Oli Laekem Tumas Ol Leta Blong Hem

Brooke i wan Witnes blong Jehova long Yunaeted Stet. Long taem blong COVID-19 pandemik, hem i raetem ol leta blong prij long ol narafala. Evri wik, hem i raetem plante leta, be afta we wan yia haf i pas, tingting blong hem i foldaon, from we wan man nomo i bin ansa, mo hem i talem long Brooke blong i no moa raet long hem bakegen. Brooke i harem se ol hadwok blong hem i blong nating nomo.

Samtaem biaen, Kim we hem tu i wan Witnes mo i wok long wan bang, i talem long Brooke se wan kastoma i tokbaot wan leta we hem i kasem long wan Witnes blong Jehova. !Hemia wan leta we Brooke i bin raetem! Wan wik biaen, kastoma ya i kambak long bang, mo i askem long Kim sipos hem i save joen long ol miting blong kongregesen, we long taem ya oli stap wajem tru long Intenet.

Smoltaem biaen bakegen, Deved we hem tu i wan Witnes, i talem long Brooke se wan man we hem i wok wetem, i kasem wan leta we Brooke i raetem. Man ya i laekem tumas leta ya from we Brooke i raetem wetem han blong hem, i talem se: “I gud sipos plante moa man oli soemaot intres olsem long ol narafala.” David i tekem janis ya blong storian moa wetem man ya mo i karem sam buk i kam long hem. Man ya i glad tumas.

Plante taem ol Witnes blong Jehova oli no save frut we i kamaot long sid blong trutok we oli planem. (Prija 11:5, 6) Nating se i olsem, samting we i hapen long Brooke i leftemap tingting blong hem, mo i mekem hem i glad long Kristin wok blong prij we hem i stap mekem.—1 Korin 3:6.