Refrens Blong Kristin Wok Mo Laef Miting Wokbuk
© 2025 Watch Tower Bible and Tract Society of Pennsylvania
5-11 JENUWARE
OL SAS SAMTING LONG BAEBOL AESEA 17-20
‘Samting We Olgeta We Oli Stap Spolem Yumi Bambae Oli Kasem’
“Kingdom Blong Mi i No Blong Wol Ya”
16 !I impoten tumas blong mekem ol jenis ya! Baebol i talem se ol man oli olsem solwota we i raf. (Aesea 17:12; 57:20, 21; Revelesen 13:1) Politik i mekem rao mo faet i kamaot, mo i seraotem ol man. Be ol man blong Jehova oli gat pis mo oli joen gud. Taem Jehova i skelem olgeta wetem ol man blong wol we oli seseraot, hem i mas glad tumas.—Ridim Sefanaea 3:17.
Yumi No Joen Long Politik
4 Long kantri blong yumi, maet ol man oli no wari sipos yumi no joen long wan pati blong politik. Be taem yumi stap kam klosap moa long en blong wol ya blong Setan, bambae i had moa blong yumi no joen long politik. Naoia, ol man oli stap “mekem i strong tumas oltaem long ol narafala man” mo oli stronghed. Bambae oli seraot moa yet long ol defdefren grup. (2 Timoti 3:3, 4) Sam brata mo sista oli kasem trabol finis, from we i gat ol jenis long politik we oli kamaot kwiktaem nomo long kantri blong olgeta. Taswe, yumi mas rere naoia, blong bambae tingting blong yumi i strong blong no joen long politik, nating se yumi kasem trabol. Bambae yumi tokbaot fo samting we yumi save mekem blong rere.
ip-1 198 ¶20
Tok We Jehova i Talem Agensem Ol Nesen
20 ?Wanem bambae i hapen? Aesea i talem se: “Long sapa, i gat ol samting we oli mekem man i fraet. Mo klosap long moning oli no moa stap. Hemia nao samting we olgeta we oli stap spolem yumi mo tekemaot olting blong yumi, bambae oli kasem mo hemia i sem mak long olgeta we oli stap stilim olting blong yumi.” (Aesea 17:14) Plante man oli stap spolem ol man blong Jehova, oli stilim olting blong olgeta, oli mekem i strong long olgeta, mo oli no respektem olgeta. Ol tru Kristin oli no man blong wol ya mo oli no stap joen long ol popiula relijen. Taswe, i isi nomo we ol man oli no laekem olgeta mo tok nogud long olgeta. Nating se i olsem, ol man blong God oli gat strong tingting se “moning” i stap kam, hemia se klosap nao ol trabol blong olgeta bambae i finis.—2 Tesalonaeka 1:6-9; 1 Pita 5:6-11.
Ol Gudgudfala Samting
Ol Bigfala Poen Long Buk Blong Aesea—Haf 1
20:2-5—?Aesea i rili stap wokbaot we i neked nomo blong tri yia? Ating tok ya i minim se Aesea i no putum olgeta klos blong hem be i wokbaot wetem “kalsong” nomo olsem Baebol long Bislama i talem.—1 Samuel 19:24, futnot NW
12-18 JENUWARE
OL SAS SAMTING LONG BAEBOL AESEA 21-23
Ol Lesen We Yumi Lanem Long Sebna
Taem God i Stretem Yumi, Hem i Soemaot Lav
7 Blong kasem save olsem wanem fasin stretem i mekem i gud long yumi, bambae yumi tokbaot tu man we Jehova i stretem. Wan, hemia Sebna, man Isrel we i laef long taem blong King Hesekia, mo narawan hemia Graham, wan brata long taem blong yumi. Sebna i wan haeman. Hem i “bos blong ol man blong wok long haos blong king,” maet King Hesekia. (Aesea 22:15) Be Sebna i kam flas mo i wantem mekem ol narafala oli ting se hem i impoten tumas. Taswe hem i rerem wan beregraon we i sas we i sas, blong hem wan. Mo hem i stap ron long ol ‘kat blong faet ya, we oli flas tumas.’—Aesea 22:16-18.
8 Sebna i leftemap hem wan tumas, taswe God i tekemaot wok blong hem mo i givim long Eliakim. (Aesea 22:19-21) Samting ya i hapen taem King Senakerib blong Asiria i mekem plan blong spolem Jerusalem. Biaen, Senakerib i sanem sam haeman mo wan bigfala ami blong mekem King Hesekia mo ol man Jiu oli fraet. (2 King 18:17-25) Hesekia i sanem Eliakim mo tu narafala man oli go blong toktok wetem ol haeman ya. Wan long tufala hemia Sebna, we naoia i wok olsem sekretari. Samting ya i soemaot se ating Sebna i lanem blong gat tingting daon, mo i no harem nogud mo sore long hem wan. Hem i glad blong mekem wan wok we i no impoten tumas. Yumi lanem tri lesen long stori blong Sebna.
