Gudfala Fiuja We i Stap Givim Paoa Long Mi

TATJANA VILEYSKA I STORIAN

Wan man i kilkilim mama blong mi gogo i ded long renhaos blong mifala. Samting ya i spolem hapi famle blong mifala. Fo manis biaen, papa blong mi i kilim hem wan i ded. Afta long samting ya, mi tu mi harem se mi no moa wantem stap laef. ?Taswe, olsem wanem mi stap yet blong storian long samting ya? Bambae mi eksplenem.

DONETSK i wan taon long is Yukren. Long ples ya, ol man oli stap digim graon blong faenem wan ston we oli bonem long faea blong i kam jakol. I gat bitim milian man long taon ya we oli toktok lanwis blong Rasia. Oli wok had mo oli kaen. Samfala oli stadi long ol sta blong lukluk rod blong olgeta, samfala oli joen long wok blong ol rabis spirit. Sam narafala bakegen oli go luk ol kleva, no kolduns long lanwis blong Rasia. Sam long olgeta ya oli traem toktok wetem ol dedman, olsem wan pleplei nomo, no blong lukaot rod blong winim sik.

Papa i man blong wokem sus. Hem i stap talem se i no gat wan God i stap. Nating se hem i talem olsem, be hem i ting se i mas gat wan man we i putum yumi long wol ya. Hem i stap talem se: “Yumi stap smoltaem long wol ya blong visitim nomo.” Mama i stap go long jos long taem blong Ista nomo. Hem i se: “Sipos i gat wan God mo hem i laef i stap, i gud we yumi go long jos.” Mi mi bon long Mei 1963. Mi gat wan bigfala sista, Lubov, mo wan smol brata, Alexandr. Famle blong mifala i hapi.

“Waet Majik i Gud”

Wan famle blong mifala, Pjotra, i stap mekem wok blong digim graon blong faenem ston ya we oli wokem jakol long hem. Wan dei, hem i aksiden, i kasem kil long hed blong hem, mo i mas go long wan spesel hospital. Hem i wantem winim sik ya, taswe hem i go luk wan kleva (koldun). Kleva ya i mekem rod blong hem i toktok wetem ol rabis spirit. Woman blong hem mo papa mama blong mi, oli talem long hem se hem i krangke blong mekem samting ya. Be hem i wantem folem tingting blong hem nomo. Hem i talem se: “Hemia waet majik. Blak majik i nogud, be waet majik i gud.”

Pjotr i stap talem se hem i gat paoa blong lukluk fiuja mo blokem man blong wan rabis samting i no kasem hem. Nating se i olsem, woman blong hem i ronwe long hem. Taswe, Pjotr i stap kam long haos blong mifala, mo maet hem i stap plante wik wantaem. Paoa we hem i gat i mekem i nogud long famle. Mama mo Papa tufala i stat raorao bigwan. Biaen, tufala i seraot mo divos. Mifala ol pikinini i folem Mama, mo Pjotr we i wan famle blong Mama, hem i kam stap wetem mifala.

Sista blong mi, Lubov, hem i mared, nao hem i aot wetem man blong hem blong go stap long Uganda long Afrika. Long Oktoba 1984, Alexandr i go spel, mo mi tu mi wokbaot i go long taon ya Gorlovka blong wan wik. Taem mi mi aot, mi talem tata kwiktaem long Mama. !Mi sore tumas we mi no tekem taem blong toktok moa long hem, i moagud yet sipos mi no bin go wokbaot nating! Yes, hemia lastaem we mi luk mama blong mi.

“Gudfala Mama Blong Yu i Ded”

Taem mi kambak, lok i hang long doa blong mifala, mo i gat wan notis we polis i putum, se i tabu blong go insaed. Mi harem skin blong mi i kolkol. Mi go luk ol man we oli stap long nekis rum. Woman ya Olga i harem nogud tumas, i no save toktok. Man blong hem, Vladimir, i tok long kaen fasin, i se: “Tanja, taem yu yu no stap wan nogud samting i hapen. Gudfala mama blong yu i ded. Pjotr i kilim hem i ded. Biaen, hem i kam long ples ya, i toktok long polis long telefon, mo i talemaot evri samting we hem i mekem.”

Polis i kam talem long mi se rabis nius ya i tru, mo oli givim ki blong rum long mi. Mi mi no laekem Pjotr we mi no laekem hem nating. Mi kros tumas, mi karem olting blong hem, wetem ol buk blong majik we hem i gat tu, mi kavremap olgeta long wan blangket, mo mi bonem olgeta long wan klia ples klosap long haos.

