehemaea i No Dipen Long Narafala, Hem Tu i Wok”
Ol Man We Oli Sapotem Trufala Wosip Bifo Mo Tede
Nehemaea i no jes givim taem mo save blong hem nomo long wok ya. Hem i yusum ol samting we hem i gat blong sapotem trufala wosip. Hem i yusum mane blong hem blong pemaot ol brata blong hem, hemia ol man Jiu we oli kam slef. Hem i givim mane blong hem olsem lon, be i no mekem man i pem intres long hem. Hem i neva “mekem i strong tumas” long ol man Jiu. Hem i no fosem olgeta blong givim ol samting we hem i gat raet blong kasem olsem distrikejen. Defren olgeta, oltaem hem i welkamem ol man oli kam long haos blong hem. I gat ‘wan handred fifti man Juda we oltaem oli stap kakae wetem hem mo ol man blong ol narafala kantri tu oli stap kakae wetem hem.’ Evri dei hem i “stap kilim wan buluk, mo sikis sipsip we i beswan, mo plante faol,” blong kakae wetem ol man we oli kam luk hem. Mo oltaem, long evri ten dei, hem i givim “plante waen long ol man ya blong oli no sot”—yes, olgeta samting ya Nehemaea nomo i pem.—Nehemaea 5:8, 10, 14-18.
‘Yu No Letem Han Blong Yu i Slak’
16 Jehova i givim paoa long Nehemaea mo ol man Jiu blong mekem olgeta oli strong. !Oli finisim stonwol blong Jerusalem long 52 dei nomo! (Neh. 2:18; 6:15, 16) Nehemaea i no stanap blong lukluk nomo, be hem i joen blong givhan long wok ya. (Neh. 5:16) Long sem fasin, plante elda oli givhan blong bildim no lukaot gud long ol Haos Kingdom. Mo tu, oli givhan long ol brata mo sista we oli wari, taem oli visitim olgeta mo prij wetem olgeta.—Ridim Aesea 35:3, 4.
?Jeova Bambae i Tingbaot Yu Olsem Wanem?
Plante taem, Baebol i soem se taem God i tingbaot, “tingbaot” i minim se hem i tekem strong aksin. Eksampel, afta we bigfala ren i foldaon blong 150 dei mo wota i kavremap ful wol, “God i stap tingbaot Noa yet . . . , nao i sanem wan win i blu long wota ya, mo wota i stat blong godaon bakegen.” (Jenesis 8:1) Plante handred yia biaen, ol man Filistaen oli spolem ae blong Samson mo oli fasem hem long jen. Samson i prea long God se: “Hae God, yu yu Masta blong mi. Plis mi wantem blong yu yu tingbaot mi bakegen. God, plis yu mekem mi mi kam strong bakegen wan taem moa.” Jeova i tingbaot Samson, i givim paoa long hem we i bigwan moa bitim paoa blong man, blong Samson i save givimbak ol samting nogud we ol enemi blong God oli mekem long hem. (Jajes 16:28-30) Long saed blong Nehemaea, Jeova i blesem ol traehad blong hem, mo trufala wosip i stanap bakegen long Jerusalem.
Ol Gudgudfala Samting
‘Holemstrong Ol Stret Fasin Blong Winim Ol Rabis Fasin’
15 Namba tri samting, ol enemi blong Nehemaea oli yusum wan man Isrel nomo we hem i rabis man, nem blong hem Semaea, blong traem pulum Nehemaea blong brekem Loa blong God. Semaea i talem long Nehemaea se: “Bambae yumitufala i go haed insaed long Rum ya we i Tabu, long haos blong God, yumitufala i lokem doa, from we olgeta ya oli wantem kam kilim yu.” Semaea i talem long Nehemaea se ol man oli wantem kilim hem i ded ale hem i save sef sipos i go haed long tempol. Be, Nehemaea i no wan pris. Sipos hem i go haed long haos blong God, hem i mekem wan bigfala sin ya. ?Olsem wanem? ?Nehemaea bambae i brekem Loa blong God blong traem sevem hem wan? Nehemaea i talem long Semaea se: “?Yu ting se mi save go haed long haos blong God blong sevem laef blong mi? !Mi mi no save mekem samting ya!” ?From wanem Nehemaea i no foldaon long trap ya? From we hem i save se, nomata sipos Semaea i wan man Isrel nomo, be i no ‘God we i talem samting ya long hem.’ Hem i save se wan trufala profet blong God bambae i neva talem long wan man blong mekem samting we i agensem Loa blong God stret. Long taem ya bakegen, Nehemaea i no letem ol enemi blong hem oli winim hem. Smoltaem biaen, hem i save raetem se: “Olgeta wok blong bigfala stonwol ya i finis long manis ya Elul, long namba twanti faef, mo mifala i wok fifti tu dei long hem.”—Nehemaea 6:10-15; Namba 1:51; 18:7.
