Ol Man Blong Jehova Oli Laekem Stret Fasin

1. ?Wanem traem we Josef i fesem, mo hem i mekem wanem?

JOSEF boe blong Jekob, i fesem wan traem we i had. Wan woman, hemia waef blong masta blong hem Potifa, i talem long hem se: “Yu kam slip wetem mi.” Be Josef i no wantem. Tede, maet sam man oli save gat tingting ya se: ‘?From wanem Josef i no wantem slip wetem hem?’ Potifa i stap longwe ya. Mo tu, Josef i wan slef nomo long haos ya, mo woman ya i save mekem laef blong hem i had sipos hem i no wantem slip wetem hem. Nating se i olsem, Josef i gohed nomo blong talem no long hem. ?From wanem? Josef i talem se: “?Olsem wanem mi save mekem bigfala rong olsem mo mekem sin agens long God?”—Jen. 39:7-12.

2. ?Olsem wanem Josef i save se Jehova i agensem adaltri?

² ?Olsem wanem Josef i save se long tingting blong Jehova adaltri i wan “bigfala rong”? Loa blong Moses we i inkludum klia komanmen ya se “Yu no mas mekem adaltri,” i jes kamaot nomo tu handred yia biaen. (Eks. 20:14) Nating se i olsem, smol save we Josef i gat long saed blong Jehova, i mekem hem i naf blong kasem save tingting blong Jehova long saed blong adaltri. Eksampol, Josef i save gud se Jehova i wokem mared blong i stap bitwin wan man mo wan woman nomo. Mo maet hem i harem stori se tu taem Jehova i bin protektem bubu woman blong hem Sera, taem ol man oli traem blong spolem hem. Mo God i mekem sem samting tu blong protektem waef blong Aesak, Rebeka. (Jen. 2:24; 12:14-20; 20:2-7; 26:6-11) Taem Josef i tingting dip long ol stori ya, hem i luksave samting we i stret mo samting we i no stret long ae blong Jehova. Mo from we Josef i lavem God, hem i laekem tu ol rul blong Jehova long saed blong stret fasin, mo hem i gat strong tingting blong mekem samting we Jehova i wantem.

3. ?Bambae yumi tokbaot wanem long stadi ya?

³ ?Yu yu laekem stret fasin? I sua se yes. Be yumi evriwan i sinman, mo sipos yumi no lukaot gud, tingting blong wol long saed blong stret fasin i save gat paoa long yumi. (Aes. 5:20; Rom 12:2) Taswe, naoia i gud yumi faenemaot se wanem ya stret fasin, mo olsem wanem laef blong yumi i save kam gud moa sipos yumi laekem fasin ya. Biaen, bambae yumi tokbaot tri step we i save halpem yumi blong yumi laekem moa fasin ya.

?WANEM YA STRET FASIN?

4. ?Wanem rong tingting we plante man oli gat long saed blong stret fasin?

⁴ Taem ol man oli tingbaot wan man we i stret, maet oli tingbaot se hem i praod, i jikim ol narafala, mo i ting se hem i gud moa long ol narafala. Be God i no laekem ol fasin ya nating. Taem Jisas i stap long wol, hem tu i tok strong agensem ol lida blong skul long taem blong hem, from we oli stap putumap ol prapa rul blong olgeta long saed blong stret fasin. (Pri. 7:16; Luk 16:15) Man we i laekem stret fasin, hem i neva tingbaot se hem i gud moa long ol narafala man.