Taem Alexandr i harem nius se Mama i ded, hem tu i agensem Pjotr. I no longtaem, oli singaot Alexandr blong joen long ami, nao hem i gowe. Papa i kam stap wetem mi, mo Lubov i kambak long Uganda blong stap wetem mitufala blong smoltaem. Sam samtaem, mifala i harem se ol rabis spirit oli stap mekem mifala. Mo tu, Papa i stap lukluk ol nogud drim. Hem i harem se hem i gat fol from ded blong Mama. Hem i stap talem se: “Sipos mi no bin seraot long hem, bambae hem i laef i stap yet.” Smoltaem biaen, tingting blong Papa i foldaon olgeta. Fo manis afta we Mama i ded, Papa i kilim hem wan i ded.

Afta we mifala i berem Papa, Alexandr i gobak long ami, mo Lubov i gobak long Uganda. Mi mi traem blong fogetem ol samting we i bin hapen. Mi stat blong stadi long Skul blong ol Enjinia blong Bildim Haos, long Makeyevka. Hem i no longwe long haos blong mi, maet mi mas wokbaot 30 menet nomo. Mi flasem haos mo mekem i luk defren, blong traem sakemaot ol tingting blong rabis samting we i bin kamaot. Nating se mi mekem ol samting ya, mi harem yet se ol rabis spirit oli stap.

“God, Sipos i Tru Se Yu Stap”

Alexandr i finisim ol yia blong hem long ami mo hem i kamhom. Be mitufala i stat raorao. Ale, hem i mared. Mi mi girap mi go stap sam manis long Rostov. Hemia wan taon long Rasia we i stap klosap long solwota blong Azov, samwe 170 kilometa longwe long ples blong mi. Nao mi mekemap tingting blong mi blong sakemaot ol laswan samting blong Pjotr.

Tingting blong mi i foldaon, nao mi tu mi mekem plan blong kilim mi wan i ded. Be oltaem mi stap tingbaot tok blong Mama se: “Sipos i gat wan God mo hem i laef i stap.” Wan naet mi prea, hemia fastaem long laef blong mi we mi bin prea. Mi plis long God se: “God, sipos i tru se yu stap, soemaot long mi from wanem mi mi stap long wol ya.” Tu dei biaen, mi kasem wan leta long Lubov. Hem i singaot mi blong go stap smoltaem wetem hem long Uganda. Ale, mi livim plan blong kilim mi wan i ded, i stap fastaem.

Sapraes Long Uganda

Uganda i defren olgeta long Yukren. Ating i no gat plante ples long wol we oli defren tumas olsem. Long Maj 1989, mi tekem plen, mi go long Entebbe. Taem mi kamaot long plen, i olsem we mi go insaed long wan oven. !Mi neva harem i hot olsemia bifo! Be, mi neva bin kamaot long Soviet Yunion samtaem tu. Mi mi no kasem save nating long ol man, from we oli toktok Inglis.

Mi tekem wan taksi i go long Kampala, mifala i ron ating 45 menet. Ples i defren olgeta long ples blong mi. !I olsem se mi no moa stap long wol, mi stap long wan narafala ples! Be man we i draevem taksi i kaengud mo i laf plante. Hem i putum mi long haos blong Lubov mo man blong hem, Joseph. !Naoia, tingting blong mi i jes spel!

Lubov i stap stadi Baebol wetem ol Witnes blong Jeova. Mi mi neva harem nem ya bifo, be Lubov i glad blong storian long mi long saed blong olgeta ya. Hem i tokbaot evri samting we hem i lanem finis, stat long Jenesis i go kasem Revelesen. !Tru ya, samting ya i traem mi bigwan!

Wan dei, ol Witnes we oli stadi wetem Lubov, oli kam luk hem. Wan long olgeta ya, nem blong hem Marianne. Hem i no traem blong storian long mi, from se mi mi no kasem save long Inglis tu. Be, mi luk lav mo kaen fasin long tufala ae blong hem, nao mi luksave se hem i no stap giaman, mo hem i glad. Hem i soem wan pija blong Paradaes long mi, we i stap long buk ya “Look! I Am Making All Things New.” Hem i talem se: “Traem luk woman ya. Hemia yu ya. Narafala woman ya, mi ya. Yumitu stap long Paradaes wetem ol narafala man ya. ?Hemia i gud tumas, no?”

Sam narafala Witnes long Kampala, olgeta tu oli stap kam luk Lubov mo Joseph. Evriwan oli kaen, mi mi stap tingting se ating oli stap traem blong pulum mi nomo. Sam wik biaen, mi go long wan miting blong olgeta, hemia Lodsapa. (Luk 22:19) Mi no kasem save long ol tok long miting ya, be bakegen, mi sapraes long kaen fasin blong ol man.

