Sam Nyus Blong Wol

Tabak Mo Wok

Ripot long The Journal of the American Medical Association i talem se long sam ples long Yunaeted Stet, “ol man oli no moa spenem plante mane blong pem tabak, mo samting ya i givim moa wok long ol man.” Oli yusum kompyuta blong soem olsem wanem mane we ol man oli bin spenem long tabak, oli save spenem long ol narafala samting, mo from samting ya, bambae i gat moa wok long ful kantri. Mo tu, ripot ya i talem se long ol ples we ol man oli planem tabak, bambae oli no lusum plante wok olsem ol kampani blong tabak oli talem. Ripot ya i talem se: “Bigfala samting we yumi mas wari long hem long saed blong tabak, hemia se hem i mekem plante tumas sik i kamaot, i no se hem i katem wok.” Los Angeles Times i talem se, Asosiesen blong ol Dokta long Amerika tu i askem ol man we oli pem haf blong 13 kampani blong tabak wetem mane we oli putum long stok maket, blong salem haf blong olgeta bakegen. Scott Ballin we i blong Hat Asosiesen blong Amerika, i talem se: “Yumi no mas sapotem ol kampani we oli gohed blong salem sik mo ded i go long ol man long kantri ya mo long ol narafala kantri.”

Haos We i Hae Moa Long Ol Narafala Haos Long Wol

Hemia faswan taem long bitim wan handred yia, we haos we i hae moa bitim ol narafala haos long wol i no stap long Yunaeted Stet. Kaonsel blong ol Haos we Oli Hae mo ol Haos Long Taon, grup we i mekem ol loa long saed blong ol haos we oli hae, i talem se Petronas Twin Taoa long Koala Lumpa, Malesia, hem nao i hae moa long ol narafala haos. Haos we bifo hem i hae moa, hemia Sirs Taoa long Jikago. Hem i hae moa yet sipos oli kaontem ol waea blong televisin antap long haos ya. Be, kaonsel ya i mekem disisen se ol waea ya oli no haf blong haos. Ol man we oli sapotem fasin blong bildim ol haos we oli hae long plante kantri blong Esia, oli talem se ol haos ya oli soemaot we ol man long ples ya oli gat moa mane naoia. Yes, kolosap nao Petronas Twin Taoa bambae i lusum haenem blong hem olsem haos we i hae moa long ol narafala haos long wol, mo bambae haenem ya i go long Senta blong ol Mane long Wol, long Sangae, Jaena, we oli mas finisim bifo long yia 2000.

?Oli Sevem Pijin Blong Solwora?

Taem plante oel i lik long wan sip we i stap long solwora kolosap long so, samting ya i save spolem bigwan ol anamol mo pijin. Sam samtaem, ol grup, we ol man blong olgeta oli no kasem pei from wok blong olgeta, oli tekem aksin kwiktaem blong givhan. Faswan samting we oli traem mekem, i blong klinim ol pijin blong solwora we oel i kavremap bodi blong olgeta. ?Be samting ya i gat gudfala risal we i stap longtaem? Ol stadi we oli mekem naoia, oli soem se plante taosen pijin we oli klinim mo putumbak olgeta long ples blong olgeta, bighaf blong olgeta oli ded bifo we ten dei i pas. ?From wanem? Wan samting se, ol pijin oli harem nogud taem ol man oli tajem olgeta tumas. Mo tu, ol pijin oli kakae sam oel taem oli traem blong klinim gras blong olgeta, mo biaen oli save ded from. Blong traem winim problem ya, ol man we oli holem ol pijin long Engglan blong klinim olgeta, oli fidim olgeta wetem sam samting we oli meksemap, olsem kaolin, jakol, mo suga. Samting ya i blong traem karemaot ol posen long bel blong olgeta. Nating se oli mekem olsem, sam pijin nomo oli stap laef longtaem naf blong karem pikinini. Nyuspepa ya blong London, The Sunday Times, i talem tok blong wan man we i wok blong lukaotgud long ol laef samting long wol. Hem i talem se, fasin ya blong klinim olgeta, i “blong mekem olgeta oli luk naes nomo,” from we posen i spolem bel blong olgeta finis.”

