Wan Nyufala Skul Long Afrika

Man blong Wekap! long Naejeria i raetem store ya

LONG Julae 1990 oli ridimaot wan leta we i mekem bigfala glad i kamaot long medel blong bitim 400 volontia, ol Wetnes blong Jeova, we oli slip mo oli wok long branj ofis blong Watch Tower Society long Igiduma, Naejeria. !Skul Blong Ol Man Blong Givhan, we oli stanemap long Yunaeted Stet long 1987, hem i stap kam long Afrika, mo bambae oli holem ol faswan klas long Igiduma!

Long ol manis we oli kam biaen, Betel famle i rerem ol samting from faswan klas.a Ol studen mo ol tija oli nidim ples blong slip. I no gat inaf rum long ples blong ol visita; i nidim 15 rum bakegen. Taswe ol Wetnes oli stat blong jenisim ol rum blong putum ol samting long olgeta, oli kam ol naesfala rum blong slip. Ol wok ya, hemia blong putum tael long floa, pentem ol wol, mo hangem ol kaliko blong windo. Long woksap blong ol kapenta oli wokem ol bed, kabod, mo ol des mo oli putum long ol rum wanwan. Biaen, oli karem ol jea, ol laet blong rid, mo ol ples blong putum buk oli kam insaed. Oli fulumapgud ol ples blong putum buk wetem ol tiokratik buk.

Antap long samting ya, oli jenisim rum blong spel i kam klasrum mo laebri blong ol studen. Oli jenisim wan bedrum blong ol sikman i kam wan ofis blong ol tija blong smoltaem mo insaed oli putum ol des, tebel, mo ol narafala samting blong yusum long ofis. Long sem taem, taem oli stap talem nyus blong skul ya long ol asembli blong ol Wetnes blong Jeova long kantri ya, plante handred leta blong aplae oli stap kam long ol brata we bambae oli kam studen long skul ya.

Long fas wik blong Febuwari 1992, evri samting i rere. Tufala tija, Michael Purbrick mo Peter Nicholls, tufala i aot long Engglan i kasem ples ya blong tijim faswan klas. Wetem ol 22 studen, i gat tri brata ya, Isaiah Mnwe, Isaiah Olabode, mo Pius Oparaocha we biaen bambae trifala i kam olsem tija blong skul ya, trifala i kam tu. Trifala ya oli Wetnes blong Naejeria we trifala i stap lan blong tijim ol klas long skul ya biaen.

Stampa Tingting Blong Putumap Skul Ya

Long Betel, oli stap tingbaot mo oli stap haremgud long ol samting we bambae i kam. ?From wanem? From spesel paoa we skul ya i save gat long wok blong mekem disaepol long Naejeria. Longtaem bifo Jeova i talem se bambae hem i givim ‘sam man olsem presen.’ (Ol Sam 68:18) Hem i mekem samting ya long taem blong ol aposol, olsem aposol Pol i raetem long Efesas 4:8-11. Tede, Jeova i stap givim sam man tu olsem presen. Skul Blong Ol Man Blong Givhan i wan nambawan rod blong halpem sam long ol man ya blong karem moa responsabiliti long ogenaesesen.

Long kantri ya, i gat moa long 160,000 Wetnes long bitim 3,000 kongregesen. Sam long ol kongregesen ya oli gat wan no tu elda nomo mo sam man blong givhan. Ol narafala kongregesen oli gat bigfala teritori we oli no talemaot gud nyus plante long hem yet. Taswe, i gat bigfala nid blong gat ol man we oli naf blong lidim wok blong prij, be tu blong lukaot long ol sipsip mo tij insaed long ol kongregesen.

Mak blong Skul Blong Ol Man Blong Givhan i blong trenem ol brata blong lukaot long ol responsabiliti ya. Afta long skul ya, sam long ol studen oli mekem wok blong spesel paenia no wok blong ol elda we oli goraon, i gat bigfala nid long saed blong tufala wok ya long Naejeria. Sam narafala oli gobak long ol kongregesen blong olgeta blong givhan mo leftemap tingting blong ol brata long ples ya. !Hem i wan blesing blong gat ol man we oli naf blong mekem wok olsem long ol kongregesen we oli stap long hem!

Spesel Trening

Nating se Skul Blong Ol Man Blong Givhan i joen wetem ‘Watchtower Bible School of Gilead,’ we i blong trenem ol misinari blong wok long ol narafala kantri, be ol program blong hem oli spesel. Long taem blong eit wik blong skul ya, ol studen oli stadi dip long Baebol. Oli stadigud long plante tijing blong Baebol, olsem advaes long responsabiliti blong lukaot ol sipsip mo ol rod blong winim ol problem long Kristin laef. Mo tu oli lanem tijing blong Baebol long saed blong fasin ya blong lidim wan wok, stretem problem long kongregesen, mo bisnes blong ogenaesesen. Oli kasem spesel trening long pablik tok mo wanwan long olgeta oli kasem advaes long ol tija blong olgeta we oli keagud long olgeta, we i givhan long olgeta blong gru moa long saed blong speret.

Long ful kos ya, wanwan studen i kasem 45 wok blong mekem long klasrum, mo wanwan long olgeta i haremgud long 256 haoa blong ol tijing long klasrum. Antap long samting ya, wanwan studen i spenem 140 haoa blong mekem homwok mo i tekem 14 haoa blong mekem tes.

Baebol nao i bigfala buk we oli stadi long hem, be oli askem ol wanwan studen blong tekem ol prapa kopi blong olgeta blong 16 narafala buk oli kam long skul, ol buk we Watch Tower Society i prentem we oli givhan blong stadi long Baebol. Long taem blong skul ya, ol studen oli mekem dip stadi tu long ol narafala buk we oli save faenem long laebri blong Betel we i fulap long buk. I klia se oli mas ol gudfala man blong rid.

