Trak Blong Yu—?Ples Blong Haed No Wan Trap?
FEMA (U.S. Federal Emergency Management Agency), i givim woning ya se: “Kolosap evritaem we disasta i kamaot, ol tim blong sevem ol man oli faenem ol dedbodi. Maet ol man ya oli laef i stap yet, sipos oli bin save se i stret blong haed insaed long trak blong olgeta, no i moagud blong ronwe long hem.” Yes, wan rong disisen i save mekem se yu lusum laef blong yu. ?Yu yu save wanem samting yu mas mekem sipos wan disasta i kamaot? Ansarem ol kwestin ya, nao jekem ol ansa blong yu wetem ol ansa we oli stap biaen.
1. GRAON I SEKSEK
□ Stap insaed long trak
□ Kamaot long trak
2. HARIKEN
□ Stap insaed long trak
□ Kamaot long trak
3. STRONG WIN MO SNO
□ Stap insaed long trak
□ Kamaot long trak
4. BIGFALA WORA I RON
□ Stap insaed long trak
□ Kamaot long trak
OL ANSA:
1. Graon i seksek: STAP INSAED LONG TRAK.
Nating se ol spring blong trak bambae oli mekem se i seksek bigwan, be ating yu sef moa insaed—hemia sipos yu no stap kolosap long ol bigfala haos, ol brij, no ol rop blong lektrik.
2. Hariken: KAMAOT LONG TRAK.
Ating ples we i denja moa bitim ol narafala ples long hariken, hemia insaed long trak. ?Be olsem wanem sipos i no gat ples blong haed kolosap? FEMA i talem se: “Ledaon long wan hol no ples long graon we i daon moa, mo putum ol han blong yu antap long hed blong yu.”
3. Strong win mo sno: STAP INSAED LONG TRAK.
Sipos yu no luk wan sefples blong haed long hem kolosap, i moa gud blong wet long samfala blong kam mo givhan long yu. Yu save statem enjin blong smoltaem blong mekem trak i hot, be yu mas livim windo i open lelebet blong mekem se ol posen gas i no jokem yu. Laetem laet insaed long trak olsem wan saen long eni man we i kam blong givhan long yu.
4. Bigfala wora i ron: KAMAOT LONG TRAK.
FEMA i givim woning ya se: “Sipos trak blong yu i stop long wan wora, yu mas kamaot kwiktaem mo go long ples we i hae moa. Maet wora i stap kam antap, mo i save karemaot trak blong yu wantaem nomo.” Yu no mas traem winim, samting ya i denja tumas. Maet wora ya i dip moa bitim wanem we yu tingting, mo hem i save kam antap kwiktaem.
FEMA i givim advaes se i gud blong holem save ya i stap long trak blong yu. Mo hem i talem tu se, evritaem, “rul we i impoten moa blong folem, hemia: No lusum hed.”