I No Longtaem—!Wan Nambawan Laef!
FOLEM ol tok blong Baebol, God i wantem se ol man oli laef blong olwe long wan paradaes long olgeta ples blong wol. (Jenesis 1:28; 2:8, 9) Be, i klia se yumi stap go longwe tumas long stampa tingting ya blong God. ?Wanem samting i bin hapen?
Faswan man mo woman tufala i no obei long God. From samting ya, sin mo ded i kasem tufala mo olgeta man we oli kamaot biaen long tufala. (Jenesis 2:16, 17; 3:6, 7, 17-19; Rom 6:23) Baebol i eksplenem se: “Sin i kam long wol ya tru long wan man nomo, mo sin blong hem i karem ded i kam. From samting ya, ded i kasem olgeta man long wol, from we olgeta evriwan oli mekem sin.”—Rom 5:12, Today’s English Version.
Nating se trabol ya i kamaot, stampa tingting blong God i stap sem mak nomo. “Tok blong mi i olsem sno, mo ren we i kamaot long skae i foldaon blong givim wora long graon. Oli mekem kakae i gru mo givim sid blong planem mo ol gudfala samting blong kakae. Hemia i sem mak long olgeta tok we mi mi talem . . . Bambae hem i mekem evri samting we mi mi sanem hem from.” (Aesea 55:10, 11, Today’s English Version.) ?God i promes blong givim wanem blesing long yumi?
OL BLESING ANINIT LONG KINGDOM BLONG GOD
Laef Foreva
“Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.
“Bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem.”—Revelesen 21:4.
Seftaem
“Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta.”—Ol Sam 37:10.
Gudfala Wok
“Bambae ol man oli bildim ol haos mo bambae oli save stap long hem—i no gat wan narafala man we bambae i stap long hem. Bambae oli planem rop blong mekem waen long hem mo bambae oli haremgud long waen ya—i no ol narafala we bambae oli dring long hem. Olsem laef blong ol tri, bambae laef blong ol man blong mi i longfala. Bambae oli haremgud fulwan long olgeta samting we oli wokhad blong mekem.”—Aesea 65:21, 22, TEV.
Strong Bodi
“Mo bambae i no gat wan man ples we i save talem se: ‘Mi mi sik.’ Ol man we oli stap long ples ya, bambae God i tekemaot rong blong olgeta.”—Aesea 33:24.
I No Gat Man We Haf Bodi Blong Hem i Nogud
“Ae blong ol blaenman bambae i open, mo sora blong ol man we oli no save harem bambae i no moa fas. Long taem ya, man we i wokbaot nogud bambae i save klaemap olsem wan man dia, mo tang blong man we i no save toktok bambae i singaot from glad.”—Aesea 35:5, 6.
Plante Kakae
“Yu mekem we bambae i gat plante kakae long ples ya, we ol hil oli fulapgud long ol kakae.”—Ol Sam 72:16.
Pis
“Yufala i kam, yufala i luk ol samting ya we Hae God i mekem. Yufala i luk ol bigbigfala wok ya we hem i mekem long wol. Hem i stap mekem ol faet oli finis long olgeta ples long wol.”—Ol Sam 46:8, 9.
WANEM SAMTING YU YU MAS MEKEM
?Yu yu mas mekem wanem blong haremgud long ol nambawan blesing ya we God i promes blong givim? Baebol i givim ansa long Jon 17:3 se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” Yes, taem yumi lanem moa long saed blong God—nem blong hem, ol stampa tingting blong hem, mo ol loa blong hem—yumi stat blong luksave wanem rod we yumi mas wokbaot long hem. Antap moa, taem yumi lanem moa long saed blong Jisas—laef blong hem long wol ya, ransom sakrifaes we hem i givim from ol sin blong yumi, mo haenem blong hem olsem King long Kingdom blong God—yumi save bilif strong se ol stampa tingting blong God bambae oli kamtru.
Fasin blong God blong letem ol rabis fasin oli stap, i soemaot klia se man i no naf blong lidim hem wan. Hem i olsem wan man we i lus long wan ples we hem i no save long hem. (Jeremaea 10:23) Yes, tru long plante defren gavman—ol strongfala rul blong wan man nomo mo ol demokratik gavman—man i bin traem evri rod we yumi save tingbaot. Be, hem i no winim wan samting we i rili gud.
Taswe, yumi save gat bigfala tangkyu se bambae Kingdom blong God i ansarem prea we plante milyan man oli stap talem: “Yu mekem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.” (Matyu 6:10, NW) I no longtaem, ol blesing blong Kingdom blong God bambae oli kamaot long wol ya, taem Kingdom ya i tekem ples blong olgeta gavman blong man. Baebol i mekem promes ya se: “Long taem blong ol king ya, God blong heven bambae i stanemap wan kingdom we neva i save brokdaon. Mo bambae kingdom ya i no save go long han blong narafala nesen. Bambae hem i smasem mo i finisim olgeta kingdom ya, mo hem nomo bambae i stanap olwe.”—Daniel 2:44.
!Bambae hem i wan taem we i nambawan tumas! Save long saed blong Baebol i rili givim wan hop long yumi. Yes, naoia yumi stap long wan taem we laef i fulap long trabol—mo i stap kam nogud moa. Be, samting ya i pruvum se yumi stap finis long ol las dei blong rabis wol ya. !I no longtaem, bambae taem ya we i nogud bitim ol narafala taem bifo, i jenis! !Bambae i kam wan taem we i moagud bitim ol narafala taem bifo, aninit long Kingdom blong God!