‘Ridim Olgeta Haf Blong Hem’

Marianne i givim wan Baebol long mi long lanwis blong Rasia. Hemia faswan Baebol we mi bin gat long laef blong mi. Hem i talem se: “Ridim olgeta haf blong hem. Nating se yu no kasem save long evri samting, jes ridim nomo.”

Samting ya we Marianne i mekem i tajem hat blong mi, nao mi folem tok blong hem. Tingting blong mi se: ‘I blong nating nomo we mi holem Baebol ya sipos mi no ridim.’

Taem mi kambak long Yukren, mi karem Baebol blong mi i kam. Blong sam manis, mi wok long Moscow, long Rasia. Taem mi no stap wok, mi ridim Baebol. Naen manis biaen, mi go long Uganda bakegen. Mi mi flatem haf blong Baebol finis. Long Kampala, Marianne i soemaot sam vas long mi. Oli tokbaot nambawan promes blong fiuja. !Paradaes! !Laef bakegen long ded! !Bambae mi lukluk Mama mo Papa bakegen! Naoia, mi jes luksave se samting we mi stap lanem, hem i ansa long prea we mi bin mekem long Donetsk.—Ol Wok 24:15; Revelesen 21:3-5.

Taem mifala i stadi long saed blong ol rabis spirit, mi mi lesingud. Baebol i talem samting we mi mi bilif long hem longtaem finis i kam. I no gat gudfala majik mo nogud majik. Olgeta majik i pulum trabol i kam long man. Mi mi luk samting ya long famle blong mifala. Taem mi bonem olting blong Pjotr, mi mi mekem wan gudfala samting, nating se mi no kasem save long taem ya. Ol faswan Kristin tu oli bonem ol samting long saed blong majik taem oli stat blong wosip long Jeova.—Dutronome 18:9-12; Ol Wok 19:19.

Moa mi kasem save long Baebol, moa mi bilif se hemia trutok. Ale, mi lego sigaret, mo long Disemba 1990, mi tekem baptaes blong soem se mi givim laef blong mi i go long Jeova. Lubov i tekem baptaes tri manis bifo long mi, mo Joseph long 1993.

Kambak Long Donetsk

Long 1991, mi kambak long Donetsk. Long semfala yia, gavman blong Yukren i luksave ol Witnes blong Jeova olsem wan skul. Naoia, mifala i save joen wanples mo prij long open ples. Mifala i storian wetem enikaen man we i wokbaot long rod mo we i gat smoltaem. Mifala i luk se plante man long kantri ya oli wantem save long Kingdom blong God, nating se plante oli stap talem se oli no bilif long God.

Jes afta 1990, mifala i no gat plante buk we oli eksplenem Baebol. Taswe, mifala i givimaot ol buk we ol man oli save ridim mo givimbak. Mifala i mekem samting olsem wan smol stoa long taon ya Donetsk, blong soemaot ol buk blong mifala. I no longtaem, samfala oli kam storian mo askem kwestin. Olgeta we oli wantem ridim buk, oli save tekem, be oli mas karem i kambak afta we oli ridim. Mifala i stap askem long ol man sipos oli wantem stadi Baebol long haos blong olgeta.

Long 1992, mi mi kam paenia, hemia wan Witnes blong Jeova we i yusum olgeta taem blong hem blong mekem wok blong God. Long Septemba 1993, ofis blong Watch Tower Sosaeti long Selters, Jemani, i singaot mi blong joen long wok blong tanem ol buk oli kam long lanwis blong mifala. Long Septemba 1998, mifala i go wok long Polan, gogo oli finisim niufala ofis long Lviv, Yukren.

Ol man blong Jeova long Yukren oli kam plante bitim mak. Long 1991, i gat wan kongregesen nomo long Donetsk, we 110 Witnes oli stap long hem. !Naoia i gat 24 kongregesen we bitim 3,000 Witnes oli stap long olgeta! Long 1997, mi mi visitim Donetsk. Hem i wan hapi taem, be i gat wan samting i kamaot we i mekem mi mi wari bigwan.

“Pjotr i Stap Lukaotem Yu”

Taem mi stap long Donetsk, Witnes ya Juliya, we i save famle blong mifala, i mekem mi mi sek. Hem i talem se: “Pjotr i stap lukaotem yu. Hem i wantem toktok wetem yu.”

