Oli Kam Stop Blong Halpem Mi

Bob i draev long wan spid blong 100 kilometa long wan aoa long wan weta we i kolkol mo i gat win mo ren, long Alberta, Kanada, taem lef wil blong trak blong hem biaen, i brok. Be hem i no save se wil blong hem i brok, mo hem i gohed blong draev faef kilometa moa (3 mael) i go long haos blong hem.

Long wan leta we Bob i raetem i go long Haos Kingdom blong ol Witnes blong Jehova we i stap long ples blong hem, hem i eksplenem samting we i hapen long taem ya. Hem i se: “I gat faef yangfala we oli draev i kam pas klosap long mi mo oli mekem windo blong trak blong olgeta i godaon,” mo “oli talem long mi se wil blong trak blong mi i brok. Mifala i stop long saed blong rod, mo oli askem blong jenisim wil ya. Mi mi no save tu sipos i gat wan spea wil o aean blong leftemap trak. Be taem mi stap sidaon long wiljea blong mi long saed blong rod, olgeta oli go aninit long trak mo oli faenem wan spea wil mo aean blong leftemap trak, mo oli jenisim wil. Long taem ya i kolkol tumas mo sno i stap foldaon. Nating se oli jenis gud, be oli jenisim wil blong mi, mo mi save ron bakegen. Mi no naf blong mekem wok ya mi wan.

“Tangkiu tumas long ol faef yangfala Witnes ya we oli givhan long mi. Olgeta oli stap ron long rod blong go prij long ol haos wanwan. Ol yangfala ya oli mekem samting we oli stap talemaot taem oli go prij. Oli sevem mi, long longfala rod ya we bae mi ron long hem, mi mi talem tangkiu tumas from samting we oli mekem. ?Hu i save? Maet oli ol yang enjel we God i sanem olgeta blong oli kam givhan long mi long dei ya.”