Man We i Rid i Lanem Plante Samting

ATING yu yu wantem wokbaot i go long ol ples we oli stap longwe. Ating yu yu wantem mitim ol man we oli gat defren kastom. Ating yu yu wantem luk ol naesfala samting we oli stap long wol olsem kaskad, ol bigfala hil, ol bus. Ating yu yu wantem luk ol pijin, ol anamol, mo ol defren kaen tri mo gras. Ating yu yu wantem daeva ananit long solwora, mo go antap long heven blong lukluk ol sta. Ating yu yu wantem stadi long ol smosmol samting we man i no save luk wetem prapa ae blong hem. Ating yu yu wantem stadi blong save olsem wanem bren, ae, mo hat blong man i wok. Ating yu yu wantem luk taem wan pikinini i bon. Ating yu yu wantem stadi long histri mo ol samting we ol man oli faenem long graon blong save ol samting we oli hapen bifo.

Yu yu save faenemaot ol naesfala store ya tru long ol buk. Nating se yu stap long haos blong yu nomo, be yu save ridim ol buk mo ol narafala magasin. Hemia i olsem Baebol i talem, se: “Man i mekem plante buk, i no gat en long wok ya.” (Eklesiastis 12:12) Man we i rid gud i save faenemaot plante store long hif blong ol buk ya.

I Gud Blong Winim Trabol Ya

Sore tumas, raonabaot long wol i gat bitim 800 milyan man we oli gat bitim 15 yia blong ol, be oli no save rid mo raet. Samting ya i blokem olgeta taem oli wantem lanem ol samting mo toktok wetem narafala. Oli no save tingtinggud long plante samting, nao oli dipen long olgeta we oli save rid. Be olgeta ya oli save gyaman long olgeta.

Evri dei i gat sam wok we man i mas mekem. Be olgeta we oli no save rid oli faenem i had blong mekem olgeta. Olsem nao, oli no save ridim nem blong ol rod, ples we bambae ol bas mo ol plen oli go long hem. Oli sem blong askem long narafala blong ridim no raetem leta mo fulumap sam pepa. Ol mama we oli no save ridim ol tok we oli soemaot olsem wanem blong yusum wan kakae no wan meresin, oli save givim wan samting long pikinini blong olgeta we i save spolem olgeta.

I klia se man we i no save rid i mestem plante samting. Be sipos hem i kasem help, hem i save winim trabol ya. Traem tingbaot eksampel blong wan woman, Mata. Hem i gat 70 yia blong hem mo hem i blaen i bitim 20 yia finis. Hem i rimemba long tingting blong hem nomo se laet mo ol kala oli olsem wanem. Biaen wan dokta i katem hem. Nao hem i save luk bakegen ol naesfala samting we oli stap long wol mo hem i glad blong rid. Wan narafala man, Kalu, i gat 70 yia blong hem. Taem hem i yangfala, hem i no save rid, i olsem we hem i “blaen.” Be hem i go long ol kos blong save rid. Tede hem i save rid mo raet long tri lanwis.

Ating i no gat plante man we oli olsem Mata. Be plante taosen man oli olsem Kalu we oli lanem blong rid, nao oli winim trabol blong olgeta. I tru se i no isi blong lanem blong rid from i tektaem. Be man i mas wok had, mo tu hem i nidim we man i leftemap tingting blong hem mo i halpem hem. ?Yu yu save halpem wan long olgeta? Long plante kantri, ol Wetnes blong Jeova oli mekem sam kos blong tijim ol man blong rid mo raet. Kalu i folem ol kos olsem. Olsem nao, plante Wetnes oli save rid mo raet. Hemia nao wan eksampel: Long Naejiria, namba blong ol Wetnes blong Jeova we i save rid, hem i bitim tu taem namba blong ol man we oli save rid long kantri ya.

Olsem Wanem Blong Rid Moa Gud

Ating yu yu save rid finis. ?Be yu yu save rid gud? Ating i hadwok long yu. Ating yu yu stap rid, be yu mas ridim bakegen samting we yu jes ridim. Olsem nao yu yu stap ridim wan tok, yu stop long hafrod blong tok ya, nao yu gobak long stat blong hem mo yu ridim tok ya bakegen. Mo ating yu yu no save talemaot gud ol wod we yu stap ridim, mo yu yu no kasem save long mining blong ol. ?Olsem wanem yu yu save winim ol trabol ya?

Wan gel, Biatris, we i gat 13 yia blong hem i kasem save long ol samting we hem i stap ridim. Be hem i no save gud long fasin blong talem sam tok taem hem i stap rid. Ale, hem i stap joenem sam tok wetem tingting blong hem nomo. Olsem nao, hem i talem “haos” be buk i raetem se “bilding.” Wan man i soem long hem olsem wanem ol saon blong ol vawel (olsem a, e, i, o, u, y) mo ol konsonan (ol narafala leta olsem b, d, f, g) oli joen blong mekem narafala saon. Hem i tijim hem tu blong talem klia wanwan haf blong wan wod. Hem i talem long hem blong ridim buk ya My Book of Bible Stories mo blong lesin long wan kaset blong hem long semtaem.a Biatris i folem ol advaes ya, nao hem i kasem save moa long ol wod we hem i ridim mo hem i talemaot gud ol tok. Tede hem i harem gud moa blong rid.

