LAEF STORI
Mi Mi Harem Se Mi Sef, From Mi Trastem Jehova
TAEM ol man oli wantem save long saed blong laef blong mi, plante taem mi talem long olgeta se: “!Mi mi olsem wan sutkes long han blong Jehova!” Mi min se, olsem we mi mi tekem sutkes blong mi i go long eni ples, mi wantem se Jehova mo oganaesesen blong hem i mekem sem mak long mi, i tekem mi enitaem i go long eni ples. Mi mi akseptem ol asaenmen blong go long ol ples we i had, mo samtaem i denja. Be mi lanem se sipos mi trastem Jehova oltaem, bambae mi harem se mi sef.
MI SAVE JEHOVA MO MI STAT BLONG TRASTEM HEM
Mi mi bon long 1948, long wan smol vilej blong Naejeria. Long taem ya, Moustapha we i smol brata blong papa blong mi, mo bigfala brata blong mi Wahabi, tufala i baptaes olsem Witnes blong Jehova. Taem mi gat naen yia, papa blong mi i ded. Mi mi harem nogud tumas. Be Wahabi i talem long mi se mifala i save luk Papa, taem i laef bakegen. Toktok ya i mekem mi harem gud mo i pulum mi blong stadi Baebol. Ale, mi baptaes long 1963, mo tri narafala brata blong mi tu oli baptaes.
Long 1965, mi joenem bigfala brata blong mi Wilson long Lagos mo mitufala i glad blong joen wetem ol fultaem paenia long Igbobi Kongregesen. Taem mi luk se oli glad mo oli gat strong tingting, hemia i pulum mi tu blong statem wok blong paenia long Jenuware 1968.
Wan brata we i wok long Betel, hemia Albert Olugbebi, i holem wan spesel miting wetem mifala ol yangfala, blong tokbaot se i gat bigfala nid blong ol spesel paenia long not blong Naejeria. Mi tingbaot yet toktok blong Brata Olugbebi we i talem se: “Yufala i yang, mo yufala i save yusum taem mo paoa blong yufala long wok blong Jehova. !I gat plante wok blong mekem longwe!” Mi wantem tumas blong mekem olsem profet Aesea we i glad nomo blong mekem enikaen wok, taswe mi fulumap wan fom.—Aes. 6:8.
Long Mei 1968, oli sanem mi olsem spesel paenia i go long taon blong Kano, long not blong Naejeria. Hemia long taem we i gat Biafran War (1967-1970), we i mekem plante man long not blong Naejeria oli safa mo oli ded, mo biaen i muv i go long is blong Naejeria. Wan brata i wari long mi, mo i traem stopem mi blong mi no go. Be mi talem long hem se: “Tangkiu tumas blong tingbaot mi. Be sipos Jehova i wantem se mi go longwe, mi sua se bambae hem i stap wetem mi.”
MI TRASTEM JEHOVA LONG OL PLES WE WO I SPOLEM GUD
Situesen long Kano i nogud we i nogud. Wo ya i spolem gud bigfala taon ya. Samtaem long wok blong prij, mifala i luk ol dedbodi blong ol man we oli ded long taem blong wo ya. Bifo i gat plante kongregesen long Kano, be bighaf blong ol brata oli ronwe finis. I gat samwe 15 pablisa nomo oli stap yet, be oli fraet mo tingting blong olgeta i foldaon. Be oli glad tumas taem mifala ol sikis spesel paenia i kasem longwe. Mo oli glad tumas taem mifala i leftemap tingting blong olgeta. Mifala i halpem olgeta blong oli gohed bakegen long saed blong spirit, mo sanem ol ripot blong wok blong prij mo oda blong ol buk i go long branj.
Mifala ol spesel paenia i stat blong lanem lanwis ya Hausa. Taem ol man oli harem gud nius blong Kingdom long prapa lanwis blong olgeta, oli glad tumas blong lesin. Be mifala i mas lukaot gud, from we ol memba blong men jos long Kano oli no glad taem mifala i prij. Wan taem, wan man i holem naef mo i ronem mi wetem brata we i prij wetem mi. !From we mitufala i ron spid moa i bitim hem, hem i no save blong kasem mitufala! Nating se i gat ol denja, be Jehova i mekem mifala i “stap gud” mo namba blong ol pablisa i stat blong kam antap. (Sam 4:8) Tede, i gat 11 kongregesen long Kano, mo i gat bitim 500 pablisa.
