Ripot Long Wok Blong Kingdom

God i Ravemaot Wota Blong Ae Blong Hem

OL MAN we oli jenisim ol fasin blong olgeta blong folem ol loa blong Jeova long laef blong olgeta, oli kasem bigfala blesing. I tru, i no isi blong jenisim laef blong yumi, be oltaem i gat wan we i rere blong givhan. (Ol Sam 84:11) Wan stori we i kamaot long Saot Is Esia i soem samting ya.

Wan woman Franis, we hem i wan Witnes, i go holide long narafala kantri nao hem i storian wetem Kima, ona blong wan stoa. Tufala i storebaot stamba tingting blong Jeova long saed blong wol ya. Mo hem i givim wan buk long Kim, nem blong buk ya Yu Save Laef Foreva Long Paradaes Long Wol. Taem Kim i stap lukluk long ol pej blong buk ya, hem i luk vas ya we i talem se, “Hem bambae i ravemaot wota blong ae blong olgeta.” (Revelesen 21:4) Kim i talem se: “Vas ya i rili tajem hat blong mi. Taem mi stap long stoa, ol man oli ting se mi mi glad from we mi toktok mo laf oltaem. ?Be, olsem wanem taem mi gobak long haos? Mi krae gogo mi slip.” Hem i talemaot from wanem hem i stap harem nogud, i se: “Mi bin stap wetem wan man blong 18 yia, mo mi no glad nating from we hem i no wantem maredem mi. Mi no moa wantem blong laef olsem, be from we mi bin stap wetem hem longtaem, mi mi fraet blong seraot long hem.”

Smoltaem biaen, Kim i stat stadi wetem wan Witnes blong Jeova we nem blong hem Linh. Kim i talem se: “Ol samting we mi mi lanem long Baebol, mi bin wantem tumas blong mekem i wok long laef blong mi.” Taswe, mi stop blong mekem wosip long ol bubu blong mi we oli ded finis. Samting ya i mekem ol famle blong mi oli agensem mi bigwan. Antap long samting ya, mi traem blong stretem mared blong mitufala, be man we i stap wetem mi i no wantem. Tru long ol hadtaem ya, Witnes woman ya long Franis i gohed blong sanem ol buk long mi, mo tu, Linh i leftemap tingting blong mi bigwan. Longfala tingting mo lav we ol sista ya oli soem long mi, i givhan long mi blong gohed gogo, mi luksave klia ol fasin blong man ya we mi stap wetem. !Mi faenemaot se hem i gat 5 ‘woman’ finis mo 25 pikinini! Samting ya i givim strong tingting long mi blong mi livim hem.

“I no isi blong livim wan bigfala haos mo go stap long wan smol rum. Antap moa, man ya we mi livim hem, hem i wantem se mi mas gobak long hem bakegen. Hem i talem se sipos mi no wantem, bambae hem i bonem skin blong fes blong mi wetem asid. Wetem help blong Jeova, mi mi naf blong folem rod we i stret.” Kim i gohed gud, mo hem i tekem baptaes long Eprel 1998. Biaen, tufala sista blong hem mo boe blong hem tu i stat blong stadi Baebol wetem ol Witnes blong Jeova.

Kim i talem se: “Bifo, mi mi ting se bambae mi gohed blong harem nogud oltaem long laef blong mi. Be naoia mi mi glad mo mi no moa krae long naet. Jeova i ravemaot finis wota blong ae blong mi.”

[Futnot]