Baebol i Talem Wanem . . .

?I Stret We Yu Baptaes Namba Tu Taem?

TINGTING blong Lucila i stap trabol. Hem i bin stap long skul Katolik ful laef blong hem, be hem i jes stat blong stadi dip long Baebol wetem help blong wan fren we i no wan Katolik. Hem i luksave se baptaes we Baebol i tokbaot i defren long samting we oli bin mekem long hem taem hem i pikinini, samting we i olsem wan kastom nomo. Hem i rili wantem save se: “?Samting ya i minim se mi mas baptaes bakegen? Mi mi fraet se samting ya bambae i mekem God i kros.”

Plante handred milyan man, ol Katolik mo ol Protestan tu, oli bin baptaes long fasin we oli sakem no kafsaedem smol wora nomo long olgeta taem oli pikinini. Plante milyan narafala man oli bin draon fulwan long wora taem oli bigman finis, blong tekem baptaes. Samting ya i stanemap wan kwestin se, ?Wanem nao Kristin fasin blong baptaes? ?I gat sam samting we oli save kamaot blong mekem se wan man i mas baptaes namba tu taem?

Pocket Catholic Dictionary i eksplenem baptaes olsem “wan fasin blong skul, we oli yusum wora mo tok blong God, blong klinim wan man long ol sin blong hem, nao hem i bon bakegen mo i kam tabu long Kraes blong kasem laef we i no save finis.” Long saed blong baptaes namba tu taem, sem buk ya i talem se “baptaes i mekem wan mak long sol we i no gat samting i save ravemaot, mo samting ya i minim se baptaes i no save kamaot namba tu taem, from i no gat nid.” ?Baebol i agri long tingting ya?

Mekem Ol Disaepol, Baptaesem Olgeta

Long Matyu 28:19, 20, yumi ridim oda long saed blong baptaes we Kraes i givim long ol disaepol blong hem, afta we hem i laef bakegen long ded mo bifo we hem i go long heven. ‘Yufala i mas go long ol man long olgeta ples long wol, blong pulum olgeta oli kam disaepol blong mi; yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Speret. Mo yufala i mas tijim olgeta blong oli folem ol oda we mi mi givim finis long yufala.’ (The Jerusalem Bible) I klia se baptaes i wan samting we ol disaepol blong Kraes oli mas mekem—olgeta we oli lanem finis blong obei long ol oda blong Kraes—i no ol pikinini.a Samting ya i laenap wetem trutok ya se olgeta baptaes we Baebol i tokbaot oli mekem long ol disaepol we oli draonem olgeta fulwan long wora. I klia tu se sem samting ya i tru long saed blong Jisas Kraes hem wan, taem Jon Baptaes i baptaesem hem. Store blong Baebol i talem se taem Jisas i tekem baptaes, hem i “kamaot long wora” blong Jodan Reva. (Matyu 3:16, JB) Tru ya, Baebol i soemaot se Jon i jusumgud ol ples we oli gat plante wora, blong baptaesem ol man long hem.—Jon 3:23.

Biaen, taem Baebol i tokbaot baptaes blong haeman blong Itiopia, hem i talem se “Filip i go long wora wetem man Itiopia mo i baptaesem hem,” mo biaen “tufala i kamaot long wora.” (Ol Wok 8:38, 39, The New American Bible) Ol baptaes ya we oli draonem ol man fulwan long wora, oli stret long mining blong Grik tok ya ba·ptiʹzo, “blong baptaes” we i kamaot long baʹpto, we i minim “blong draonem no putum aninit,” mo tok ya i stampa blong Engglis tok ya “baptaes.”

