?Hu Ya Jisas Kraes?

Long plante ples long wol, long en blong yia, ol man oli mekem lafet blong Krismas. Plante milyan man oli bilif se Jisas i bon long Desemba 25, samwe 2,000 yia bifo long taem blong yumi. Ol man oli mekem ol defdefren pija blong Jisas, olsem wan bebi we i stap slip long haos kakae blong ol anamol. Be, Jisas i gruap, i kam wan bigman mo i laef 33 yia haf long wol ya.

SAMTAEM, yu bin tingting long ol kwestin ya se, ?bodi blong Jisas i olsem wanem taem hem i kam bigman? ?Wanem kala blong skin blong hem? ?Bodi blong hem i strong mo i naes, no i no strong, i slaslak, olsem we yumi luk long ol pija we ol man oli wokem long ol handred yia we oli pas? ?Hem i gat mustas no nogat? ?Hea blong hem i longfala no i sot?

Mo tu, raon long hed blong Jisas, ?i gat wan samting olsem laet blong makem se hem i tabu, olsem yumi luk long sam pija we ol man oli mekem? no ?Jisas i sem mak nomo long ol narafala man—we i no gat wan samting blong makem hem se hem i defren?

Long ol handred yia we oli pas, ol man blong histri mo ol man blong mekem ol pija, oli bin talem plante defren tingting long saed blong bodi blong Jisas. Mo tu, sam man we oli bin luk Jisas mo kampani wetem hem long faswan handred yia, oli givim sam pruf long yumi long saed blong Jisas, mo yumi save trastem ol pruf ya.

Be, i gat sam kwestin we oli moa impoten i winim fes mo bodi blong Jisas: ?Hu ya Jisas Kraes? ?Hem i gat wanem wok long stamba tingting blong God? ?Hem i mekemgud wok ya? ?Tede, hem i olsem wanem mo hem i stap weples? ?Wok blong hem i rili impoten mekem se i gat paoa long olgeta man, wetem olgeta we oli ded finis?

Fastaem, bambae yumi luk sam pruf we i soem lukluk blong Jisas. ?Fes mo bodi blong hem i olsem wanem?