Wan Blaen Woman i Kasem Ansa Blong Prea Blong Hem

Woman ya Yanmei we i wan Witnes long Esia, hem i luk wan blaen woman we nem blong hem Mingjie, nao i talem long hem se bae hem i halpem hem blong krosem rod.a Mingjie i ansa se: “Tangkiu. !God i blesem yu!” Afta long samting ya, Yanmei i askem long Mingjie sipos hem i glad blong tufala i save mit blong tokbaot Baebol. Biaen Mingjie i talem se hem i bin stap prea evri dei blong God i lidim hem i go long trufala kongregesen blong hem. ?From wanem hem i stap askem samting ya long prea blong hem?

Mingjie i eksplenem se long 2008, wan fren blong hem we i blaen tu, i invaetem hem blong i go long wan jos blong ol handikap. Mingjie i lesin long tok blong pris, biaen hem i go askem long pris ya se wanem buk ya we hem i stap tokbaot long tok blong hem. Pris ya i se hemia Baebol, Tok blong God we i trutok. Mingjie i harem se hem i wantem tumas blong ridim buk ya. So Mingjie i karem wan Baebol long braille blong lanwis Jaenis we i stap long 32 volium, mo hem i ridim ol 32 volium ya long samwe sikis manis. Taem hem i stap gohed blong ridim Baebol, hem i kasemsave se doktrin blong Triniti we oli stap tijim long jos blong hem, i giaman nomo, mo se God i gat wan nem, hemia Jehova.

Taem i pas, mo Mingjie i no moa glad long samting we ol memba blong jos oli stap mekem. Hem i kasemsave se oli no mekem laef blong olgeta i laenap wetem ol samting we hem i stap ridim long Baebol. Eksampol, ol man oli stap givim ol haf kakae blong yestede long olgeta we oli blaen, be oli givim ol fres kakae long olgeta we oli save lukluk. Mingjie i harem nogud from ol fasin ya we i no stret, ale hem i stat blong lukaotem ol narafala jos long eria blong hem. Hemia nao from wanem Mingjie i stap prea blong faenem trufala Kristin kongregesen.

Kaen fasin blong Yanmei i pulum Mingjie, ale hem i agri blong stadi long Baebol. Biaen, Mingjie i joen long faswan miting blong hem wetem ol Witnes Blong Jehova. Hem i tingbaot taem ya, mo i se: “Bambae mi neva fogetem faswan miting blong mi. Olgeta brata mo sista oli glad blong luk mi mo oli talem halo long mi. Nating se mi mi blaen, be mi haremsave se i gat lav long ples ya.”

Mingjie i gohed gud mo i stat blong joen oltaem long ol miting. Hem i glad moa long ol singsing blong Kingdom, be i had long hem from we i no gat singbuk long lanwis braille we hem i save ridim. Ale, wetem help blong kongregesen, Mingjie i wokem prapa singbuk blong hem. !Hem i tekem 22 aoa blong tanem evri 151 singsing ya i go long braille! Long Eprel 2018, Mingjie i statem minista wok blong hem, mo biaen hem i spenem samwe 30 aoa evri manis blong prij.

Blong givhan long Mingjie blong i naf blong baptaes, Yanmei i rikodem ol kwestin blong buk ya Oganaesesen We i Mekem Wok Blong Jehova, wetem ol vas blong Baebol we i stap long hem. Ale long Julae 2018, Mingjie i baptaes. Hem i talem se: “Ol brata sista we oli stap long bigfala asembli ya, oli soemaot lav long mi mo samting ya i tajem hat blong mi. Mi glad tumas nao mi stat blong krae, from we naoia, mi mi joen long trufala kongregesen blong God.” (Jon 13:34, 35) Mingjie i gat strong tingting blong soemaot sem lav ya we oli soemaot long hem, taswe naoia hem i wan evanjelis we i prij fultaem.