Baebol i Talem Wanem
?Wanem Ya Tabu Spirit Blong God?
“Taem jon i baptaesem olgeta man finis, jisas tu i kam, mo jon i baptaesem hem. Mo biaen, taem jisas i stap prea, skae i open, nao tabu spirit i kamdaon long hem olsem wan sotleg. Nao god i toktok long hem, i talem se, ‘yu yu pikinini blong mi we mi lavem yu tumas.’ ”—luk 3:21, 22.
TAEM aposol Pol i stap givim wan tok long fored blong ol man Gris we oli gat hae save, hem i kolem God se, “Masta blong heven mo wol.” Pol i talem se, God ya nao “i mekem wol ya, mo olgeta samting we oli stap long hem” mo “we i stap mekem yumi evriwan i laef, mo hem i stap givim olgeta samting long yumi.” (Ol Wok 17:24-28) ?Olsem wanem God i mekem olgeta samting ya? Hemia tru long tabu spirit, no strongfala paoa blong hem we i stap wok oltaem.
Baebol i eksplenem tu se God i gat ‘bigfala paoa we i strong we i strong.’ (Aesea 40:26) Yes, God nao i wokem olgeta samting long skae mo long wol. Ol wok ya we hem i mekem, oli soemaot bigfala paoa blong hem.
Paoa Ya i Stap Wok
I no stret tumas blong talem se tabu spirit i paoa blong God. Hemia i from we paoa i save stap long wan man no wan samting, be i no mekem wan wok. Eksampel, maet wan batri i gat paoa, be man i no yusum batri ya. Be, Baebol i talem se tabu spirit blong God i stap wok oltaem. Tabu spirit ya i olsem lektrik blong batri we wan man i stap yusum blong mekem wan samting. (Jenesis 1:2) Taswe, tabu spirit blong God, hemia bigfala paoa blong hem we hem i stap yusum blong mekem ol samting, no strongfala paoa blong hem we i stap wok oltaem.
Samtaem Baebol i talem se tabu spirit i stap mekem wan wok long wan ples longwe long God. (Matiu 28:19, 20; Luk 3:21, 22; Ol Wok 8:39; 13:4; 15:28, 29) Samfala man, taem oli ridim ol vas ya, oli ting se tabu spirit i wan samting we i no joen wetem God. ?From wanem sam vas blong Baebol oli soem se tabu spirit i stap longwe long God? ?Tabu spirit i no joen wetem God nating?
God ya we i gat Olgeta Paoa, hem i stap antap we antap olgeta, i winim olgeta samting we hem i wokem. Hem i wan spirit man, yumi no save luk hem wetem ae blong yumi. (Jon 4:24) Baebol i talem se Jeova God i stap long heven, mo i stap lukluk i kamdaon long olgeta man long wol ya. (Ol Sam 33:13, 14) Yumi save samting ya. Man we i Wokem olgeta samting, hem i hae moa long olgeta paoa we hem i stap wok wetem. Hem i bos long ol paoa ya, i lidim olgeta, i wokem olgeta, mo i kontrolem olgeta.—Jenesis 1:1.
God i stap long wan ples we yumi no save luk, mo i save mekem eni samting we hem i wantem mekem long eniples. Taswe, hem i no nid blong lego ples blong hem blong go long narafala ples blong strongfala paoa blong hem i mekem wan wok, no gat. Hem i save sanem tabu spirit blong hem blong mekem wan wok. (Ol Sam 104:30) Ol man long taem blong yumi oli naf blong kasem save long samting ya kwiktaem nomo, from we yumi save yusum remot kontrol, we i no gat rop blong lektrik, blong mekem wan samting olsem televisin we i stap longwe i wok. Tede yumi luksave wok blong ol paoa we yumi no save luk, olsem paoa blong lektrik mo paoa we i stap bitwin remot kontrol mo televisin. Long sem fasin, God i save yusum tabu spirit blong hem, we yumi no save luk, blong mekem eni samting we hem i wantem mekem, be hem i no nid blong lego ples blong hem.—Aesea 55:11.
