‘Olgeta We Tang Blong Olgeta i Sot Bambae Oli Toktokgud’

LONG aftenun blong wan spesel dei asembli blong ol Wetnes blong Jeova long Jekoslovakia, (naoia Ripablik blong Jek), i gat plante handred man oli stap blong kasem tijing blong Baebol. Mi mi stap stanap biaen long platfom, mi stap tingting long tok we mi mas mekem long program. I no wan bigfala tok. Bambae tu yangfala Wetnes oli talem sam ekspiryens blong olgeta, mo mi mas jeaman blong haf ya. Long moning ya finis, mi harem se mi taet insaed, mo naoia filing ya i kam strong moa. Mi harem se bodi blong mi i ded, mi wari tumas, mo mi no save toktok.

Maet yu stap tingbaot se kolosap olgeta man we oli mas mekem wan tok olsem, oli seksek. Be hemia i moa bitim we man i seksek. Bambae mi eksplenem from wanem i olsem.

Trabol Blong Toktok We Mi Gat

Taem mi gat 12 yia, mi foldaon mo mi kasem kil long hed, nek, mo bun we i godaon long medel blong baksaed blong mi. Afta long taem ya, sam samtaem mi no save talemgud ol tok blong mi olsem we tang blong mi i sot, antap moa ol tok we oli stat wetem p, k, t, d, mo m. Sam samtaem mi no save toktok nating.

Long taem ya, trabol ya i no wan bigfala wari. I olsem we i hadwok lelebet blong toktok nomo. Be taem ol yia oli pas, mi stat blong fraet tumas blong toktok long fored blong plante man. Wan taem, mi stap talem wan ripot long fored blong klas long skul, ale ae blong mi i kam tudak nao mi foldaon. Mo samtaem long ol stoa, taem ol man oli askem long mi wanem samting we mi wantem, mi no save ansa long olgeta. Taem mi stap traehad blong toktok long olgeta, oli kam kros mo oli talem se: “Yu kwik. Mi no gat ful dei blong wet long yu. Ol narafala man oli stap wet.” From samting ya, mi no save pem ol samting we mi nidim long stoa.

I hadwok tumas long mi long ol yia we mi skul. Taem mi mas toktok fored blong klas, ol yangfala oli laf long mi from we mi no save toktokgud. Be long 1979, mi kasem stefeket long haeskul, mo mi gohed blong stadi long yunivesiti blong Prag long Jekoslovakia. Mi laekem spot tumas, taswe mi mekem kos blong kam wan tija blong spot. ?Be olsem wanem mi save kasem mak ya? Nating se mi wari long kwestin ya, mi gohed nomo.

Mi Lukaot Help

Mi tingbaot se i mas gat wan rod blong winim trabol ya we mi gat blong toktok. Taswe, afta we mi kasem stefeket long yunivesiti, mi lukaot help blong ol dokta. Mi go long wan spesel klinik long Prag we i givhan long ol man we oli no save toktokgud. Long faswan taem we mi go long ples ya, wan nes i talem strong long mi se: “!Sik long hed blong yu i narakaen!” Mi harem nogud tumas from we hem i ting se mi sik long tingting, nating se ol man blong hae save oli agri se fasin ya blong no toktokgud i no kamaot from sik long tingting. Kwiktaem nomo, mi luksave se mi fesem wan spesel traem: Mi wan yangfala man we i gat 24 yia, be ol narafala long klinik ya oli ol pikinini nomo.

I no longtaem, olgeta nes mo dokta, wetem wan dokta we i wok long saed blong tingting blong man, oli stap givhan long mi. Oli traehad long evri rod. Wan taem, oli talem long mi se mi no mas toktok wetem wan man blong faef wik. Long wan narafala taem, oli letem mi mi toktok, be long voes we i daon nomo mo i slou t-u-m-a-s. Samting ya i givhan long mi, be i mekem tu se ol narafala oli singaot mi se Man Blong Mekem Ol Snek Oli Kwaet, from we plante oli slip taem mi stap talemaot ol ripot long fored blong olgeta.