Long naet ya, long haos blong mi, mi krae mo mi prea long Jeova. ?Pjotr i wantem wanem? Mi save se hem i bin stap long kalabus sam yia from rabis samting we hem i mekem. Mi mi no laekem hem nating, mo mi no wantem givhan long hem blong kasem save long niufala wol, from we mi harem se hem i nogud tumas. Mi prea long saed ya blong plante dei, nao mi jes luksave se i no mi we bambae i jajem ol man se oli gat raet blong kasem laef no nogat. Mi tingbaot promes blong Jisas Kraes long man blong brekem loa we i hang long pos klosap long hem, se bambae i stap wetem hem long Paradaes.—Luk 23:42, 43.

Ol tingting ya oli pulum mi blong wantem luk Pjotr blong witnes long hem long saed blong Kingdom blong Mesaea mo niufala wol we God bambae i mekem. Ale, tu Kristin brata oli folem mi i go long adres we Juliya i givim long mi. Long ples ya, mi lukluk Pjotr, fastaem we mi bin luk hem afta we mama blong mi i ded.

I luk olsem se mifala evriwan i fraet. Mi mi eksplenem long Pjotr se naoia mi mi wan Witnes blong Jeova, mo se Baebol i givhan long mi blong save from wanem yumi stap kasem ol trabol, we samtaem i spolem hat blong yumi bigwan. Mo tu, mi talem long hem olsem wanem mifala i harem nogud bitim mak taem mifala i lusum mama blong mifala mo biaen papa.

Pjotr i talem se hem i bin harem wan voes we i talem long hem blong kilim mama blong mi i ded. Afta, hem i tokbaot evri samting we i hapen long dei we hem i kilim mama. I had long mi blong lesin long stori ya, mi harem nogud tumas. Be mi sore long hem tu, from we hem i stap seksek olsem wan anamol we man i ronem. Taem hem i finisim stori blong hem, mi mi traem blong soem long hem ol nambawan promes blong Baebol. Hem i talem se hem i bilif long Jisas, taswe mi askem long hem se:

“?Yu yu gat wan Baebol blong yu?”

Hem i ansa se: “No yet, be mi oda long wan finis.”

Mi mi se: “Maet yu save finis se Baebol i talemaot prapa nem blong trufala God, hemia Jeova.”—Ol Sam 83:18.

Taem hem i harem nem ya, hem i kam kros, i se: “Yu no talem nem ya long mi. Mi mi no laekem nating.” Mifala i traehad blong tokbaot ol nambawan promes blong God, be hem i no wantem lesin.

Taem mi mi aot long ples ya, wan samting i kam klia long tingting blong mi: Sipos mi mi no bin kasem save long Jeova, ating Pjotr i kilim mi mi ded olsem Mama, no ating mi mi kilim mi wan i ded olsem Papa, no ating ol rabis spirit oli pulum mi blong mekem ol nogud wok olsem Pjotr i stap mekem. !Mi mi talem tangkiu tumas long trufala God, Jeova, we hem i givhan long mi blong save hem!

Tingbaot Fiuja, i No Ol Samting We Oli Pas

Ol trabol we mi mi kasem long laef blong mi oli spolem gud filing blong mi. Nating se ol samting ya i hapen longtaem finis, taem mi tingting bak, mi harem nogud yet mo mi wari. Be taem mi kasem save long Jeova mo ol tingting blong hem, mi mi stat kamgud. Trutok blong Baebol i tijim mi blong tingbaot fiuja, i no ol samting we oli pas finis. !Tru ya, wan nambawan fiuja i stap fored long ol man blong Jeova!

Long fiuja, ol dedman bambae oli laef bakegen long paradaes long wol. !Bambae mi glad bitim mak blong welkamem papa mama blong mi bakegen! Papa i talem tru, taem hem i se: “Yumi stap smoltaem long wol ya blong visitim nomo.” Mo tingting blong Mama se God i laef i stap, hem i tru nomo. Samting we mi mi wantem tumas, i blong tijim Mama mo Papa long ol trutok blong Baebol, taem tufala i girap bakegen long niufala wol we God i promes long hem.

[Futnot]

[Tok blong makem poen pija long pej 24]

Hemia fastaem afta long ded blong Mama, we mi luk man ya we i kilim hem

[Tok blong pija long pej 23]

Tu misinari we oli stadi wetem mi long Uganda, Marianne mo Heinz Wertholz

[Tok blong pija long pej 23]

Baptaes blong mi long Kampala

[Tok blong pija long pej 24]

Long Polan, mi wok long tim blong tanem ol tok i go long lanwis blong Yukren