5. Folem Baebol, ?wanem ya stret fasin? Givim wan eksampol.

⁵ Stret fasin i wan nambawan fasin, from we yumi stap mekem samting we i stret long ae blong Jehova God. Long Baebol, tok ya “stret fasin,” i givim tingting ya se yumi laef folem ol rul blong Jehova. Eksampol, Jehova i talem se ol bisnesman oli mas yusum ‘ol wet blong mesarem samting we oli tru.’ (Dut. 25:15) Hibru tok we oli tanem i kam “tru” oli save transletem tu se “stret.” Taswe, wan Kristin we i wantem mekem samting we i stret long ae blong Jehova, i mas tok tru long olgeta samting we hem i mekem long bisnes. Wan stret man, hem i laekem jastis tu, mo hem i no laekem nating blong luk we man i tritim nogud narafala. Mo “blong mekem [Jehova] i glad,” wan man we i rili laekem stret fasin, bambae i lukluk gud long ol desisen we hem i mekem.—Kol. 1:10.

6. ?From wanem yumi save trastem ol rul blong Jehova long saed blong ol samting we i stret mo samting we i rong? (Aesea 55:8, 9)

⁶ Baebol i tokbaot Jehova se hem i Stamba blong stret fasin. From samting ya oli singaot hem se “ples blong stret fasin.” (Jer. 50:7) Jehova i Krieta, mo hem nomo i gat raet blong talem wanem i stret mo wanem i rong. From we Jehova i stret gud olgeta, tingting we hem i gat long ol samting we i stret mo samting we i rong, i hae moa i bitim tingting we yumi ol sinman i gat long saed ya. (Prov. 14:12; ridim Aesea 55:8, 9.) Be from we Jehova i wokem yumi long pija blong hem, yumi naf blong laef folem ol rul blong Jehova long saed blong stret fasin. (Jen. 1:27) Mo yumi laekem blong mekem olsem. Mo from we yumi lavem Papa blong yumi, bambae yumi wantem mekem bes blong yumi blong folem fasin blong hem.—Efes. 5:1.

7. ?From wanem yumi nidim ol stret rul? Talem wan eksampol.

⁷ Laef blong yumi i save kam gud sipos yumi folem ol rul blong Jehova long samting we i stret mo samting we i rong. ?From wanem yumi talem olsem? Traem tingbaot samting we i save hapen sipos evri bang oli putum prapa rul blong olgeta long saed blong valiu blong mane. O sipos evri konstraksen kampani oli folem prapa rul blong olgeta long saed blong mesamen. I sua se bambae i no gat oda. Mo sipos ol dokta oli no obei long ol rul taem oli tritim wan man, maet sam sikman oli save ded. Taswe, taem i gat ol stret rul, hemia i wan proteksen. Long sem fasin, ol rul we God i putum long saed blong ol samting we i stret mo samting we i rong, i blong protektem yumi.

8. ?Ol man we oli laekem stret fasin, bambae oli kasem wanem blesing?

⁸ Jehova i blesem olgeta we oli traehad blong laef folem ol rul blong hem. Hem i promes se: “Ol stret man bambae oli tekem wol ya i blong olgeta, mo bambae oli stap long hem blong olwe.” (Sam 37:29) Traem tingbaot se ?laef blong ol man bambae i olsem wanem sipos oli folem ol rul blong Jehova? I sua se bambae oli joen gud, oli gat pis, mo oli hapi. Mo hemia nao wan laef we Jehova i wantem se yu gat. !Taswe, yumi gat plante gudfala risen blong laekem stret fasin! ?Be yumi save mekem wanem blong laekem moa fasin ya? Naoia bambae yumi tokbaot tri step we yumi save folem.

LAVEM MOA OL RUL BLONG JEHOVA

9. ?Wanem bambae i halpem yumi blong laekem stret fasin?

⁹ Step 1: Lavem Man ya we i putumap ol rul. Blong laekem stret fasin, fastaem yumi mas lavem moa Man we i putumap ol rul long saed blong samting we i stret mo samting we i rong. Sipos yumi lavem Jehova moa, bambae yumi wantem laef folem ol stret rul blong hem. Eksampol, sipos Adam mo Iv i bin lavem Jehova, bambae tufala i neva brekem loa blong hem.—Jen. 3:1-6, 16-19.

10. ?Olsem wanem Ebraham i kasemsave moa long Jehova?