14-20 OGIS
OL SAS SAMTING LONG BAEBOL | NEHEMAEA 8-9
“Glad We i Kamaot Long Jehova, Hem i Strong Ples Blong Haed Blong Yufala”
Samting We Yumi Lanem Long Wan Gudfala Prea
2 Wan manis bifo long spesel asembli ya, ol man Jiu oli finisim wok ya blong mekem gud bakegen stonwol blong Jerusalem. (Neh. 6:15) Oli finisim wok ya long 52 dei nomo. Nao long namba wan long manis ya Tisri, oli mekem wan bigfala miting long open ples nomo. Oli lesin long Esra mo ol Livaet we oli ridimaot Loa blong God mo oli eksplenem. (Pija 1) Ol papa mo mama wetem ol pikinini blong olgeta, olgeta evriwan oli stanap mo oli lesin, stat long taem ya we san i girap long moning go kasem medel dei. Ol man Isrel ya oli soemaot wan gudfala eksampol long yumi. Nating se yumi go sidaon long ol gudfala jea blong lesin long miting long Haos Kingdom, plante taem tingting blong yumi i flae olbaot. Be ol man Isrel ya oli lesin gud, oli tingbaot samting we oli harem, mo taem oli kasem save se oli no stap obei long Loa blong God, oli krae.—Neh. 8:1-9.
?Bambae Yu Letem ‘Tabu Spirit i Lidim Yu’?
9 Glad, hem i fasin blong harem gud tumas. Jeova i “stap harem gud oltaem.” (1 Timoti 1:11; Ol Sam 104:31) Pikinini blong hem i glad tumas blong mekem samting we Papa blong hem i wantem. (Ol Sam 40:8; Hibrus 10:7-9) Mo “glad blong Jeova i olsem strong haos, i stap givim paoa long [yumi].”—Nehemaea 8:10, NW.
10 Glad we God i givim, i mekem se yumi harem gud taem yumi mekem samting we hem i wantem, nating se yumi kasem hadtaem, soasore, mo fasin agens. Mo taem yumi ‘savegud God,’ hemia i mekem yumi glad tumas. (Ol Proveb 2:1-5) Fasin fren wetem God we i givim glad, i stanap long stret save long saed blong God mo bilif long hem mo long ded blong Jisas we i pemaot yumi. (1 Jon 2:1, 2) Wan narafala samting we i givim glad, hemia blong joen wetem bigfala kampani blong ol Kristin brata sista blong yumi raon long wol. (Sefanaea 3:9; Hagae 2:7) Ol promes blong Kingdom mo bigfala blesing blong talemaot gud nius, i givim glad long yumi. (Matiu 6:9, 10; 24:14) Mo yumi glad long janis we yumi gat blong kasem laef we i no save finis. (Jon 17:3) Janis blong kasem nambawan fiuja olsem i mas mekem yumi “glad” tumas.—Dutronome 16:15.
Ol Gudgudfala Samting
it-1 145 ¶2
Arameik
Sam yia afta we ol man Jiu oli aot long Babilon oli kambak, pris ya Esra i ridimaot kopi blong Loa long ol man Jiu we oli kam wanples long Jerusalem, mo ol defdefren Livaet oli eksplenem ol samting ya long ol man. Nehemaea 8:8 i se: “Mo olgeta oli gohed blong ridimaot buk ya long bigfala voes, hemia Loa blong tru God, mo oli eksplenem klia Loa ya mo oli talemaot mining blong hem. Long rod ya, olgeta oli givhan long ol man blong oli kasemsave ol tok ya we oli stap ridim.” Maet tok ya eksplenem klia mo talemaot mining blong hem, i soemaot se ol Livaet oli transletem ol toktok we i stap long Hibru i go long Arameik, lanwis we maet ol man Hibru oli toktok long hem taem oli stap long Babilon. Tok ya eksplenem i save givim tingting ya tu se, oli givim moa ditel long samting we oli tokbaot, blong givhan long ol man Jiu. I tru, nating se ol man Jiu oli save lanwis Hibru finis, be hemia i blong givhan long olgeta blong kasemsave from wanem ol samting ya oli impoten.