9 Fas lesen se: “Man we i praod bambae i kasem trabol.” Taswe Sebna i lusum wok blong hem. (Ol Proveb 16:18) Maet yu gat wok long kongregesen, mo ol narafala oli ting se yu yu impoten. ?Be olsem wanem? ?Yu yu gat tingting daon? ?Yu tingbaot se gudhan we yu yu gat blong mekem ol gudfala wok ya i kamaot long Jehova nomo? (1 Korin 4:7) Aposol Pol i givim woning ya se: “Mi mi talem long yufala se i no mas gat wan long yufala we i tinghae long hem bitim mak. Yufala i mas gat stret tingting.”—Rom 12:3.
Taem God i Stretem Yumi, Hem i Soemaot Lav
10 Namba tu lesen se: Jehova i save se strong advaes we hem i givim long Sebna i save jenisim fasin blong hem. (Ol Proveb 3:11, 12) Olgeta we oli lusum wan spesel wok oli mas tingbaot samting ya. I no stret we oli kam kros mo harem nogud, be oli mas gohed blong mekem bes blong olgeta long wok blong Jehova. Oli mas luk fasin stretem ya olsem wan samting we i soemaot lav blong Jehova. Tingbaot se Papa blong yumi bambae i givim pei long olgeta we oli gat tingting daon. (Ridim 1 Pita 5:6, 7.) Man blong wokem graonpot i save wokem graon we i sofsof i kam wan naesfala graonpot. Long sem fasin, sipos yumi gat tingting daon taem Jehova i stretem yumi, hemia i save jenisim fasin blong yumi.
Taem God i Stretem Yumi, Hem i Soemaot Lav
11 Namba tri lesen we yumi lanem long stori blong Sebna, se: Fasin blong Jehova blong stretem man we i mekem sin, i soemaot se hem i no laekem sin, be i soemaot tu se hem i laekem man ya yet. Jehova i lukaotem ol gudfala fasin blong man. Sipos yu yu wan papa, mama, o wan elda, ?bambae yu folem fasin blong Jehova blong stretem narafala?—Jud 22, 23.
Ol Gudgudfala Samting
Ol Bigfala Poen Long Buk Blong Aesea—Haf 1
21:1—?Wanem ples ya we oli kolem “Draeples klosap long Solwota”? Vas ya i stap tokbaot Babilon. Nating se Babilon i no stap klosap long solwota, be vas i talem olsem from we taem reva Yufretes mo reva Taegris oli fulap tumas, oli kavremap gud ol ples raonabaot long taon ya olsem wan bigfala “solwota.”
19-25 JENUWARE
OL SAS SAMTING LONG BAEBOL AESEA 24-27
“!Hemia God Blong Yumi!”
cl 15 ¶21
“!Yufala i Luk! !Hemia God Blong Yumi!”
21 ?Yu bin luk finis wan smol pikinini we i poen i go long papa blong hem mo i glad tumas blong talem long ol fren blong hem se: “Hemia papa blong mi”? Hemia sem filing we ol man we oli stap wosipim Jehova, oli gat long saed blong Jehova. Baebol i tokbaot se i gat wan taem we ol man we oli holemstrong long Jehova bambae oli singaot se: “!Yufala i luk! !Hemia God blong yumi!” (Aesea 25:8, 9) Taem yu save moa ol gudfala fasin blong Jehova, bambae yu luksave se hem i beswan Papa we yu save gat.
Merikel We Jisas i Mekem Blong Givim Bred
14 Taem Jisas i talem long yumi blong prea from ‘bred we i naf blong tede,’ hem i tijim yumi tu blong prea blong God i mekem wil blong hem i kamtru “long wol ya olsem long heven.” (Mat. 6:9-11) ?Yu ting se wol bambae i olsem wanem long taem ya? Baebol i soemaot se wil blong God, hemia se wol bambae i fulap long ol gudfala kakae. Hemia i laenap wetem Aesea 25:6-8, we i talem se bambae i gat plante gudfala kakae we yumi save harem gud long hem aninit long Kingdom blong Jehova. Ol Sam 72:16 i talem se: “Bambae i gat fulap garen blong sid long olgeta ples long wol, bambae oli kavremap top blong ol bigfala hil gogo i kafkafsaed.” ?Yu yu stap wet long taem ya we bambae yu yusum sam long ol sid ya blong mekem wan bred we yu laekem tumas, o blong traem kukum wan niufala kakae? Antap long hemia, yu save harem gud long ol frut blong grep we yu planem. (Aes. 65:21, 22) Mo bambae yu no stap yu wan.
?Wanem Ol Blesing We Yumi Kasem From We Jehova i Lavem Yumi?
11 Traem tingbaot se laef bambae i olsem wanem taem yu laef long paradaes long wol ya. Bambae yu no nid blong wari long saed blong sik o ded. (Aes. 25:8; 33:24) Jehova bambae i givim evri gudfala samting we yu wantem. ?Yu yu wantem mekem wanem? ?Yu wantem stadi long ol animol? ?Yu wantem lanem blong plei long wan instramen? ?Yu wantem lanem blong dro? I sua se long paradaes, i nidim ol man we oli save olsem wanem blong wokem ol plan blong haos, bildim ol haos, mo ol man blong wok long garen. Mo tu, bambae i nidim ol man blong planem mo rerem ol kakae, wokem ol tul, mo lukaot gud long ol naesfala garen. (Aes. 35:1; 65:21) Taem yu laef olwe, bambae yu gat moa taem blong mekem ol samting ya.
