Oli Glad Nomo Blong Mekem Wok—Long Guyana

“I no gat tok blong eksplenem glad we mi kasem taem mi prij long ples we i gat moa nid!” Hemia tingting blong Josua, we i laef long Yunaeted Stet be i bin go prij long Guyana. Plante Witnes we oli go prij long kantri ya long Saot Amerikaa we wok blong prij i karem frut, oli gat sem tingting olsem hem. ?Yumi save lanem wanem long ol Witnes we oli muv i go long ples we i nidim moa man blong prij? ?Olsem wanem ol lesen ya i save rerem yu sipos yu wantem blong go prij long wan defren kantri?

?Wanem i pusum olgeta blong go?

Bifo we hem i go long Guyana, wan brata we nem blong hem Linel i prij long ol ples we oli no stap prij tumas long hem, long kantri blong hem Yunaeted Stet. Hem i se, “Oli askem blong wan grup blong 20 brata mo sista i go prij long ol eria aotsaed long taon long Wes Virginia. Glad we mi kasem long wok blong prij mo fasin blong joen wetem ol brata mo sista long tufala wik ya i jenisim laef blong mi! Ale mi gat strong tingting moa blong mekem beswan blong mi long wok blong Jehova.”

Wan brata we nem blong hem Gat mo waef blong hem Erika, tufala i wantem blong prij long wan defren kantri, mo oli jusum Guyana. ?From wanem? Erika i eksplenem se, “Mitufala i save wan brata mo waef blong hem we i muv i go long ples ya. Oli kasem bigfala glad mo oli laekem tumas wok blong prij long ples ya, mo samting ya i pusum mitufala blong muv i go long ples ya tu.” Erika mo Gat i stap tri yia long Guyana, mo oli tingbaot oltaem hapi taem ya we oli prij long ples ya. Gat i se, “Mifala i traem testem wok blong prij long narafala kantri, mo mifala i luk se i gud tumas.” Biaen, hem mo waef blong hem i go long Skul blong Gilead mo naoia oli stap prij long Bolivia.

?Oli Mekem Wanem Blong Rere?

Baebol i leftemap tingting blong yumi, blong yumi no mekem laef blong yumi i fasfas. (Hibru 13:5) Baebol i leftemap tingting blong yumi tu blong tingting gud mo plan gud taem yumi mekem ol bigfala desisen long laef. (Luk 14:26-33) !I wan bigfala desisen blong muv i go long wan narafala kantri! Gat i se, “Bifo we mitufala i go long Guyana, mitufala i mas mekem se laef blong mitufala i no moa fasfas. Mitufala i mas salem bisnes, haos mo ol narafala samting insaed long haos we mitufala i no nidim. Hemia i tekem sam yia. Long sem taem, mitufala i gohed blong tingbaot mak we mitufala i wantem kasem, mo evri yia mitufala i go visitim Guyana. Samting ya i mekem se mitufala i holemtaet strong tingting blong go longwe.”

Wan narafala samting blong tingbaot hemia rod blong winim mane. Samfala we oli kam blong givhan long wok blong prij long ples we i gat moa nid, oli naf blong faenem wok long kantri we oli go stap long hem, sipos loa blong kantri i letem olgeta i mekem olsem. Samfala i wok long kompiuta long sem wok we oli mekem long kantri blong olgeta bifo we oli muv. Sam narafala oli gobak long kantri blong olgeta wanwan taem blong go wok. Wan brata we nem blong hem Pol mo waef blong hem Sinead, tufala i bin gobak long Aealan evri yia blong wok. Long rod ya, oli naf blong prij long Guyana blong 18 yia, we 7 long ol yia ya hem i afta we gel blong tufala i bon.

Ol Sam 37:5 i se, “Yu mas givim laef blong yu long Hae God, yu mas trastem hem, nao bambae hem i halpem yu.” Kristofa mo Lorisa we i kam long Yunaeted Stet, tufala i bin prea plante long saed blong mak blong tufala blong go prij long wan defren kantri. Mo tu, long taem blong famle wosip, tufala i tingbaot samting we oli mas mekem blong muv, mo oli tokbaot ol gud saed mo nogud saed. From we oli wantem jusum wan ples we oli no nidim blong lanem wan narafala lanwis, oli jusum Guyana, from we long ples ya Inglis hem i ofisol lanwis.

