?I Stret Blong Endem Laef Blong Man We i Gat Wan Rabis Sik?

Ansa we Baebol i givim

Baebol i no tokbaot kwestin ya,a be samting we hem i talem long saed blong laef mo ded i save givim stret tingting. Baebol i talem se i no stret blong kilim wan man i ded, be i no talem tu se yumi mas traem mekem man i gohed blong laef taem klosap hem i ded.

Baebol i talem se God i wokem yumi, taswe hem i “stamba blong laef.” (Ol Sam 36:9; Ol Wok 17:28) Long tingting blong God, laef i sas we i sas. From samting ya, God i talem se man i no mas kilim hem wan i ded o kilim narafala. (Eksodas 20:13; 1 Jon 3:15) Mo tu, Baebol i talem se yumi mas lukaot gud long laef blong yumi mo laef blong ol narafala. (Dutronome 22:8) I klia se, God i wantem we yumi tinghevi long laef we hem i givim.

?Olsem wanem sipos sikman ya i no save kam gud?

Baebol i no talem se yumi save endem laef blong wan man we i sik tumas mo klosap hem i ded. Stori blong King Sol blong Isrel i soemaot samting ya. Taem Sol i kasem kil long faet, hem i askem long wan man blong hem blong i endem laef blong hem. (1 Samuel 31:3, 4) Be man ya i no wantem. Biaen, wan narafala man i giaman se hem nao i bin endem laef blong Sol olsem Sol i wantem. Be Deved i jajem man ya from we hem i kilim Sol i ded. Deved i gat tingting blong God long saed blong laef.—2 Samuel 1:6-16.

?Yumi mas mekem sam samting blong man ya i no ded hareap?

Baebol i no talem se yumi mas traem mekem laef blong man i longfala moa, taem klosap hem i ded. Be Baebol i givim stret tingting, i talem se ded i wan bigfala enemi blong yumi, mo yumi ded from we yumi sinman. (Rom 5:12; 1 Korin 15:26) I tru, yumi no wantem ded, be i no nid blong fraet long ded tu, from we God i promes se bambae hem i mekem ol dedman oli laef bakegen. (Jon 6:39, 40) Wan man we i tinghevi long laef, bambae i go luk dokta blong kasem meresin blong sik blong hem. Be taem klosap hem i ded, i no nid blong mekem sam samting blong hem i stap laef longtaem moa.

?God i save fogivim man we i kilim hem wan i ded?

Baebol i no talem se God i no save fogivim man we i kilim hem wan i ded. I tru se hem i mekem wan bigfala sin,b be God i save samting we i lidim man ya blong kilim hem wan i ded, olsem sik long tingting, wari bitim mak, o maet sam fasin blong famle blong hem we hem i bon wetem. (Ol Sam 103:13, 14) Baebol i leftemap tingting blong olgeta we oli trabol. Mo tu, Baebol i talem se “ol man we oli stret wetem ol man we oli no stret bambae oli laef bakegen.” (Ol Wok 24:15) Hemia i soemaot se man we i mekem bigfala rong, olsem kilim hem wan i ded, i gat hop blong laef bakegen.