12 !Long taem ya bambae yumi glad tumas blong welkamem olgeta we oli laef bakegen! (Wok 24:15) Mo tu, traem tingbaot bambae yu glad tumas blong save Jehova moa taem yu stadi long ol samting we hem i wokem. (Sam 104:24; Aes. 11:9) !Be samting we i gud moa, hemia se bambae yumi neva save mekem sin bakegen, mo bambae yumi haremgud blong wosipim Jehova! ?Olsem wanem? ?Bambae yu lego ol nambawan blesing ya blong mekem “sin we i save mekem [yu] harem gud blong smoltaem nomo”? (Hib. 11:25) !I sua se nogat! Ol blesing ya oli gud moa long ol samting we yumi save kasem long wol ya naoia. Tingbaot se bambae yu no wet long Paradaes ya olwe, from we i no longtaem bambae hem i kam wan ples we bambae yu laef long hem evri dei. !Ol samting ya oli save kamtru from we Jehova i lavem yumi, mo hem i givim nambawan presen ya hemia Boe blong hem, blong i ded from yumi.
Ol Gudgudfala Samting
Niu Wol Translesen We Oli Wokem Long Yia 2013
?From wanem naoia i gat plante moa japta blong Baebol we oli raetem long stael blong poem? Plante haf blong ol olfala hanraet blong Baebol, oli raetem long stael blong poem. Tede ol man oli raetem poem long fasin ya we saon blong wod long en blong wan sentens, i saon sem mak olsem wod long en blong narafala sentens. Be fasin blong raetem poem long Hibru i defren, from we oli save ripitim semfala tingting, o oli save tokbaot wan defren tingting we i no joen wetem laen bifo. Taswe long Hibru, oli raetem poem folem oda blong ol tingting, be i no folem saon blong ol wod long en blong ol sentens.
Long ol narafala edisen blong Niu Wol Translesen, oli raetem buk blong Job mo Ol Sam folem stael blong ol olfala hanraet, blong soemaot se hemia wan haf we ol man oli yusum blong singsing o ridimaot laod. Hemia i wan stael blong raetem poem blong makem ol poen mo i givhan blong ol man oli rimemba ol tok ya. Long edisen ya blong 2013, oli raetem buk blong Ol Proveb, Sing Blong Solomon, mo plante japta blong ol buk we i tokbaot ol profet tok, folem ol olfala hanraet. Hemia i blong soemaot se oli raetem olgeta folem stael blong poem, mo blong makem ol semfala tingting mo ol defren tingting. Wan eksampol hemia buk blong Aesea 24:2. Wanwan laen i tokbaot ol defren tingting, mo wanwan long olgeta i ademap moa save blong makemgud poen ya se i no gat man i save ronwe long jajmen blong God. Taem yumi luksave samting ya, hemia i givhan blong kasemsave se man we i raetem buk ya i no stap ripitim semfala samting, be hem i yusum stael blong raetem poem, blong mekem mesej blong God i kam klia moa.
Samtaem i no isi blong luksave stael blong raetem wan stori mo stael blong raetem wan poem long lanwis Hibru. Hemia nao from wanem sam translesen blong Baebol oli no raetem sam haf folem stael blong poem. Blong raetem wan vas long stael blong poem, hemia i dipen sipos ol transleta oli luksave se hem i wan poem o nogat. Samtaem insaed long sam vas, i gat ol toktok we i saon olsem poem from we oli yusum ol pija tok, ol simpol tok we i gat paoa, mo oli ripitim sem samting blong makem wan impoten poen.
26 JENUWARE–1 FEBRUARI
OL SAS SAMTING LONG BAEBOL AESEA 28-29
Ona Long Jehova Wetem Lips Mo Hat Blong Yu
ip-1 299 ¶23
Aesea i Talemaot ‘Wok Blong Jehova We i Narakaen’
23 Ol lida blong skul long Juda oli stap talem se oli waes long saed blong spirit, be oli lego Jehova finis. Oli stap tijim ol man folem prapa tingting blong olgeta long saed blong samting we i stret mo i no stret, oli faenem rod blong mekem eskius blong mekem ol nogud samting, mo oli stap pulum ol man i gowe long God. From samting ya, Jehova i talem se bambae hem i “mekem oli sapraes,” o i mekem wan samting we i “narakaen” blong soemaot se oli gat tu fes. Hem i talem se: “Ol man ya oli kam klosap long mi long maot nomo mo oli stap ona long mi long lips blong olgeta nomo, be hat blong olgeta i stap longwe tumas long mi. Mo fasin blong olgeta blong fraet long mi i stanap long ol loa blong man nomo, hemia ol loa we ol man oli bin tijim ol man long hem. From samting ya, mi nao bambae mi mekem ol gudgudfala samting bakegen long olgeta, bambae mi mekem oli sapraes long wan samting afta narawan. Mo bambae mi mekem ol waes man blong olgeta, oli lusum waes blong olgeta, mo ol man blong olgeta we oli waes gud, save blong olgeta bambae i lus.” (Aesea 29:13, 14) Ol man Juda oli ting se oli waes mo oli gat save, be Jehova i mekem rod finis blong Wol Paoa Ya Babilon i distroem giaman skul blong olgeta. Sem samting ya i bin hapen tu long faswan handred yia long ol lida blong ol man Jiu we oli ting se oli waes, be oli stap pulum ol man i gowe long God. Mo long fiuja, semfala samting ya bambae i hapen bakegen long ol giaman relijen.—Matiu 15:8, 9; Rom 11:8.