Biaen, oli folem advaes long Proveb 15:22: “Man we i stap holem ol gudfala advaes we ol man oli givim long hem, bambae laef blong hem i save gohed gud, be man we i tanem baksaed long ol advaes olsem, ol plan blong hem bambae oli foldaon.” Oli raetem leta i go long branj ofis we i stap lukaot long wok long Guyana,b mo oli eksplenem samting we oli naf blong mekem mo histri blong tufala. Long semtaem, oli askem kwestin long saed blong ol hospital, weta mo ol kastom long Guyana. Branj i ansa long ol kwestin blong tufala mo i givim kontak blong ol elda long eria we biaen oli muv i go long hem.

Linel, we yumi tokbaot hem bifo, naoia i wan eria elda long Guyana. Bifo we hem i muv i go long we, hem tu i folem ol advaes blong Proveb 15:22. Hem i talem se, “Mi sevem mane blong go, be i no hemia nomo. Mi storian tu wetem ol narafala we oli bin go prij long wan narafala kantri. Mi tokbaot samting ya wetem famle blong mi, ol elda long kongregesen, mo eria elda blong mifala. Mo mi ridim olgeta haf we mi save faenem long ol buk blong yumi we i tokbaot olgeta we oli go prij long ples we i gat moa nid.”

Plante brata mo sista we oli wantem go prij long wan narafala kantri oli soemaot waes taem oli visitim kantri ya fastaem. Josef mo Kristina, wan mared kapol, i se, “Fastaem we mitufala i go long Guyana, mitufala i stap blong tri manis. Hemia i minim se mitufala i gat naf taem blong save ples ya. Ale mitufala i gobak long haos, mekem plan, mo muv i go.”

?Oli Mekem Wanem Blong Lan Long Niufala Ples?

Olgeta we oli wantem go prij long ples we i gat moa nid, oli mas rere blong lego sam samting mo lan long fasin blong laef mo ol kastom long niufala ples. Eksampol, olgeta we oli aot long ples we i kolkol i kam long ples we i hot, oli lanem se i gat plante kaen bebet mo flae i stap long ples ya. Josua, we hem i bin talemaot sam tingting blong hem bifo, i se, “Mi mi no lan long plante bebet mo flae olsem. !Mo long Guyana oli bigwan moa! Be sloslo mi lan long olgeta. Mi faenemaot se sipos mi klinimgud haos blong mi, ol bebet oli no plante tumas. Mi mas mekem ol samting olsem wasem ol doti plet, tekemaot doti, mo klinim haos oltaem.”

Taem yu go long wan defren kantri, samtaem i nid blong lan long ol niufala kakae mo lanem olsem wanem blong rerem ol kakae ya. Josua i se, “Mi mo brata we mi stap laef wetem, mitufala i askem ol brata mo sista blong givhan long mifala blong lanem olsem wanem blong kuk wetem ol lokol kakae. Afta we mitufala i lanem olsem wanem blong rerem wan niufala kakae, mitufala i singaot samfala long kongregesen blong kam kakae wetem mitufala. Hemia wan gudfala rod blong save long ol brata mo kam ol gudfala fren.”

Long saed blong ol kastom blong ol manples, Pol mo Katlin i se, “Mitufala i mas lanem wanem fasin mo klos we ol manples oli luk se i stret, mo hemia wan niufala samting long mifala. Taswe mitufala i mas gat tingting daon blong mekem sam jenis, sipos i laenap wetem ol advaes long Baebol. Taem mitufala i lanem ol kastom blong ol manples, hemia i mekem se mitufala i joengud moa long kongregesen, mo ol man we mitufala i prij long olgeta oli glad long samting ya tu.”

?Oli Kasem Wanem Blesing?

Josef mo Kristina i se, “Ol blesing oli plante moa i bitim ol hadtaem. From we mitufala i traem wan samting we i niu mo i had lelebet, i givhan long mitufala blong luksave samting we i moa impoten. Mitufala i luksave se ol samting we fastaem mitufala i ting se i impoten, oli no impoten tumas. Ol ekspiriens we mitufala i kasem i mekem se mitufala i gat strong tingting moa, blong gohed blong mekem bes blong mitufala long wok blong Jehova. Hemia i mekem se mitufala i kasem trufala glad.” Tingting blong tufala i sem mak long plante narafala brata mo sista.

Erika, we yumi tokbaot finis, i se, “Taem mitufala i go prij long ples we i gat moa nid, hemia i mekem se mi mo hasban blong mi i gat janis blong lanem olsem wanem blong trastem Jehova fulwan. Mitufala i luk se hem i givhan long mitufala long ol rod we mitufala i neva luk bifo. Mo taem mitufala i kasem ol ekspiriens olsem, mitufala i kam klosap moa long mitufala tu.”