Oli Makemaot Smol Taem Nomo Blong Yusum Olsem “Gudfala Taem”

TEDE i no plante papa mama we oli tekem i naf taem wetem ol pikinini blong olgeta. Plante oli no mared mo oli stap traehad blong lukaot ol pikinini blong olgeta we man no woman we i bin stap wetem olgeta bifo i no givhan long olgeta. Mo from we ekonomi i foldaon, plante papa mama we oli gat pikinini oli luk se tufala evriwan oli mas go wok blong kasem i naf mane blong sapotem famle. Taswe, hemia i no wan samting blong sapraes, se tingting blong makemaot sam taem olsem gudfala taem i kam antap bigwan.

Olsem plante man oli save, plante taem gudfala taem i joen wetem fasin blong mekem plan blong spenem samtaem wetem pikinini, plante taem i gud blong gat tingting blong mekem wan isi wok—eksampel, wan spesel taem blong goaot samples, olsem wan trep i go long ples blong lukluk ol anamol. Yes, tingting ya i bin karem frut. Ol pikinini oli nidim fasin keagud we eni man i save soemaot long olgeta. Be, stampa tingting we ol man oli gat long gudfala taem i gat sam problem we i save kamaot from, we i stap kam klia moa long ol man we oli savegud long fasin blong lukaot long ol pikinini.

I luk olsem se plante papa mama we oli bisi mo oli spenem bighaf long taem blong olgeta long wok blong olgeta oli bin tekem rong tingting se fasin blong spenem smoltaem, we oli mekem plan from wetem wan pikinini bambae i lukaot long ol nid blong pikinini long saed blong taem we hem i nidim blong spenem wetem papa mama blong hem. Taswe, magasin ya Daily News blong Nyu Yok i talem tok blong Dokta Lee Salk, wan tija long ‘Cornell University Medical School’ long Amerika, olsem ya se: “Tingting long saed blong gudfala taem we oli makemaot finis i krangke.” Hem i eksplenem se: “Tok ya i bin kamaot from ol papa mama oli harem se oli gat fol. Oli stap mekem eskyus blong spenem smol taem nomo wetem ol pikinini blong olgeta.”

?Be ol gudfala samting blong taem ya, wetem fasin blong papa mama blong givim ful tingting mo toktok long pikinini nomo long smol taem ya, i save tekem ples blong fasin blong no spenem plante taem wetem pikinini? No gat, from wan gudfala risen—ol fasin mo rod we papa mama oli stap soemaot oli save tijim ol pikinini blong olgeta moa bitim ol narafala samting. I no longtaem wan stadi long ol yangfala we oli stap insaed long wan taon i soemaot trabol we i save kamaot from rabis eksampel. Sipos wan memba blong famle blong wan yangfala i bin stap long kalabus taem yangfala ya i stap gruap, samting ya i mekem se yangfala ya i gat tu jans bitim ol narafala blong mekem samting we hem i mas go long kalabus from. I sem mak, olgeta we oli gruap long famle we oli yusum tumas alkol no drag oli gat tu jans blong kam nogud bitim ol narafala long ol fasin blong yusum ol samting ya we oli save givim ded.

Gudfala eksampel blong papa mama i save gat bigfala paoa olsem. Problem i stap se i tekem taem blong soem wan gudfala eksampel, longfala taem, i no ol taem we oli sot nomo. Olsem Daily News blong Nyu Yok i talem: “Problem wetem tingting blong gat gudfala taem se ol impoten taem we papa mama i spenem wetem wan pikinini—hemia ol toktok mo ol disisen we i save mekem pikinini i harem se hem i stap sef, mo i givim ol rul long hem we hem i save folem long laef blong hem mo i mekem se hem i save tinghae long hem wan—oli save kam eni taem nomo.” Wan man i no save mekem plan blong kasem ol samting ya we oli save kam eni taem nomo. Papa mama i save putumap 15 menet blong gudfala taem blong spenem wetem wan pikinini, ?be hu i save talem sipos papa mama oli save kasem mak we oli stap storeyan gud mo frengud wetem pikinini long smol taem olsem? ?Mo olsem wanem eksampel blong papa mama i save tijim pikinini sipos hemia nomo ol menet we papa mama i spenem wetem hem long dei ya?

From we ol papa mama oli gat smol fri taem nomo, ?wanem i save givhan? I no gat rod we i isi. I no gat wan samting i save jenisim laef we wol ya i bin mekem se wok blong lukaot long ol pikinini i had wok. Maet sam papa mama oli save katem taem we oli spenem long wok blong olgeta. Wan man we i no longtaem i raetem wan buk long saed blong fasin blong lukaot long pikinini i talem long eni papa mama we i gat rod blong mekem samting ya se hem i mas mekem olsem—stap long haos wetem ol pikinini. Be long plante papa mama, oli no save mekem olsem. Mo tu olgeta we program blong wok blong olgeta i no strong tumas blong folem no olgeta we oli no wok long wan masta oli faenem se i had yet blong spenem i naf taem wetem ol pikinini blong olgeta.

Sam man blong stadi oli talem long ol papa mama blong lukluk long wok we oli stap mekem long haos blong olgeta, olsem fasin blong klinim, kuk, fiksimap ol samting, lukaot gud long trak, wasem klos, mo go pem ol samting long stoa, blong luk sipos oli save mekem sam long ol wok ya wetem ol pikinini blong olgeta. Wok wanples no spel wanples, maet i save givim taem long papa mama blong toktok wetem ol pikinini blong olgeta mo blong givim gudfala eksampel. Ol Kristin papa mama oli gat ol narafala wok we bambae oli wantem blong mekem wetem ol pikinini blong olgeta. Ol Kristin miting, Kristin minista wok, Baebol stadi long famle, joen wetem ol Kristin brata mo sista—ol samting ya oli mekem wan impoten taem we ol papa mama oli gat blong stap wetem ol pikinini blong olgeta.

I gud blong save se, Loa we God i givim long nesen blong Isrel 3,000 yia bifo i tokbaot sem samting. Long Dutronome 6:6, 7, yumi ridim se: “Mo ol tok ya we mi mi stap talem long yu tede, bambae yu mas fasem olgeta long hat blong yu. Mo bambae yu mas tijim pikinini blong yu long hem, mo yu mas tokbaot olgeta taem yu yu stap sidaon long haos blong yu, mo taem yu yu wokbaot long rod, mo taem yu yu go slip, mo taem yu yu girap.” Laef i no isi long ol taem bifo. !Tingbaot ol taem we oli nidim blong mekem ol wok we oli mas mekem blong stap laef nomo—papa i mas tekem hamas taem blong wok blong givhan long famle blong hem, no hamas hadwok oli mekem long ol wok olsem kuk no wasem ol klos! Be ol papa mama we oli laekem Jeova ol mekem plante samting wetem ol pikinini blong olgeta, taswe oli faenem plante taem long dei blong tijim Loa blong God long ol yangfala hat blong olgeta.

Ol Kristin papa mama tede oli mas mekem sem samting. Long saed blong bisnes ya blong spenem taem wetem ol pikinini blong olgeta, oli mas agensem fasin ya blong folem rod we i moa isi long olgeta. Wan olfala tok we i talem se, “I no plante samting we i stap long hem, be gudfala samting we i stap long hem,” i no stret wetem fasin blong tijim pikinini. Antap moa long yangtaem blong olgeta, ol pikinini oli no nidim spesel taem nomo be tu taem blong stap “wanples.”

[Tok blong pija long pej 16]

Famle i bisi long haos, ol pikinini tu oli joen

[Tok blong pija long pej 16]

Wok wanples long wok blong Jeova