Wan Store Long Baebol Long Saed Blong Namba Tu Baptaes

?Be olsem wanem long plante milyan man we oli baptaes finis taem oli pikinini mo we oli no draon fulwan long wora? ?I stret we olgeta oli baptaes namba tu taem? Wan store we i stap long Ol Wok 19:1-7 i givhan long yumi blong ansa long ol kwestin ya. Ating long koltaem blong 52/53 K.T. nao, aposol Pol i visitim Efesas, taon ya we i rij tumas, long Esia Maena. Long ples ya, hem i faenem sam disaepol we oli mas baptaes namba tu taem. Taem hem i harem se ol man ya oli baptaes finis long baptaes we Jon i mekem, Pol i baptaesem olgeta namba tu taem “long nem blong Jisas, Masta blong yumi.” Hem i no harem se samting ya bambae i mekem God i kros. I klia se God i agri long tingting blong Pol, mo hem i no kros nating from fasin ya blong mekem baptaes namba tu taem, defren olgeta, God i soem se i stret, taem hem i givim tabu speret long olgeta.

Sipos ol 12 man ya oli bin agensem tijing blong Pol long saed blong fasin blong baptaes mo tijing long saed blong Mesaea, Jisas Kraes, we i impoten tumas, i klia se Pol i no save baptaesem olgeta. Faswan samting, ol man ya oli mas kasem ol mak we oli naf blong tekem baptaes. Long taem ya nomo, oli save tekem baptaes namba tu taem, we God i glad long olgeta.

Olsem Wanem Blong Kam Naf Blong Tekem Baptaes

?Olsem wanem yumi save kam naf blong tekem baptaes? Tingbaot bigfala hif blong man we oli tekem baptaes long dei blong Pentekos 33 K.T. ?Olsem wanem oli kam naf? Faswan samting, from we oli man Jyu finis no oli man we oli jenisim skul blong olgeta finis blong folem skul blong ol man Jyu, oli gat sam save finis long saed blong Jeova God, ol samting we hem i mekem long ol man blong hem, mo ol profet tok blong Baebol we oli mekem promes long saed blong wan Mesaea. Namba tu samting, oli kasem moa stret save long dei ya we tabu speret i pusum aposol Pita blong givim wan gudfala wetnes. ?Wanem samting i kamaot from?

“Taem ol man oli harem tok ya, oli harem we i stikim olgeta tumas. Nao oli askem long Pita mo ol narafala aposol, oli se, ‘Ol brata. ?Bambae mifala i mekem olsem wanem?’ Pita i talem long olgeta, i se, ‘Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala. Nao bambae God i givim Tabu Speret ya long yufala.’” (Ol Wok 2:37, 38, JB) Makem se wetnes we Pita i givim i no ol tok we oli no dip. “Hem i gohed blong toktok plante long olgeta, mo i talemaot plante poen blong pulum olgeta.” Oli kasem save long ol toktok blong Pita, mo oli akseptem ol samting we hem i talem, nao oli tekem baptaes. “Long dei ya, samting olsem tri taosen man oli joen long kampani blong olgeta.”—Ol Wok 2:40, 41, JB.

Tede wan man i nidim sem samting blong tekem baptaes we i laenap wetem Baebol: (1) stret save, (2) rili tanem tingting blong hem from ol sin blong hem, mo (3) tanraon, no tanem hem i go long God mo tanem baksaed long “ol rabis man long taem ya.” Mo tu, ol baptaes we oli laenap wetem Baebol oli mas “long nem blong Jisas Kraes,” hemia se, oli mas stanap long bilif long ransom sakrifaes blong kasem fogif blong ol sin, mo oli mas stanap long fasin blong obei long hem olsem king we God i putumap finis.—Ol Wok 2:40, JB; Rom 5:12-19; 7:14-25.

Ol man we oli rili wantem mekem i stret, we oli kasem ol mak we Baebol i putum long saed blong baptaes, oli no nid blong fraet se God bambae i no glad sipos oli tekem baptaes namba tu taem. Defren olgeta, baptaes we i laenap wetem Baebol, long ol man we oli kasem ol stret mak finis, i mekem God i glad.

[Futnot]