!Oli Kam Fri Long Bigfala Win We i Kilim Man!

Bigfala trabol we Hariken Mitch i mekem las yia, i kamaot long fored blong ol niuspepa raon long ful wol. Be, ol man oli no tokbaot tumas fasin traehad we ol Witnes blong Jeova oli mekem blong sevem ol man we strongfala win blong kilim man i spolem olgeta. Ripot we bambae i kam biaen, i soemaot gud olsem wanem ol trufala Kristin brata oli save glad, nating se oli stap long ol taem we i nogud olgeta.

LONG Oktoba 22, 1998, wan samting blong kilim man i kamaot long solwota we i stap long saot wes blong Karibin. Samting ya i stat olsem wan hot win we paoa blong hem i daon olgeta. Long ol 24 aoa we oli kam biaen, hem i kasem moa paoa, i kam olsem wan hariken, mo oli givim nem long hem se Mitch. Plante man bambae oli rimemba hariken ya olsem wan samting blong fraet mo harem i soa. Mitch i kam strong, mo i muv i go long not. Long Oktoba 26, hem i kam wan hariken we i blong Grup 5. Hem i holem ol win we spid blong olgeta i kasem 290 kilometa long wan aoa. Mo ol sotfala win we oli blu strong wanwan taem, spid blong olgeta i kasem 320 kilometa long wan aoa.

Fastaem, i luk olsem se Hariken Mitch i stap rere blong kilim Jamaika mo Ol Aelan blong Kaeman. Be strongfala hariken ya i tanem i go long wes, mo i go from Belis, hemia wan kantri long Sentrol Amerika, klosap long solwota. Be nao, hariken ya i no kilim Belis, hem i stap nomo antap long solwota, long not blong Honduras. Ale, kwiktaem nomo, hariken ya blong kilim man i mekem wok blong hem. Long Oktoba 30, Hariken Mitch i kam daon long Honduras, i kilim ol man oli ded mo i spolem gud ol ples.

Mitch i Kilim Honduras

Ol strongfala ren we oli foldaon bigwan, oli soemaot se Hariken Mitch i stap finis. Victor Avelar, wan fultaem paenia we i stap long Tegucigalpa, i tingbaot bakegen taem ya, i se: “Raonabaot wan klok long moning, long Sarede, Oktoba 31, mifala i harem wan noes olsem wan bigfala tanda. !Wan krik we bifo hem i smol nomo, naoia i kam wan bigfala reva we i ron strong! Paoa blong reva ya i karemaot tu haos wetem ol man blong olgeta we oli fas insaed mo oli stap singaot bigwan.” Long wan narafala haf blong taon ya, bigfala sofmad we i ron i kilim 32 man i ded, we 8 long ol man ya oli stap stadi Baebol wetem ol Witnes. Be i no gat wan Witnes we i lusum laef blong hem.

Ol haeman blong Honduras oli kwik blong mekem wok biaen long trabol ya. Oli stanemap ol haos blong ol refuji. Mo tu, wan bigfala tim blong man we oli kamaot long bitim 12 kantri, i stanap rere blong wok. Ol Witnes blong Jeova tu, oli stat lidim wok blong halpem ol man. Samting ya i mekem yumi tingbaot ol tok blong Baebol, se: “Yumi mas mekem i gud long olgeta man. Antap moa, yumi mas mekem long olgeta ya we oli brata mo sista blong yumi from we olgeta tu oli bilif long Kraes.” (Galesia 6:10) Ol brata oli stanemap ol komiti blong givim help kwiktaem long ol man we oli kasem kil. Taem ol Witnes oli luksave se ol man we oli stap long ol taon klosap long solwota oli rili nidim help, oli girap oli stanemap wan grup blong givhan long olgeta.

Wan Witnes we nem blong hem Edgardo Acosta i tingtingbak se: “Long Sarede, Oktoba 31, mifala i tekem wan smol bot mo mekem trep i go long ples ya we bigfala wota i ron long hem. Nating se mifala i sevem tu brata,a mifala i luksave se i nidim wan bigfala bot sipos mifala i wantem tekem olgeta brata i kamaot long wota ya. Taswe mifala i faenem wan bot we i bigwan moa, mo long Sande eli moning, mifala i statem wan seken trep. Sloslou, mifala i karemaot evri memba blong kongregesen, wetem sam man we oli stap raonabaot, oli aot long eria ya. Fulnamba blong olgeta ya i kasem 189 man.