I No Gat Samting i Save Mekem Stret Man i Stambol
7 Jisas i no fraet blong talemaot se ol lida blong skul long taem blong hem oli gat tu fes. Eksampol, hem i soemaot se ol Farisi oli gat tu fes from we oli tinghae moa long kastom ya blong wasem han, i bitim we oli ona long perens blong olgeta. (Mat. 15:1-11) Ating ol disaepol blong Jisas oli sapraes long ol tok we hem i talem, taswe oli askem se: “?Yu save se ol Farisi oli stambol taem oli harem tok we yu talem?” Nao Jisas i ansa se: “Evri tri we Papa blong mi long heven i no planem, bambae hem i pulumaot. Lego olgeta. Olgeta oli lida be oli blaen nomo. Sipos wan blaenman i lidim wan blaenman bakegen, bambae tufala tugeta i foldaon long wan hol.” (Mat. 15:12-14) Nating se ol lida blong skul oli kros from ol tok ya we Jisas i talem, be hemia i no blokem hem blong talemaot trutok.
!Gohed Blong Stap Olsem Gest Blong Jehova Olwe!
8 Olgeta we ‘long hat blong olgeta, oli stap tok tru oltaem,’ oli obei oltaem long God nating se oli stap wetem ol narafala, o oli stap olgeta wan. (Aes. 29:13) Mo tu, oli no gat tu fes. Wan man we i gat tu fes, maet hem i stat blong gat tu tingting long ol loa blong Jehova. (Jem. 1:5-8) Maet hem i no obei long Jehova long ol samting we hem i luk se oli no rili impoten. Mo sipos hem i luk se i no gat nogud frut i kamaot from, maet hem i stat blong mekem plante moa nogud samting. Nating sipos hem i ting se hem i stap wosipim God, be Jehova bambae i no glad long wosip blong hem. (Pri. 8:11) Be yumi, yumi wantem tok tru long olgeta samting.
Ol Gudgudfala Samting
it “Ariel” ¶1; it “Ariel” N. 3
Ariel
(Arʹi·el) [Ples Blong Faea Long Olta Blong God; o Laeon Blong God].
3. Hemia wan nem we i minim Jerusalem we Aesea 29:1, 2, 7 i tokbaot. From we tempol blong God mo olta blong bonem sakrefaes i stap long Jerusalem, taon ya Jerusalem i kam olsem ples blong faea long olta blong God mo i stamba ples blong tru wosip. Be mesej we i stap long Aesea 29:1-4, i givim woning mo i talemaot trabol we bambae Jerusalem i kasem, taem Babilon i kam spolem hem long yia 607 B.K.T. Long taem ya, “ples blong faea long olta blong God” we i stap long Jerusalem, bambae i kam wan ples we blad i ron long hem, faea i bonem evri samting, mo i gat fulap dedbodi. Mo vas 9 kasem 16 i tokbaot risen from wanem Jerusalem i kasem ol trabol ya. Nating se i olsem, Aesea 29:7, 8 i talem se ol nesen we oli mekem trabol i kasem Jerusalem, bambae oli no win mo ol plan blong olgeta bambae oli foldaon.
2-8 FEBRUARI
OL SAS SAMTING LONG BAEBOL AESEA 30-32
Haed Aninit Long Wing Blong Jehova
Jehova i Olsem Sefples Blong Yumi
7 From we Jeova i sefples blong yumi, yumi harem gud long tok ya: “Bambae hem i blokem yu yu stap gud olsem we pikinini blong faol i stap gud aninit long wing blong mama blong hem. Oltaem tingting blong hem bambae i stap strong long yu, nao bambae hem i lukaot gud long yu, i blokemgud yu [“i olsem wan bigfala sil no wan stonwol we yu haed biaen long hem,” NW].” (Ol Sam 91:4) God i stap blokem yumi, olsem wan mama faol i mekem long ol pikinini blong hem. (Aesea 31:5) ‘Hem i blokem yumi i stap gud . . . aninit long wing’ blong hem. Faol i yusum wing blong hem blong kavremap ol pikinini blong hem, nao i no gat samting i save kam spolem olgeta. Yumi olsem ol pikinini faol ya, we yumi stap sef aninit long wing blong Jeova, from we yumi stap gud long trufala Kristin ogenaesesen blong hem.—Rut 2:12; Ol Sam 5:1, 11.
Jehova Bambae i Halpem Yu Taem Yu Fesem Ol Hadtaem
13 Samting we yumi mas mekem. Yumi mas traehad blong no stap yumi wan, from hemia i save mekem se yumi stat blong tingbaot yumi wan nomo, mo ol problem blong yumi. Mo tu, hemia i save blokem yumi blong mekem ol gudfala desisen. (Prov. 18:1) I tru, yumi evriwan i nidim blong stap yumi wan samtaem, speseli taem wan nogud samting i hapen long yumi. Be sipos yumi mekem olsem longtaem, maet yumi no save kasem help long ol man we Jehova i yusum blong sapotem yumi. Taswe nating se i had, i gud yumi akseptem help blong ol famle, ol fren, mo ol elda. Luk olgeta olsem rod we Jehova i yusum blong sapotem yu.—Prov. 17:17; Aes. 32:1, 2.