Ating yu tu, yu no save talemaot gud ol haf blong ol wod. Yu yu stap ridim magasin ya, from samting ya yu save finis wanem ya ol haf blong wan wod. Long Engglis oli kolem ol haf ya ‘ol sylabal.’ From we yu save rid, nao yu save mekem sam samting blong talemaot gud ol wod. Yu save jusum wan wod, katem wod ya long ol haf blong hem, mo talemaot ol haf ya wanwan. (Eksampel: ta-lem-aot) Nao yu save joenem bakegen ol haf blong wod ya mo talemaot wod ya wantaem. Ale, yu save mekem olsem wetem wan narafala wod, mo biaen yu save traem ridim wod ya bakegen wantaem. Afta, yu save traem luksave ol wod wantaem wetem ae blong yu, be yu no moa talemaot olgeta sloslou wetem maot.

Ol man we oli rid gud oli no luk wan wod biaen long narawan. Oli luk plante wod wantaem, mo oli kasem save long ol grup blong wod no oli kasem save long mining blong evriwan wantaem. Olsem nao taem yu stap rid, ae blong yu oli no mas stop long ol wanwan wod, be taem yu stop oli mas luk sam wod tugeta. Mo taem yu stop olsemia, yu mas stop smoltaem nomo. Sipos yu yu traehad blong mekem olsem, bambae yu kasem mak. Be lukaot we yu no ridim bakegen samting we yu jes ridim. Samting ya i blokem ol tingting we oli go insaed long maen blong yu, nao yu no kasem gud wanem yu stap ridim. Taem yu rid, yu no mas stop. Yu yu mas tren blong mekem olsem.

Ating yu yu stap ridim ol isi tok nomo. Be man we i rid gud, i kasem save long wanem samting hem i stap ridim, hem i rimemba samting ya, mo hem i lanem ol nyufala wod. I gud sipos yu yu traem kasem ol mak ya. Blong mekem olsem, folem ol advaes we oli stap long bokis we i stap long pej ya. Yu yu save ridim olgeta mo jekem sipos yu yu folem olgeta.

Jusum Ol Gudfala Buk

Taem yu rid gud, yu kasem save long plante samting mo long plante nyus we oli stap long buk mo magasin. I tru, yu save lanem sam samting long televisin mo video. Be sipos yu ridim plante buk, bambae yu save fasin ya blong tingtinggud, blong tingbaot sam samting we yu neva luk bifo mo blong talemaot ol tingting blong yu. Ol fasin ya bambae oli kam moa gud. Yu save rimemba ol tok mo ol pija we yu luk long ol buk we yu ridim, nao yu save tokbaot no raetem ol samting we yu ridim long narafala. Nao bambae ol man oli glad blong joen mo storeyan wetem yu.

I gat plante samting blong tokbaot. ?Yu yu save stat wetem wanem buk? Baebol i talem se: “Man i mekem plante buk, i no gat en long wok ya.” Hem i talem tu se: “Man we i ridim plante buk blong olgeta, bodi blong hem i save taed from.” (Eklesiastis 12:12) Yu yu no save ridim evri samting. Mo tu, i no olgeta buk we oli stret mo oli talem trutok. Taswe yu yu mas jusum olgeta. Traem folem advaes ya: Ridim ol buk we oli save givhan long yu, nao fasin blong yu bambae i kam moa gud. Ridim ol buk we oli save givhan long yu long wok, long skul mo long ol wok we yu mas mekem long famle. Sipos yu ridim ol buk we oli stap kamaot long evri ples long wol olsem Wekap!, bambae yu save lanem plante samting. Long magasin ya, yu save faenem sam nyus we oli kam long olgeta ples long wol.

Sipos yu yu jusum gud ol buk we yu ridim, bambae yu lanem sam samting we yu save mekem biaen. Mo tu, save blong yu i save gru, mo yu save harem gud long saed blong speret. Olsem nao jusum gud, yusum gud ol jans blong rid long haos blong yu, taem yu spel long wok, taem yu wet long wan samting, taem yu go long bas, mo taem yu mekem sam narafala samting olsem. Sipos yu gohed blong rid, samting ya bambae i mekem yu kasem save long plante samting.

[Futnot]

[Bokis blong pija long pej 30]

Olsem Wanem Blong Kasem Save Moa Long Wan Buk

● Taem yu stap rid, tingtinggud mo askem kwestin long yu wan mo traem faenem ansa long olgeta.

● Rimemba stampa tok mo nem blong ol haf blong wan store we yu stap ridim.

● Traem luksave olsem wanem evri haf oli joen wetem stampa tok.

● Long tingting blong yu, joenem ol samting we yu save finis wetem ol samting we yu yu stap lanem.

● Folem samting we yu yu ridim long laef blong yu.

Olsem Wanem Blong Save Sam Moa Wod

● Raetemdaon ol wod we yu yu no save.

● Luksave olsem wanem oli yusum ol wod ya.

● Lukluk long diksonari blong save mining blong ol wod.

● Lanem blong talemaot gud ol wod.

● Taem yu toktok wetem narafala, yusum ol nyufala wod we yu lanem.