Nating Se Hem i Gat Problem Blong Helt, Hem i Tingbaot Ol Narafala Fastaem

Maria Lúcia, we i stap long Brasil, i gat wan sik (Usher’s syndrome), we i mekem se sora i fas mo sloslo hem i kam blaen. Taem hem i bon, sora blong hem i fas finis, mo taem hem i pikinini, hem i lanem saen lanwis. Taem hem i gat 30 yia, hem i stat blong kam blaen. Nating se i had, be Maria Lúcia i no wantem stap hem wan, longwe long ol narafala man. Naoia hem i gat bitim 70 yia, be hem i harem gud yet long laef blong hem, mo hem i glad.

Long 1977, bifo we Maria Lúcia i blaen, ol Witnes blong Jehova oli kam luk hem. Hem i eksplenem se: “Mi mitim Adriano, we bifo hem i wan fren blong mi long skul, be i no longtaem i pas, hem i kam wan Witnes. Hem i tokbaot promes we God i mekem long saed blong fiuja, se wol bambae i kam wan paradaes we ol man oli no moa sik. Mi mi laekem tumas ol tok blong hem, mo mi agri blong stadi Baebol. Mi stat blong joen wetem wan kongregesen long Rio de Janeiro, we oli tanem sam miting i kam long saen lanwis. Jehova i givhan long mi blong gohed gud, ale long Julae 1978, mi mi baptaes.”

Biaen, Maria Lúcia i muv i go long wan kongregesen we i no gat wan Witnes i save saen lanwis. Fastaem, i had from we hem i no kasem save long samting we oli tokbaot long miting. Tu sista long kongregesen i givhan long hem. Tufala i sidaon wetem hem long ol miting mo raetem ol not blong eksplenem ol samting we oli tokbaot long miting. Maria Lúcia i talem se: “Long haos, mi ridim ol not ya bakegen mo bakegen, gogo mi kasem save gud. Biaen, tufala sista ya i lanem saen lanwis mo tufala i stap tanem ol tok long miting, blong mi mi kasem save.”

Taem ae blong Maria Lúcia i kam nogud moa, hem i no moa save luk ol saen lanwis we oli yusum. Ale hem i stat blong yusum saen lanwis blong ol man we sora i fas mo oli blaen tu. ?Saen lanwis ya i olsem wanem? Hem i eksplenem se: “Mi putum han blong mi antap long han blong hemia we i stap tanem ol tok i kam long saen lanwis. Taem mi mekem olsem, mi kasem save samting we hem i stap talem.”

Maria Lúcia i glad tumas long wok we tufala sista i mekem blong givhan long hem. Hem i talem se: “Tufala i olsem wan sas presen we Jehova i givim. Taem tufala i givhan long mi, mi kasem ol gudfala samting we i kamaot long ol miting mo ol asembli.”

Maria Lúcia i bisi gud long wok blong prij. Hem i yusum saen lanwis blong olgeta we sora i fas mo oli blaen tu, blong prij long olgeta we sora i fas. Taem oli luk we hem i traehad bigwan blong talemaot gud nius long olgeta, oli sapraes mo oli glad. Long COVID-19 pandemik, brata blong hem, José Antônio we hem tu i blaen mo sora i fas, i givhan long hem blong i raetem plante leta.a

?Olsem wanem hem i raetem leta? Hem i talem se: “Mi yusum wan tul we oli wokem long plastik mo i luk olsem leta L. Hem i givhan long mi blong raet long ol stret laen mo mekem ol paragraf. José Antônio i save rimemba plante samting. Ale hem i talem topik mo sam vas blong Baebol long mi, mo mi raetem long ol leta blong mi. Mi traem blong eksplenem long fasin we olgeta we sora i fas oli kasem save. Plante long olgeta oli faenem i had blong kasem save long tok we ol man oli raetem.”

Naoia Maria Lúcia i blaen fulwan, be nating se i olsem, hem i gohed blong wok had. Karoline, wan sista we i tanem ol tok i go long saen lanwis, i talem se: “Maria Lúcia i klinim haos blong hem fulwan, mo i putum ol samting long stret ples blong olgeta. Hem i laekem blong rerem kakae mo serem wetem ol fren blong hem.”

Jefferson, wan elda long kongregesen blong Maria Lúcia i talem se: “Maria Lúcia i lavem Jehova. Mo hem i lavem ol man tu. Oltaem hem i stap givhan long narafala. Hem i no tingbaot hem wan nomo.”—Filipae 2:4.