¹⁰ Yumi no wantem mekem sem mastik olsem Adam mo Iv. Blong no foldaon long trap ya, yumi mas gohed blong save Jehova, laekem ol fasin blong hem, mo traem blong kasemsave long tingting blong hem. Sipos yumi mekem olsem, bambae yumi lavem Jehova moa. Traem tingbaot Ebraham. Hem i rili lavem Jehova. Mo nating se hem i no kasem save long ol desisen blong Jehova, be hem i no rebel. Defren olgeta, hem i traem blong save gud Jehova. Eksampol, taem hem i harem se Jehova i mekem desisen blong distroem Sodom mo Gomora, fastaem hem i fraet se “Jaj blong olgeta man long wol” bambae i distroem fulwan ol gudfala man wetem ol rabis man. Long tingting blong Ebraham, hemia i no stret ya, taswe wetem tingting daon, hem i askem sam impoten kwestin long Jehova. Be Jehova i gat longfala tingting mo i ansa long hem. Biaen, Ebraham i luksave se Jehova i stap skelem hat blong evri man mo se hem i neva panisim ol gudfala man wetem ol rabis man.—Jen. 18:20-32.

11. ?Olsem wanem Ebraham i soemaot se hem i lavem Jehova mo i trastem hem?

¹¹ Storian blong Jehova wetem Ebraham long saed blong Sodom mo Gomora, i gat bigfala paoa long hem. Mo hemia i mekem se hem i lavem mo i respektem Papa blong hem moa i bitim bifo. Sam yia biaen, hem i fesem wan situesen we i rili traem fasin blong hem blong trastem Jehova. Jehova i askem hem blong sakrefaesem boe blong hem Aesak we hem i lavem tumas. Be from we naoia Ebraham i save gud God blong hem, hem i no gat tu tingting. Hem i gohed nomo blong mekem samting we Jehova i askem. Be nating se i olsem, !i sua se hem i mas harem nogud taem hem i stap rere blong kilim boe blong hem! Mo hem i mas tingting plante long ol samting we hem i lanem long saed blong Jehova. Hem i save se Jehova bambae i neva askem hem blong mekem wan samting we i no stret, o we i no soem lav. Folem tok blong aposol Pol, Ebraham i save se Jehova i naf blong mekem boe blong hem Aesak i laef bakegen. (Hib. 11:17-19) Antap moa, Jehova i bin promes se Aesak bambae i kam papa blong wan nesen, we long taem ya Aesak i no gat pikinini yet. Be from we Ebraham i lavem Jehova, hem i trastem se Papa blong hem bambae i mekem samting we hem i stret. Mo from we hem i bilif, hem i obei nating se i had.—Jen. 22:1-12.

12. ?Olsem wanem yumi save folem fasin blong Ebraham? (Ol Sam 73:28)

¹² ?Olsem wanem yumi save folem fasin blong Ebraham? Olsem hem, yumi mas gohed blong lanem moa long saed blong Jehova. Sipos yumi mekem olsem, bambae yumi kam klosap long hem mo yumi lavem hem moa. (Ridim Ol Sam 73:28.) Mo yumi trenem tingting blong yumi blong i folem tingting blong Jehova. (Hib. 5:14) Long rod ya, taem wan man i traem pulum yumi blong mekem samting we i rong, bambae yumi naf blong talem no. Bambae yumi no laekem nating blong mekem ol samting we i save mekem Papa blong yumi i harem nogud, mo spolem frensip blong yumi wetem hem. ?Yumi save mekem wanem moa blong soemaot se yumi laekem stret fasin?

