Sam Nyus Blong Wol

Ol Man Oli No Moa Trastem Ol Gavman

I no longtaem i pas, The Washington Post i talem se: “Ol man long olgeta ples long wol oli stap lusum tras blong olgeta long ol gavman.” Hem i gohed se: “Long evri ples, tok ya gavman, ol man oli no laekem nating.” Blong tokbaot stadi we oli mekem blong faenemaot tingting blong ol man long ol yia we oli jes pas, magasin ya i talem se: “Stat long Kanada kasem Japan mo ol ples we oli stap bitwin long tufala, samtaem bigfala namba blong ol manples oli talem long olgeta we oli stap mekem stadi ya se, oli no save trastem gavman blong kantri blong olgeta, mo trabol long saed blong mane i kam bigwan tumas, mo se ol samting bambae oli go moa nogud, oli no save kamgud.” Eksampel, long Franis, 60% blong ol man we oli askem olgeta long stadi ya, oli bilif se long fyuja, bambae ol samting oli go moa nogud, mo kolosap sem namba blong olgeta, oli soem se oli no glad long fasin blong gavman blong rul long kantri blong olgeta. Long Itali, kolosap 75% blong ol man oli harem se gavman i no moa mekem gudfala wok olsem i bin mekem faef no ten yia bifo. Long Kanada, bitim 50% blong ol man, oli harem se trabol long saed blong mane bambae i kamaot moa long ol pikinini blong olgeta bitim long taem blong olgeta naoia.

Paoa Blong Ol Plasebo

Longtaem finis i kam, ol man blong stadi long meresin oli ting se, samwe long wan long evri tri sikman oli kam moa gud taem oli tekem wan plasebo, wan meresin we oli ting se i stap givhan long olgeta be i no rili mekem olsem nating. Be, wan nyufala stadi i soem se ol plasebo oli save gat bigfala paoa moa long ol man. I no longtaem i pas, The New York Times i talem se ol sayentis long La Jola, Kalifonia, Yunaeted Stet, oli mekem stadi long kolosap 7,000 sikman we oli bin kasem ol nyufala meresin olsem wan tes blong fiksimap sik blong olgeta, be biaen i kam klia se ol meresin ya oli no rili meresin. Stadi ya i soem se tu long evri tri sikman oli kam moa gud from ol meresin ya, nating se samfala oli kamgud blong smoltaem nomo. Long sam sikman, plasebo ya i rili mekem se sik blong olgeta i kamgud moa, be, ol sayentis oli givim woning se samtaem ol sikman oli talem se oli kam moa gud from oli wantem mekem ol dokta oli glad long olgeta. Taswe, sam man blong stadi oli talem se stadi ya i soem nid blong kamgud moa long wok blong testem ol nyufala meresin.

Faenemaot Ol Ples We i Lik

Maet ol smosmol lik long ol paep we oli berem, oli no save mekem ol bigfala store i kamaot long nyus olsem ol bigbigfala hol mo ol paep we oli brok bigwan oli save mekem, be ol smosmol lik ya oli stap yet olsem wan samting we evri yia, ol faktri oli spenem plante milyan vatu long hem, mo magasin ya National Geographic i givim ripot se ol smosmol lik ya oli stap mekem “doti we yumi no save luk, we i save mekem trabol long man.” Wan kampani blong Kanada i faenem wan spesel rod blong winim problem ya—oli yusum ol dog, ol Labrado, blong smelem ol smosmol hol long ol paep we oel, gas, mo ol kemikol, oli stap pas long olgeta. Fastaem, oli pamem wan kemikol we i smel nogud i go insaed long haf blong paep we oli ting se i gat smol hol long hem. Nao ol dog oli traem faenemaot. Geographic i givim ripot se: “Ol dog ya oli save smelem ol kemikol we i stap lik long ol paep we oli berem 5 mita aninit long graon. Long wan swom blong Luisiana, [ol] dog oli stanap long ol smosmol bot mo oli faenemaot ol smel we oli kamaot long kemikol we i lik long ol paep we oli stap 1.8 mita aninit long wora mo 1.5 mita aninit long graon.” Magasin ya i gohed se: “Raonabaot long wol, ol dog oli wok oltaem.”

Ol God Blong Ren Oli Mekem Ol Man i Harem Nogud

I no longtaem i pas, bigfala draetaem long saot-is India i mekem gavman blong Andra Prades i traem wan defren rod blong mekem ren. Magasin ya India Today i soem se, gavman i givim mane blong sapotem “kastom blong ol man Hindu blong bifo, blong mekem ol god blong ren oli glad.” Minista we i stap lukaot long ol haos wosip long India i talem se: “Bambae God i sevem yumi.” Ol pris blong 50 haos prea we oli jusumaot oli mekem kastom blong 11 dei. ?Wanem risal i kamaot? India Today i givim ripot se: “I klia se ol god oli no haremgud. . . . Skul i no save mekem wan samting, naoia gavman i mekem disisen blong folem tingting blong ol sayentis. Blong gat ren we olgeta nomo oli mekem, oli sakem kemikol i go long ol klaod, olsem wan tes, blong traem fosem ol klaod blong lego ren.”

