Sam Nius Blong Wol

Ol Pikinini Blong Rod Oli Ronwe From Trabol

Enza Mattar, we i wok long Rejional Senta blong Lukaot long ol Pikinini we man i spolem olgeta (Crami), i talem se: “Naenti pesen blong olgeta pikinini blong rod oli gat famle. Be, klosap 90 pesen [blong ol pikinini ya blong rod] oli karekil from papa mama blong olgeta nomo taswe oli ronwe. Ale, oli brekem loa, oli tekem drag, mo oli folem ol man olbaot we oli stap yusum olgeta blong mekem nogud long saed blong seks.” Niuspepa blong Brasil, O Estado de S. Paulo, i talem se woman ya, Enza Mattar, i stap givim advaes long ol dokta blong helt mo ol tija, blong oli luksave ol saen long wan pikinini we oli soemaot se pikinini ya i stap harem nogud from narafala i spolem hem. Sam long ol saen ya hemia se, pikinini i “jenisim fasin blong hem bigwan, hem i no moa toktok plante wetem ol man, mo i gat ol kil long bodi blong hem.” Taem man i luksave ol saen ya hem i mas tekem aksin kwiktaem, from we 5 pesen nomo blong olgeta pikinini we oli stap aninit long kea blong Crami, oli bin kam stret blong askem help. Ol papa mama we oli mekem trabol long ol pikinini blong olgeta, plante taem oli no wantem se narafala i halpem olgeta. ?From wanem? João Roberto Scomparim, presiden blong Crami, i talem se: “Ol papa mama we oli mekem raf fasin long pikinini blong olgeta oli stap mekem sem samting we papa mama blong olgeta wan i bin mekem long olgeta taem oli smol. Mo long fasin ya, oli ting se oli stap tijim pikinini blong olgeta.”

Ol Man We Oli Fogetem Samting Kwiktaem

Niuspepa ya La Repubblica, i talem se long Itali, sam man oli askem kwestin long 1,600 bigman, mo oli luksave se 77 pesen blong olgeta oli gat trabol blong rimemba samting. Wan long evri tri man long grup ya, oli talem se, long yia we i pas, oli bin fogetem wan impoten anivesari blong olgeta. Ripot i gohed se, 42 pesen blong ol man long grup ya, oli talem se evri dei oli stap fogetem ples we oli bin putum trak blong olgeta long hem, bitim 30 pesen oli fogetem ki blong haos blong olgeta, bitim 25 pesen oli bin fogetem paos blong olgeta, mo 1.2 pesen i bin fogetem nem blong olgeta finis samtaem. Be, i gat 28 pesen blong olgeta man Itali we oli talem se oli rimemba yet wan haf blong ol singsing we oli bin lanem long skul. ?Olsem wanem yu save mekem i isi long bren blong yu blong rimemba ol samting? Wan man we i stadi long saed ya i givim advaes se, i gud blong tingbaot wan samting we i laenap wetem wanem we yumi wantem rimemba. I gud tu, blong raetem samting we yumi wantem tingbaot, long wan smol buk ale, yumi save lukluk olgeta bakegen. Yumi save mekem eksasaes tu long bren blong yumi taem yumi traem rimemba ol namba blong telefon, ol singsing, mo tu, namba we i stap long ol trak.

From Wanem Laen Blong Yu i Slou Moa

Taem yu stap mekem laen blong pem long stoa, maet yu harem olsem we laen blong yu i slou moa oltaem, bitim ol narafala laen. I no rili tru ya. Yu mas folem ol loa blong jans, samting ya nomo. Wan niuspepa blong Jemani (Die Zeit) i faenem se taem i gat tu laen klosap long laen we yu stap folem, i gat tu jans blong wan long tufala laen ya i spid moa, i gat wan jans nomo blong yu spid moa. Mo sipos i gat moa laen, maet plante laen i bitim yu. Plante man oli kam kros, i no from we oli mas wet, be from “oli ting se oli stap westem taem.” Long sam Hotel sipos ol man oli mas wet long elevator blong go antap, oli putum glas blong halpem olgeta. Ale oli save kom mo stretem nektae, mekem se oli bisi oltaem. Mo tu oli talem long ol man hamas seken no menet we oli mas wet yet. Long sam subways (tren aninit long graon) i gat sam bigfala saen we i laet blong soem hamas menet oli mas wet go kasem nekis tren i pas.