13. ?Yumi save mekem wanem blong gat stret fasin? (Ol Proveb 15:9)

¹³ Step 2: Traehad evri dei blong laekem stret fasin. Blong laekem ol rul blong Jehova long saed blong stret fasin, yumi mas traehad olsem we yumi traehad blong mekem ol masel blong yumi oli kam strong. Hemia wan samting we yumi save mekem evri dei. Jehova i mekem i stret mo hem i neva askem yumi blong mekem wan samting we yumi no naf blong mekem. (Sam 103:14) Hem i talem long yumi se: “Hem i lavem man we i stap mekem ol stret fasin.” (Ridim Ol Proveb 15:9.) Sipos yumi traehad blong kasem wan mak long wok blong Jehova, yumi mas wok had blong traem kasem mak ya. Hemia i sem mak taem yumi stap traehad blong mekem stret fasin. Mo Jehova bambae i gat longfala tingting long yumi mo i givhan long yumi sloslo blong kam gud moa.—Sam 84:5, 7.

14. ?“Aean klos” hem i wanem, mo from wanem yumi mas werem?

¹⁴ Jehova i rimaenem yumi se stret fasin i no wan baden. (1 Jon 5:3) Defren olgeta, hem i wan proteksen, mo yumi nidim samting ya evri dei. Traem tingbaot ol klos blong faet we aposol Pol i tokbaot. (Efes. 6:14-18) Blong protektem hat blong wan soldia, hem i mas “werem stret fasin olsem wan aean klos,” we hemia i minim ol rul blong Jehova long saed blong stret fasin. Wan aean klos i protektem hat blong wan soldia, long sem fasin, ol rul blong Jehova long saed blong stret fasin oli protektem hat blong yumi we i minim ol gudfala fasin blong yumi. !Hemia nao from wanem i impoten we yu werem olgeta klos blong faet, inkludum stret fasin olsem wan aean klos!—Prov. 4:23.

15. ?Olsem wanem yu save werem stret fasin olsem aean klos?

¹⁵ ?Olsem wanem yu save werem stret fasin olsem aean klos? Yu save mekem olsem taem yu folem gud ol rul blong Jehova long ol samting we yu wantem mekem evri dei. Taem yu mekem desisen long saed blong samting we bambae yu tokbaot, miusik we yu wantem lesin long hem, o samting we yu wantem wajem, o buk we yu wantem ridim, fastaem i gud yu askem yu wan se: ‘?Mi mi stap fidim hat blong mi long wanem? ?Samting we bambae mi mekem, Jehova i glad long hem o i pulum mi blong mekem samting we Jehova i talem se i no stret, olsem rabis fasin, faet, griri, mo tingbaot mi wan?’ (Fil. 4:8) Sipos ol desisen blong yu oli laenap wetem tingting blong Jehova, i olsem we yu letem ol rul blong Jehova long saed blong stret fasin oli protektem hat blong yu.

16-17. ?Olsem wanem Aesea 48:18, i mekem yumi sua se yumi save folem ol rul blong Jehova olwe?

¹⁶ ?Samtaem, yu yu wari sipos yu save gohed blong folem ol rul blong Jehova long saed blong stret fasin evri dei mo long ol yia we i kam? Traem tingbaot pijatok we Jehova i yusum long Aesea 48:18. (Ridim.) Jehova i promes se stret fasin blong yumi i save kam “olsem ol wef blong solwota.” Traem tingbaot se yu stap stanap long saed blong solwota mo yu stap lukluk ol wef we oli stap kam, wan afta narawan. Taem yu stap lukluk, ?yu yu wari se wan dei bambae i no moa gat ol wef? Nogat. Yu save se ol wef ya oli bin gohed olsem blong plante taosen yia finis, mo bambae oli gohed nomo blong kam.

¹⁷ !Stret fasin blong yu i save kam olsem ol wef blong solwota! ?Olsem wanem? Taem yu gat wan desisen blong mekem, fastaem i gud yu tingbaot samting we Jehova i wantem se yu mekem, mo biaen, yu mekem olsem. Nomata se desisen blong yu i had, be Papa blong yu we i lavem yu bambae i stap oltaem klosap long yu blong givim paoa, mo halpem yu evri dei blong yu mekem samting we i stret.—Aes. 40:29-31.