Oli Daonem Ol Stret Rul Bakegen Mo Bakegen

I no longtaem i pas, ol Luteran long Yunaeted Stet mo ol Metodis long Engglan, oli lukluk long kwestin long fasin we man i slip wetem man mo woman i slip wetem woman bakegen. Long Engglan, wan Miting blong Metodis Jyos i mekem wan disisen we i no klia nating. Oli mekem disisen blong no putumap ol man blong slip wetem man mo woman blong slip wetem woman olsem pasta; be long semtaem, oli talem se skul i “luksave, i agri mo i glad blong talemaot ol wok mo ples blong ol woman we oli slip wetem woman mo ol man we oli slip wetem man bakegen insaed long Jyos.” Long Yunaeted Stet, wan komiti blong Luteran Jyos i mekem wan ripot we i gat 21 pej blong hem blong givimaot long 19,000 pasta blong jyos blong kasem ansa blong olgeta long ripot ya. ‘Associated Press’ i soem se, ripot ya i talem se Baebol i stap sapotem fasin ya we man i slip wetem man mo woman i slip wetem woman bakegen. Ripot ya i talem tu se, fasin we man no woman i pleplei wetem samting blong seks, i “stret mo i gud long saed blong helt.” Ol tok blong ripot ya oli agensem ol rul blong Baebol long ol bisnes ya.—Rom 1:26, 27; 1 Korin 6:9, 10; Kolosi 3:6, 7.

Bisnes Blong Tabak i Kam Antap Bigwan Long Rasia

Magasin ya blong Kanada, Maclean’s i givim ripot se, bisnes blong tabak i stap kam antap bigwan tumas long Rasia mo ol narafala ples we bifo oli stap aninit long rul blong Soviet Yunion. I gat samwe long 70 milyan man blong smok long ples ya we bifo oli kolem Soviet Yunion, no 25% long ful namba blong ol man long kantri ya, mo oli smok 350 bilyan sigaret long wan yia. Mo stat long taem ya we oli tekemaot tabu we bifo Soviet Yunion i putum blong blokem pablisiti blong sigaret, i gat plante pablisiti blong tabak we ol kampani blong ol kantri long Wes oli mekem long—radyo, televisin, ol nyuspepa, ol magasin, mo ol notisbod—blong sapotem ol sigaret we oli stap mekem. Nating se praes blong ol sigaret blong Wes i sas olsem tu kasem fo taem antap long praes blong sigaret blong ol man ples, plante taem ol man oli pem olgeta blong soem olgeta nomo. Maclean’s i talem se: “Stadi blong gavman i soem se evri yia, 500,000 man Rasia oli kasem kansa long waet leva mo ol narafala sik we oli kamaot from smok.”

Hospital We i Gat Ol Wil

Wan spesel hospital i stap halpem ol sikman long India: wan tren we oli kolem ‘Laef Laen Ekspres.’ Wetem ol dokta we oli wok fri nomo, tren ya i “wan prapa hospital we i gat wil,” olsem magasin ya Asiaweek i talem. Hem i ron i go long ol velej mo i save stap wan manis kasem wan manis haf long wan velej, i mekem se ol dokta blong katem ol man oli gat naf taem blong fiksimap sik blong 600 man, afta i muf i go long narafala velej. Grup ya we oli lukaot long hospital ya we oli no winim mane from, nem blong hem ‘Impact India Foundation,’ mo hospital ya we i gat wil, i bin halpem bitim 400,000 man finis. Woman ya Zelma Lazarus we i wok long kampani ya ‘Impact India,’ i talem se: “Plan ya blong mifala i kam wan bigfala samting kwiktaem. Naoia ol narafala kantri oli stap askem mifala blong putumap ol semkaen hospital olsem.”

