“!Sam Man i No Blokem Mifala Blong No Mekem Lafet Ya!”

Sam skul tija mo sam narafala man oli bin talem se wan man i blokem ol pikinini blong ol Wetnes blong Jeova blong no joen long pleplei we ol skul pikinini oli mekem long ol lafet olsem Krismas, Ista, mo Halowin. Biaen i gat sam eksampel blong ol sotfala leta blong ol pikinini we oli Wetnes blong Jeova, we oli raetem blong talem from wanem wanwan long olgeta oli no wantem joen long ol lafet blong ol holide ya.

“NATING se mi eksplenem long ol fren blong mi long skul from wanem mi no mekem ol samting ya, oli harem yet se wan man i blokem mi. !Be i no gat man we i blokem mi! Yu luk, oltaem oli mas wet gogo kasem Krismas no sam narafala holide blong olgeta blong kasem ol presen, taem mi stap kasem ol samting ya mo mi go long ol pati tru long yia. Mi save se i no famle blong mi nomo we i laekem mi be kongregesen mo Jeova tu, mo samting ya i moa spesel long mi bitim eni holide.”—Becky, 13 yia.

“Mi save se olgeta holide oli gat ol nogud stampa. Jisas i no bon long Krismas. Famle blong mi i no nidim blong mekem wan spesel samting blong tekem ples long ol holide olsem. Oltaem famle blong mi i stap taem mi mi nidim olgeta. Long mi, samting ya i sas moa bitim eni presen we oli save givim long mi.”—Josh, 15 yia.

“Krismas. Mi no harem se wan man i blokem mi from we lafet ya i no Kristin nating. Be i moa gud long mi sipos mi mi save se papa mama blong mi tufala i givim presen long mi bitim Fata Krismas we i stap kam long fasin haed. Ista. Wetem Ista hem i rili had from we ol man bambae oli talem se hem i blong ‘Jisas mo fasin blong laef bakegen’ no hem i jes blong ‘stap lukaot ol eg.’ ?Be ol eg oli gat wanem wetem Jisas? Mo tu nem ya Ista i kamaot long wan olfala woman god. Halowin. Stampa tingting blong Halowin i no laenap nating wetem tingting blong mi. !Ol gos mo ol rabis speret, YUCK!”—Katie, 10 yia.

“Mi olsem wan yangfala, neva mi harem nogud from we mi mestem wan holide blong wol. Papa mo mama blong mi tufala i no talem long mi se ‘yu no save mekem ol samting ya from yu wan Wetnes blong Jeova,’ be mi savegud Baebol mo wanem tingting blong Jeova long ol holide ya. Long haos blong mifala, fasin blong givim presen i hapen tru long yia.”—Ryan, 17 yia.

“Long evri holide, oli stap mekem lafet blong tingbaot samting we i gyaman. Plante pikinini we mi save oli mekem lafet long ol holide blong kasem ol swit loli no ol presen. Samting we mi gat we i moa gud bitim ol holide, hemia nambawan ogenaesesen blong ol Wetnes blong Jeova. Tok blong God i no blong wan dei nomo, olsem wan holide, hem i gat wan hapi mesej we i blong olwe.”—Brooke, 14 yia.

“Ol risen we i mekem se mi no mestem ol holide: 1. Baebol i talem se oli rabis. 2. Mi no kea long olgeta. 3. Papa mo mama blong mi tufala i givim presen long mi.”—Brandi, 6 yia.

“Mi no harem se wan man i blokem mi. Mi no wari sipos mi no joen long lafet blong tingbaot ol holide. Mi kasem ol presen, mo mifala i pleplei spot mo gat ol pati. Mi kasem plante samting nating se mi no joen long lafet blong tingbaot ol holide. Mi wantem stap wan Wetnes long evri samting we mi mekem mo i no gat wan samting we i save pulum mi blong gobak.”—Brianne, 9 yia.

“Mi rere blong go long klas 5 mo mi no fraet blong talem se mi wan long ol Wetnes blong Jeova. Wan taem wan boe i talem long mi se mi mas harem nogud from we mi no kasem eni presen long Krismas, be mi talem se mi kasem presen tru long yia. Nao hem i talem se mi mi laki. Mi ting se i no gat wan Wetnes blong Jeova we i sore from we hem i kam wan Wetnes blong Jeova.”—Jeff, 10 yia.

“Mi mo sista blong mi mitufala i mekem lafet blong tingbaot mared blong papa mo mama blong mitufala olsem wan holide blong famle. Mi kasem bigfala glad blong rerem ol presen, ol kad mo ol narafala samting mo blong givhan long papa mama blong givim presen long tufala we i mekem tufala i sapraes, samting ya i mekem mi glad bitim glad we mi gat taem mi kasem wan presen. Fasin blong givim presen i moa gud bitim fasin blong kasem presen.”—Rachel, 16 yia.

“Taem mi mi smol nomo, mi faenem se i had blong no joenem sam holide. Be biaen mi luksave se ol holide oli save statem fasin griri, rao, mo fasin blong sore. Taem i gat sam spesel dei blong givim presen, neva yu save sapraes long wan presen. I moa gud sipos mi kasem sam spesel presen eni taem long yia. Blong mekem lafet no blong no mekem lafet i jes wan smol haf blong wan disisen we i bigfala moa, se: givim laef blong yu no, no givim laef blong yu blong mekem wok blong Jeova. Taem mi tingbaot holide olsem, stret disisen i klia nomo.”—Ben, 13 yia.

