?Yu Yu Save?
?Ol pris long tempol bifo oli mekem wanem wetem blad blong ol animol we oli kilim long olta?
EVRI yia, ol pris long tempol blong Isrel bifo oli stap kilim i ded plante taosen animol long olta, blong mekem sakrefaes. Folem tok blong man Jiu ya Josephus we i wan man blong raetem histri, long dei blong Pasova, ol pris oli kilim bitim 250,000 smol sipsip blong mekem sakrefaes. Hemia i min se i gat plante blad i ron long olta. (Lev. 1:10, 11; Nam. 28:16, 19) ?Oli mekem wanem wetem blad ya?
Ol man blong digim graon oli faenem wan bigfala rod blong wota aninit long tempol blong Herod, we oli yusum kam kasem taem ya we Jerusalem i lus long yia 70 K.T. Mo oli faenemaot se blad we i stap long olta i stap ron folem rod blong wota ya mo i goaot long tempol.
Traem luk tu samting we i givhan blong mekem se olta i stap klin oltaem:
I gat ol hol long stamba blong olta: Wan buk blong loa mo kastom blong ol man Jiu, we oli raetem afta long yia 200 K.T., hemia Mishnah, i tokbaot wan rod we ol wota long olta oli ron folem. Hem i talem se: “Long wan kona blong olta, i gat tu hol. Mo ol hol ya nao we blad blong ol sakrefaes mo wota we oli yusum blong klinim olta, i stap ron i go long hem, i godaon long Kedron Vali.”
Ol man blong digim graon tede oli agri wetem samting we olfala buk ya i talem. Wan buk blong histri blong ol man Jiu i talem se ol man blong digim graon oli faenemaot wan rod blong wota klosap long tempol, we i luk olsem se oli stap yusum blong tekemaot ol blad blong sakrefaes mo wota long olta.
I gat wan gudfala saplae blong wota: Ol pris oli nidim plante wota blong mekem stamba blong olta, mo rod blong wota ya i stap klin oltaem. Blong mekem impoten wok ya, ol pris oli stap yusum wota we i kamaot long taon. Oli yusum ol kanal mo ol paep blong pulum wota i kam long tempol, mo oli yusum ol tang mo pul blong storem wota. Saentis ya Joseph Patrich, i eksplenem se i luk olsem se i no gat wan narafala tempol long taem ya, we i gat wan gudfala saplae olsem blong kasem plante wota, mo blong klinimaot ol doti wota.