Juan Alvarado i joen long wok ya blong sevem ol man klosap long La Junta. Hem i tingtingbak se: “Mifala i save harem ol man we oli stap krae se, ‘!Help! !Sevem mifala!’ Hemia i wan taem we i nogud we i nogud moa i bitim eni narafala taem long laef blong mi. Ol brata oli kalabus stret. Plante long olgeta oli stap antap long ol ruf blong haos.” Maria Bonilla, wan long olgeta we i laef tru long taem ya, i eksplenem se: “Ol wota we oli stap raonabaot long mifala oli olsem bigfala solwota. Mifala evriwan i stap krae.” Be ol traehad blong sevem man oli karem frut. Humberto Alvarado, we i laef tru long taem ya, i talem se: “Ol brata oli sevem mifala be antap long hemia oli givim ples blong slip, kakae, mo klos long mifala.” Humberto i gohed se: “Wan man we i stap lukluk wok we [ol brata oli mekem] blong sevem man, i talem long mifala se, i no gat man long jos blong hem we i traem givhan long hem—ol Witnes blong Jeova nomo oli mekem samting ya. !Naoia, hem i bilif se ol Witnes blong Jeova oli gat trufala skul!”

Long wan taon we nem blong hem La Lima, wan grup blong ol Witnes oli fas i stap insaed long wan haos. From we wota i stap kam antap raon long olgeta, oli mekem wan hol i gotru long siling mo oli klaem i go antap long ol wud we oli holem ruf. Wan Witnes we nem blong hem Gabi, i tokbaot taem ya se: “Mifala i gat inaf kakae blong holemtaet mifala blong samfala dei. Taem ol kakae ya oli finis, wan long ol brata i putum laef blong hem long denja taem hem i jyam i go long wota blong go tekem sam kokonas. Blong mekem se wari blong mifala i godaon, mifala i singsing long ol sing blong Kingdom.” Juan, wan man blong givhan, i tingtingbak se: “Mifala i no ting se mbae mifala i laef. Taswe mifala i stat blong stadi long magasin ya Wajtaoa we i tokbaot Baebol. Mifala i stat blong krae, taem mifala i tingbaot se hemia nao laswan taem we bambae mifala i save stadi wanples. Stadi ya i givhan long mifala blong stanap strong.” Eit dei i pas we oli stap holem strong, go kasem we tim blong sevem ol man long ples ya i kam sevem olgeta.

Plante long olgeta we oli sef mo oli laef tru long bigfala wota ya we i ron, oli mas fesem hadtaem from ol samting ya we oli bin hapen. Wan Witnes we nem blong hem Lilian, i talem stret se: “Mi rili harem nogud blong lusum ol samting blong mi olsem ol klos, ol tebel, jea, kabod, bed, mo ol foto blong famle. !Taem mi luk we haos blong mi i fulap long sofmad, ol doti, mo ol snek, mi harem i nogud we i nogud olgeta!” Be long taem ya bakegen, ol Kristin brata oli soemaot fasin we i nambawan tumas. Lilian i tingbaot se: “Ol brata oli kam blong givhan. Hasban blong mi, we i no wan Witnes i askem se, ‘?Olsem wanem bambae mifala i save pembak olgeta from ol wok ya we oli mekem?’ Wan long ol sista i ansa taem hem i talem long mi se, ‘Yu no nid blong talem tangkiu long mi. !Mi mi sista blong yu!’”

El Salvado i Haremsave Paoa Blong Mitch

Taem Hariken Mitch i pulumaot olgeta samting long rod blong hem i go long wes blong kasem El Salvado, paoa blong hem i stat blong lus. Be hem i gat paoa yet blong kilim man i ded. Long taem ya, ol Witnes blong Jeova long El Salvado oli bisi blong mekem ol plan blong Distrik Asembli ya “Fasin Blong Laef We God i Glad Long Hem.” Bitim 40,000 man oli mas kam long asembli ya. Taem Hariken Mitch i stap kam, ol brata oli luksave se maet bambae i no gat jans blong evriwan i save kam long asembli ya. Ol reva oli ronaot long prapa rod we oli stap folem bifo, nao oli spolem ol kakae long garen, ol rod blong trak, mo ol haos. Graon we i stap antap long ol hil i no moa strong from we ol man oli bin katemdaon tumas tri, ale ol graon ya oli ron i kamdaon olsem sofmad.