“Taem mi mi smol i gat sam spesel taem we mi harem se mi mestem sam holide we i gud, be biaen mi laf taem mi tingbaot olsem wanem ol eg, Jisas, mo lafet blong Ista evriwan i go wanples. Taem mi kam bigfala moa papa mama blong mi tufala i eksplenem long mi ples we olgeta saen ya oli kamaot, mi luk se samting ya i nogud. Mi harem nogud taem mi tingbaot olsem wanem Jeova mo Jisas tufala i mas tingting taem tufala i luk we ol man oli joenem nem blong tufala wetem ol hiten tingting olsem.”—Alexa, 18 yia.

“Kolosap long taem blong Krismas, yu save harem nogud taem yu stap long skul mo yu harem se yu yu stap yu wan. Ale mi luksave se fasin blong mekem lafet blong tingbaot Krismas i no save winim ol trabol blong yu, i no save mekem famle blong yu i joengud, mo i no save mekem yu glad. Fasin blong folem ol rul blong Baebol nomo i save mekem samting ya.”—Joe, 15 yia.

“Mifala i no mekem lafet long Krismas no wan narafala holide, be mifala i gat Bigfala Dei blong pleplei blong ol pikinini. Mifala i kasem presen mane blong pem eni samting we mifala i wantem. Wan yia mi givim wan toktok long klas blong mi long saed blong skul blong mi. Mi no folem rod blong wol, be mi mekem prapa rod blong mi blong go long ol miting, go long wok blong prij, mo mi mekem prea i kam haf blong laef blong mi. Bambae mi baptaes long nekis asembli.”—George, 11 yia.

“Mi laekem tumas blong kasem ol presen, mo mi kasem olgeta tru long yia. Mi mi no mestem plante samting long saed blong ol pati. Mi stap mekem Jeova i glad taem mi stanap strong long trutok. I fani blong luk se sam fren blong mi long klas we oli no Kristin, oli Hindu, oli man Jyu, mo sam narafala bakegen, oli mekem lafet blong tingbaot Krismas mo oli givim presen nating se oli no save stampa blong holide ya.”—Julia, 12 yia.

“Mi no harem nogud taem mi mestem ol holide long skul. Ol pikinini oli mekem plante samting ya blong flasem olting, olsem fasin blong putum klos blong Halowin. Mi no mestem samting ya nating. Mi talem long olgeta olsem wanem papa mama blong mitufala i stap pem ol samting long mi tru long yia. Oli tokbaot jyos blong olgeta long mi mo slak fasin blong hem, mo mi talemaot long olgeta ol miting we yumi gat long ol pablik ples, mo samtaem oli jelas. Be mi no jelas long olgeta. Blong talem stret, yu fren nomo wetem olgeta we oli respektem bilif blong yu mo neva letem wan studen no wan tija i fosem yu blong mekem wan samting we i agensem wil blong Jeova.”—Justin, 12 yia.

“Mi no harem se wan man i blokem mi. No gat, from we mifala i gat ol narafala pati, mo taem ol man oli mekem lafet blong tingbaot Krismas, ol pikinini oli tingting moa long Fata Krismas, no long Ista oli tingting moa long rabet blong Ista, be mi save se oli kamaot long ol hiten skul. Mi laekem wok blong prij from i givhan long mi blong tingting strong long trutok.”—Sharon, 8 yia.

“Mi save talem stret se neva mi mi harem nogud blong stap olsem wan long ol Wetnes blong Jeova. Mi mo famle blong mi mifala i gat plante pleplei. Taem i gat ol pati long skul, mama blong mi i tekem mi mi go kakae dina long haos. Papa mama blong mi, tufala i karem kakae mo dring i kam long skul i no from wan spesel risen mo long taem ya olgeta pikinini oli save se mifala i gat pleplei. Mi joengud wetem papa mama blong mi mo taem ol pikinini oli askem from wanem mi no joen long lafet blong ol holide, mi talem long olgeta se mi mekem lafet evridei. ?Olsem wanem wan Wetnes i save harem se hem i mestem wan samting?”—Megan, 13 yia.

“Halowin. Ol pikinini oli putum klos olsem ol devel, oli folem fasin we oli luk long komik buk—?from wanem? Ol pikinini oli wokbaot long rod i go long ol haos wanwan wetem ol bag we i fulap wetem loli. No oli stonem ol haos wetem ol eg, oli pulum ol toelet pepa antap long ol tri, mo samting we i moa nogud se bighaf blong ol papa mama oli joen long samting ya.”—Zachary, 10 yia.

“Mi no wet long wan spesel dei blong kasem ol presen. Oltaem papa mama blong mi tufala i karem plante pleplei i kam long mi. Halowin i wan fasin blong wosip long ol speret we i ded. Fasin ya i no stret. Jeova nomo i God ya we yumi mas wosip long hem.”—Nicholas, 6 yia.