21-27 OGIS
OL SAS SAMTING LONG BAEBOL | NEHEMAEA 10-11
“Oli Lego Sam Samting Blong Mekem Wok Blong Jehova”
Wan Jerusalem We i Stret Wetem Mining Blong Nem Ya
13 ‘Strong promes’ we ol lida oli saen long hem long taem blong Nehemaea, i mekem se ol man blong God bifo, oli rere blong dediketem stonwol blong Jerusalem. Be oli mas tingbaot wan narafala impoten bisnes. Naoia we wan bigfala stonwol wetem 12 doa i raonem Jerusalem, taon ya i nidim plante man. I tru se i gat sam man Isrel oli stap long taon ya. Be ‘Jerusalem i wan bigfala taon, we i no gat plante man i stap long hem.’ (Nehemaea 7:4) Blong stretem problem ya, ol man oli mekem plan se “long evri ten famle, oli jusumaot wan famle se oli mas stap long taon ya.” Olgeta man oli agri fulwan long plan ya. Nao oli stap presem ‘olgeta ya we oli glad blong go stap long Jerusalem.’ (Nehemaea 11:1, 2) !Hemia wan nambawan eksampel long ol trufala man blong wosip tede, we oli jenisim sam samting long laef blong olgeta blong go wok long ol ples we i nidim ol Kristin we oli bigman long saed blong spirit!
w86 2/15 26
Tru Wosip Bambae i Win
I no isi blong ol man oli lego ol samting we oli kasem long ol olfala blong olgeta mo muv i go long Jerusalem, from maet oli save gat problem long saed blong mane o fesem sam narafala problem. Mo tu, olgeta we oli go laef long taon ya, maet isi nomo blong oli kasem ol defdefren trabol. Nating se i olsem, sam narafala oli tinghae long fasin ya we man i glad nomo blong volontia mo oli prea blong Jehova i blesem olgeta.
God i Blesem Man We i Bilif Strong
15 Taem yumi givim laef blong yumi i go long Jehova, yumi promes blong mekem samting we hem i wantem, nomata wanem i hapen. Yumi save finis se bambae i no isi oltaem blong holem promes ya. Yu traem tingbaot: ?Yumi mekem wanem taem Jehova i askem long yumi blong mekem samting we yumi no laekem? Sipos yumi winim nogud tingting ya mo yumi obei long God, yumi stap holem promes blong yumi. Maet yumi harem nogud blong lego samting we yumi wantem, be blesing we Jehova i givim bambae i bigwan moa i bitim samting we yumi lego. (Mal 3:10) ?Olsem wanem long gel blong Jeftaha? ?Hem i mekem wanem taem hem i harem promes blong papa blong hem?
Ol Gudgudfala Samting
Ol Bigfala Poen Long Buk Blong Nehemaea
10:34—?From wanem ol man oli mas tekem faeawud i kam? Hemia i no wan loa we i kamaot long Loa blong Moses. Ating oli putum loa ya nomo from we i nidim inaf faeawud blong bonem sakrefaes long olta. Mo ating i no gat inaf Netinim blong mekem wok ya. Ol Netinim hemia ol man we oli no blong Isrel be oli holem wok olsem slef insaed long haos prea blong God. From samting ya, ol man Isrel oli yusum ol spesel ston blong faenemaot se laen blong hu bambae i mekem wok ya blong tekem faeawud i kam long haos prea, blong mekem se ol pris oli neva sot long faeawud.
28 OGIS–3 SEPTEMBA
OL SAS SAMTING LONG BAEBOL | NEHEMAEA 12-13
“Stap Tru Long Jehova Taem Yu Jusum Ol Fren”
it-1 95 ¶5
Ol Man Amon
Afta we oli ronemaot Tobia long yad blong tempol, oli ridimaot Loa blong God we i stap long Dutronome 23:3-6 mo oli folem Loa ya. Loa ya i se ol man Amon mo ol man Moab oli no gat raet blong joen long kongregesen blong Isrel. (Neh 13:1-3) Loa ya i bin kamaot finis samwe 1,000 yia bifo, taem ol man Isrel oli stap go klosap long Promes Lan. Jehova i givim loa ya, from we ol man Amon mo ol man Moab oli no wantem givhan long ol man Isrel taem oli nidim help. Loa ya i min se ol man ya oli no save kam wan memba blong Isrel, mo kasem ol raet we wan memba i save kasem. Be hemia i no min blokem ol man ol man Amon mo ol man Moab oli no save storian wetem ol man Isrel, o laef klosap long olgeta, o kasem blesing from oli stap wetem ol man blong God, nogat. Yumi luk samting ya long eksampol blong Jelek we yumi bin tokbaot finis, we i lida blong ol ami blong Deved, mo long stori blong Rut we i wan woman Moab.—Ru 1:4, 16-18.
