Jusumgud Ol Film We Yu Luk
?Ol film oli save mekem wanem long ol pikinini? Wan man we i tija mo dokta, Alvin Poussaint, i bin mekem wok blong hem wetem ol pikinini long 30 yia we i pas. Man ya i sua se taem ol pikinini oli waj long ol film we i gat seks mo raf fasin insaed, oli stap lanem we fasin ya i stret nomo. Mo man ya i talemaot wan narafala denja we i save kamaot long fasin ya bakegen. Hem i talem se: “Mi luk finis sam pikinini oli waj long wan film, nao oli kamhom we oli fraet tumas, no ating oli raf bitim mak. Sam narafala oli tekem fasin blong smol pikinini bakegen, olsem oli holem papa mama oltaem, oli titi long fingga, no oli pispis long bed.” Dokta ya i talem se ol man blong save oli faenemaot sam moa samting we oli save mekem sem kaen trabol long ol pikinini, hemia taem man i fosem olgeta blong slip wetem olgeta, no i kilim strong olgeta, mo taem i gat wo long kantri blong olgeta, mo sam narafala trabol olsem. Nao hem i talem se: “I no gat wan long yumi we i wantem putum pikinini blong hem long wan trabol olsemia. Be taem oli wajem sam nogud film, maet yumi no blokem olgeta. Ating, sipos ol samting blong ol film ya oli rili hapen long fes blong olgeta, bambae yumi fraet tumas, yumi no save letem olgeta i lukluk.”
Ol Kristin oli gat gud risen blong jusumgud ol film we oli no brekem ol rul blong Baebol. Wan eksampel, long Ol Sam 11:5 Baebol i talem se: “God i stap skelem laef blong olgeta man, ol gudfala man wetem ol man nogud. Mo hem i no laekem nating olgeta we oli laekem tumas blong mekem faet.” Mo kristin aposol Pol i talem se: “Yufala i mas kilimaot ol fasin ya blong yufala, we oli blong wol ya nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting . . . Be naoia, yufala i mas sakemaot olgeta [fasin ya] i gowe long laef blong yufala. Bambae yufala i no moa kros. Bambae yufala i no moa faerap. Bambae yufala i no moa stap badfren long yufala. Bambae yufala i no moa tok agens long narafala man, mo yufala i no moa yusum ol doti tok.”—Kolosi 3:5, 8.
Taswe papa mo mama, tufala i mas lukaot taem tufala i jusum ol film we bambae ol pikinini blong tufala, mo tufala tu, oli lukluk. Oli no mas jusum sam film we oli pulum olgeta blong “mekem ol rabis samting we tingting blong olgeta i wantem.” (Galesia 5:19-21) Oli mas jusumgud ol gudfala film nomo, mo oli mas putum wan mak long taem we bambae oli spenem long ol fasin ya.—Efesas 5:15-17.