Klosap Oli Lus Evriwan
LONG pija ya, yu luk wan mangki we i gat tri yia blong hem, nem blong hem Sam. Hem i no glad. Be yumi no sapraes long samting ya. Ol man oli kilim mama blong hem i ded, nao hem i stap hem wan we i no gat janis blong gobak long bus samtaem. Sore tumas, sam manis nomo afta we oli tekem pija ya, Sam i ded from wan sik blong waet leva. Be i no hem nomo we laef blong hem i stap long denja.
Plante anamol olsem oli stap long denja, from we ol man oli stap spolem prapa ples blong olgeta. Long sam ples, ol man oli kilim ol mangki blong kakae olgeta. Oli yusum ol niufala masket blong sutum olgeta. Samting ya tu i mekem se kaen anamol olsem i stap lus olgeta. Fiuja blong ol mangki i nogud, be blong sam narafala anamol, i moa nogud.
International Union for Conservation of Nature and Natural Resources (IUCN) i raetem wan ripot we i tokbaot bigfala trabol we i kasem plante anamol blong wol. Long ol yia we oli jes pas, plante kaen anamol oli stap long denja blong lus olgeta. Mo samting ya i stap hapen kwik tumas. IUCN i wan grup we i stap jekem plante taosen kaen anamol blong luk olsem wanem namba blong olgeta i stap godaon. I no longtaem i pas, oli raetem Red Lis, blong mekem ol man oli save long trabol we ol anamol blong wol oli fesem.
Plante (klosap 25 pesen) blong ol anamol long wol we oli givim titi long pikinini blong olgeta, mo sam pijin (12 pesen) oli stap long denja. Mo hemia ol kaen anamol nomo we ol man oli stadi long olgeta. Bighaf blong ol anamol mo pijin blong wol, ol man oli no save namba blong olgeta we oli stap.
?Sipos yu yu harem nogud long trabol ya, olsem wanem long Man ya we i Wokem olgeta samting ya? Hem i talem long Baebol se: “Olgeta anamol blong bus oli blong mi nomo.” (Ol Sam 50:10, Today’s English Version) Taswe hem i no save satem ae blong hem long fasin ya blong kilimaot ol samting we hem i wokem. Long buk blong Revelesen, God i promes se bambae hem i “spolem ol man ya we oli stap spolem wol.”—Revelesen 11:18.
God bambae i “mekem olgeta samting oli kam niuwan bakegen.” Long taem ya, Kingdom blong Hem bambae i mekem plante impoten wok, tu long ol wok ya hemia: Lukaotgud long ol anamol mo pijin, mo lukaotgud long ol samting raonabaot long yumi we laef blong yumi evriwan i dipen long hem.—Revelesen 21:5; Matiu 6:10.
[Bokis/Foto blong pija long pej 21]
Taega (Panthera tigris)
◼ Hamas i stap long bus: samwe 5,000 kasem 7,500 (wan handred yia bifo i gat samwe 100,000)
◼ Bigfala samting we i spolem olgeta: ol man oli ronem mo kilim olgeta, posenem olgeta, spolem prapa ples blong olgeta, mo ol grup blong taega oli stap longlongwe tumas long ol narafala grup
[Bokis/Foto blong pija long pej 21]
◼ Bigfala Bea Ya Panda (Ailuropoda melanoleuca)
◼ Hamas i stap long bus: 1,000 nomo—namba blong olgeta i daon moa long ol narafala anamol we oli givim titi long pikinini blong olgeta
◼ Bigfala samting we i spolem olgeta: oli no stap karem plante pikinini, mo ol man oli stap spolem bambu we ol bea ya oli kakae
[Credit Line]
Foto: Zoo de la Casa de Campo, Madrid
[Bokis/Foto blong pija long pej 21]
Mangki Ya Orangutan (Pongo pygmaeus)
◼ Hamas i stap long bus: samwe 20,000
◼ Bigfala samting we i spolem olgeta: ol faea long bus, ol man oli katemaot ol tri, oli ronem mo stilim olgeta, mo oli salem olgeta oli go long ol narafala kantri long fasin haed
[Credit Line]
Foto: Zoo, Santillana del Mar, Cantabria, España
[Bokis/Foto blong pija long pej 22]
Bea Ya (Red) Panda (Ailurus fulgens)
◼ Hamas i stap long bus: oli no save, be i luk olsem se namba i stap godaon from we ol man oli spolem prapa ples blong olgeta, mo from we oli no stap karem plante pikinini
◼ Bigfala samting we i spolem olgeta: ol man oli ronem mo kilim olgeta, spolem ol bambu long ol hil, mo fulap buluk oli stap long ples blong olgeta
[Credit Line]
Foto: Zoo de la Casa de Campo, Madrid
[Bokis/Foto blong pija long pej 22]
Mangki Ya Goeldi (Callimico goeldii)
◼ Hamas i stap long bus: oli no save (oli jes faenem kaen mangke ya long 1904)
◼ Bigfala samting we i spolem olgeta: ol man oli spolem dak bus blong Amazon, mo i no moa gat plante mangki olsem taswe oli stap serseraot olbaot
[Credit Line]
Foto: Zoo, Santillana del Mar, Cantabria, España
[Bokis/Foto blong pija long pej 22]
Pijin Ya Kren (Grus japonensis)
◼ Hamas i stap long bus: samwe 2,000
◼ Bigfala samting we i spolem olgeta: oli flae i go fas long ol rop blong lektrik, ol man oli spolem ples we oli mekem pikinini, mo ples blong olgeta i kam doti
[Credit Line]
© 1986 Steve Kaufman