Nelson Flores i presiden elda long kongregesen blong ol Witnes blong Jeova long taon ya Chilanguera. Long Sarede moning, Oktoba 31, hem i wekap mo i lukluk i gokros long reva, long ples ya we Chilanguera i bin stap long hem bifo. !I no moa gat wan samting i stap! !Hariken ya i bin karemaot olgeta faef handred haos we oli bin stap long ples ya! Hem i wari taem i tingbaot laef blong ol Kristin brata blong hem, taswe hem i jyam i go long bigfala reva ya we i no moa tingbaot prapa laef blong hem. Nelson i tingtingbak i se: “Taem mi kasem narasaed, mi girap mo mi traem luksave ples we mi stap stanap long hem. Mi bin stap prij long eria ya evri dei, mi stap go long olgeta haos wanwan. Be, !naoia i no moa gat wan samting we i givhan long mi blong luksave ples we mi stap long hem!”

Long naet ya, i gat raonabaot 150 man we oli ded long Chilanguera. Long olgeta ya i gat samfala we oli bin stap stadi Baebol wetem ol Witnes blong Jeova. Be i no gat wan Witnes we i ded.

Kwiktaem nomo wok i stat blong traehad blong sevem ol man. Aristedes Estrada, we hem i givhan blong stanemap ol wok ya, i eksplenem se: “Mifala i no gat raet blong go long Chilanguera. !Ol wota oli gohed blong kam antap! Mi no save fogetem taem ya we mi luk ol man oli stap singaot blong narafala i halpem olgeta. Be ol man blong wok blong sevem man oli livim olgeta from we olgeta tu oli mas ronwe blong stap laef.” Be biaen, evri brata oli kasem sef mo oli kamaot long taon ya. Ol Haos Kingdom oli kam olsem ol ples blong ol refuji. Antap long samting ya, oli sanem ol Witnes oli go long ol hospital, ol skul, mo ol narafala ples, blong jekemap sipos i gat sam Witnes long lis blong nem blong ol man we oli kasem kil mo we oli no gat haos. Ol lokol Haos Kingdom oli kwik blong givim ol samting we ol man i nidim.

Be, i no isi blong tekem ol samting we ol brata oli nidim, i go long ol ples we man i save seremaot. Ol brata long wan taon we nem blong hem Corinto oli fulumap wan trak wetem ol kakae blong garen blong olgeta. Be oli kam kasem wan bigfala hip graon we i foldaon i stap mo i blokem rod blong olgeta. ?Bambae oli mekem wanem nao? !Oli digimaot ol graon blong mekem rod i go tru! Fastaem, olgeta we oli stap stanap mo lukluk nomo. Be, i no longtaem, olgeta tu oli wantem givhan mo digimaot graon ya blong openem rod. Ol brata long Corinto oli kasem ples we oli stap go from. Nating se sofmad i kavremap olgeta, be oli glad blong givim presen blong olgeta.

Branj ofis blong Wajtaoa Sosaeti i kam olsem wan senta blong givimaot samting we ol brata oli nidim. Gilberto, wan we i wok long branj ofis mo we i givhan blong givimaot ol presen i go long ol brata, i tingtingbak se: “!I hadwok blong bilivim samting we i hapen! I gat plante trak we oli kam, mekem se i nidim ol volontia blong soem rod long ol trak i go long ples blong putum trak, mo long rod we i stap fored long branj ofis. I gat samwe long 25 tan blong ol klos mo 10 tan blong ol kakae we ol brata oli givim olsem presen. I gat 15 volontia we oli tekem wan ful wik blong seraotem ol klos mo sanem olgeta i go long sip.

