?God i Wantem Se Mi Mekem Wanem Long Laef Blong Mi?

Ansa we Baebol i givim

God i wantem se yu save gud hem, yu kam klosap long hem, yu lavem hem, mo yu mekem wok blong hem long olgeta hat blong yu. (Matiu 22:37, 38; Jemes 4:8) Blong save samting we God i wantem yu blong mekem, i gud yu stadi long laef blong Jisas, mo ol tijing blong hem. (Jon 7:16, 17) Jisas i no tokbaot nomo samting we God i wantem se ol man oli mekem, be hem i mekem ol samting ya. Taswe, Jisas i talem se risen we hem i stap laef ‘i no blong mekem ol samting we hem nomo i wantem, be blong mekem ol samting we Man we i sanem hem i kam, i wantem.’—Jon 6:38.

?Mi mas luk wan saen, wan vison, no wan merikel, blong save samting we God i wantem se mi mekem?

Nogat, from we God i yusum Baebol nao blong talemaot long ol man samting we hem i wantem. Insaed long Baebol i gat ‘evri samting we man i nidim blong mekem evri gudfala wok.’ (2 Timoti 3:16, 17) God i wantem se yu yusum Baebol mo yu ‘mas yusum gud tingting blong yu’ blong kasem save gud samting we hem i wantem yu blong mekem.—Rom 12:1, 2; Efesas 5:17.

?I tru se mi save mekem samting we God i wantem?

Yes, yu naf blong mekem from we Baebol i talem se: “Ol tok blong hem i no strong tumas blong folem.” (1 Jon 5:3, Baebol Long Bislama) ?Hemia i min se i isi oltaem blong obei long ol loa blong God? Nogat. Sipos yu traehad blong folem gud ol loa ya, bambae yu harem gud moa. Jisas i talem se: “Man we i harem tok blong God mo i obei long hem, hem i save harem gud moa”—Luk 11:28, BLB