Kaontem Olgeta We Bambae Oli Go Long Hel

I no longtaem i pas, ol Saoten Baptis long Alabama, Yunaeted Stet, i kasem sam strong tok from oli prentem wan tok we i talem se 46.1% long ful namba blong ol man long stet ya, maet oli go long hel folem tijing blong Baptis. Ripot blong olgeta, we oli prentem long The Birmingham News, i givim ripot long ol wanwan eria long stet ya, oli mekem lis we i soem hamas man long ol wanwan eria we “God i no sevem olgeta.” ‘Associated Press’ i soem se ol Baptis ya oli jes tekemaot namba blong ol memba blong jyos long fulnamba blong ol man long ol wanwan eria, mo oli folem “wan fasin haed” blong faenemaot namba blong ol man blong ol narafala skul we oli ting se maet oli save go long heven tu. Ol man we oli ridim The Birmingham News, oli tok agens long ripot ya. Wan long olgeta i raetem se: “I soem flas tingting bitim mak blong stanemap wan fasin blong traem kaontem olgeta we God i no sevem olgeta.”

Gudfala Ekspiryens i Givhan Long Bodi Blong Stap Strong

“Ol problem long saed blong tingting we i foldaon mo filing, oli daonem paoa blong bodi blong kamgud bakegen, be glad mo fasin blong pleplei i givim paoa long bodi blong blokem mo faet agensem ol sik.” Hemia nao tok blong nyuspepa ya blong Jemani, Nassauische Neue Presse blong tokbaot ol pruf we ol sayentis oli faenemaot long wan nyufala stadi long saed blong fasin blong tingting blong givim paoa long bodi blong blokem ol sik. Ol traem long ples blong wok no long haos oli mekem se bodi i no moa strong blong faet agensem sik. Long defren fasin, Dokta Anton Mayr, wan tija mo wan man blong stadi long ol smosmol laef samting long bodi, i soem se ol gudfala filing mo ekspiryens oli gat paoa blong mekem bodi i strong. Hem i givim sam eksampel se: “Bilif, hop, lav, fasin tras, kwaet tingting, fasin blong toktok tugeta, gudfala tingting blong traehad, fasin blong spel—mo tingting blong wantem stap laef mo stap strong long bodi.”

Kruked Fasin Mo Fasin Blong Talemaot Ol Sin

Tu man blong raetem nyuspepa long Itali, we tufala i gyaman se tufala i bisnesman mo man blong politik, tufala i askem plante Katolik pris blong tekemaot ol sin blong tufala long saed blong kruked fasin. Nao biaen tufala i prentem samting we ol pris oli talem long tufala long smol rum ya blong talemaot sin. Nyuspepa ya La Repubblica i givim ripot se: “Jyos i ting se [tufala man ya] i mekem wan samting we i no soem respek nating long jyos, mo oli tok agensem tufala finis mo ating, from fasin we tufala i mekem, oli sakemaot tufala long jyos finis.” Be nyuspepa ya i gohed se gyaman fasin ya blong talemaot sin “i soem stret se plante long ol 36,000 pris blong Itali, we plante taem oli intres moa long ol sin long saed blong seks bitim ol narafala sin agens long ol man, tingting blong olgeta i fasfas, oli no naf blong mekem wok ya, mo oli no gat strong tingting blong blokem ol samting we olgeta nomo oli wantem.” Pino Nicotri, wan long tufala man ya, i faenem se long ol 49 pris we hem i “talemaot sin blong hem” long olgeta, wan nomo i no agri blong tekemaot sin blong hem mo i talem long hem blong go talemaot nogud fasin blong hem long ol man we oli wok long saed blong loa. La Repubblica i talem se: “Long tingting blong ol narafala pris, fasin blong tekem doti mane i no wan sin, mo i blong nating nomo blong go long wan jaj, from we God nao i fogivim ol sin.”

Kamgud Bakegen Long Bigfala Fasin

Arthur Guerra de Andrade, wan man blong hae save long saed blong trabol blong alkol mo fasin blong yusum drag, i eksplenem se: “Long ol yia we oli jes pas, laef long Brasil i jenis. Bifo, ol man oli stap pastru long Brasil blong salem [drag], be naoia ol man Brasil tu i stap pem mo i stap mekem drag.” O Estado de S. Paulo i soem se, nogud fasin blong yusum drag i “stap spolem 6 kasem 8% long ful namba blong olgeta man long kantri ya.” Antap long samting ya, “long ol yangfala we oli gat 12 kasem 16 yia, 90% blong olgeta i bin dring alkol wan taem finis no bitim wan taem.” Andrade i gohed se: “Ol man we oli soem se oli gat problem long bodi mo long tingting from alkol, namba blong olgeta i go antap 50 % long ol ten yia we oli jes pas.” Mo tu, “samwe long 25% blong ol man we oli stap akseden long Brasil taem oli stap wok, hemia from nogud fasin blong yusum drag, antap moa, alkol.” Be, long gudfala saed, Brasil i “wan long ol kantri we oli bitim ol narafala kantri long fasin blong kamgud bakegen—60 kasem 80% blong ol alkolik man blong wok oli kamgud bakegen.”