?Olsem Wanem ‘Jehova Bambae i Givim Paoa Long Yu’?
19 ?Olsem wanem yu save mekem hop blong yu i kam strong moa? Sipos yu gat hop blong laef olwe long wol, i gud yu ridim ol vas we i tokbaot paradaes mo yu tingting dip long olgeta. (Aes. 25:8; 32:16-18) Traem tingbaot se laef bambae i olsem wanem long niufala wol. Pijarem yu wan long paradaes. ?Yu luk hu? ?Yu harem noes blong wanem? ?Wanem filing blong yu? Blong halpem yu blong tingbaot se laef long paradaes bambae i olsem wanem, i gud yu luk ol pija long ol buk blong yumi o wajem wan miusik video olsem Long Wan Niufala Wol, Klosap Bambae i Kamtru, o Traem tingbaot taem ya. Sipos yumi gohed oltaem blong tingbaot niufala wol, bambae yumi luk ol problem blong yumi se oli “oli smol nomo, mo oli no save stap longtaem.” (2 Kor. 4:17) Hop we Jehova i givim long yu i save halpem yu blong stanap strong.
Ol Gudgudfala Samting
it “Bred” ¶6
Bred
Pijatok. Long Baebol, tok ya “bred” oli yusum olsem wan pijatok blong minim plante defren samting. Eksampol, taem Josua mo Keleb i talem long ol man Isrel se ol man Kenan “oli olsem bred nomo,” hemia i min se oli save winim olgeta isi nomo. Mo sipos oli winim ol enemi blong olgeta, hemia bambae i mekem se ol man Isrel oli kam strong moa. (Na 14:9) Taem Ol Sam 80:5 i tokbaot Jehova se, “Yu givim wota blong ae olsem bred blong olgeta,” hemia i minim se ol man Isrel oli harem nogud mo oli stap krae from we Jehova i no glad long olgeta. Mo tu, taem Baebol i tokbaot se Jehova i “givim trabol olsem bred blong yufala, mo i givim hadtaem olsem wota blong yufala,” hemia i minim bigfala hadtaem we ol man blong God oli fesem taem ol enemi oli raonem Jerusalem. From we ol trabol we oli fesem oli stap longtaem, hemia i kam wan nomol samting olsem bred mo wota blong olgeta.—Aes 30:20.
9-15 FEBRUARI
OL SAS SAMTING LONG BAEBOL AESEA 33-35
Hem i Mekem Yumi Stap Strong Yumi No Jenis
Jehova Bambae i Halpem Yu Taem Yu Fesem Ol Hadtaem
7 Samting we i had. Taem yumi gotru long wan hadtaem, ol filing, tingting, mo aksen blong yumi oli olbaot. I olsem wan sip we strong win i stap saksakem hem i go olbaot. Ana we yumi tokbaot hem finis i talem se afta we Luis i ded, ol filing blong hem oli olbaot nomo. Hem i talem se: “Samtaem mi harem nogud gogo mi stat blong sore long mi wan. Mo tu, mi kam kros from hem i ded.” Narafala taem, hem i harem se hem i stap hem wan, mo i kros taem hem i mas mekem ol desisen long saed blong ol samting we Luis nao i bin stap mekem. Mo samtaem, hem i harem olsem se hem i stap long wan solwota we i gat strong win. Long taem olsem, ?olsem wanem Jehova i stap halpem yumi?
8 Samting we Jehova i mekem. Hem i mekem yumi sua se bambae hem i mekem yumi stap strong yumi no jenis. (Ridim Aesea 33:6.) Taem wan sip i fesem wan strong win long solwota, maet wef i stat blong saksakem hem i go olbaot. Be blong holemtaet sip blong i no muvmuv, maet plante sip oli gat tu longfala spesel fin long saed saed blong olgeta. Tufala fin ya i givhan long sip blong i no muvmuv tumas, nao ol pasenja oli save harem se oli sef mo enjoem trip blong olgeta. Be tufala fin ya i save wok gud nomo taem sip i stap ron. Long sem fasin, Jehova bambae i mekem yumi stap strong yumi no jenis, taem yumi gohed blong mekem wok blong hem nating se yumi fesem hadtaem.
?Olsem Wanem Blong Stap Glad Taem Yu Kasem Trabol?
10 Rod blong winim: Askem waes long Jehova. Sipos yumi wantem stanap strong wetem glad, fastaem yumi mas askem Jehova blong i givim waes we yumi nidim blong mekem ol gudfala desisen. (Ridim Jemes 1:5.) Sipos Jehova i no ansa kwiktaem long yumi, ?yumi mas mekem wanem? Jemes i se yumi mas “gohed blong askem long God.” Jehova i no kros taem yumi gohed blong askem waes. Bambae hem i no tok long yumi. Papa blong yumi “i glad blong givim,” sipos yumi prea from waes blong stanap strong. (Sam 25:12, 13) Hem i luk ol trabol blong yumi, i harem nogud taem yumi safa, mo i wantem tumas blong givhan long yumi. !Hemia nao samting we i mekem yumi glad! ?Be olsem wanem Jehova i givim waes?
