?Wanem Fyuja Blong Pijin Ya Albatros?
Man blong Wekap! long Briten i raetem store ya
?Wanem fyuja blong albatros, pijin ya we i bigwan moa long ol narafala pijin blong solwora? Nyuspepa ya The Times long London, i ansa se “i nogud.” Ol man oli stap kilim i ded plante taosen albatros evri yia. Ol man blong stadi long Ostrelya, oli ting se maet namba ya i go kasem 44,000. Yes, sam man we oli gat plante save long saed ya, oli ting se pijin ya albatros, wetem nambawan bodi blong hem we i bitim tri mita stat long wansaed wing i go kasem narasaed wing, i save lus olgeta i no longtaem.
Taem wan albatros i naf blong flae, hem i stap flae antap long solwora blong seven yia, i stap flae mo flot long win gogo i kavremap plante taosen kilomita. Taem hem i slip, hem i gohed blong flae. Samfala oli ting se pijin ya i goraon long wol plante taem bifo we i kambak long ples we hem i bon long hem, blong mekem pikinini.
Albatros i karem wan pikinini nomo evri yia. Be, long ol 20 yia we oli jes pas, stret haf blong ol albatros long Saot Jojia we i stap long Solwora blong Saot Atlantik, mo long Kroset we i stap long Solwora blong India, oli lus. ?Wanem tingting blong samfala long saed blong risen blong samting ya? Oli talem se hemia i kamaot from ol longfala string we ol bigfala bot blong hukum fis oli yusum.
Blong hukum fis ya blufin tuna, ol man blong huk oli yusum ol longfala string we oli gat plante handred huk long olgeta wanwan. Oli pulum ol string ya biaen long bot. Oli putum nawita long ol huk olsem bet, mo nawita i stampa kakae blong albatros. Ale, taem pijin ya i kamdaon blong karem nawita ya, samtaem hem i solemdaon huk tu. Biaen, string ya we i hevi i pulum hem i godaon long solwora mo hem i draon.
Blong traem lukaotgud long ol albatros, sam man blong huk oli folem advaes ya blong yusum ol string long naet nomo, from we pijin ya i no stap lukaot kakae long naet. Mo tu, ol man blong huk oli stap lukaot sam rod blong haedem ol string blong olgeta aninit long bot, nao ol albatros oli no save luk bet ya. Oli bin yusum sam narafala rod tu, olsem, fasem ol hevi samting long string blong mekem i godaon kwik long solwora, mo wan kaen doli we i olsem man we oli wokem blong mekem ol pijin oli fraet.
Be, long bigfala solwora blong Saot Atlantik, i no gat wan man we i stap jekem ol bot blong huk, blong luk sipos oli stap yusum sam rod blong lukaotgud long ol pijin. Wan woman we i wok long Musium blong Nyusilan mo i gat spesel save long ol pijin blong solwora, nem blong hem Sandy Bartle, i talem se, ol bot long Saot Atlantik “oli no mekem wan samting nating blong traem sevem laef blong ol albatros.” Tru ya, ol samting we oli hapen long nambawan pijin ya albatros we oli mekem se i save lus, oli soem klia olsem wanem man i no stap lukaotgud long ol naesfala samting long wol ya, mo olsem wanem hem i no kea tu.