Mitch i Pas Klosap Long Nikaragwa

Hariken Mitch i pas klosap long boda blong Nikaragwa mekem se hem i karem strongfala ren i kam we i spolem graon. Plante taosen haos oli bagarap, mo wota i wasemaot ol rod blong trak. Klosap long taon blong Posoltega, bigfala hip sofmad we i ron, i berem fulwan vilej—mo bitim 2,000 man.

Taem ol Witnes long Nikaragwa oli harem we nogud samting ya i kamaot, oli stanemap wan bigfala grup blong givhan long ol brata. Oli sanem ol volontia i go mekem wan strongfala wok long wan taem we i denja, blong soem sore—blong faenem ol brata blong olgeta. Tu tim blong ol Witnes, wan long León (wan taon we i stap long saot blong Posoltega) mo narawan long Chichigalpa (wan taon we i stap long not), tufala i go long Posoltega, wanwan brata i karem ol hevi basket wetem samting we bambae ol brata oli nidim. Ol narafala grup blong sevem man oli givim woning long ol brata se bambae i hadwok blong gotru long rod ya, be ol brata oli gat strong tingting blong go.

Long eli moning, Mande Novemba 2, ol brata long León oli fulumap plante samting long wan trak mo oli ron i go kasem wan brij we wota i wasemaot. Afta we oli karemaot ol samting long trak, ol brata oli mekemap tu tim blong olgeta we bambae oli ron long baskel: Wan tim bambae i go long Posoltega, mo narawan bambae i go long wan taon we wota i kavremap, nem blong hem Telica. Fastaem ol brata oli mekem wan prea. Wan long ol brata ya i talem se: “Afta long prea, mifala i harem we mifala i gat bigfala paoa.” Yes, bambae oli nidim paoa ya. Olgeta oli mas krosem ol bigbigfala hol, samtaem oli glis long sofmad mo sam narafala taem oli mas karem ol baskel long solda blong olgeta. Samtaem i gat ol tri we oli foldaon, oli blokem rod blong olgeta. Mo oli mas stanap strong nating se oli luk ol ded bodi we oli stap flot long ol ples we i gat wota.

!Wan samting blong sapraes se, ol brata we oli ron long baskel blong go long Léon mo Chichigalpa, oli kasem tufala ples ya klosap semtaem nomo! Nerio Lopez, wan memba blong tim ya blong sevem man, i tingtingbak se: “Baskel blong mi i gat ol wil we oli nogud finis. Mi ting se mbae hem i save ron wan kilometa no tu kilometa nomo.” Be, baskel ya i no brokdaon. Hemia nomo se long rod blong gobak, tufala wil i bosta. Nomata wanem samting we i hapen, ol brata oli faswan tim blong kasem ples ya blong givim samting long olgeta we oli trabol gud. !Bigfala glad i kamaot taem oli mitim wan grup blong ol lokol brata mo sista! Wan sista i talem se: “Mi mi talem tangkiu bigwan long Jeova mo long ol brata blong yumi from we oli sapotem mo halpem mifala. Mifala i neva ting se ol brata blong mifala bambae oli kam kwiktaem blong halpem mifala olsem.”

Hemia faswan trep blong baskel we oli mekem i go long ol taon we bigfala wota i kavremap, mo plante taem ol brata oli faswan blong kasem ol ples ya blong givhan long ol man we oli trabol gud. !Ol man long taon blong Larreynaga oli luk taem we ol 16 brata oli kasem ples blong olgeta long ol baskel! Ol lokol brata oli krae from bigfala traehad ya we ol brata blong olgeta ya oli mekem. Samtaem olgeta we oli ron long baskel, oli mas karem 20 kilo blong ol samting long baksaed blong olgeta. !Tu brata oli karem bitim 100 kilo blong ol samting i go long taon blong El Guayabo! Wan brata we i stap karem ol hevi samting mo i ron long baskel, i faenem se hem i haremgud taem hem i tingting dip long vas blong Baebol we i stap long Aesea 40:29: “Olgeta we oli taed, [Jeova] i stap givim paoa long olgeta, mo olgeta we oli no strong, hem i stap mekem olgeta oli strong bakegen.”