11 Jehova i yusum Baebol blong givim waes long yumi. (Prov. 2:6) Blong kasem waes ya, yumi mas stadi long Baebol mo ol buk we oli tokbaot Baebol. Be yumi no mas stadi blong kasem save nomo. Yumi mas mekem waes ya i wok long laef blong yumi tu. Jemes i raetem se: “Yufala i mas mekem samting we tok ya i talem, be yufala i no mas lesin nomo.” (Jem. 1:22) Taem yumi folem advaes ya, yumi kam man blong pis, yumi gat stret tingting, mo yumi gat sore. (Jem. 3:17) Ol gudfala fasin ya oli halpem yumi blong stanap strong wetem glad.
ip-1 352-355 ¶21-22
“Bambae i No Gat Wan Man Long Ples Ya i Talem Se: ‘Mi Mi Sik’”
21 Profet tok blong Aesea i stap kamtru tu tede. Ol man blong Jehova oli stap harem gud from we oli no moa sik long saed blong spirit. Oli kam fri long ol giaman tijing olsem sol i no save ded, Triniti, mo helfaea. Oli kasem stret save long saed blong ol gudfala fasin we i mekem se oli fri long ol doti fasin, mo hemia i givhan long olgeta blong mekem ol gudfala desisen. Mo from ransom sakrefaes blong Jisas Kraes, Jehova i luk olgeta se oli klin, nao tingting blong olgeta i no jajem olgeta. (Kolosi 1:13, 14; 1 Pita 2:24; 1 Jon 4:10) From we oli no moa sik long saed blong spirit, hemia i givhan long olgeta tu long saed blong bodi. Eksampol, taem oli no moa mekem ol rabis fasin blong seks mo oli no moa yusum tabak, hemia i protektem olgeta long ol sik we i save pastru long seks mo oli no kasem ol defren kaen kansa.—1 Korin 6:18; 2 Korin 7:1.
22 Be tu, profet tok ya blong Aesea 33:24 bambae i kamtru long wan fasin we i bigwan moa afta long Amagedon, hemia long niufala wol. Long taem ya we Mesaea i rul olsem King long Kingdom blong God, bambae hem i hilim ol man fulwan long saed blong bodi mo long saed blong spirit. (Revelesen 21:3, 4) Mo afta we wol ya blong Setan i lus, ol merikel we Jisas i mekem taem hem i bin stap long wol, bambae oli hapen long olgeta ples long wol. !Blaenman bambae i save lukluk, man we sora blong hem i fas bambae i harem samting, man we leg blong hem i nogud bambae i save wokbaot! (Aesea 35:5, 6) Mo olgeta man we oli laef tru long bigfala trabol, bambae oli gat wok ya blong mekem se fulwol i kam wan paradaes.
Ol Gudgudfala Samting
Gohed Blong wokbaot Long “Rod Blong Tabu Fasin”
8 Sam man oli save gat tingting ya se ‘hemia i nambawan tumas, ?be samting we i hapen long ol man Jiu bifo i save gat paoa long yumi tede?’ Yes, from samting we yumi stap mekem tede, i sem mak olsem we yumi stap wokbaot long “Rod Blong Tabu Fasin.” Nating se bambae yumi go long heven o yumi ol “narafala sipsip,” yumi evriwan i mas gohed blong wokbaot long “Rod Blong Tabu Fasin.” From hemia bambae i halpem yumi blong gohed blong wosipim Jehova naoia, mo long fiuja, taem Kingdom blong God i karem ol nambawan blesing i kam long wol ya. (Jon 10:16) Stat long 1919 K.T., plante man, woman, mo pikinini oli lego bigfala Babilon, hemia olgeta giaman skul long wol mo oli stat blong wokbaot long rod ya blong tabu fasin. Ating yu tu yu stap long medel blong ol man ya. Nating se rod ya i open samwe handred yia i pas, be i gat sam narafala man we oli stat blong rerem rod ya plante yia bifo.
16-22 FEBRUARI
OL SAS SAMTING LONG BAEBOL AESEA 36-37
“Yu No Mas Fraet From Ol Tok We Yu Harem”
it “Hesekia” N. 1 ¶14
Hesekia
Plan Blong Senakerib Long Saed Blong Jerusalem i No Kamtru. Senakerib i gat strong tingting blong kam atakem Jerusalem, olsem we Hesekia i stap tingbaot. Taem Senakerib wetem ol ami blong hem oli raonem strongfala taon blong Lakis, hem i sanem sam ami blong hem wetem sam lida blong ol ami, blong oli go talem long ol man Jerusalem se oli mas sarenda. Wan long ol lida ya hemia Senakerib (hemia i no nem blong man, be i wan taetel blong lida blong ami), we hem i save toktok gud lanwis Hibru. Hem i talem ol tok blong jikim Hesekia mo i stap tok flas se Jehova i no save givhan long Jerusalem, sem mak olsem we ol god blong ol narafala nesen oli no save sevem ol man blong olgeta long han blong king blong Asiria.—2Ki 18:13-35; 2Kr 32:9-15; Aes 36:2-20.
