Baebol i Talem Wanem
?Yia 2000 i Impoten Olsem Wanem?
PLANTE man oli no bilif, olsem long ol kantri blong Wes mo sam narafala ples, se yia 2000 i impoten tumas. Eksampel, ol man Jyu, ol Muslim, mo ol Hindu oli gat prapa kalenda blong olgeta. Ol kalenda ya oli no laenap wetem kalenda blong ol kantri long Wes. Blong makem ol tabu dei blong skul mo kastom, ol man Jaena oli yusum wan kalenda we i folem mun. Taswe plante milyan man, maet bighaf blong ol man long wol, oli no bilif se yia 2000 i gat spesel mining.a
Nating se i olsem, plante man, antap moa long ol kantri blong Wes, oli stap wet blong save wanem bambae i hapen long stat blong nekis taosen yia, long kalenda blong Gregori. Samfala oli no jes wantem save ol samting we bambae oli hapen nomo. Be oli gat tingting tu se, yia 2000 bambae i statem wan nyufala taem, we bambae i mekem bigfala jenis long histri blong man. Plante man we oli talem se oli bilif long Baebol, oli talem se sam profet tok bambae oli kamtru long yia 2000. Sam narafala oli stap wet blong luk wan bigfala saen we God i save mekem long taem ya. Sam narafala oli fraet se wan bigfala trabol—en blong wol—bambae i kamaot long yia 2000. ?Baebol i sapotem ol tingting ya?
Jeova, Man We i Kaontem Taem
Baebol i tokbaot God, we hem nao i God blong Baebol, se hem i “Olfala blong Ol Dei.” (Daniel 7:9) Hem i bos long taem long fasin we i stretgud olgeta. Olgeta samting we hem i mekem oli soemaot samting ya. Yumi save luk pruf blong samting ya long ol wok blong hem, i stat long ol planet we oli stap muf raon long san go kasem ol smosmol atom we oli stap muf. Hem i gat ol prapa taem blong hem we hem i makem finis mo hem i stap folemgud ol taem ya. Baebol i talem se: “Hem i makemaot fastaem we ples blong ol man bambae i bigfala olsem wanem, mo oli save stap long hem longtaem olsem wanem.” (Ol Wok 17:26) Jeova i nambawan long fasin blong kaontem taem.
Taswe Baebol i makemgud ol yia. Hem i givim namba blong ol yia, mekem se yumi save kaontem ol yia i gobak kasem faswan man. Fasin blong kaontem ol yia we i stap long Baebol, i soem se God i wokem faswan man, Adam, long yia 4026 B.K.T.b Kolosap 2,000 yia biaen, Ebraham i bon. Mo i gat 2,000 yia bakegen kasem taem we Jisas i bon.
Samfala we oli stadi long ol yia we Baebol i makem, oli givim sam tingting we i poen i go long sam spesel yia long fyuja. Eksampel, samfala oli yusum ol 2,000 yia bitwin Adam, Ebraham, mo Jisas, blong pruvum tingting blong olgeta. Oli talemaot se bambae wan bigfala trabol i mas hapen, long en blong 2,000 yia, we yumi kaontem stat long taem we Jisas i bon. Hemia wan eksampel nomo long ol defren fasin blong kaontem ol yia we samfala oli talem se i folem ol yia we Baebol i makem.
I tru, Baebol i tokbaot taem ya we Jeova God bambae i stretem ol problem blong wol. Blong mekem olsem, bambae hem i tekemaot ol rabis fasin mo i stanemap wan nyufala wol. Ol profet tok blong Baebol oli tokbaot “taem blong en,” “en blong rabis fasin blong wol,” “ol las dei,” mo “dei blong Jeova.” (Daniel 8:17; Matyu 24:3; 2 Timote 3:1; 2 Pita 3:12) Be, ol profet tok blong Baebol oli no talem se bambae “en” ya i kam long yia 2,000, no gat. I no gat wan tok nating long Baebol we i talem se wan spesel samting bambae i hapen long en blong tu taosen yia long kalenda blong Gregori.
“?Bambae Ol Samting Ya Oli Kamtru Wetaem?”
Ol Aposol blong Jisas oli soemaot se oli intres tumas long ol taem we God i makem finis. Taswe, oli askem long Jisas se: ‘Plis yu talemaot long mifala. ?Bambae ol samting ya oli kamtru wetaem? ?Mo wanem saen bambae i soemaot we yu yu stap finis mo en blong rabis fasin blong wol i kam?’ (Matyu 24:3, NW) Tede tu, plante man oli wantem tumas blong save long saed long fyuja. I stret nomo blong wantem save ol impoten profet tok blong Baebol mo taem we bambae oli kamtru. Be, i waes tu blong agri mo soem respek long tingting blong God long bisnes ya.