18. ?From wanem yumi mas blokem fasin ya blong jajem narafala folem tingting blong yumi nomo?

¹⁸ Step 3: Letem Jehova i jaj. Taem yumi stap traehad blong mekem samting we Jehova i wantem, yumi no mas komperem samting we yumi mekem wetem samting we narafala i mekem, mo ting se yumi gud moa. Yumi no gat raet blong talem sipos ol narafala oli stap mekem samting we Jehova i wantem o nogat. Yumi mas tingbaot se Jehova i “Jaj blong olgeta man long wol.” (Jen. 18:25) Jehova i no givim raet long yumi blong jajem narafala. Mo tu, Jisas i talem se: “Yufala i stop blong jajem ol narafala, olsem nao God bambae i no jajem yufala.”—Mat. 7:1.b

19. ?Olsem wanem Josef i soemaot se hem i trastem jajmen blong Jehova?

¹⁹ Traem tingbaot bakegen eksampol blong gudfala man ya Josef. Nating se ol man oli tritim nogud hem, be hem i no jajem olgeta. Ol brata blong hem oli tok nogud long hem, oli salem hem i kam slef, mo oli giaman long papa blong olgeta se hem i ded. Sam yia biaen, Josef i joen bakegen wetem famle blong hem, naoia hem i gat paoa blong rul. Nating se i olsem, hem i no jajem nogud ol brata blong hem o traem blong givimbak long olgeta. Ol brata blong Josef oli fraet se maet hem i save mekem sem samting long olgeta, nating se oli rili sore from samting we oli mekem. Be Josef i talem long olgeta se: “Yufala i no fraet. Mi mi no save tekem ples blong God.” (Jen. 37:18-20, 27, 28, 31-35; 50:15-21) Josef i gat tingting daon mo i letem Jehova i jajem bisnes ya.

20-21. ?Olsem wanem yumi save blokem tingting ya se yumi stret man?

²⁰ Olsem Josef, yumi mas letem Jehova i jaj. Eksampol, yumi no save wanem i pulum ol brata mo sista blong mekem wan samting, from yumi no save samting we i stap long hat blong olgeta. ‘Jehova nomo i stap skelem ol tingting we i pulum man.’ (Prov. 16:2) Jehova i lavem olgeta kaen man, nomata wanem bakgraon o kalja blong olgeta. Mo Jehova i enkarejem yumi blong “openem hat blong [yumi] moa.” (2 Kor. 6:13) Yumi mas lukaot rod blong soem lav long ol brata mo sista, be i no blong jajem olgeta.

²¹ Mo hemia i minim tu se yumi no mas jajem olgeta we oli no pat blong kongregesen. (1 Tim. 2:3, 4) Bambae yumi no jajem wan famle blong yumi we i no stap long trutok mo talem se: “!Man ya bambae i neva kam long trutok!” Nogat. Sipos yumi mekem olsem, yumi praod mo ting se yumi stret man. Jehova i givim janis long “olgeta man” yet blong oli tanem tingting blong olgeta. (Wok 17:30) Yumi mas tingbaot oltaem se long lukluk blong Jehova, man we i ting se hem i stret moa i bitim ol narafala, hem i wan rabis man.

22. ?From wanem yumi mas gat strong tingting blong laekem stret fasin?

²² Fasin blong yumi blong laekem ol rul blong Jehova long saed blong stret fasin, bambae i mekem yumi glad, mo i halpem ol narafala blong oli lavem yumi mo oli lavem Jehova moa. I gud yumi gohed blong ‘tosta mo hanggri from stret fasin.’ (Mat. 5:6) Mo i gud blong tingbaot se Jehova i luk ol traehad blong yu, mo oltaem hem i glad blong luk we yu stap gohed gud. !Nating se ol man long wol ya oli stap kam moa nogud, be yu no mas harem nogud! I gud yu tingbaot oltaem se “Jehova i lavem ol stret man.”—Sam 146:8.