?Wanem i Save Mekem Man i Hapi?
Blong bitim twante yia, wan grup blong man long olgeta ples blong wol, oli stadi long fasin hapi. ?Oli faenemaot wanem? Nyuspepa ya, Scientific American, i talem se: “I luk olsem se, fasin hapi i no stanap long kaen laef we yumi gat mo ol samting blong laef.”
Nyuspepa ya i gohed blong talem se: “Mane mo ol sas samting oli no mekem man i hapi. Nating se sam kantri oli bin kam rij moa long ol yia we oli pas, hemia i no mekem ol man oli kam hapi moa. . . . Long bighaf blong ol kantri, fasin hapi i no joen nating wetem mane we ol man oli kasem.”
Stadi ya i soemaot fo stampa fasin we ol hapi man oli gat: Oli tinghae mo oli gat bigfala respek long olgeta wan. Oli harem se oli bos long prapa laef blong olgeta. Oli gat gudfala tingting long saed blong laef mo fyuja. Oli intres long ol narafala man. Mo tu, wan gudfala mared mo ol gudfala fren, oli impoten blong mekem man i hapi. Mo samting ya i givim gudfala helt mo longfala laef long man tu.
Yumi intres blong luk wanem we Scientific American i gohed blong talem, i se: “Ol man we oli bisi long ol wok blong jyos tu, oli hapi moa. Wan stadi i soemaot se, ol man we oli joen plante long ol wok blong skul, namba blong olgeta we oli talem se oli hapi i tu taem antap long olgeta we oli no joen tumas long ol wok long saed blong speret. Sam narafala stadi, olsem hemia we 16 kantri oli mekem long 166,000 man long 14 kantri, oli soemaot se olgeta we oli strong long skul blong olgeta mo oli go oltaem blong wosip long jyos, oli moa hapi mo oli haremgud moa long laef.”
Longtaem bifo, Deved, we i raetem Ol Sam, i soemaot se fasin hapi blong yumi wanwan i joen bigwan wetem fasin blong kam wanples wetem ol narafala man, blong wosip long Jeova God. Hem i raetem se: “Taem ol man oli talem long mi se ‘Yumi go long haos blong Hae God,’ mi mi glad tumas.”—Ol Sam 122:1.
!Hemia nao from wanem aposol Pol i pulum ol Kristin brata blong hem, se: ‘I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong kongregesen’! (Hibrus 10:24, 25, NW) Yes, olgeta we oli laekem trutok blong Baebol, oli hapi tumas taem oli joen wanples blong wosipim God, wetem ol narafala we oli gat semfala nambawan bilif. Plante milyan Wetnes blong Jeova oli pruvum se samting ya i tru tumas, mo oli singaot yu blong joen wetem olgeta blong wosip long Haos Kingdom long ples blong yu. Olsem nao, yu tu yu save kasem fasin hapi ya.