Ol Witnes we oli stap long taon blong Tonalá, oli sanem wan man i go wetem mesej blong talemaot long ol brata we oli lukaot long ol nid, se kakae blong olgeta klosap i finis. !Taem hemia we i karem mesej i kasem ples ya, hem i sapraes blong lanem se oli sanem finis ol samting we olgeta oli nidim! Mo taem hem i kasem haos, i gat kakae i stap finis long haos blong hem. Marlon Chavarría, we hem i givhan blong tekem ol samting i go long ol eria we wota i kavremap, raonabaot long Chinandega, i tingtingbak i se: “Insaed long wan taon, i gat 44 famle blong ol Witnes i stap. Be nating se i olsem, i gat 80 famle we oli haremgud from we ol brata oli seremaot kakae long olgeta.”

Ol haeman oli luksave olgeta traehad ya we ol brata oli mekem blong givim ol samting i go long olgeta we oli trabol. Mea blong taon blong Wamblán i raet i go long ol Witnes, i se: “Mifala i raetem leta ya blong askem long yufala sipos mifala i save kasem sam help. . . . Mifala i luk olsem wanem yufala i stap halpem ol brata mo sista blong yufala long ples ya Wamblán, mo mifala i wantem save sipos yufala i save mekem sam samting long mifala tu.” Ol Witnes blong Jeova oli agri long samting ya, nao oli sanem kakae, meresin, mo klos i go long olgeta.

Hariken i Spolem Ol Samting Long Gwatemala

I no longtaem afta we Hariken Mitch i livim Honduras mo El Salvado, hem i go spolem Gwatemala. Sara Agustín, wan Witnes we i stap long saot blong bigfala taon blong Gwatemala, i wekap taem hem i harem noes blong wota we i stap ron strong. Ples we hem i laef long hem, long medel blong tu bigfala hil, i kam olsem rod blong wan bigfala reva. Plante taem, hem i stap kilkilim doa blong ol man we oli stap raonabaot long hem blong serem trutok blong Baebol wetem olgeta. !Be, naoia hem i resis i go long ol doa ya wanwan blong traem wekemap ol man! Wan bigfala hip sofmad i ron i kamdaon long hil, i kavremap plante long ol haos blong ol man we oli stap raonabaot long hem. Sara i karem wan savel mo i stat blong halpem olgeta we oli laef yet. Hem i digimaot seven smol pikinini oli kamaot long sofmad. Wok blong Sara i blong givhan long ol woman we oli gat bel, blong oli bonem bebi blong olgeta. Mo, wan long ol seven pikinini ya i wan bebi we Sara i bin givhan long mama blong hem taem hem i bon. Sore tumas, wan yangfala gel we nem blong hem Vilma i wan long olgeta we oli ded. I no longtaem bifo, Sara i bin givim sam buk long gel ya.

Nating se Hariken Mitch i lusum bigfala paoa blong hem, be ren we i gohed blong folfoldaon i spolem gud olgeta kakae long garen, ol brij, mo ol haos. Ol brata oli sanem bigfala hip blong ol samting i go long branj ofis blong ol Witnes blong Jeova long Gwatemala. Mo ol brata oli mekem disisen se sam long olgeta samting ya bambae oli yusum blong givhan long ol brata long Honduras. From we plante brij oli brok mo wota i kavremap epot, ol brata oli mas putum ol samting ya long sip nomo i go long ol brata long Honduras. Frede Bruun, wan brata we i wok long branj ofis, i storeyan se: “Mifala i rentem wan faebaglas bot we longfala blong hem i kasem 8 mita, mo mifala i karem samwe long wan tan blong ol meresin mo kakae i go. Nating se trep i no isi antap long solwota we i raf, be mifala i kasem ples we ol sip oli stap angka long hem long Omoa. Mifala i wetwet gud.”

Hariken Mitch—Ol Frut We Oli Kamaot Biaen

I luk olsem se Hariken Mitch bambae i lus fulwan long saot-is blong Meksiko. Nating se i olsem, Hariken Mitch i tekem laswan jans blong hem, i go not-is mo i kilim ol ples raon long saot blong Florida, Yunaeted Stet. Nao hariken ya i kam slak. Hem i gobak long solwota blong Atlantik mo kwiktaem nomo hem i lusum strongfala win blong hem, mo paoa blong hem i finis. Long Novemba 5, ol woning blong hariken ya oli finis.