Hepataetas C Mo Blad

Ripot blong Nasnal Netwok blong Pablik Helt long Franis i talem se, “500,000 kasem 600,000 man long Franis oli kasem jem blong hepataetas C.” Nyuspepa ya blong Paris Le Monde, i talem se 60 pesen blong ol man we oli kasem jem blong hepataetas C, oli kasem from blad we dokta i putum insaed long bodi blong olgeta, no from nidel we oli yusum blong tekem drag. Antap long hemia, samfala oli kasem jem ya taem dokta i yusum sam tul we oli no klingud. Hepataetas C i save givim sik blong leva, mo kansa blong leva tu.

Taem Yu Sakem Fasin Blong Smok

Twante menet afta we wan man i sakem fasin blong smok, bodi i stat blong kamgud. Buk ya Reader’s Digest i gat wan lis blong ol gudfala jenis we oli kamaot afta we man i sakem fasin blong smok. Twante menet biaen: Blad presa i godaon mo hat i no pam kwik olsem bifo, ol han mo leg oli kam moa hot lelebet. Eit haoa biaen: Posen long blad i godaon, win long blad i kam antap kasem mak we i stret. Twante fo haoa biaen: Denja blong hat atak i godaon moa. Fote eit haoa biaen: En blong ol nev oli stat gru bakegen, fasin blong testem mo smelem ol samting i kam moa gud, i moa isi blong wokbaot. Tu wik kasem tri manis biaen: Blad i ron moagud long ol string, waet leva i wok moa gud go kasem mak we i 30 pesen moa gud. Wan manis kasem naen manis biaen: Kof, nus i fas, taed, mo sot win i kamgud moa, ol smosmol hea long waet leva oli gru bakegen. Wan yia biaen: Denja blong kasem sik blong hat i godaon 50 pesen moa bitim ol man blong smok.

Seks Mo Raf Fasin Long Ol Buk

Nyuspepa blong Stamfod, Konetikut, The Advocate, i talem se long sam ples blong ol buk long Konetikut, Yunaeted Stet, oli letem ol pikinini oli karem ol video we oli soem klia, fasin blong man mo woman blong slip tugeta, mo ol raf fasin. Samtaem, ol pikinini oli fri blong yusum ol kompyuta we oli joen long Intanet, long ples blong ol buk ya. Samting ya i stanemap sam moa kwestin long saed blong ol samting we ol yangfala oli save lukluk mo ridim. Plante papa mama oli sapraes tumas, be ol man we oli lukaot long ol ples blong buk, oli talem se hem i wok blong ol papa mama nomo mo olgeta nomo oli gat raet blong jekem ol samting we ol pikinini blong olgeta oli karemaot long ples blong ol buk ya. Woman we i wok long ples blong ol buk, Renee Pease, i talem se, “hem i wan problem we i hadwok blong skelem.” Mo hem i talem tu se, “plante store we oli no tru, maet oli no stret blong ol pikinini oli ridim.”

Spolem Bodi Blong Ol Pikinini Gel

The New York Times i talem se, wan yangfala woman Afrika we gavman blong Yunaeted Stet i letem hem i kam stap long kantri ya, i pulum tingting blong ol man bakegen long fasin we oli mekem long sam kantri blong spolem ol tabu haf blong bodi blong ol pikinini gel. Woman ya i talem se hem i agri blong mared wetem wan man, jes blong ronwe long fasin ya we oli spolem bodi blong hem. Long plante ples long Afrika, oli katemaot haf blong ol tabu samting blong ol gel, maet taem oli smol nomo, no taem oli kam wan woman. Plante taem, oli no mekem hafbodi i ded bifo we oli katem olgeta, mo oli no yusum ol tul we oli klin. Fasin ya i spolem bigwan filing blong ol gel ya. Antap long hemia, i givim sik long olgeta, plante tumas blad i ron tumas, oli no save karem pikinini, mo samfala oli ded. (Lukluk Wekap! blong Epril 8, 1993, pej 20-24.) Nyuspepa i talem se, oli mekem samting ya finis long 80 milyan kasem 115 milyan woman. Long Yunaeted Stet, oli stanemap wan loa blong blokem fasin ya.

