Traem Olgeta Stori

OL MAN oli gat ol defren tingting taem oli harem ol stori blong olgeta we oli mitim wan enjel. Faswan, i gat olgeta we oli bilif long ol stori ya. Olgeta ya oli talem se from we ol stori ya oli plante mo oli kasem ol man long ol defren ples, i min se oli tru. Seken, i gat olgeta we oli no bilif nating long ol stori ya. Oli talem se i no gat strong pruf blong sapotem ol stori ya. Oli talem se nomata we plante man oli bilif long wan samting, be hemia i no min se samting ya i tru. Oli talem se bifo, plante man oli rong long sem fasin, oli bilif long ol woman we haf bodi i tel blong fis, be i no gat. Namba tri, i gat olgeta we oli stap long medel nomo. Buk ya Angels—Opposing Viewpoints i tokbaot olgeta ya se: “Plante man oli talem se oli bin luk ol enjel. I no gat pruf se oli rili luk ol enjel; be ol man oli trastem ol stori ya from bilif blong olgeta. Be, ol man we oli no bilif, olgeta tu oli no save pruvum se ol stori oli giaman, taswe oli no traehad blong agensem olgeta.”

Plante man oli agri se Baebol nao, i stamba blong ol save we ol man oli save trastem long saed blong ples blong ol spirit man.a Hem i save halpem yumi blong skelemgud ol stori blong ol enjel we oli stap kamaot tede. Maet yu save finis we Baebol i mekem yumi sua se ol enjel oli rili stap, oli gat bigfala paoa, oli spirit man we oli gat haenem. Baebol i fulap long ol stori blong ol enjel we oli stap talemaot ol mesej mo oli stap sevem ol man blong God long denja.—Ol Sam 104:1, 4; Luk 1:26-33; Ol Wok 12:6-11.

Baebol i soem tu se i gat ol rabis enjel. Ol rabis enjel ya oli stap giaman mo lidim ol man oli go krangke, oli stap pulum ol man oli go longwe long God. (2 Korin 11:14) From risen ya, Baebol i givim woning se: “I gat plante profet we oli stap talem se [“spirit,” NW] blong God i stap long olgeta, be yufala i no mas bilif long olgeta evriwan. Yufala i mas traem olgeta fastaem, blong faenemaot se spirit we i stap long olgeta i kamaot long God no nogat.” (1 Jon 4:1) Wan eksampel. Bifo we yumi save bilif long ol tok blong wan man we i talem se hem i wan profet blong God, i moa waes blong skelemgud ol toktok blong hem wetem Tok blong God. I klia se yumi mas folem sem fasin, long ol stori tede blong ol man we oli luk ol enjel. ?Olsem wanem nao, ol stori tede blong ol man we oli mitim enjel, oli laenap wetem wanem we Baebol i talem?

Ol Trufala Enjel Oli No Olsem Plante Man Oli Bilif

I gat tu giaman tingting we plante man oli gat long saed blong ol enjel, we i gud blong yumi stretem. Defren olgeta long bilif we plante man oli gat, laef blong ol enjel i no stat long wol ya olsem ol man. Oli stap long heven plante yia finis, bifo we God i mekem olgeta laef samting long wol. Baebol i talem se long taem we God i “mekem wol ya . . . , ol enjel long heven oli glad tumas, oli stap singsingaot.”—Job 38:4-7.

Wan narafala giaman tingting bakegen we ol man oli gat tede, hemia se ol enjel oli save letem man i mekem eni samting we hem i wantem, mo oli no blokem man blong mekem ol fasin nogud. Defren olgeta, ol trufala enjel blong God oli sapotem ol stret rul blong hem, mo oli letem hem i lidim olgeta. Oli stap mekem wok blong God, i no wok blong ol man.—Ol Sam 103:20.