Mi Mitim Ol Wetnes Blong Jeova

Wan dei, long hot taem blong 1984, mi stap wokbaot long taon, ale tu yangfala man oli kam toktok wetem mi. Mi no sapraes long lukluk blong tufala, be mi sapraes long ol toktok blong tufala. Tufala i talem se God i gat wan gavman, wan Kingdom, we bambae i finisim olgeta trabol blong man. Tufala i givim telefon namba blong tufala long mi, mo biaen mi telefon long tufala.

Long taem ya, long Jekoslovakia, gavman i no agri long ol Wetnes blong Jeova olsem wan skul. Be, i no longtaem, mi mi intres tumas, mekem se mi stap go long ol miting blong ol Wetnes. Mi filim lav mo kaengud fasin we oli stap soemaot.

Rod Blong No Fraet

Samting we i givhan long mi blong toktok moagud, hemia Tiokratik Skul, wan skul we evri kongregesena blong ol Wetnes blong Jeova oli mekem wan taem evri wik. Oli askem mi blong joen long skul ya, ale mi agri. From ol advaes long wan teksbuk blong skul ya, Theocratic Ministry School Guidebook, mi traehad blong kamgud moa long ol fasin blong toktok, olsem mekem tok i rongud, talem klia ol wod, makem sam wod, mo jenisim saon blong voes.b

Faswan tok blong mi long skul ya, hemia wan Baebol riding. Hem i nogud nomo. Mi mi seksek bitim mak. Kolosap mi no moa save kasem haos blong mi bakegen. !Mi glad tumas taem mi swim long hot wora, ale mi haremgud lelebet!

Afta we mi givim faswan tok ya, elda we i lukaot long skul i toktok wetem mi long kaen fasin. Hem i givim ol gudfala advaes long mi, be antap long samting ya, hem i presem mi. Samting ya i mekem se mi no fraet blong traehad bakegen. Smoltaem biaen, long 1987, mi tekem baptaes olsem wan Wetnes. Sam manis biaen, mi aot long Prag mi muf i go long wan smol taon we nem blong hem Sa nad Sasavo. Smol grup blong ol Wetnes long ples ya oli welkamem mi long kaen fasin. Mo tu, oli akseptem mi taem mi no save toktokgud, mo samting ya i mekem se mi haremgud moa.

Sloslou, mi stat blong lidim wan smol grup blong stadi Baebol. Mo biaen, mi givim faswan pablik tok blong mi long saed blong Baebol. Biaen, afta we gavman i jenis long Jekoslovakia, mi stat blong givim ol tok ya long ol narafala kongregesen kolosap. Taem mi go toktok long ol ples we mi no savegud ol man, ol trabol blong toktok i kambak long mi bakegen. Be mi gohed blong traehad blong winim.

Winim Ol Spesel Traem

Wan dei, wan Kristin elda i singaot mi blong go long ples blong wok blong hem. Hem i talem se: “!Petr, mi mi gat sam gud nyus blong talem long yu! Mifala i wantem se yu mekem wan smol tok long seket asembli we i stap kam.” Bodi blong mi i kam slak mo mi sidaon. Mi mekem fren blong mi i harem nogud taem mi talem ‘no’ long hem.

Be mi tingting tumas long samting ya we mi mekem. Mi no save sakem tingting ya. Long ol Kristin miting, taem oli tokbaot blong trastem God, mi tingbaot bakegen we mi bin talem ‘no’ long hem, mo mi harem nogud from. Samtaem, oli tokbaot Gideon long miting. Taem God i lidim Gideon, hem wetem 300 man nomo oli fesem ful ami blong ol man Midian. (Jajes 7:​1-​25) !Hemia nao wan man we i rili trastem God blong hem, Jeova! ?Mi mi folem eksampel blong Gideon taem mi talem ‘no’ long tok ya we oli wantem mi blong givim? Trufala ansa long kwestin ya se no gat. Mi harem mi sem.