Folem Ol Sugabag

Long Briten, ol man oli fasem sam smol waea blong rada, we oli hae olsem 16 milimita nomo, oli go long baksaed blong sam sugabag. Ol smol waea ya oli mekem se ol man oli save folem ol sugabag ya evri ples we oli go long hem. Oli hop se stadi ya bambae i mekem se oli save yusum ol waea we oli smol moa long fyuja. Bambae oli save fasem olgeta long ol tetsi flae long Afrika, blong luk plan we oli folem taem oli stap flae. Samting ya i save halpem olgeta blong kontrolem sik we flae ya i karem i go long ol man, hemia we i mekem man i slak mo i taed tumas. I no nidim batri blong givim paoa long ol smol waea ya, from we oli karem paoa we oli nidim from ol signal we oli kasem. Antap long ol samting ya, ol man blong sayens oli hop blong kasem moa save long saed blong fasin blong ol sugabag. Samting ya bambae i givhan long olgeta blong putum haos blong ol sugabag long ples we i moagud long olgeta.

Oli Joenem Televisin Wetem Wan Sik

Taem oli stat blong yusum satelaet long India blong kasem televisin we i gohed blong 24 haoa evri dei, samting ya i mekem ol trabol long saed blong tingting i kam antap long ol pikinini. Ol top dokta long saed blong ol nev nao oli talem samting ya long miting ya, Ol India Updet Long Neroloji blong 1996. Dokta Ashok Uppal, we hem i hed blong dipatmen blong neroloji long Kolej blong ol Dokta long Amritsa, i talem se: “Naoia, ol pikinini oli lukluk televisin blong plante haoa moa. Samting ya i mekem wan sik i kamaot moa, we ol dokta oli kolem ‘epilepsi we i kamaot taem man i lukluk tumas pija, no epilepsi we i kamaot from televisin.’” Dokta Uppal i givim advaes long ol papa mama, blong blokem ol pikinini blong olgeta blong lukluk tumas televisin, no blong letem olgeta oli lukluk blong smoltaem nomo nao spel bifo we oli lukluk bakegen, bitim we oli lukluk blong wan longfala taem.

Oli Luksave Samting We i Kilim Olgeta i Ded

Leta blong ol nyus, Health InterAmerica, i talem se, smol namba nomo blong ol woman Meksiko oli smok tabak, be plante we oli gat bitim 40 yia oli kasem ol sik blong waet leva we oli kamaot from fasin blong smok. ?Wanem i stampa blong ol sik ya? I no longtaem, ol man we oli stadi long bisnes ya, oli talem se: “Ol woman ya oli kuk long faea we oli yusum wud long hem.” Wan tija blong ol dokta, Peter Paré, i talem se ol man oli no tingting tumas long problem ya, from we “plante oli no ting se smok blong faea i wan bigfala denja long helt. Taem wan woman olsem i ded, oli talem se hat blong hem i nogud. Be, trufala risen from wanem hem i ded, se hem i pulum tumas smok blong faea.” Wol Helt Ogenaesesen i talem se kolosap 400 milyan man long wol oli stap long denja, bighaf blong olgeta oli ol woman long bus we oli laetem faea insaed long smol haos we i no gat windo. Sipos oli putum wan paep antap long ruf blong haos blong karemaot smok blong faea, samting ya bambae i givhan. Be, Dokta Paré i talem se, “samting we i hadwok moa i blong traem mekem ol man oli bilif se oli mas jenisim fasin blong laef we oli bin folem blong plante handred yia.”