Sam Nius Blong Wol

Yunaeted Stet

Long taon ya Los Angeles, Kalifonia, i gat 4,500 laet long rod we oli givim saen long man blong i krosem rod, mo oli givim saen blong ol trak oli save stop, no oli go. Ol laet ya oli stap long wan longfala rod olsem 1,215 kilometa. Ol man we oli wokem ol laet ya, oli mekem se evriwan oli save laet semtaem. Long niuspepa ya, The New York Times, i talem se Los Angeles hem i “fas bigfala taon long wol we i mekem samting olsem.”

Wol

Wan stadi we oli mekem long olgeta ples long wol bitwin long ol yia 1990 mo 2010, oli faenemaot se namba blong ol man we oli fatfat tumas i kam antap, olsem 82 pesen. Long plante ples long wol ol man oli faenem i had blong kasem kakae. Nating se i olsem, namba blong ol man we oli ded from we oli fatfat tumas, i tri taem antap long namba blong ol man we oli ded from hangre. Majid Ezzati wan man blong stadi i talem se: “Twanti yia bifo i no gat naf kakae long wol. Be naoia long ol kantri we oli no gat mane tu, i gat plante kakae be ol kakae ya oli mekem man i sik nomo.”

Aelan Ya Midway

Wan ripot i talem se, pijin ya we nem blong hem Laysan albatross, i “olfala moa long ol narafala wael pijin long wol.” Hem i gat plante pikinini finis, mo naoia hem i gat wan moa pikinini bakegen. ?Mama pijin ya i gat hamas yia? Ol saentis oli putum mak long pijin ya long yia 1956, long taem ya hem i gat samwe 5 yia, be naoia hem i gat bitim 60 yia finis. Long ful laef blong pijin ya hem i save flae blong tri kasem fo milian kilometa, hemia i olsem we hem i go long mun mo i kambak long wol 4 no 6 taem.

Saot Afrika

Wan stadi i soemaot se sam woman long Saot Afrika oli yusum sam kaen sop mo krim blong mekem olgeta oli kam laet skin moa. Ol sop mo ol krim ya oli denja mo sam kantri oli putum tabu long olgeta. Ol woman we oli yusum ol samting ya oli save kasem ol defdefren kaen kansa, problem long kidni, tingting i foldaon, oli wari tumas, no maet skin blong olgeta i skras, no maet oli gat sam mak long skin blong olgeta.