Japta 12
Mining Blong Baptaes Blong Yu
1, 2. (a) ?From wanem yumi wan wan i mas tingbaot baptaes long wora? (b) ?Olsem wanem yu yu save ansa long ol kwestin we oli stap long haf namba tu?
LONG yia 29 K.T., Jisas i tekem baptaes long Jodan reva. Jeova hem wan i stap lukluk mo hem i agri long hem. (Matyu 3:16, 17) Tri yia haf biaen, taem hem i laef bakegen, Jisas i talem long ol disaepol blong hem, se: “Mi mi kasem olgeta paoa long heven mo long wol. Yufala i mas go mo yufala i mas mekem disaepol long ol man blong olgeta nesen, mo yufala i mas mekem baptaes long olgeta.” (Matyu 28:18, 19) ?Yu yu kasem baptaes finis, i stret long ol tok ya blong Jisas? ?Yu yu stap rere blong tekem baptaes?
2 Nomata i olsem wanem long yu, be yu yu mas savegud wanem ya baptaes. Yumi mas tingtinggud long ol kwestin ya: ?Baptaes blong ol Kristin tede i gat sem mining blong baptaes blong Jisas? ?Olgeta samting we Baebol i talem long saed blong baptaes oli laenap long yu? ?Olsem wanem wan man i save mekem laef blong hem i stret long mining blong Kristin baptaes long wora?
Ol Baptaes We Jon i Mekem
3. ?Baptaes blong Jon i blong hu?
3 Samwe long sikis manis bifo we Jisas i tekem baptaes, Jon Baptaes i go long draeples blong Juda, i prij, i talem se: “Yufala i mas tanem tingting blong yufala from sin blong yufala, from we kingdom blong heven i stap kolosap nao.” (Matyu 3:1, 2) Ol man blong ples ya oli harem ol tok blong Jon, oli talemaot ol sin blong olgeta mo Jon i baptaesem olgeta long Jodan reva. Baptaes ya i blong ol man Jyu nomo.—Wok 13:23, 24; Luk 1:13-16.
4. (a) ?From wanem ol man Jyu oli mas hareap blong tanem tingting blong olgeta from sin? (b) ?Olgeta we oli no wantem kasem ‘baptaes wetem faea’ oli mas mekem wanem?
4 Ol man Jyu oli mas hareap blong tanem tingting blong olgeta from sin. Long yia 1513 B.K.T. long hil Sinae, ol bubu blong olgeta oli wokem wan nasnal kontrak wetem Jeova God. Be oli no ona long ol responsabiliti blong kontrak ya we i panisim olgeta from we oli sinman. Oli stap long hadtaem from. Taswe, Malakae i talemaot “Bigfala Dei ya blong Jeova we i mekem man i fraet.” Dei ya i kolosap tumas long taem ya. Long yia 70 K.T., dei ya i kam long Jerusalem blong spolem hem wantaem nomo. Be, God i sanem Jon Baptaes i go fastaem. Hem i mas mekem sem mak long Elaeja we i wok strong long tru wosip, blong “mekem wan pipol i rere blong Jeova.” Oli mas tanem tingting blong olgeta from ol sin we oli mekem agens long kontrak blong Loa. Oli mas mekem hat mo tingting blong olgeta i rere blong kasem Pikinini blong God, we Jeova i stap sanem i go long olgeta. (Malakae 4:4-6; Luk 1:17; Wok 19:4) Olsem Jon i talem, Pikinini blong God i mas mekem baptaes wetem tabu speret (hemia baptaes ya we ol stret disaepol oli kasem long Pentekos blong yia 33 K.T.) mo wetem faea (we i kam long ol man we oli no tanem tingting blong olgeta taem oli lus long yia 70 K.T.). (Luk 3:16) Sipos oli no wantem kasem “baptaes wetem faea,” ol man Jyu ya blong faswan handred yia oli mas baptaes long wora blong soemaot we oli tanem tingting blong olgeta from sin. Nao biaen, oli mas kam disaepol blong Jisas Kraes, taem rod ya i open long fes blong olgeta.