MIFALA I FESEM FASIN AGENS LONG NAEJA
Mekem wok blong spesel paenia long Niamey, Naeja
Afta we mi stap sam manis long Kano, long Ogis 1968, oli sanem mi wetem tu narafala spesel paenia i go long Niamey, we i kapital blong Ripablik blong Naeja. I no longtaem afta, mifala i luksave se Naeja, long Wes blong Afrika, i hot moa i bitim ol narafala ples long wol. Mifala i mas lan long ples we i hot olsem, antap long hemia mifala i mas lanem lanwis blong ples ya, hemia Franis. Nating se mifala i fesem ol hadtaem ya, be mifala i trastem Jehova mo mifala i stat blong joen wetem ol pablisa long kapital ya blong prij. Long wan sot taem nomo, klosap evriwan long Niamey we oli save rid, oli kasem wan kopi blong buk blong stadi, hemia Trutok Blong Soemaot Rod Blong Itenel Laef. !Ol man oli stap lukaotem mifala blong oli save kasem wan buk!
I no longtaem afta, mifala i luksave se ol haeman long ples ya oli no laekem ol Witnes blong Jehova. Long Julae 1969, mifala i mekem faswan asembli long kantri ya, we i gat samwe long 20 man oli joen long hem. Mifala i stap wet long dei ya blong luk tu niufala pablisa i baptaes. Be long faswan dei blong asembli, ol polis oli kam stopem mifala. Ale, oli tekem ol spesel paenia mo eria elda i go long polis stesen. Afta we oli kwestinim mifala, oli givim oda se long nekis dei mifala i mas gobak luk olgeta. Mifala i luksave se maet ol haeman ya bambae oli mekem trabol long mifala. Taswe mifala i mekem plan blong lesin long tok blong baptaes long haos blong wan brata, mo biaen long fasin haed, mifala i mekem baptaes long wan reva.
Sam wik biaen, gavman i givim oda blong mi mo ol faef narafala spesel paenia i aot long Naeja. Oli talem se mifala i gat 48 aoa nomo blong aot long kantri, mo mifala i mas faenem prapa rod blong mifala. Mifala i obei, mo mifala i go stret long branj ofis long Naejeria, mo long ples ya mifala i kasem ol niu asaenmen.
Oli sanem mi mi go long Orisunbare, wan vilej long Naejeria, mo long ples ya, mi glad blong joen wetem smol grup blong ol pablisa blong prij mo mekem ol Baebol stadi. Be afta long sikis manis, branj ofis i sanem mi wan i gobak long Naeja. !Long stat, mi sapraes mo mi fraet, be biaen mi wantem tumas blong joen bakegen wetem ol brata long Naeja!
Ale, mi gobak long Niamey. Long nekis dei afta we mi gotru, wan bisnesman blong Naejeria i luksave se mi mi wan Witnes, mo hem i stat blong askem plante kwestin long saed blong Baebol. Nao mifala i stadi, mo afta we hem i stop blong smok mo dring bitim mak, hem i baptaes. Mi mi glad tumas blong prij long ol defren ples long Naeja, mo luk olsem wanem trutok i stap gru sloslo. Taem mi kambak long Naeja, i gat 31 Witnes nomo long kantri ya, be taem mi aot i gat 69 Witnes.
“MIFALA I NO SAVE PLANTE SAMTING LONG SAED BLONG OL BRATA MO SISTA LONG GINI”
Long en blong 1977, mi gobak long Naejeria blong kasem trening. Long en blong tri wik kos ya, kodineta blong Branj Komiti, hemia Malcolm Vigo, i givim wan leta we i kam long branj blong Siera Leon long mi, blong mi ridim. Ol brata oli stap lukaotem wan singel brata we i paenia mo i gat gudfala helt, mo we i toktok Inglis mo Franis blong i save go long Gini, blong mekem wok blong eria elda. Ale Brata Vigo i talem long mi se oli bin trenem mi blong mekem wok ya. Mo hem i eksplenem tu se wok ya i no isi. Mo hem i givim advaes long mi se: “Yu mas tingting gud bifo we yu akseptem.” Be kwiktaem nomo mi ansa se: “From we Jehova nao i sanem mi, bambae i go.”
Mi tekem plen i go long Siera Leon mo mi mitim ol brata blong branj ofis longwe. Wan memba blong Branj Komiti i talem long mi se: “Mifala i no save plante samting long saed blong ol brata mo sista long Gini.” Nating se ol brata long branj blong Siera Leon oli lukaot long wok blong prij long Gini, be oli no toktok long ol pablisa longwe from we i gat bigfala problem long saed blong politik. Nating se oli traem plante taem blong sanem wan brata i go visitim olgeta long Gini, be oli no save mekem. Taswe, oli askem mi blong travel i go long Conakry we i kapital blong Gini, blong luk sipos gavman i save letem mi mi stap long ples ya.
“From we Jehova nao i sanem mi, bambae mi go”
Taem mi gotru long Conakry, mi go long embasi blong Naejeria blong toktok wetem ambasada. Mi talem long hem se mi wantem prij long Gini. Be hem i talem long mi se, mi no mas stap long ples ya from oli save arestem mi mo kilim mi. Hem i talem se: “Yu gobak long Naejeria mo yu prij longwe.” Be mi ansa long hem se: “Mi wantem tumas blong stap long ples ya.” Taswe, hem i raetem wan leta i go long Minista blong Gini, mo Minista ya i halpem mi.