Trabol We Ol Lida Blong Skul Long Afrika Oli Mekem

Catholic International i talem se: “Namba blong ol bisnes we kot i mas stretem long saed blong ol lida blong skul we oli mekem trabol long saed blong seks wetem narafala, i stap kam antap bigwan naoia long Afrika.” Blong blokem ol trabol ya, sam bisop blong Katolik jos oli talem se bambae oli stat traehad moa blong skelemgud mo trenemgud olgeta man we oli gat tingting blong joen long ol kos blong kam pris. Sam long ol narafala nogud fasin we ol bisop blong Afrika oli stap mekem hemia, “dring alkol bitim mak, mo joen long sam wok we ol pris oli no gat raet blong mekem, olsem bisnes mo salem samting, no joen long politik.” ?From wanem ol toktok ya oli jes kam long klia ples naoia nomo? Catholic International i talem se: “Ol man blong raetem niuspepa oli no moa stap aninit long paoa blong gavman, mo Jos i no moa gat bigfala paoa long nius olsem bifo.” Niuspepa ya i gohed se: “Fastaem, sam haeman blong Jos long samfala ples blong Afrika, oli bin traem blong blokem ol nogud nius ya long saed blong olgeta . . . be oli no bin winim.”

Ol Prija Oli Karem Masket

Wan nius we i kamaot long Reuters i talem se, long Kentaki, Yunaeted Stet, gavman i jenisim loa blong givim raet long ol pasta blong karem mo haedem masket long jos, sipos oli gat wan laesens. I no longtaem i pas, ol pasta long kantri ya, we oli gat laesens blong holem masket, oli no gat raet blong karem ol masket ya i kam insaed long ol ples blong wosip. Long 1997, sam man we oli holem masket, oli bin kam insaed long sam jos long Kentaki, mo stilim kleksin mane blong jos ya. Nating se i no gat man i bin karekil long ol taem olsem, ol “minista blong jos mo ol pris oli bin pulum ol man blong gavman blong oli stanemap wan loa we i givim raet long olgeta blong holem wan masket.” Be, i no olgeta lida blong jos evri wan we oli sapotem disisen ya. Nancy Jo Kemper, we i hem i Ekseketif Daerekta blong Kentaki Kaonsel blong ol Jos, i askem se: “?Olsem wanem yumi save tijim ol pikinini blong yumi se masket i no rod ya blong stretem ol problem, sipos ol pikinini ya oli luk se ol minista tu, we oli mas man blong pis mo stretem trabol, oli karem masket we i save kilim man i ded?”

Ol Bebi Oli Nidim We Yumi Tajem Olgeta

Niuspepa ya Toronto Star i ripotem se: “Sipos ol pikinini oli gruap we neva papa mama blong olgeta i holem olgeta no tajem olgeta . . . bambae oli gruap we oli wari moa long laef.” Ol man blong mekem stadi oli tingting se taem mama i seraot long bebi blong hem, no i no spenem taem wetem bebi blong hem, samting ya i save “mekem i hadwok tumas [long pikinini] blong lanem samting no blong rimemba samting.” Wan sayentis we i wok long Havad Medikol Skul, Mary Carlson, i talem se ol pikinini we famle blong olgeta i “lego olgeta long ol haos blong lukaot pikinini taem oli go wok evri dei, oli trabol tumas long tingting blong olgeta long ol dei blong wik be oli harem gud long wiken, taem oli stap long haos wetem papa mama blong olgeta.” Woman ya i gohed blong talem se i impoten tumas we ol papa mama oli holem mo tajem ol pikinini blong olgeta blong soem se oli laekem olgeta.

Ol Man We Oli No Moa Wantem Ol Dog Blong Olgeta

Niuspepa ya Herald Sun blong Melbon, i talem se naoia long Ostrelya, ol haos blong lukaot anamol oli stap kam fulap moa wetem ol dog we ol man oli no moa wantem. Ripot i talem se: “Ol dog we oli kolem Alaskan malamut, oli ol faswan we naoia plante man oli no moa wantem.” Ol man we oli no moa wantem ol dog blong olgeta oli mekem olsem from we oli luk se plante man oli pem ol narafala dog, no oli no moa laekem dog blong olgeta from we dog ya i kam bigwan tumas. RSPCA (Royal Society for Prevention of Cruelty to Animals) i gat tingting se wan narafala dog we oli kolem Dalmatians hem i nekis kaen dog we bambae ol man oli no moa wantem kipim long taem we i kam. Plante man oli bin pem dog ya taem oli luk wan film long saed ya. Wan bigman blong RSPCA, Richard Hunter, i talem se fasin ya blong man we i no moa wantem ol dog blong olgeta i no wan niufala samting. Long ol yia 1970 semfala samting i bin hapen long ol dog ya Afghan hounds; mo long ol yia 1980, hem i hapen long ol English sheepdogs. Sore tumas, plante long ol dog ya we ol man oli no moa wantem, oli mas ded. RSPCA i askem strong long ol man blong oli jusumgud ol dog we olgeta oli rili laekem mo we oli sua se long laef blong olgeta, bambae oli save lukaot. I nogud oli pem wan dog jes from we ol narafala man oli mekem olsem.