5. (a) ?Taem Jisas i kam blong baptaes, from wanem Jon i wantem blokem hem? (b) ?Wanem mining blong baptaes blong Jisas long wora? (c) ?Olsem wanem Jisas i tinghae long fasin blong mekem wil blong God i kamtru?
5 Jisas hem wan i kam long Jon blong tekem baptaes. ?Be blong wanem? Jon i save se Jisas i no gat sin blong talemaot, nao hem i talem long hem se: “Mi nao mi nidim we yu yu baptaesem mi. ?Nao yu yu stap kam long mi?” Be baptaes blong Jisas i wan saen blong wan narafala samting. Taswe hem i ansa long hem, se: “Yu yu mas letem samting ya i kamtru naoia, from we i oraet nomo we yumi mekem olgeta samting we i stret.” (Matyu 3:13-15) Baptaes blong Jisas i no wan saen blong fasin blong tanem tingting from sin. Jisas i no gat nid blong givim laef blong hem i go olgeta long God, from we hem i memba blong wan nesen we i blong God finis. Be defren nao, baptaes ya, we hem i tekem taem hem i kam bigman long ae blong ol man Jyu from we hem i kasem tate yia blong hem, i wan saen we hem i soemaot hem wan long Papa blong hem long heven, blong mekem olgeta samting we God i wantem. Wil blong God long “man, Kraes Jisas,” i minim wan wok long saed blong Kingdom, mo sakrafaes blong laef blong hem we i stret gud olgeta. Hem i kam rensam mo stampa blong nyufala kontrak. (Luk 8:1; 17:20, 21; Hib. 10:5-10; Mat. 20:28; 26:28; 1 Tim. 2:5, 6) Jisas i tinghae long mining blong baptaes blong hem long wora. Hem i no letem sam narafala samting oli pulum hem. Gogo kasem hem i finisim laef blong hem long wol, hem i wok gud blong mekem wil blong God.—Jon 4:34.
Baptaes Long Ded
6. ?Jisas i tekem wanem narafala baptaes? ?Long wanem taem?
6 Stret nomo long mining blong baptaes blong Jisas long wora, hem i kasem wan narafala baptaes. Hem i save finis se God i givim wok long hem blong mekem sakrafaes blong laef ya we hem i gat olsem man. Be bambae hem i mas laef bakegen long speret long namba tri dei. Hem i tokbaot samting ya olsem we hemia i wan kaen baptaes. “Baptaes” ya i stat long yia 29 K.T., be hem i finis nomo taem hem i ded mo i laef bakegen. Taswe samwe long tri yia biaen we Jisas i tekem baptaes long wora, hem i save talem se: “Mi mi gat wan baptaes we mi mi mas baptaes long hem, mo mi mi stap harem nogud tumas, gogo kasem samting ya bambae i kamtru i finis!”—Luk 12:50.
7. (a) ?Hu ya bakegen i baptaes long ded? (b) ?Hu ya i mekem baptaes ya?
7 Olgeta we bambae oli rul wetem Kraes long Kingdom blong heven, oli mas baptaes tu long ded. (Mak 10:37-40; Kol. 2:12) Tru ya, taem oli ded oli lego laef blong olgeta olsem man foreva, olsem Jisas i mekem. Taem oli laef bakegen oli joen blong rul wetem hem long heven. Ol man oli no naf blong mekem baptaes ya, be God nomo i yusum Pikinini blong hem long heven blong mekem olsem.
8. ?Wanem mining blong “baptaes long Kraes Jisas”?
8 Baebol i talem se olgeta we oli baptaes long ded blong Jisas, oli ‘baptaes tu long Kraes Jisas.’ From tabu speret, we i pastru long Kraes, oli joen long hem. Jisas i hed blong olgeta, mo oli memba blong kongregesen blong hem we tabu speret i makemaot, oli “bodi blong hem.” From we speret ya i mekem olgeta oli saenaot i stret long nambawan fasin blong Kraes, yumi save talem se olgeta oli “wan man nomo we i joen wetem Kraes Jisas.”—Rom 6:3-5; 1 Kor. 12:13; Gal. 3:27, 28; Wok 2:32, 33.