Be, ol Kristin brata blong mi oli no kam slak blong givhan long mi. Oli givim wan jans long mi bakegen. Oli askem long mi blong joen long wan haf blong wan spesel dei asembli. Ale mi talem yes. Mi glad tumas blong kasem wan blesing olsem. Be blong talem tru, taem mi tingbaot se mi mas stanap long fored blong wan haos we i fulap long ol man, mi fraet we mi fraet. Mi mas wok had blong trastem Jeova moa. ?Be olsem wanem?

Mi luklukgud mo tingting long bilif mo tras long God we ol narafala Wetnes oli soem. Samting ya i givim paoa long mi. Mo tu, Verunka, smol gel blong wan fren we i gat 6 yia nomo, i sanem wan leta i kam long mi, we i soem wan gudfala eksampel blong folem. Hem i raetem se: “Long Septemba, bambae mi stat long skul. Mi no save wanem bambae i kamaot long saed blong singsing blong kantri. Mi bilif se Jeova bambae i mekem faet blong mi, olsem we hem i bin mekem blong ol man Isrel.”

Hemia nao sam samting we oli kamaot bifo long aftenun blong spesel dei asembli ya we mi tokbaot long stat blong store ya. Ale, mi prea wetem fulhat blong mi. Nao mi no moa wari tumas long saed blong toktok blong mi, be mi tingbaot blong presem haefala nem blong God long fored blong plante man.

Ale, mi stap stanap mo oli putum wan maekrofon long fored blong mi. Mi stap fored blong plante handred man. Nao mi luksave se mesej we bambae i kamaot i moa impoten bitim man we i talem mesej ya, ale mi pulum win strong mo mi stat toktok. Afta, mi gat taem blong tingtingbak long bisnes ya. ?Mi mi seksek? Yes, mo i gat sam tok we mi no talemgud. Be, sipos God i no bin givhan long mi, mi save se bambae mi no naf blong toktok nating.

Biaen, mi tingting long samting we wan Kristin brata i bin talem long mi se: “Yu mas glad se yu no save toktokgud.” Taem hem i talem samting ya long mi, mi sapraes bigwan. ?From wanem hem i talem olsem? Naoia, mi kasem save long mining blong tok blong hem. Trabol we mi gat blong toktok i givhan long mi blong dipen long God, i no long mi wan.

Aftenun blong spesel dei asembli ya i pas sam yia bifo finis. Long ol yia we oli kam biaen, i gat sam narafala blesing we mi bin kasem, we mi mas toktok long fored blong plante man. Oli putumap mi olsem wan Kristin elda long Sa nad Sasavo mo tu olsem wan paenia, hemia Wetnes blong Jeova we i prij fultaem. !Tingbaot! Long taem ya, mi spenem bitim wan handred haoa evri manis blong toktok wetem ol narafala long saed blong Kingdom blong God. Mo antap long samting ya, mi spenem taem evri wik blong tijim ol narafala man long ol Kristin miting. Mo naoia, mi mekem wok blong seket elda, we mi givim ol tok long fored blong ol defren kongregesen evri wik.

Hat blong mi i fulap long tangkyu taem mi ridim nambawan profet tok ya long buk blong Aesea long Baebol: “Ol man we tang blong olgeta i sot, bambae oli kwik blong toktok klia.” (Aesea 32:4; Eksodas 4:​12) Tru ya, Jeova i soem se i stap wetem mi, i givhan long mi blong ‘toktok klia’ blong givim ona long hem, presem hem mo leftemap nem blong hem. Mi mi glad tumas mo mi haremgud tumas blong presem God blong yumi we i gat bigfala sore.​—Petr Kunc i talem store ya.

[Ol Futnot]