Tru long Pikinini blong hem, Jeova i soemaot tingting blong hem mo i givim stret ansa long bisnes ya. Smoltaem bifo we Jisas i go antap long heven, ol disaepol blong hem oli askem long hem bakegen se, wetaem ol promes blong God bambae oli kamtru. Jisas i ansa long olgeta se: “I no blong yufala i save ol taem ya mo ol dei ya we Papa blong mi nomo i gat raet blong jusumaot.” (Ol Wok 1:7) Bifo finis, Jisas i talem long ol disaepol blong hem se: “Be dei blong samting ya, mo taem blong hem, i no gat man naoia we i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.”—Matyu 24:36.
I klia se, ol man oli no gat raet blong jusumaot “ol taem ya mo ol dei ya,” antap moa long saed blong ol taem we bambae ol profet tok blong Baebol oli kamtru long hem. God i no givim save olsemia long yumi. (Matyu 24:22-44) ?Olsem wanem sipos yumi stap traem blong givim mining blong ‘dei mo taem blong samting ya’ folem prapa tingting blong yumi nomo? ?Yu ting se samting ya i save jenisim stampa tingting blong God? !No gat! Wan man i no save jenisim stampa tingting blong hem. (Namba 23:19; Rom 11:33, 34) Baebol i talem se: “Ol plan blong hem oli stap stanap strong oltaem.” (Ol Sam 33:11) From we God i gat olgeta paoa, plan blong hem i mas win oltaem.—Aesea 55:8-11.
Nating se God nomo i gat paoa blong ‘save ol taem ya mo ol dei ya we . . . hem nomo i gat raet blong jusumaot,’ plante man oli stap gohed yet blong talem tingting blong olgeta long saed ya. Samfala oli putumaot olgeta wanwan olsem ol profet blong talemaot jajmen blong God. Hemia nao risen from wanem aposol Pol i givim klia advaes long ol Kristin blong Tesalonaeka se i denja blong lesin long olgeta we oli stap talemaot prapa tingting blong olgeta long saed blong Dei blong God. Hem i raetem se: “Mi mi talem long yufala, se plis yufala i no hareap blong go krangke, no blong harem nogud long tok olbaot ya, we i talem se Dei ya blong Masta blong yumi i kam finis. Bambae yufala i no letem ol man oli gyaman long yufala olsem.”—2 Tesalonaeka 2:1-3.
Ol Wetnes blong Jeova oli bilif strong long ol stampa tingting blong God long saed blong fyuja. God i save taem blong olgeta, mo bambae oli kamtru long stret dei mo haoa we hem i makem. (Habakuk 2:3; 2 Pita 3:9, 10) Taswe yumi bilif se i no longtaem nating, bambae ol samting ya oli kamtru. (2 Timote 3:1-5) Be, yumi no traem blong talem prapa tingting blong yumi no sapotem ol tingting we plante man oli gat tede long saed blong dei ya.c Yes yia 2000, 2001, no wan narafala yia we man nomo i makem, i no laenap wetem taem we Jeova i makem finis.
[Futnot]
a Sam stadi i soem se, namba tri taosen yia bambae i stat long Janewari 1, 2001. Wan taosen yia i no statem long yia siro be hem i stat long yia 1. Nating se i olsem, ol man oli joenem “tri taosen yia” wetem yia 2000. Haf ya i tokbaot ol tingting we plante man oli gat, long saed long yia ya 2000.
b B.K.T. i minim Bifo Kristin Taem.
c Wajtaoa blong Septemba 1, 1997, long pej 21-22, i talem se: “Ol Wetnes blong Jeova oli bin wantem tumas blong save wetaem dei blong Jeova bambae i kamtru. From samting ya, sam samtaem oli bin traem blong luksave stret taem we bambae dei ya i kamtru. Be, taem oli mekem olsemia, oli mekem mastik, long sem fasin we ol faswan disaepol blong Jisas oli bin mekem mastik. Oli no bin lesingud long woning blong Masta blong yumi se, ‘yumi no save dei mo taem we samting ya bambae i kamtru.’ (Mak 13:32, 33) Ol man blong jikim ol promes blong God oli bin laf long ol trufala Kristin ya from we oli bin ting se dei ya i mas kamtru bifo finis. (2 Pita 3:3, 4) Nating se i olsem, Pita i talem klia se dei blong Jeova i sua blong kam long stret taem we Hem i makem.”