ip-1 387 ¶10
King i Kasem Blesing From Bilif Blong Hem
10 Biaen, Rabsake i talem long ol man Jiu se ol soldia blong olgeta oli no naf blong winim Asiria. Hem i tok flas se: “Bambae mi givim 2,000 hos long yu sipos yu save faenem inaf man blong raed long olgeta.” (Aesea 36:8) ?Olsem wanem? ?Ol man Jiu oli nidim plante soldia we oli save ron long hos blong oli save win? Nogat, Juda i no nidim blong gat wan strongfala ami blong hem i save win. Ol Proveb 21:31 i eksplenem samting we i moa impoten, hemia se: “Man i save mekemrere ol hos blong go mekem faet, be paoa blong sevem man i blong Jehova.” Be Rabsake i talem se Jehova i no blesem ol man Jiu, hem i blesem ol man Asiria, taswe oli naf blong kam insaed long teritori blong Juda.—Aesea 36:9, 10.
ip-1 388 ¶13-14
King i Kasem Blesing From Bilif Blong Hem
13 Rabsake i gohed blong sakem ol nogud tok we i stikim ol man Jiu. Hem i wonem olgeta se oli no mas putum tingting blong olgeta long ol tok ya we Hesekia i talem, se: “Jehova bambae i sevem yumi.” Rabsake i rimaenem olgeta se ol god blong ol man Sameria oli no givhan nating long ol ten traeb blong Isrel, blong ol man Asiria oli no winim olgeta. Mo hem i askem kwestin long saed blong ol god blong ol narafala nesen we ol man Asiria oli winim, i se: “?Wehem ol god blong Hamat mo Apad? ?Wehem ol god blong Sefavaem? ?Ol god ya oli bin tekemaot Sameria long han blong mi?”—Aesea 36:18-20.
14 Rabsake i stap wosipim ol giaman god, mo hem i no save se ol man Sameria we oli tanem baksaed long tru wosip, oli no olsem ol man Jerusalem we Hesekia i rul long olgeta. Ol giaman god blong ol man Sameria oli no save sevem ol ten traeb blong Isrel long not. (2 King 17:7, 17, 18) Be King Hesekia wetem ol man Jerusalem, oli lego giaman wosip mo oli kambak long Jehova. Nating se i olsem, ol trifala man blong Hesekia oli no traem blong eksplenem samting ya long Rabsake. “Oli stap kwaet nomo, mo oli no talem wan tok blong ansa long hem, from we king i givim oda long olgeta se: ‘Yufala i no mas ansa long hem.’” (Aesea 36:21) Eliakim, Sebna, mo Joaha oli gobak long Hesekia mo oli givim ripot we oli karem long Rabsake.—Aesea 36:22.
Ol Gudgudfala Samting
it “Rop Blong Hos” ¶4
Rop Blong Hos
Jehova i talem long King Senakerib blong Asaria se: “Bambae mi putum huk blong mi long nus blong yu, mo rop blong hos bitwin ol lips blong yu, nao bambae mi lidim yu yu gobak long rod we yu kam long hem.” (2Ki 19:28; Aes 37:29) Jehova nao i stopem Senakerib blong i no atakem Jerusalem mo i fosem hem blong i gobak long Nineve, we biaen ol boe blong hem oli kilim hem i ded. (2Ki 19:32-37; Aes 37:33-38) Tok ya se Jehova i putum rop blong hos long maot blong ol enemi blong hem, i soemaot se Jehova nao i gat ful kontrol, sem mak olsem we wan man i putum rop long maot blong hos blong kontrolem hem.—Aes 30:28.
23 FEBRUARI–1 MAJ
OL SAS SAMTING LONG BAEBOL AESEA 38-40
“Hem i Lukaot Gud Long Ol Sipsip Blong Hem”
?Baebol i Soemaot Wanem Long Saed Blong Jehova?
3 Ridim Aesea 40:8. Longtaem finis i kam, Tok blong God i givim ol waes advaes long ol gudfala man mo woman. ?Olsem wanem hemia i posibol? I tru se ol faswan hanraet oli bin raetem long ol skrol we oli save kam roten. Taswe, tede yumi no gat wan original kopi blong ol hanraet ya. Be Jehova i meksua se ol man oli mekem kopi blong tabu tok ya. Nating se ol man we oli mekem kopi blong ol tok ya oli sinman, be oli lukaot gud taem oli stap raetemdaon. Eksampol, long saed blong Hibru Haf blong Baebol, wan skola i talem se: “Yumi sua se i no gat wan narafala olfala buk we ol man oli lukaot gud moa taem oli mekem kopi blong hem.” Taswe, nomata se plante yia i pas, mo oli raetem ol tok ya long ol samting we oli save kam roten, mo ol man we oli raetem oli sinman, be yet yumi save trastem ol tok we yumi ridim long Baebol tede, from we oli soemaot klia ol tingting blong Man ya we buk ya i kamaot long hem, hemia Jehova.