Sam man blong hae save oli tokbaot Hariken Mitch olsem: “!Wan hariken we i karemaot moa laef i bitim ol narafala hariken we oli kilim ol kantri long Wes blong Wol long ol tu handred yia we i pas finis!” Stret namba blong olgeta we oli ded ating i go kasem 11,000, mo i gat plante taosen man we oli lus i stap yet. Bitim tri milyan man, oli no moa gat haos no hariken ya i rili spolemgud olgeta. Presiden Carlos Flores Facusse, blong Honduras i harem nogud taem i talem se: “Ol haos we mifala i bin bildim, sloslou, long ol 50 yia we oli pas, ol lus evriwan.”

Plante long ol Witnes blong Jeova, oli lusum haos blong olgeta we Hariken Mitch i karemaot. !I nogud tumas from se, samfala long olgeta, oli lusum ol graon we haos blong olgeta i stap antap long hem! Be nating se i olsem, ol Witnes blong Jeova oli bin mekem sam samting i rere blong halpem plante man blong bildim bakegen ol haos blong olgeta.

Ol disasta olsem Hariken Mitch oli mekem yumi tingbaot se yumi stap laef long taem ya we “wol ya bambae i kam strong tumas.” (2 Timoti 3:1-5) Trufala fasin sef agensem ol disasta ya, bambae i kam fulwan nomo taem Kingdom blong God i lukaot long wol ya. (Matiu 6:9,10; Revelesen 21:3,4) Nating se i olsem, ol Witnes blong Jeova oli glad from we i no gat wan long olgeta we i lusum laef blong hem taem Hariken Mitch i kilim ples blong olgeta.b Taem ol lokol kongregesen oli obei long olgeta oda we ol brata oli putumap taem oli karemaot man long ples we i denja, mo from we oli wok folem oda, samting ya i givhan long plante blong olgeta blong ronwe long denja mo kasem sef.

Long ol manis we i pas, ol Witnes blong Jeova long ol kantri we hariken i bin spolem, oli wokhad blong gohed bakegen blong folem ol program blong olgeta long saed blong spirit. Eksampel, long El Salvado, oli mekem rere blong givhan long olgeta we hariken i kasem ples blong olgeta, blong oli save kam long distrik asembli ya we i kamaot sam dei biaen nomo afta we Hariken Mitch i pas. Oli rentem sam bas blong karem ol man, mo oli kasem ol ples blong slip. !Oli rerem ol meresin tu, we oli save givhan long olgeta we oli sik blong oli save kam long asembli! Asembli ya i rili karem frut, namba blong olgeta we oli kam i go antap kasem 46,855—hemia i bitim namba we oli ting se bambae i kam. Wan brata blong Salvado we Hariken Mitch i karemaot haos mo bisnes blong hem, nem blong hem José, i talem se: “Mifala i harem nogud mo wari from samting we i hapen long mifala. Be taem mifala i livim asembli ya, tingting blong mifala i jenis, i kam gud from we mifala i luk olsem wanem ol brata oli welkamem gud mifala.” Ol ripot we oli kamaot oli soem se, namba blong ol man we oli stap kam long ol miting long olgeta kantri ya i go antap bigwan—hemia frut we i kamaot taem ol man afsaed oli luk ol traehad we ol brata oli mekem blong givim ol samting long olgeta we hariken i spolem olgeta.

Be maet samting we i hapen i gat bigfala paoa moa long ol Witnes. Carlos, wan brata we i laef tru long taem ya we bigfala wota i ron long Honduras, i talem se: “Mi neva gat wan ekspiryens olsem long laef blong mi. Mi haremsave lav mo fasin kea blong ol brata blong mi.” Yes, ol trabol we Hariken Mitch i mekem bambae wan dei i kam olsem wan samting blong bifo nomo. Be lav we ol Witnes blong Jeova oli soem taem oli putum laef blong olgeta long denja blong halpem ol brata blong olgeta, bambae oli no save fogetem.

