Wan Alkolik Long Famle
“Fasin blong gohed blong tekem strong dring i joen wetem alkolik . . . Taem i gat wan alkolik nomo long famle, evri famle i no glad long hemia we i gohed blong tekem strong dring.”—Dr. Vernon E. Johnson.
ALIS, wan gel blong faef yia i stap slip long bed, leg blong hem i soa tumas. Wan kil we i stap tu dei finis i soemaot we oli mas kavremap ful leg blong hem wetem simen. Be simen ya oli taetem tumas, nao samting ya i mekem leg blong hem i solap. Alis i plis long papa mama blong hem blong karem hem i go long dokta, be papa blong hem i harem nogud from alkol i stap wok, mo mama blong hem i stap goraon long tufala we hem i no save hu i nidim moa help.
Sam dei i pas, leg blong Alis i ded. Taem wan blak wora i stat blong ron long fingga blong leg blong hem, papa mama blong hem oli resis kwiktaem wetem hem long haospetal. Taem oli openem simen, wan dresa ae blong hem i kam dak taem i luk leg blong Alis i sting finis, mekem se oli mas katemaot.
Man We i No Save Lego Dring Mo Hemia We i Dipen Long Hem
Trabol we i hapen long taem ya i go moa, i no se wan man i lusum wan haf blong bodi blong hem nomo. Papa blong Alis i wan alkolik. Olsem nao, hem i harem nogud mo tu hem i no rere blong lukluk long dota blong hem, taem i nidim hem. Man blong givim advaes long bisnes ya Toby Rice Drews i talem se: “Fasin we man i no save lego alkol i mekem se alkolik i putum ol famle blong hem long laswan ples—afta alkol mo ol samting we i joen wetem.”
?Olsem wanem long mama blong Alis? Hem tu i dipen long wan samting, i no long alkol, be long hasban blong hem we i alkolik. Kolosap evritaem hem we i no alkolik i yusum ful taem blong hem blong stopem alkolik ya blong i no moa dring no blong traem blokem filing we hem i harem nogud long fasin ya blong hasban blong hem.a Sloslou hem tu i kasem trabol blong alkolik olsem we hem tu i dipen long alkol—be hem i no dring alkol. From risen ya nao, ol man olsem mama blong Alis oli kolem olgeta, hemia we i dipen long hem.
Tufala tugeta, alkolik ya mo hemia we i dipen long hem, wan samting no wan man i kontrolem tufala. Tufala i blaen long wan samting we tufala i no save. Tufala tugeta i trabol mo oli no naf blong lukaotem ol pikinini blong tufala. Tufala i no moa save, from we alkolik ya i no save kontrolem dring blong hem, hemia we i dipen long hem tu i no save kontrolem alkolik ya, mo tufala tugeta i no moa save kontrolem frut we bambae i kamaot long ol pikinini blong tufala from fasin ya blong man we i no save lego dring.
Be i gat help blong alkolik ya mo famle blong hem. Bambae yumi tokbaot samting ya long ol haf we oli kam biaen.
[Futnot]
a Store ya i tokbaot man we i alkolik, be sem samting i save kamaot long woman tu.