Long taem blong Baebol, maet i hadwok blong kasem save long tingting ya. Be i sua se, taem Baebol i tokbaot tabu spirit olsem wan strongfala paoa we i stap wok longwe long God, samting ya i halpem ol man we oli ridim Baebol blong save olsem wanem God i yusum paoa blong hem, nating se hem i no stap long ples we paoa blong hem i mekem wok long hem. Taem Baebol i talem se tabu spirit i mekem wan samting, i olsem we Baebol i talem se God i yusum paoa blong hem no i givim paoa long wan man no wan samting blong mekem samting we hem i wantem.
Ol Defren Wok Blong Tabu Spirit
Jeova i yusum tabu spirit blong wokem olgeta samting we oli gat laef wetem olgeta samting we oli no gat laef. (Ol Sam 33:6) God i yusum sem tabu spirit ya blong mekem bigfala wota i ron, blong spolem ol man ya we oli gat raf fasin mo oli no wantem tanem tingting blong olgeta. (Jenesis 6:1-22) Mo tu, God i yusum strongfala paoa blong hem we i stap wok oltaem blong putum nambawan laef blong Pikinini blong hem insaed long bel blong vejin Meri, we i wan woman Jyu.—Luk 1:35.
Samtaem, tabu spirit i givim paoa long man blong gat strong tingting mo no fraet blong talemaot trutok long fored blong ol enemi. Plante taem, samting ya i mekem bigfala denja long laef blong ol man ya. (Maeka 3:8) Mo long Baebol, i gat plante eksampel long saed blong ol man mo woman we tabu spirit i givim spesel save long olgeta blong talemaot profet tok. Long wol ya, i no gat wan man i save talem stret wanem bambae i hapen long fiuja. Taswe, nambawan wok ya blong talem fiuja, i kamaot from tabu spirit.—2 Pita 1:20, 21.
Tabu spirit i save givim paoa long man tu blong mekem merikel. Eksampel, wetem paoa ya, Jisas i stopem bigfala win, i mekem ol sik man oli kam gud, mo i mekem ol dedman oli laef bakegen. (Luk 4:18-21; 8:22-26, 49-56; 9:11) God i givim tabu spirit blong lidim ol faswan Kristin mo i givim paoa long olgeta blong talemaot Hem long olgeta ples long wol.—Ol Wok 1:8; 2:1-47; Rom 15:18, 19; 1 Korin 12:4-11.
Paoa We God i Givim Blong Givhan Long Yumi
?Olsem wanem long ol man blong God tede? ?Oli save kasem haf blong paoa ya we i bigfala olgeta? !Yes! God i givim haf blong tabu spirit long ol man blong hem, blong givhan long olgeta blong kasem save long hem mo blong mekem wok blong hem. Hem i lesin long prea blong ol man we oli askem tabu spirit blong hem wetem fulhat blong olgeta, olgeta we hat blong olgeta i stret, mo we oli folem ol rul blong hem oltaem. (1 Korin 2:10 -16) Yumi no stret gud, be tabu spirit i save givim long yumi “paoa ya we i bigwan tumas,” blong mekem yumi naf blong gohed oltaem long wok blong God, nating se yumi kasem traem. Taswe, ol man blong God, we oli onagud long hem, oli wantem tumas blong gat tabu spirit oltaem.—2 Korin 4:7; Luk 11:13; Ol Wok 15:8; Efesas 4:30.
I no longtaem, God bambae i yusum bigfala paoa blong hem blong finisim ol rabis fasin mo fasin blong harem nogud long rabis wol ya. Nao bambae hem i mekem nem blong hem we i hae mo i tabu i kam klin. Tabu spirit bambae i jenisim fulwol i kam gud, mo bambae ol man oli luk klia ol frut blong tabu spirit. Samting ya bambae i givim ona long Man ya we i Stamba blong tabu spirit.—Galesia 5:22, 23; Revelesen 21:3, 4.