Bigfala Intres Long Ol Enjel
“Yumi ‘evriwan’ i gat ol enjel we oli stap lidim yumi mo oli lukaot long yumi . . . I nogud yumi blokem wok blong ol enjel. I moa gud yumi kam olsem ol smol pikinini, we yumi trastem, lavem, mo soem fasin tangkiu long olgeta wetem tingting daon. Nao sipos yumi mekem olsem, bambae oli blesem yumi bigwan. Oli pleplei wetem yumi. Oli lukaot long yumi. Oli stretem ol sik blong yumi, oli tajem yumi, mo oli mekem yumi haremgud bakegen, wetem gudfala han blong olgeta we yumi no save luk. Mo oltaem oli traehad blong givim samting we yumi wantem.”—Tok ya i kamaot long buk ya “Angel Letters.”
ATING yu agri se tingting ya we plante man oli gat long saed blong ol enjel i pulum intres blong man. Folem tingting we sam man oli gat mo we oli kolem se “new spirituality” (niufala tingting long saed blong spirit), oli talem se wanwan long yumi i gat wan enjel, wan enjel we wok blong hem i blong mekem yumi harem gud mo protektem yumi long ol trabol. Oli talem se enjel blong yu i gat bigfala paoa mo hem i gat lav. Hem i no wantem se yu obei no wosip long hem, mo neva bambae hem i jajem no stretem yu. Hem i stap oltaem long saed blong yu, rere blong givim ol samting we yu nidim mo hem i wantem tumas blong mekem olgeta samting we yu askem. Plante man tede oli rili bilif long ol samting ya.
Longtaem finis, ol man oli bilif long ol enjel. Long taem bifo, ol man blong plante skul oli bilif strong finis long olgeta. Hemia i klia long ol samting we ol man blong bifo oli wokem. Ol pija blong ol jerubim, wan kaen enjel, oli flasem haos tapolen mo haos prea blong ol man Jiu blong bifo. Ol jos blong Krisendom oli flasem ol jos haos blong olgeta long pija blong ol enjel. Insaed long ol musium i gat fulap pija blong ol enjel we oli wokem mo pentem.
Plante Man Oli Save Gud Ol Enjel
Long ol yia we oli jes pas, long sam kantri, plante man oli stat blong intres bigwan long ol enjel. Samtaem ol sinema oli soem ol enjel olsem ol man we oli ded finis, mo oli kambak long wol ya blong mekem ol gudfala samting. Long wan sinema ol enjel oli givhan long wan tim blong plei besbol blong oli no lus. Long wan narafala sinema bakegen, wan enjel i givhan long wan yangfala boe blong givimbak panis long man ya we i kilim gel fren blong hem i ded. Stamba blong wan program long televisin we plante man long Yunaeted Stet oli laekem tumas, hemia enjel we i givhan long man. Program ya i kam antap bigwan.
Ol singsing long saed blong ol enjel oli kam plante. Long Yunaeted Stet, long ol yia we oli pas, long evri ten singsing we ol man oli laekem tumas, i gat wan we i tokbaot enjel. Kam kasem medel blong ol yia 1990, bitim 120 long “ol smol stoa we oli salem ol samting long saed blong ol enjel” oli bin open long Amerika. Ol stoa ya oli salem ol samting olsem ol aedol blong ol enjel, ol smol wan we oli save hangem long jen, mo ol pepa blong raet long hem—mo tu ol pleplei blong bebi, we i gat pija blong ol enjel i stap long hem. Long ol miting mo ol nius leta oli tijim ol man olsem wanem blong toktok wetem ol enjel ya we oli stap long heven. Ol magasin, ol niuspepa, mo long ol so long televisin, oli tokbaot ol stori blong ol man we oli mitim ol enjel.
Plante Handred Buk
Antap long samting ya i gat ol buk tu. Wan bigfala stoa blong salem buk long New York i salem 500 defren kaen buk we oli tokbaot ol enjel, speseli ol enjel we oli lukaot long man. Ol buk ya oli promes blong soem long ol man we oli ridim, olsem wanem blong mitim ol enjel, olsem wanem blong lanem nem blong olgeta, toktok wetem olgeta, mo askem help blong olgeta. Ol buk ya oli tokbaot plante stori olsem wanem ol enjel oli kam long taem ya we ol man oli nidim olgeta, oli tekemaot man long fored blong wan trak we i spid i kam, oli mekem man we klosap i ded from wan nogud sik i kam oraet bakegen. Oli mekem ol man we oli trabol oli harem gud, mo oli protektem ol soldia long taem blong faet. Ol enjel ya oli mekem ol wok ya, nating se “man i no soemaot we hem i tanem tingting blong hem from sin, no i jenisim laef blong hem, no i obei long ol tijing.” Be ol stori olsemia tede, blong ol man we oli “mitim ol enjel,” i no pusum olgeta blong jenisim laef blong olgeta. Plante taem olgeta we oli talem se oli mitim wan enjel, oli jes harem glad nomo long filing blong olgeta.
Long taem blong yumi we i gat fulap wari mo trabol, plante man oli laekem ol stori ya olsem gud nius. ?Be yumi save trastem olgeta? ?Samting ya i impoten no olsem wanem?
[Tok blong makem poen pija long pej 4]
Plante man wanwan oli talem se oli bin mitim ol enjel