Smoltaem afta, mi gobak long branj ofis long Siera Leon mo mi talemaot long ol brata, desisen blong minista ya. Ol brata oli glad tumas, taem oli harem olsem wanem Jehova i givhan long mi. !Gavman i letem blong mi save stap long Gini!
Mekem wok blong eria elda long Siera Leon
Stat long 1978 kasem 1989, mi wok olsem eria elda long Gini, Siera Leon. Mo long Laeberia, mi givhan blong mekem wok blong eria elda taem hem i no stap. Fastaem, mi siksik plante. Mo samtaem hemia i hapen taem mi stap long ol ples we i longwe. Be ol brata oli mekem bes blong olgeta blong tekem mi mi go long wan hospital.
Wan taem, mi sik we mi sik from mi kasem malaria, mo mi gat ol wom long bel blong mi. Taem mi kam gud, mi harem se ol brata oli ting se bambae mi ded, taswe oli disaed finis weples blong berem mi. Nating se mi kasem ol sik ya, be mi neva gat tingting ya blong lego asaenmen blong mi. Mi sua fulwan se Jehova nao i protektem mi, from hem i God ya we i save mekem yumi laef bakegen.
MI MO WAEF BLONG MI I TRASTEM JEHOVA
Long 1988 taem mitufala i mared
Long 1988, mi mitim Dorcas, wan paenia sista we i lavem Jehova mo i gat tingting daon. Mitufala i mared mo hem i joenem mi long wok blong eria elda. Dorcas i wok had wetem mi long asaenmen ya, mo i rere blong lego plante samting blong mekem wok blong Jehova. Mitufala i karem ol basket blong mitufala, mo mitufala i wokbaot samwe 25 kilometa blong go long ol kongregesen. Mo blong go long ol kongregesen we oli longwe moa, mitufala i yusum eni transpot we mitufala i save faenem, blong travel long ol rod we i fulap long sofmad mo ol bigfala hol.
Dorcas i gat strong tingting. Eksampol, samtaem mifala i mas krosem ol wota we i gat krokodael. Wan dei, mifala i mas travel blong faef dei, mo mifala i yusum ol kenu blong krosem wan reva, from we ol wud we oli yusum olsem brij oli brok. Taem Dorcas i stanap blong goaot long kenu, hem i foldaon i go long dip wota. Be i no gat wan long mifala we i save swim, mo i gat plante krokodael long reva ya. Be laki nomo se sam yangfala man oli jam i go mo oli sevem hem. From samting ya, blong samtaem mitufala i gat sam rabis drim, be mitufala i gohed blong mekem wok blong eria elda.
Jahgift mo Eric, oli wan presen we Jehova i givim
Long stat blong 1992, mitufala i sapraes blong faenemaot se Dorcas i gat bel. Taswe, naoia mitufala i mas disaed sipos bambae mitufala i gohed blong spesel paenia o nogat. Mitufala i tingbaot se, “!Jehova i givim wan nambawan presen long mitufala!” Taswe, mitufala i disaed blong putum nem blong gel blong mifala se Jahgift. Afta we Jahgift i bon, fo yia afta brata blong hem Eric i bon. Tufala pikinini ya, i wan nambawan presen we i kam long Jehova. Jahgift i wok sam taem long translesen ofis long Conakry, mo Eric i wan man blong givhan.
Nating se Dorcas i mas stop blong mekem spesel paenia, be hem i gohed blong mekem fultaem paenia, nating se hem i mas lukaot long ol pikinini blong mitufala. Jehova i halpem mitufala, taswe mi gohed blong mekem wok blong Jehova fultaem. Afta we ol pikinini blong mitufala oli kam bigwan, Dorcas i naf blong mekem wok blong spesel paenia bakegen. Naoia mitufala tugeta i wok olsem misinari long Conakry.
JEHOVA I PROTEKTEM MIFALA
Oltaem mi mi go long eni ples we Jehova i tekem mi mi go long hem. Plante taem mi mo waef blong mi i luksave se Jehova i stap protektem mo blesem mitufala. Taem mitufala i trastem Jehova i bitim we mitufala i trastem ol sas samting, mitufala i blokem plante problem mo mitufala i no wari tumas. Mi mo Dorcas i lanem tru long ol ekspiriens blong mitufala se Jehova nao i stap mekem mitufala i sef, from we hem i “God blong sevem mifala.” (1 Kron. 16:35) Mi mi sua fulwan se olgeta we oli trastem Jehova long laef blong olgeta, “Jehova, i protektem [olgeta] olsem wan man we i putum ol sas samting blong hem long wan bag, blong i protektem.”—1 Saml. 25:29.