Ol Enjel Oli Intres Long Laef Blong Yumi Long Saed Blong Spirit

Plante long ol stori blong ol enjel we yumi harem tede, oli tokbaot ol enjel we oli sevem wan man. Wan buk we plante man oli pem, i tokbaot stori blong wan yangfala gel we i stap long wan haos we i stap bon long faea. Nao wan han we man i no save luk i tekem hem i kamaot. Wan narafala buk i tokbaot tu studen blong haeskul we tufala i no moa save gohed from bigfala sno i foldaon i mekem se rod i no moa klia. Wantaem nomo, wan kamiong i kam mo i pulum trak blong tufala i go long wan ples we i sef. !Be kamiong ya we i sevem tufala i no livim wan mak blong wil nating long rod! Long sam narafala ples, wan narafala stori i tokbaot Ann, we i kasem sik ya kansa. Tri dei nomo bifo we hem i mas go long hospital blong oli katem hem, wan longfala man i kam luk hem. Hem i talem se nem blong hem Thomas mo hem i talem we God i sanem hem. Thomas i leftemap han blong hem, mo Ann i harem se wan laet we i hot mo i waet i pas tru long bodi blong hem. Taem hem i kasem hospital blong oli katem hem, ol dokta oli sapraes bigwan. !Kansa blong hem i finis!

Ol stori ya oli stanemap wan kwestin we i klia nomo. Hemia se, sipos evriwan oli gat wan enjel we i lukaot long olgeta, ?from wanem oli sevem sam man nomo, be ol narafala oli no sevem? I gat plante milian man we oli ded from ol sik, ol faet, hanggri, mo ol disasta. I sua se plante long olgeta oli prea blong askem help. ?From wanem enjel we i stap gad long olgeta i no kam sevem olgeta?

Baebol i givhan long yumi blong faenem ansa long kwestin ya. Hem i talem se God i stap mekem i sem mak nomo long ol man. (Ol Wok 10:34) Antap long samting ya, ol enjel we oli stap tru long God oli intres long yumi long ol samting long saed blong bodi, be oli intres moa long laef blong yumi long saed blong spirit. Aposol Pol i talemaot tingting ya se: “Ol enjel ya, oli spirit nomo, we oli stap mekem ol wok blong God. Hem i stap sanem olgeta blong oli kam givhan long ol man ya we bambae i sevem olgeta.” (Hibrus 1:14) Help we man i kasem long saed blong bodi i mekem se man i harem gud blong smol taem nomo, be help we man i kasem long saed blong spirit i save mekem se man i harem gud blong olwe.

I luk olsem se plante stori long saed blong ol enjel oli blong laf nomo. Oli tokbaot ol enjel we oli halpem wan mama we i taed blong i jenisim ol kaliko blong bed, oli halpem wan man we i go long stoa blong no foget blong pem mases, mo oli halpem ol man blong draevem trak blong faenem wan ples blong putum trak long hem. Wan yangfala woman blong Skotlan i laf smolsmol taem hem i talem se: “Tri wik finis mi stap putum trak blong mi long wan ples we i tabu long rod blong St. Mary mo mi askem enjel blong mi blong lukaot long trak ya long fasin lav mo sore. Sipos polis i luk trak ya bambae filing blong olgeta i fulap wetem lav, mekem se oli livim trak blong mi i stap nomo. Mi neva kasem wan faen yet.” Yumi no sapraes se sam man oli tingbaot ol enjel we oli lukaot long man tede, olsem ol woman long ol stori blong pikinini we oli gat paoa blong majik no olsem wan kaen Santa Klos we i givhan long ol bigman.

Ol Trufala Enjel Oli No Agensem Tok Blong God

Ol buk long saed blong ol enjel oli fulap long ol waes tok mo advaes we oli talem se oli kamaot long ples blong ol spirit man. Eksampel, oli talem se wan buk i fulap long ol tijing we jif blong ol enjel, Maekel, i givim long wan woman long Colorado, Yunaeted Stet. Long ol “toktok” we Maekel i givim, i gat wan we i talem se: “Olgeta rod i lidim man i go long God. Olgeta bilif, olgeta trutok oli olsem laet blong lidim man i go long God.” Defren olgeta, Jisas i talem se i gat tu rod nomo, mo wan blong tufala rod nomo i lidim man blong God i glad long hem, mo blong kasem laef we i no save finis. Narafala rod i lidim man blong God i no glad long hem, mo blong kasem ded blong olwe. (Matiu 7:13, 14) I klia, se tufala tok ya, blong buk mo blong Jisas, tufala tugeta i no save tru.