[Futnot]

[Bokis blong pija long pej 23]

Ol Witnes We Oli Stap Raonabaot Oli Givhan

TAEM olgeta we oli stap wok long saed blong weta, oli talemaot se Hariken Mitch bambae i kilim Belis, olgeta man long kantri ya oli rere blong stanap agensem paoa blong hem. Gavman i givim oda se olgeta man we oli stap long ol ples klosap long solwota mo long ol flat ples, oli mas kamaot. Taswe ol Witnes blong Jeova oli muf i go long bigfala taon ya Belmopan, klosap 80 kilometa longwe long solwota, mo long sam narafala taon we oli stap long ples we i hae.

Laki nomo, strongfala paoa blong Hariken Mitch i no kilim Belis. Be, ol Witnes long Belis oli harem se ol brata blong olgeta long Honduras, Nikaragwa, mo Gwatemala, oli trabol bigwan from we hariken i bin spolem olgeta, ale, oli givim presen kakae, ol klos, wota we i klin gud, mo mane.

I tru se fasin blong mekem wan samting blong givhan long ol brata, i sem mak wetem wanem we ol brata long ol kantri raonabaot oli stap mekem. Ol Witnes we oli stap long Kosta Rika oli sanem fo bigfala bokis blong ol kakae, ol klos, mo meresin. Ol brata we oli stap long Penama oli stanemap fo senta blong kasem olgeta presen we ol brata oli givim, nao oli seraotem, mo fulumap ol samting ya long ol bokis. Sam dei nomo biaen, i gat bitim 20,000 kilo blong ol samting we ol brata oli sanem i kam. Wan man we i no Witnes, i talem se: “Mi ting se ol ami mbae oli faswan blong mekem ol wok blong givhan long ol man we oli trabol gud. Be naoia mi luk se ol Witnes blong Jeova oli tekem ples blong olgeta blong mekem wok ya.” Naoia ol Witnes oli stap visitim man ya blong serem trutok blong Baebol long hem.

Wan brata we i mekem bisnes long saed blong transpot, i givim wan bigfala trak mo i putum wan man (we i no wan Witnes) blong draevem trak ya blong tekem ol presen ya oli go long ol brata long Nikaragwa. Ol haeman long ol ofis blong kastom oli letem trak ya i pastru i go long Panama mo Kosta Rika we oli no jekem ol pepa blong hem. Wan sevis stesen i givim olsem presen, inaf bensin we i save fulumap tugeta aean bokis bensin blong trak ya. Hemia inaf blong go mo kambak. Long Nikaragwa ol haeman blong kastom oli mekem sem mak, oli no jekem ol samting we trak i karem, oli letem hem i go nomo. Oli talem se: “Sipos samting ya i kam long ol Witnes blong Jeova mifala i no nid blong jekem. Mifala i neva gat eni problem wetem olgeta.”

I gat problem long saed blong plen we i mas tekem ol samting i go long Honduras tekem ol samting i go long Honduras. Be wan Kristin sista we i wok long Embasi blong Honduras, i mekem rod tru long embasi, blong sanem ol samting long plen, fri nomo, i go long olgeta we oli trabol. Ol brata oli yusum rod ya blong sanem bitim 10,000 kilo blong ol samting i go long olgeta we oli trabol.

Samfala we oli no Witnes, oli stat blong soem intres from ol wok we ol Witnes oli mekem blong givhan long olgeta we oli trabol gud. Samfala kampani oli givim olsem presen, ol kadbod bokis, ol plasta, mo ol plastik kontena. Ol narafala kampani oli givim presen mane mo oli mekem spesel praes long ol samting we oli salem i go long ol brata. Ol man we oli wok long epot long Panama, oli luk wan samting we i tajem filing blong olgeta. Hemia taem we, bitim 20 Witnes blong Jeova oli givhan blong tekemaot ol presen we oli kam long trak blong sanem i go long Honduras. Long nekis dei, sam long ol man ya we oli wok long epot oli kam wetem ol prapa presen blong olgeta blong givim i go tu.