Afsaed long ol wok long skul, evridei ol studen oli wok 45 menet long wan long ol eit narafala wok blong Betel: klinim ol samting, rum blong kakae, lukaot long yad, lukaot long haos, long kijin, was, putum ol samting long sip mo karem olgeta samting long trak. Oli jenisim ol wok ya mekem se long en blong eit wik kos ya, wanwan long olgeta i gat ekspiryens long olgeta wok ya. Wan long ol studen i talem se: “Wok we mi stap mekem long ol defren haf blong Betel i mekem mi kasem save se Jeova nao i man we i lidim wok ya.” Wan narafala i talem se: “Ol brata we oli lukaot long wok oli rere blong tijim mo stretem long fasin lav.” Mo wan narafala i talem se: “Wok blong Betel i wan samting we evriwan i mas traem mo save se hem i gud.”

?Ol brata oli talem wanem long saed blong trening we oli kasem? Wan i talem se: “[Hem i] wan skul we i nambawan bitim olgeta skul.” Wan narafala i talem wetem bigfala glad se: “!Hemia wan plan we i stret bitim ol narafala plan!” Wetem hat we i fulap long fasin glad mo fasin tangkyu, ol studen blong faswan klas oli raetem wan leta se: “Strong tingting blong mifala i . . . blong mekem evri haf long laef blong mifala i stanap long mesej blong gud nyus.”

Ol Leta We Oli Kam Long Ol Ples We Oli Wok Long Olgeta

Long taem blong ol faswan manis blong 1992 mo 1993, oli mekem ol fo faswan klas blong Skul Blong Ol Man Blong Givhan long Naejeria. Long wan leta blong talem tangkyu we ol studen blong namba tu klas oli sanem i go long Hed Kampani, oli raetem se: “Tru ya, neva mifala i go long wan skul we i moa gud bitim hemia. Kos ya i moa gud bitim program blong wan yunivesiti. Taswe mifala i glad blong agri wetem William Phelps we i talem se ‘save blong Baebol we yu no go long wan kos blong haeskul i moa gud bitim wan kos long haeskul we i no gat wan Baebol.’ Long olgeta samting ya, trufala intres blong yufala long mifala i klia nomo. Taswe mifala i gat strong tingting blong mekem fultaem wok i kam faswan wok long laef blong mifala.”

?Ol man long ol nyufala ples we ol brata we oli mekem kos ya oli go blong wok long hem, oli gat wanem tingting long ol brata ya? Wan elda blong goraon i raetem wan leta blong tokbaot tu brata we tufala i stap wok olsem spesel paenia, tufala i kamaot long faswan klas, i se: “Naoia ol miting oli gat paoa, oli leftemap tingting, i mekem evriwan oli glad, mo oli gat mining. Wok blong prij i stap gru . . . Kongregesen i fulap long glad . . . Taem mi askem sam brata long saed blong wok blong tufala spesel paenia ya, presiden elda i ansa we wora i ron long ae blong hem from glad, se: ‘Mifala i talem tangkyu long Jeova mo ogenaesesen blong hem blong sanem ol man blong givhan long kongregesen blong mifala we oli stanap strong mo ol wok blong olgeta oli gat frut.’ ”

?Hu i Naf?

Blong joen long Skul Blong Ol Man Blong Givhan long eni kantri i wan nambawan jans blong wok, wan nambawan blesing we Jeova i givim. I klia nomo, trening ya i halpem ol studen blong gru moa long mak blong olgeta olsem ol bigman long saed blong speret mo i mekem oli naf blong Jeova i yusum olgeta fulwan.

Yumi kasem save se ol mak blong kasem oli hae. Blong kam i naf, ol man we oli fulumap ol fom blong aplae, oli mas stap wok finis olsem ol elda no man blong givhan long Kristin kongregesen blong tu yia no moa. Fastaem oli jusum olgeta we oli stap wok olsem ol fultaem paenia. Evriwan oli mas man we oli no mared mo yia blong olgeta i mas stap bitwin 23 mo 50. Oli mas man we kot komiti i no bin stretem olgeta no kongregesen i no bin putumaot olgeta long ol faef yia we oli pas. Ol man we oli fulumap fom oli mas save rid, raet, mo toktok gud Engglis lanwis, mo oli mas gat gudfala helt, we oli no nidim spesel fasin blong lukaot long olgeta no spesel kakae.

Bigfala samting se, olgeta we oli wantem mekem wok ya oli mas rere, oli mas glad, mo oli mas man we oli save wok long eniples we i gat nid. Samting ya i nidim wan strong tingting blong wantem mekem wil blong God be tu strong tingting olsem Aesea, we hem i glad blong givim hem wan blong mekem wan spesel wok, i se: “!Mi ya, mi stap! Yu sanem mi.”—Aesea 6:8.

?Yu gat sem tingting olsem? ?Laef blong yu i stret blong yu save traehad blong kasem blesing blong wok ya? Olgeta we oli bin mekem olsem oli no sore from. Wan brata long skul ya we naoia i stap wok olsem wan seket elda i raetem se: “Long mi, Skul Blong Ol Man Blong Givhan i wan presen we yumi no save skelem wetem wan narafala presen. Hem i olsem nambawan samting long saed blong speret long laef blong mi. Sipos mi gat jans blong statem laef blong mi bakegen, bambae neva mi jusum wan defren rod.”

[Futnot]

[Tok blong pija long pej 18-20]

Tufala tija Isaiah Mnwe mo Pius Oparaocha

Tijing long klasrum

Grup blong toktok tugeta long klasrum

Mekem dip stadi long laebri

Wok long ples blong was mo long ples blong sanem samting long sip i go long defren ples