?Ol man we oli folem fasin blong skul blong “new spirituality” oli ting se ol “enjel” oli gat wanem tingting long saed blong mared mo ol stret fasin? Wan buk i talemaot stori blong Roseann, we “enjel” blong hem i talem long hem se: “I gat plante man we yu nidim blong toktok wetem olgeta yet. Prapa rod blong laef blong yu, i no blong yu stap olwe wetem hasban blong yu. Yu lavem hem, mo hem i lavem yu, be naoia i taem blong seraot.” Ale, hem i divos. Be Baebol i soemaot we God i no laekem se man i divos long rod we i no stret. (Malakae 2:16) Wan narafala stori i tokbaot wan mared man we i slip wetem narafala woman. Nao tufala i bilif se ol enjel oli glad taem oli luk samting ya mo oli putum wan tabu laet i stap raon long hed blong tufala. Be Baebol i talem se: “Yufala man we i mared, bambae yufala i no mas go slip wetem narafala woman, mo yufala woman we i mared, bambae yufala i no mas go slip wetem narafala man.”—Eksodas 20:14.

Sam man oli ting se ol mesej ya blong tede, yumi save ademap olgeta long Baebol blong mekem Baebol i stret moa long taem blong yumi. ?I tru no olsem wanem? !I no tru ya! Tok blong God i no save jenis. Aposol Pol i raet i go long sam Kristin long faswan handred yia, se: “Mi mi sapraes tumas long yufala. God i singaot yufala, mo Kraes i givhan long yufala long gladhat blong hem, be i no longtaem, yufala i girap, yufala i ronwe long God. Nao yufala i stap holem wan tok we i olsem wan narafala gud nius. Be i no save gat narafala gud nius, i gat wan gud nius nomo i stap. Mi mi talem olsem, from we i gat sam man we oli stap mekem trabol long yufala, we oli wantem tanem gud nius blong Kraes i kam narafala tok. Mi mi talem long yufala, se sipos mifala, no wan enjel long heven, no wanem man, bambae i talemaot wan gud nius long yufala, we i narafala long hemia we mifala i talemaot finis long yufala bifo, be man ya [“God i mekem strong tok se bambae hem i panisim hem,” NW].”—Galesia 1:6-8.

“!Singaot Long Nem Blong Evri Enjel!”

Samtaem yumi fesem trabol mo denja. ?Olsem wanem nao? ?Bambae yumi singaot long ol enjel blong halpem yumi? Hemia nao stamba tok blong plante buk. Hemia tu eksampel. Wan buk, Ask Your Angels, i soem long ol man we oli ridim ‘olsem wanem oli save kasem paoa blong ol enjel, we i save givhan long olgeta blong tingbaot ol dip filing we oli bin lusum mo blong kasem ol samting we oli wantem long laef blong olgeta.’ Wan buk we i sem mak hemia Calling All Angels!: 57 Ways to Invite an Angel Into Your Life.

Baebol i neva leftemap tingting blong yumi blong singaotem ol enjel. Jisas i mekem poen ya i klia long prea we hem i tijim long ol disaepol blong hem. Hem i talem se: “Taem yufala i prea bambae yufala i prea olsem. ‘Papa blong mifala. Yu yu stap long heven . . . ’” (Matiu 6:9) Long sem fasin, Pol i raetem se: “I gud yufala i prea long God from evri samting. Yufala i mas askem long hem, mo yufala i mas talem tangkiu tu long hem.”—Filipae 4:6.