4 Jehova nao i stap givim “olgeta gudfala presen mo ol presen we oli nambawan” long yumi. (Jem. 1:17) Baebol i wan long olgeta beswan presen we Jehova i givim long yumi. Taem wan man i givim wan presen long yumi, hemia i soemaot se man ya i save gud yumi, mo ol samting we yumi nidim. Hemia i sem mak long saed blong Baebol. Taem yumi stadi gud long presen ya, bambae yumi lanem plante samting long saed blong Jehova. Yumi lanem se hem i save gud yumi, mo ol samting we yumi nidim. Long stadi ya, bambae yumi tokbaot tri fasin blong Jehova we Baebol i soemaot, hemia waes, jastis, mo lav. Fastaem bambae yumi luk olsem wanem Baebol i soemaot se God i waes.
cl 70 ¶7
Paoa We i Protektem Man—“God i Ples Blong Haed Blong Yumi”
7 Taem Jehova i komperem hem wan olsem wan man blong lukaot long sipsip, hemia i blong mekem yumi trastem se hem i wantem tumas blong protektem yumi. (Esikel 34:11-16) Tingbaot samting we yumi bin luk long Japta 2 blong buk ya, we Aesea 40:11 i tokbaot long saed blong Jehova, we i se: “Olsem wan man blong lukaot long sipsip, bambae hem i lukaot gud long ol sipsip blong hem. Long han blong hem, bambae hem i hivimap ol smol sipsip oli kam wanples, mo bambae hem i holem olgeta long jes blong hem.” ?Olsem wanem wan smol sipsip bambae i kam klosap long jes blong man we i lukaot long sipsip? Maet smol sipsip ya i wokbaot i kam klosap long man ya mo i tajem leg blong hem. Be man blong lukaot long sipsip nao i mas bendaon, i karem smol sipsip ya mo i putum klosap long jes blong hem, blong mekem sipsip ya i haremsave se hem i sef. !Naesfala pijatok ya i soemaot se Bigfala Man Ya Blong Lukaot Long Sipsip i wantem tumas blong protektem mo lukaotgud long yumi!
‘Hem i Givim Paoa Long Olgeta We Oli Taed’
4 Ridim Aesea 40:26. I no gat man we i save kaontem olgeta sta long skae. Ol saentis oli ting se, i gat bitim 400 bilian sta raonabaot long yumi, mo hemia i no kaontem olgeta we oli stap longwe moa. Be Jehova i singaot ol sta ya wanwan long prapa nem blong olgeta. ?Hemia i soemaot wanem? !Sipos Jehova i intres long evri sta, traem tingbaot olsem wanem hem i intres long ol man we oli laef, olsem yu! Yu wosipim hem from we yu lavem hem, be i no from we yu mas mekem olsem. (Ol Sam 19:1, 3, 14) Gudfala Papa ya i save evri samting long saed blong yu. Baebol i talem se ‘ol hea long hed blong yu, hem i kaontem evriwan.’ (Matiu 10:30) Hem i talem se i “save evri samting we ol gudfala man oli fesem.” (Ol Sam 37:18, NW) I klia se Jehova i luk olgeta trabol blong yu, mo hem i save givim paoa we yu nidim blong stanap strong.
5 Ridim Aesea 40:28. Jehova i Stamba blong olgeta paoa. Traem tingbaot paoa blong san. Deved Bodanis we i raetem ol buk blong sayens, i talem se, paoa we i kamaot long san long wan seken nomo, i olsem plante bilian niuklia bom we oli bosta wantaem. !Wan narafala man blong stadi i talem se paoa we i kamaot long san long wan seken nomo, i naf blong givim lektrik long fulwol blong 200,000 yia! Tru ya, Jehova we i givim paoa long san, hem i naf blong givim paoa we yumi nidim blong stanap strong taem yumi kasem trabol.
6 Ridim Aesea 40:29. Taem yumi mekem wok blong Jehova, yumi kasem bigfala glad. Jisas i talem long ol man blong hem se: “Yufala i mas putum yok blong mi long solda blong yufala.” Mo i gohed se: “Nao bambae yufala i save harem gud long laef blong yufala. From we yok blong mi i isi nomo blong man i karem, mo ol samting we mi askem long yufala blong yufala i karem, oli no hevi.” (Matiu 11:28-30) !Hemia i tru we i tru! Samtaem yumi taed tumas taem yumi aot long haos blong go long miting o blong go prij. Be taem yumi kamhom, ?yumi harem olsem wanem? Yumi kasem niufala paoa, mo yumi rere blong traehad moa blong winim ol trabol. Tru ya, yok blong Jisas i isi nomo blong karem.
Ol Gudgudfala Samting
ip-1 400 ¶7
“Yufala i Toktok Gud Long Ol Man Blong Mi”
7 Profet tok ya i kamtru long ol yia 500 B.K.T., mo i kamtru tu long faswan handred yia. Jon Baptaes nao i man ya we Aesea 40:3 i tokbaot se “i stap singaot bigwan long draeples.” (Luk 3:1-6) Tabu spirit i pulum Jon blong talemaot se hem nao i man ya we Aesea i bin tokbaot. (Jon 1:19-23) Long yia 29 K.T., Jon i stat blong mekem rere rod blong Jisas Kraes. Jon i kamtru fastaem blong rerem ol man, blong oli luksave Mesaea ya we God i promes blong sanem i kam. Olsem nao, taem Mesaea i kamtru, bambae ol man oli save lesin long hem mo folem hem. (Luk 1:13-17, 76) Tru long Kingdom blong God, Jisas bambae i mekem se ol man we oli tanem tingting blong olgeta, oli fri fulwan long sin mo ded. (Jon 1:29; 8:32) Be profet tok ya i kamtru long wan fasin we i bigwan moa, taem smol haf blong ol tabu Kristin we oli stap yet long wol oli kam fri long Bigfala Babilon long yia 1919, mo oli stanemap tru wosip bakegen.