Ripot Long Wok Blong Kingdom
“Man We i Faenem Fasin Waes Hem i Save Harem Gud”
PROVEB ya i bin hapen long Koria, we naoia i gat bitim 71,000 hapi Wetnes blong Jeova. (Proveb 3:13) !Mo tingbaot, 42 pesen long ol Kristin minista ya oli stap wok fultaem long Kristin minista wok! Ekspiryens we i kam biaen bambae i soemaot se olgeta we oli stap lukaot trufala waes oli save haremgud.
Wan woman long Pusan i bin stap go long wan skul blong Krisendom blong 16 yia finis. Hem i bin folem plante fasin we oli no laenap wetem Baebol we i mekem hem i stat blong tingting se i no gat God. Be, hem i no save talem se God i no stap, ale hem i prea long God se maet hem i save faenem trufala skul sipos i gat wan. Ale wantaem nomo hem i tingbaot ol Wetnes blong Jeova, mo hem i tingbaot se skul blong hem i bin daonem olgeta mo i givim woning long ol man we oli stap go long skul blong agensem ol Wetnes from we oli no bilif long Triniti, helfaea, mo ol narafala bilif blong Krisendom. Maet ol man ya nao oli gat tru skul. Wetem help blong wan woman we i stap kolosap, hem i faenem ples we Haos Kingdom i stap long hem. Long nekis dei, woman ya i go long wan miting.
Hem i sapraes tumas long ol samting we oli kamaot long miting ya. Ol man ya oli no singaot bigfala no singsing wetem filing olsem oli stap mekem long skul blong hem. Oli soemaot hem long wan Wetnes we i glad blong mekem Baebol stadi wetem hem, mo faswan stadi i tekem plante haoa from hem i askem plante kwestin. Long seken taem blong stadi, hem i talem se bambae hem i risaen long skul blong hem mo blong kam wan Wetnes. Hem i talem long sista we i stap mekem stadi wetem hem se bambae i no moa mekem stadi wetem hem, be bambae hem i stap kam nomo long ol miting. Be, sista ya i soemaot long hem from wanem i impoten blong mekem Baebol stadi wanwan antap long fasin ya blong kam long ol miting. Hem i akseptem tok blong sista ya, hem i folem samting we hem i lanem long stadi blong hem, mo long stret taem hem i tekem baptaes.
Naoia woman ya i glad tumas from we hem i faenem waes blong trufala God, Jeova, mo i gat hop blong laef blong olwe long nyufala wol blong God.
Wan Man We Bifo i Wan Haeman Blong Ami i Lanem Trutok
Waef blong wan haeman blong ol ami i tekem baptaes long 1962. Fastaem hasban blong hem i agensem hem, be biaen hem i no moa agensem waef blong hem, mo ol defren brata oli mekem stadi blong man ya blong 28 yia we plante taem man ya i stap mestem taem blong stadi, oli traem blong pulum intres blong hem long trutok. Hem i go long sam miting mo sam asembli, be hem i wan long olgeta ya we oli no strong blong folem trutok. Long 1990 hem mo waef blong hem tufala i go long Japan, mo tufala i joen long wan distrik asembli. Long taem ya hem i lesingud long ol tok—wan samting we hem i no bin mekem bifo. Ol tok we oli soemaot klia ol gyaman skul, oli mekem hem i sapraes, be wantaem nomo samting ya i mekem hem i luksave fasin tu fes blong Krisendom. Hem i haremgud tumas long ol samting we i kamaot mo fasin glad blong ol man blong God long Japan, we i sem mak nomo olsem we hem i bin luk long Koria. Taem hem i gobak long Koria, hem i stat blong stadi gud long Baebol mo biaen hem i tekem baptaes.
?Ale hem i mekem wanem afta we hem i tekem baptaes? Hem i risaen long wok blong hem olsem presiden blong wan hotel blong ol turis we ol man oli savegud mo i joenem waef blong hem long fultaem wok blong paenia. Hem i harem se wok blong paenia i wan rod blong pembak 28 yia we hem i bin lusum taem hem i no gohed gud long trutok.
!Naoia hem i luksave se proveb ya se “man we i faenem fasin waes i save harem gud” i stret long hem tu!