Baptaes Long Wora Blong Ol Kristin
9. (a) ?Wetaem baptaes ya we Matyu 28:19 i tokbaot, i kamtru fastaem? (b) Yusum ol kwestin mo ol vas we oli stap long haf ya blong tingbaot ol samting we ol man we oli wantem baptaes oli mas agri fastaem olsem Jisas i talem.
9 Fastaem, ol faswan disaepol blong Jisas oli tekem baptaes long wora from Jon. Biaen oli go long Jisas blong kam memba blong woman blong hem long saed blong speret. (Jon 3:25-30) Jisas i lidim olgeta tu blong oli mekem baptaes. Baptaes ya i gat semkaen mining blong baptaes blong Jon. (Jon 4:1-3) I stat long Pentekos blong yia 33 K.T., oli rili stat blong ona long oda blong mekem baptaes “long nem blong Papa mo long nem blong Pikinini mo long nem blong tabu speret.” (Mat. 28:19) Bambae yu yu luksave se i gud nomo blong tingtingbak long mining blong hem, from ol vas blong Baebol mo ol kwestin we oli stap biaen:
?Blong tekem baptaes “long nem blong Papa,” wan man i mas luksave wanem long saed blong Papa ya? (2 King 19:15; Sam 3:8; 73:28; Aes. 20:3; Rom 15:6; Hib. 12:9; Jemes 1:17)
?Hemia we i tekem baptaes long nem “blong Pikinini” i mas luksave wanem? (Mat. 16:16, 24; Fil. 2:9-11; Hib. 5:9,10)
?Wan man i mas bilif wanem, blong hem i tekem baptaes long nem “blong tabu speret”? (Luk 11:13; Jon 14:16, 17; Wok 1:8; 10:38; Gal. 5:22, 23; 2 Pita 1:21)
10. (a) ?Kristin baptaes long wora i wan saen blong wanem tede? (b) ?Olsem wanem hem i defren long baptaes blong Jisas? (c) ?Taem sam man oli tekem baptaes, oli kam wanem?
10 Ol man Jyu (mo sam hiten man we oli sakomsaes) oli faswan blong tekem baptaes, stret long ol tok ya we Jisas i givim. Olgeta oli olsem wan nesen we i blong God finis. God i tingbaot olgeta long sam spesel fasin gogo kasem yia 36 K.T. Be, taem ol man Samaria mo ol hiten man oli gat rod blong kam Kristin man, olgeta wan wan oli mas givim laef blong ol i go olgeta long Jeova blong mekem wok blong hem olsem disaepol blong Pikinini blong hem, bifo oli tekem baptaes. Blong olgeta man nao, blong ol man Jyu tu, hemia i mining blong Kristin baptaes long wora kam kasem tede. Hemia “wan baptaes nomo” blong olgeta we oli kam tru Kristin. Olsem ya nao, oli save kam Kristin Wetnes blong Jeova, ol minista we God i putumap.—Efes. 4:5; 2 Kor. 6:3, 4.
11. (a) ?Kristin baptaes long wora i sem mak long wanem? ?Olsem wanem? (b) ?Olsem wanem wan Kristin i sef tede?
11 God i tinghae tumas long baptaes ya. Biaen we aposol Pita i tokbaot Noa we i wokem wan ak [wan bigfala sip], blong hem mo famle blong hem, blong oli no lus long bigfala ren, hem i talem se: “Samting ya we i stap sem mak long hem tede i stap sevem yufala tu naoia, hemia baptaes, (hemia i no fasin blong tekemaot ol nogud fasin blong bodi, be fasin blong askem wan gudfala voes blong hat mo tingting long God,) from we Jisas Kraes i laef bakegen.” (1 Pita 3:21) Ak ya i wan pruf we i soemaot we Noa i givim olgeta laef blong hem blong mekem wil blong God. Hem i soemaot we hem i mekem olgeta wok ya we God i givim long hem. From samting ya, hem i sef. Long sem fasin, olgeta we oli givim laef blong ol i go olgeta long God from oli bilif long laef bakegen blong Jisas Kraes, oli baptaes from, mo oli mekem wil blong God tede, oli save sef naoia from rabis fasin blong wol ya. (Gal. 1:3, 4) Oli no moa wokbaot wetem wol ya blong bambae oli lus. God i sevem olgeta from, mo oli gat wan gudfala voes blong hat mo tingting long fes blong hem.