[Bokis blong pija long pej 24]

Semfala Wok Blong Givhan Long Olgeta We Oli Trabol Long Meksiko

HARIKEN MITCH i mekem smol trabol nomo long Meksiko. Be, bigfala wota i ron long Chiapas, sam wik bifo we hariken ya i kilim Sentrol Amerika. I gat raonabaot 350 vilej we bigfala wota ya i spolem olgeta; sam taon oli lus fulwan.

ol bigfala wota oli mekem hadwok long ol Witnes blong Jeova long eria olsem. Be, aksin we ol elda blong ol lokol kongregesen oli tekem kwiktaem, i givhan bigwan blong katem daon smol, ol trabol we hariken ya mekem? Eksampel, long wan smol vilej, ol elda oli visitim wanwan memba blong kongregesen mo givim woning long olgeta blong oli haed insaed long ol Haos Kingdom sipos ren i stap gohed. Ol brata oli save se Haos Kingdom i wan haos we i strong moa long ol narafala haos blong vilej blong olgeta. !Long sapa, tu reva, we tufala i joen wanples, i kilim taon blong olgeta! Ol Witnes mo samfala we oli stap raonabaot long olgeta—oli sefgud taem oli bin ronwe i go haed long Haos Kingdom. I no gat wan Witnes we i lusum laef blong hem.

Be yet, i gat raonabaot 1,000 Witnes long Meksiko we oli mas go haed long ol haos we gavman i stanemap. I gat raonabaot 156 haos blong ol Witnes we hariken i flatem gud fulwan, mo 24 haos oli bagarap. Antap long hemia, seven Haos Kingdom oli flat gud olgeta.

Taswe, ol brata oli stanemap sikis grup blong halpem ol Witnes blong Jeova mo olgeta we oli stap raonabaot long olgeta. Kwiktaem nomo oli givimaot ol kakae, ol klos, ol blangket, mo ol narafala samting. Tru ya, taem ol lokol haeman oli kasem nius long saed blong ol wok blong givhan we ol Witnes oli bin mekem, oli talem se: “Ol ami oli no save mekem samting olsem ya kwiktaem.”

Ol Witnes blong Jeova oli gat gudfala nem longtaem finis long saed blong fasin blong no giaman. Mo samtaem fasin ya i karem gudfala frut. Eksampel, taem wan grup blong man i askem help long ol haeman long ples blong olgeta, ol haeman ya oli askem grup ya sipos i gat sam Witnes blong Jeova long vilej blong olgeta. Taem oli ansa se yes, ol haeman ya oli talem long olgeta se: “Ale tekem wan long olgeta i kam long mifala blong mifala i givim olgeta samting we yufala i nidim long hem.”

Wan elda blong wan kongregesen blong ples ya, i eksplenemgud olgeta samting ya, taem hem i raetem se: “Ol brata oli holem wan tingting we i strong, nating se i gat bigfala trabol ya. Plante brata long ol vilej we oli stap klosap oli kam blong givhan long mifala wetem kakae mo ol buk we oli tokbaot Baebol blong leftemap tingting blong mifala. Oli mekem olsem, nating se oli save lusum laef blong olgeta from. I gat plante samting we mifala i mas talem tangkiu long Jeova from.”

[Map/Foto blong pija long pej 18]

(Lukluk niuspepa)

Meksiko

Gwatemala

El Salvado

Belis

Honduras

Nikaragwa

Kosta Rika

[Tok blong pija long pej 19]

HONDURAS

◼ Reva blong Guacerique

[Tok blong pija long pej 20]

EL SALVADO

◼ Big rod blong Chilanguera

◼ José Lemus mo ol gel blong hem oli sef wetem Haos Kingdom

◼ José Santos Hernandez, long fored blong haos blong hem we hariken i spolem

[Tok blong pija long pej 21]

NIKARAGWA

◼ Faswan grup blong ol brata we oli ron long baskel i go long Telica

◼ Ol Witnes long El Guayabo oli glad blong kasem ol basket blong kakae

[Tok blong pija long pej 22]

NIKARAGWA

◼ Ol volontia oli bildim bakegen ol faswan haos we oli stanap bakegen

◼ Ol Witnes long ol lokol kongregesen oli givhan blong fulumap ol kakae i go insaed long basket

[Tok blong pija long pej 22]

GWATEMALA

◼ Sara i givhan blong sevem seven pikinini, oli aot long sofmad