?I Gat Wan Gavman We Bambae i Rulum Wol Ya Blong Olwe?—?Baebol i Talem Wanem?

Raon long wol ol gavman oli gohed blong jenis. Nating se long sam kantri, gavman i no stap jenis oltaem, be i gat sam samting we i afektem ol gavman ya, olsem ol rabis ripot long saed blong ol samting we ol man blong politik oli stap mekem, taem ol kandidet oli kasem klosap sem mak namba blong vot, i gat ol raorao bitwin ol pati blong politik, mo ol man oli rebel agensem gavman.

Baebol i tokbaot wan gavman we bambae i rulum wol ya blong olwe. Maet yu bin harem sam samting finis long saed blong gavman ya. Hemia gavman ya we Jisas Kraes i tokbaot long prea we hem i tijim.

• “Taswe yufala i mas prea olsem: ‘Papa blong mifala long heven, plis yu mekem we nem blong yu i tabu. Yu mekem Kingdom blong yu i kam. Yu mekem wil blong yu i kamtru long wol ya olsem long heven.’”—Matiu 6:9, 10.

?Baebol i talem wanem long saed blong Kingdom ya?

Kingdom—wan gavman we bambae i stap olwe

Kingdom ya i stap long heven.

• Jisas i singaot gavman ya se “Kingdom blong heven.” (Matiu 4:17; 5:3, 10, 19, 20) Taswe hem i talem se: “Kingdom blong mi i no blong wol ya.”—Jon 18:36.

Kingdom ya bambae i finisim ol gavman blong man.

• Baebol i talem se: “Kingdom ya . . . bambae hem i smasem mo i finisim olgeta kingdom ya [blong ol man], mo hem nomo bambae i stanap olwe.”—Daniel 2:44.

Jisas Kraes nao i King blong Kingdom ya mo i no gat man i save spolem Kingdom ya.

• Baebol i talem se: “Rul blong hem i wan rul we i blong olwe, we i no save finis, mo kingdom blong hem bambae i neva foldaon.”—Daniel 7:13, 14.

Kingdom ya bambae i mekem se long fulwol i gat pis mo ol man oli harem se oli sefgud.

• Baebol i talem se: “Olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”—Maeka 4:4, Baebol Long Bislama.

Lanem moa long saed blong Kingdom ya

Taem Jisas i stap long wol, hem i spenem bighaf blong taem blong hem blong “talemaot gud nius blong Kingdom.” (Matiu 9:35) Hem i talemaot tu se:

• “Ol man bambae oli talemaot gud nius ya blong Kingdom long olgeta ples long wol, blong oli witnes long olgeta nesen, nao biaen en bambae i kam.”—Matiu 24:14.

Tede, ol man oli stap talemaot gud nius blong Kingdom ya long bitim 240 kantri. Mifala i invaetem yu blong lanem moa long saed blong gavman ya, mo ol gudfala samting we bambae i mekem.

Wajem video ya ?Wanem Ya Kingdom Blong God?