Yumi Mas Mekem Ol Wok Blong Yumi
12. ?From wanem baptaes i no wan stefeket blong sef?
12 Yumi mastik nomo sipos yumi ting se baptaes i wan stefeket blong sef. Baptaes i wok nomo sipos wan man i rili givim laef blong hem i go olgeta long Jeova from Jisas Kraes, mo sipos hem i mekem wil blong God gogo kasem en.—Mat. 24:13.
13. (a) ?Wanem wil blong God long saed blong ol Kristin we oli tekem baptaes finis? (b) ?Olsem wanem Kristin rod i mas bos long laef blong yumi?
13 Long saed blong Jisas, wil blong God i laenap long fasin blong yusum laef blong hem. Hem i mas ded olsem wan sakrafaes. Long saed blong yumi, yumi mas soemaot bodi blong yumi long God, blong yumi gat wan kaen laef we i olsem sakrafaes. Yumi mas yusum bodi blong yumi blong mekem wil blong God nomo. (Rom 12:1, 2) Yumi no save mekem olsem sipos samtaem, yumi no blokem yumi blong mekem olsem wol i stap mekem, no sipos laef blong yumi i stanap long sam prapa tingting blong yumi, no sipos yumi mekem wok blong God long fasin we i hafhaf nomo. (1 Pita 4:1-3; 1 Jon 2:15-17) Taem wan man Jyu i askem wanem samting i mas mekem blong kasem itenel laef, Jisas i talem long hem we hem i mas gat wan fasin blong laef we i klin. Hem i soemaot we wan man i save kam wan Kristin disaepol, sipos hem i biaen long hem, from we hemia i faswan samting long laef. Kristin rod i no save kam biaen long olting blong wol.—Mat. 19:16-21.
14. (a) ?Ol Kristin oli gat wanem wok long saed blong Kingdom? (b) ?Olsem ol pija blong pej 101 oli soemaot, olsem wanem yumi save mekem wok ya? (c) ?Sipos yumi rili joengud long wok ya, samting ya i soemaot wanem?
14 Yumi mas rimemba tu we wil blong God long saed blong Jisas i laenap long Kingdom. God i makemaot Jisas blong kam King. Taem hem i stap long wol, hem i wok strong blong talemaot Kingdom. Yumi gat semkaen wok blong mekem tede mo yumi mas wok strong long hem. Taem yumi mekem olsem yumi soemaot we yumi gat tangkyu long hae rul blong Jeova mo yumi gat lav long narafala man. From samting ya, yumi soemaot we yumi joengud wetem ol narafala man blong wosip we oli stap raonabaot long wol, olgeta we oli wetnes blong Kingdom. Yumi olgeta i stap gohed nomo, blong bambae yumi kasem itenel laef aninit long Kingdom.
TINGTINGBAK
● ?Wanem poen blong baptaes blong Jisas mo baptaes blong wora oli sem mak tede? ?Wanem poen oli defren?
● ?Baptaes blong Jon i blong hu? ?Hu i kasem baptaes long ded? ?Hu i kasem baptaes “long Kraes Jisas”?
● ?Yumi mas mekem wanem blong ona long Kristin baptaes long wora?
[Bokis blong pija long pej 94]
?Olsem Wanem Yu Yu Stap Talemaot Kingdom?
Long evri haos wan wan
Long ol visit
Long ol Baebol stadi
Long ol rod
Long ol fren blong skul
Long ol fren blong wok