God i Mekem Yufala i Tabu
5 Ridim Nehemaea 13:4-9. I gat plante samting raonabaot long yumi we oli save pulum yumi blong mekem samting we i no stret. Taswe i no isi long yumi blong stap tabu oltaem. Yu traem tingbaot Eliasib mo Tobia. Eliasib i hae pris, mo Tobia i wan man Amon. I luk olsem se Tobia i gat wan posisen we i no impoten tumas long ofis blong ol man Pesia, we i stap long Judia. Hem mo ol fren blong hem oli kros we oli kros taem Nehemaea i wantem wokem gud stonwol blong Jerusalem. (Neh. 2:10) Ol man Amon oli no gat raet blong kam insaed long haos tempol. (Dut. 23:3) Taswe, ?from wanem hae pris i letem Tobia i yusum wan long ol bigfala rum ya?
6 Eliasib i wan gudfala fren blong Tobia. Tobia mo boe blong hem Jehohanan tufala i mared wetem ol woman Isrel, mo plante man Jiu oli tinghae long Tobia. (Neh. 6:17-19) Wan long ol smol bubu blong Eliasib i mared long gel blong Sanbalat, wan haeman blong Sameria, we i wan gudfala fren blong Tobia. (Neh. 13:28) Tobia i wan man we i no bilif mo hem i agensem God. Ale, from we Hae Pris Eliasib i wan fren blong Tobia, ating samting ya nao i mekem se Eliasib i letem Tobia i pulum hem blong mekem samting we i no stret. Be Nehemaea i soemaot se hem i holemstrong long Jehova, ale hem i sakemaot olgeta samting blong Tobia we oli stap long bigfala rum ya.
Winim Ol Traem Long Fasin Blong Stap Strong Oltaem
6 Sipos yumi stap strong long Jeova God oltaem, bambae yumi no fren wetem ol enemi blong hem. Hemia nao risen from wanem disaepol Jemes i raetem se: “Yufala i olsem woman we i stap mekem i krangke long man blong hem, i stap slip wetem narafala man. ?Weswe yufala i no save? Man we i stap folem ol fasin blong wol, olsem we i mekem fren wetem olgeta, wantaem nomo hem i mekem badfren long God. Taem yufala i mekem fren wetem ol fasin blong wol, semtaem nomo yufala i mekem badfren long God.” (Jemes 4:4) Yumi wantem gat fasin blong stap strong long God oltaem olsem King Deved i soemaot, taem hem i talem se: “Hae God, mi mi no laekem nating olgeta ya we oli no laekem yu, mi mi agens long olgeta from we oli stap agens long yu. Oltaem mi stap harem nogud from we olgeta ya oli stap mekem i nogud long yu. Mi mi no laekem olgeta we mi no laekem olgeta nating, oltaem mi stap makem olgeta se ol enemi blong mi nomo.” (Ol Sam 139:21, 22) Yumi no wantem kampani blong haremgud wetem eni man we i wantem mekem sin oltaem, from we oli no sem mak long yumi. Fasin blong stap strong long God bambae i blokem yumi blong no joen blong haremgud wetem ol enemi ya blong Jeova, nating se yumi kampani wetem olgeta stret, no tru long televisin.
Ol Gudgudfala Samting
it-2 452 ¶9
Miusik
Wok ya blong singsing long tempol i wan impoten wok. Hemia i tru from we long Baebol, i gat plante refrens we i tokbaot ol man blong singsing, mo tu olgeta oli no stap joen blong “mekem ol narafala wok” we ol Livaet oli mekem, from oli mas fokas long singsing. (1Kr 9:33) Baebol i gohed blong tokbaot olgeta olsem wan spesel grup blong ol Livaet, taswe nem blong olgeta i stap long wan defren lis, i no joen wetem lis blong ol narafala man we oli aot long Babilon blong kam long Jerusalem. (Esr 2:40, 41) Iven ol haeman blong King Ataksekses (Longimanus) we i king blong Pesia, oli givhan long olgeta, taem oli putum olgeta wetem sam narafala spesel grup we oli no nid blong pem ‘takis.’ (Esr 7:24) Biaen, king i givim oda blong ol “samting we bambae oli kasem evri dei folem nid blong olgeta.” Nating se oda ya i kamaot long Ataksekses, be i sua se Esra nao i mekem plan ya, folem haenem we Ataksekses i givim long hem. (Neh 11:23; Esr 7:18-26) Taswe, nating we ol man blong singsing oli ol Livaet, be Baebol i tokbaot olgeta olsem wan spesel grup, be i no wan grup nomo, i se “ol Livaet mo ol man blong singsing.”—Neh 7:1; 13:10.