Long Nem Blong Ol Enjel

Fasin blong skul blong “new spirituality” i pusum ol man blong traehad blong lanem nem blong ol enjel. Ol buk we fulap man oli ridim finis oli givim nem blong plante taosen enjel. ?Blong wanem? I no jes blong save nem blong olgeta. Hem i blong mekem se ol man oli save askem help long olgeta. Hem i joen klosap wetem majik. Wan buk (Encyclopedia of Angels) i talem se ol kastom, ol samting blong majik, mo ol toktok blong majik oli joen wetem, “fasin blong yusum ‘ol nem we oli gat paoa,’ no stret nem blong sam spirit. Samting ya i givim paoa blong openem doa bitwin ol man long wol ya mo ples blong ol spirit man. Long rod ya, man blong mekem majik . . . i save toktok wetem ol spirit man.” Be Baebol i talemaot klia se: “Yufala i no mas mekem ol bisnes blong posen no kleva.”—Levitikas 19:26.

Baebol i talemaot nem blong tu enjel nomo we oli holem strong long God, hemia Maekel mo Gabriel. (Daniel 12:1; Luk 1:26) Baebol i talemaot ol nem ya blong soemaot se ol spirit man oli no sem man nomo. ?From wanem hem i no givim sam moa nem? Risen i blong blokem ol man, blong oli no leftemap ol enjel i go long wan posisen we oli save kasem ona we i no blong olgeta—wan samting we ol enjel wanwan oli no stap traem blong kasem nating. Taswe taem Jekob i askem wan enjel blong talemaot nem blong hem, enjel ya i no wantem. (Jenesis 32:29) Biaen, enjel ya we i kam long Josua i talemaot se hem i “komanda blong ol soldia blong Hae God.” Be hem i no talemaot nem blong hem. (Josua 5:14) Taswe i sem mak taem papa blong Samson i askem wan enjel blong i talemaot nem blong hem, enjel ya i talem long hem se: “?From wanem yutufala i wantem save nem blong mi? Save blong man i no naf blong kasem nem blong mi.” (Jajes 13:17, 18) Ol enjel blong God we oli holem strong long hem oli wantem se yumi ona long God, i no long olgeta.

[Futnot]

[Tok blong makem poen pija long pej 6]

“Olgeta we oli harem se ol rul blong God oli strong, oli blokem olgeta tumas, . . . oli laekem moa ol enjel blong [Niufala Ej]. Olgeta oli no strong tumas olsem God, . . . oli gat kaen fasin, oli no jajem man. Mo evriwan i save kasem help blong olgeta olsem meresin.”—Time magazine

[Bokis blong pija long pej 5]

Ol Man Oli “Mitim” Ol Enjel Mo Ol Alien Tede

Plante man tede oli talem se oli bin luk ol enjel mo oli toktok wetem olgeta finis. Sam narafala oli talem se oli toktok wetem ol alien, hemia ol man blong narafala wol. Buk ya Angels—An Endangered Species i soemaot ol poen we oli sem mak bitwin stori blong ol enjel mo stori blong ol strenja ya blong narafala wol. Buk ya i talemaot se, ol stori blong ol enjel mo ol stori blong ol strenja ya oli gat wan stamba nomo.b Hemia sam eksampol insaed long buk ya blong makemaot ol samting we oli sem mak bitwin tufala ya.

1. Tufala i blong ol narafala wol.

2. Tufala tugeta oli gat laef, oli gat moa save long saed blong spirit no long saed blong teknoloji.

3. Tufala enjel mo alien we oli fren gud wetem man, oli yang, oli luk naes, oli kaen mo oli gat bigfala sore.

4. Lanwis i no wan samting we i hadwok long tufala, tufala i save toktok klia long lanwis blong man we i stap lesin.

5. Tufala tugeta i save flae gud.

6. Bigfala laet i saen taem man i luk wan enjel mo wan alien.

7. Tufala tugeta i werem ol klos we oli longwan olsem dres. Waet no blu hemia kala we oli laekem tumas.

8. Tufala tugeta i longwan sem mak olsem ol man.

9. Tufala tugeta i soem se tufala i wari long trabol we ol man mo wol bambae oli kasem.

10. I no gat narafala pruf se man i mitim wan enjel mo wan alien ya, i gat toktok nomo blong man we i talem se hem i luk olgeta.

[Futnot]

[Tok blong pija long pej 7]

Baebol i gat ol trufala stori blong ol man we ol enjel i kam luk olgeta