Ol Pikinini—!Yufala i Mas Muf!

Wan magasin blong Jemani, Test, i givim ripot se naoia plante moa pikinini oli no moa muf plante from we oli lukluk tumas televisin. Samting ya i spolem ol pikinini from we i mekem se oli no kwik blong luksave mo wokem samting, mo masel blong olgeta i kam slak from. Taswe, plante long ol pikinini olsem oli kasem aksiden isi nomo. Ol dokta we oli jekemap ol pikinini we oli statem skul long Jemani, oli faenem se klosap 30 pesen blong olgeta oli fatfat tumas, samwe 40 pesen oli gat hadtaem blong muvum sam haf blong bodi blong olgeta, mo klosap 60 pesen oli no save stanap stret. Ol tija blong spot, sefti mo trafik long Jemani, oli wantem traem pulum ol pikinini ya blong muvmuf moa, ale oli wokem wan spesel bokis we i insaed long hem i gat ol pleplei (frisbi, balong, mo narafala pleplei bakegen) we oli save halpem ol pikinini blong mekem wan samting we oli laekem mo long semtaem oli yusum bodi blong olgeta.

Olgeta We Oli Trabol Long Bisnes Blong Seks

Wan toktok we oli raetem long niuspepa blong Yukren i rid olsem: “Mifala i nidim ol gel we oli no mared yet mo oli naes. Oli mas yang mo longfala. Mifala i singaot yufala blong wok olsem ol model, sekretari, danis, mo blong givim ol kos blong danis mo eksasaes.” Niuspepa ya The New York Times i ripotem se hemia ol tok we ol man blong mekem bisnes blong seks oli putum long nius plante taem, blong trikim ol yang gel mo pulum olgeta blong kam ol woman we oli salem bodi blong olgeta. Evri yia, plante taosen woman long Yukren mo Rasia oli aot i go long narafala kantri from we oli gat tingting blong winim plante mane mo gat gud laef. Be, taem oli kasem narafala kantri ya, ol “masta” blong olgeta, we oli man blong brekem loa nomo, oli karemaot paspot blong olgeta mo fosem olgeta blong wok olsem woman blong salem bodi. Sipos ol gel ya oli no wantem mekem olsem, bambae ol man oli faetem olgeta, repem olgeta no kilim olgeta oli ded. Wan dokta long Yukren, Lyudmilla Biryuk, we i stap givim advaes long ol woman we oli bin faenem rod blong ronwe long ol trap ya, i talem se: “Yumi wantem talem long ol gel ya se, sipos wan samting i luk olsem se i gud tumas, plante taem samting ya i giaman nomo.”

?Fasin Blong Putum Wan Laet Long Ni i Save Blokem Fasin Les?

Kam kasem naoia, ol man oli ting se ol sel long ae blong man nomo oli stap stretem bodi blong i folem wan stret taem blong slip mo wekap. Be, wan niuspepa long Franis, Le Quotidien du médecin, i givim ripot long saed blong wan niufala stadi we i soemaot se i gat sam narafala haf long bodi blong man we ol sel blong hem oli harem save laet tu. Sam man blong hae save long Yunaeted Stet, oli mekem wan tes long sam man. Oli fasem wan spesel glas long ni blong olgeta evriwan nao oli saenem wan strongfala laet i pastru long glas long ni blong sam long olgeta, be oli no mekem olsem long evriwan. I no gat wan ol man long grup ya we oli mekem tes long olgeta, we oli save hu i stap kasem laet mo hu i no stap kasem laet. Ol man blong hae save, oli kaontem namba blong tempraja mo samting ya we oli kolem homon melatonin long bodi blong man, taem bodi blong ol man ya wanwan i stap kam hot. International Herald Tribune i tokbaot tes ya tu i se, ol man we oli bin kasem laet long ni blong olgeta, bodi blong olgeta i jenisim stret taem we hem i bin makemaot long ol wanwan man ya blong oli slip mo wekap, i mekem taem ya i “kam let long tri aoa.” I no gat klia save yet se olsem wanem samting ya i hapen. Be ol risal blong tes ya maet oli save givhan blong stretem ol problem we man i les taem i wokbaot long plen i go long narafala kantri we taem blong hem i jenis, mo ol problem we sam man oli gat blong slipgud.