Ol Man Blong Ridim Wekap! Oli Talem

Ista Aelan Stori ya “Wan Smol Aelan i Lanem Yumi Long Wan Bigfala Samting” (Jenuware-Maj, 2001) i soemaot tingting blong plante man we oli wari se ol man oli stap spolem wol blong yumi. Be mi luk se smol man nomo oli tingbaot trabol ya we yumi stap fesem. Taem mi tingbaot olsem wanem ol man oli stap spolem wol ya, wota i ron long ae blong mi.

K. M., Japan

Lanwis Tangkiu from stori ya “Ol Lanwis—Oli Givhan Long Yumi Mo Oli Blokem Yumi Tu.” (Jenuware-Maj, 2001) Mi mi intres tumas long ol lanwis, mo mi lanem faef lanwis blong Yurop finis. Naoia mi stap lanem Sinhala. Samting we i mekem mi mi glad moa, se ol lanwis oli olsem brij we i givhan long yumi blong joen wetem ol man blong ol narnarafala kantri mo serem “klin lanwis” blong ol tijing blong Baebol wetem olgeta.—Sefanaea 3:9.

C. B., Itali

Krae Tangkiu from stori ya “?I Stret Blong Krae Blong Soem Sore?” (Jenuware-Maj, 2001) Save ya i tajem hat blong mitufala from we tri yia i pas finis, mitufala i lusum wan boe blong mitufala. Sam samtaem mitufala i krae yet mo harem nogud, be ol stori olsem oli givim paoa long mitufala blong gohed.

J. A. mo L. A., Yunaeted Stet

Trabol Long Saed Blong Seks Mi wantem talem tangkiu long yufala from stori ya “Ol Yangfala Oli Askem . . . ?Mi Save Mekem Wanem Taem Wan i Stap Hambag Long Mi?” (Jenuware-Maj, 2001) Ol yangfala long skul, oli bin singaot mi long plante defdefren nem blong jikim mi, from we mi mi no slip olbaot. Taem mi finis long haeskul, mi ting se bambae i no moa gat wan i mekem trabol long mi, be plante gel oli stap sakem ol tok long saed blong seks long mi. Ale, mi talemaot ol Kristin bilif blong mi long klia ples, mo samting ya i halpem mi blong blokem olgeta. Tangkiu from ol kakae ya long saed blong spirit we yufala i givim long mifala.

H. C., Sambia

Stori ya i givhan bigwan long mi. Mi mi stap long klas tri mo wan boe i stap lukluk mi oltaem. Naoia mi save wanem blong mekem.

H. K., Yunaeted Stet

!Save ya i kamaot long stret taem we mi nidim! Wan man long ples blong wok blong mi i stap mekem trabol long mi. Mi bin harem nogud tumas. Long stret taem we paoa blong mi i finis, stori ya i kamaot. Naoia mi save wanem blong mekem long ol man long wok.

L. T., Yunaeted Stet

Kalabus Long Saeberia Bilif blong Stepan mo ol narafala gudfala Kristin brata we stori ya blong Alexei Davidjuk i tokbaot, i givim paoa long mi. Hemia stori ya “Bigfala Tingting Blong Mi i Blong Stap Tru Long God.” (Jenuware-Maj, 2001) Stori ya i talem se wan brata i no bin stap tru “from we hem i no moa ridim mo bilivim Baebol.” Ol tok ya i gat paoa long mi, mo i pusum mi blong gohed blong stadi Baebol oltaem.

A. V., Jojia